Friday, 24 October 2014

كيراستاس دنسيفيك منشط كثافة الشعر Kérastase Densifique Capillaire Hair Density



السلام عليكم 




تقرير بسيط لتجربتي مع هالمنتج ، من فتره شوي طويله ، قررت اقص وارتب شعري 
وكنت اتكلم مع نانسي الجميله من صالون باتشي اند لوتشي عن شعري وقتها خف التساقط والحمدلله
بس فيه فراغات بشعري وماصار يطلع فيها شعر و انه يطول على مايطلع ، قالت لي اخلص قص واراويك منتج جميل 


عطتني هالمنتج وهو عباره عن امبولات تستخدم يوميا على الشعر وتزيد كثافته وتطلع الشعر اللي في فتره الخمول
مااعرف اذا تعرفون هالمعلومه انه الشعره تمر بمرحله خمول وهالمنتج ينشطها ، وفعلا مكتوب هالشي على العلبه 

و مكتوب بعد انه هالمنتج يطلع ١٧٠٠ شعره اذا استخدم لمده ٣ شهور متتاليه ... 

هذا وصفها بشكل عام و عن نفسي حبيت الكلام و شركه كيراستاس اثق فيها ماجربت منها شي مافادني 

.... 

بالبدايه
- هالمنتج ينفع للرجال والنساء 
- افضل استخدام له عشان تشوفين نتيجه حلوه لمده ٣ شهور . 
- لازم لازم تعرفين انه برنامج عنايه ماينفع يوم ايه و١٠ لا وتكاسلت لا ماينفع . 

.... 






تجربتي انا ، انا اشتريت علبه وحده بس يعني لشهر واحد فقط من باب التجربه .. وبكتب النتايج اللي شفتها ... 

العلبه مثل ماتشوفون شوي كبيره وفيها ٣٠ امبوله ، كل وحده ليوم ومرقمه بالترتيب ، ويجي معاهم عصار 

اول شي وقبل الاستخدام تكونين ماخذه شور وشعرك نظيف و يفظل انك تغسلينه بشامبو منقي 
واذا بتستخدمين بلسم لا تحطينه ابدا على الفروه ابداااا ... نبي الفروه تكون نظيفه عشان الامبوله .. 

بعد الشور جففي شعرك بالمنشفه ...  اخذي الامبوله وافتحيها واخذي العصار وركبيها مثل الصوره ... 




وكذا صارت جاهزه للاستخدام ، شي سهل وسريع واهم شي انه ماتحتاجين انك تكسرين الامبوله لاني استخدمت شي كذا وساعات مااقدر اكسرها .. 

حطي الامبوله على كل فروه راسك  امشي خصله خلصه بالطول من مقده الراس الى نهايته .. خلصيها كلها 



وبعدها سوي مساج خفيف للفروه عشان تتشرب المنتج ... 

لا يدخل ابد في عينك ، محذرين من هالشي ... 


اول مره بتحطين المنتج على شعرك بتحسين بحراره خفيفه ، عادي لا تخافين هالحراره لمده كم ثانيه وتروح ...
ريحته شوي قويه بس ريحه شي لطيف نوعا ما ... 

المنتج بسرعه تتشربه الفروه و اصلا ماتحسين انه فيه شي حطيته كانه تبخر ، وتقدرين تسوين اي شي بشعرك 
تخلينه عادي او سشوار او اللي تبين مايهم ، والشعر يكون نظيف .. 

++ انا كنت اغسل شعري كل يومين لانه اليوم الثاني يكون شعري شي ماادري شلون صاير ، ولانه شعري دهني يعني 
ماينفع اطلع فيه ولا اسوي فيه شي ، اختي جربت هالعلاج بعد ونفس الاحساس بعد اليوم الثاني شعرها ماادري شلون 
مع انه جااااف جدا .... حطي هالشي ببالك اذا انتي تداومين بمكان ماتغطين شعرك فيه .. 



الاشياء اللي كنت احس فيها اول اسبوعين ، حكه بالفروه ، وكلها بعد مو جزء او جانب واحد كل راسي 
بس مو شي مزعج او انه يأذي ، بس شي غير ... 

بنهايه اول اسبوعين بديت احس  بشي بشعري ومااعرف شنو هو على الاسبوع الثالث 
بديت المس فروه راسي واحس بشعر صغاااار جدا كانه دبابيس وين مااحط اصبعي احس بهالشي ، مو بس استانست
الا طرت من الفرحه بصراحه ، اشوف نتيجه الشي اللي استخدمه وقداااامي  ، شي يونسسسسس 

الشعره اللي تطلع تكون اسمك وانا لاحظت هالشي لانه شعرتي نفسها خفيفه و الحين صار مكس بس حلو بصراحه ...





+ برنامج العنايه هذا يحتاج وقت من يومك لازم تكونين عارفه هالشيء .. اذا ل ٣ شهور اعرفي انك قادره تسوين هالشي
كل يوم يعني ٩٠ يوم .. فكوني جاده مع نفسك .. 

انا عن نفسي شهر وشوي تملين من الموضوع بس النتيجه رووووعه ، واحلى شي بعد شهرين انه اشوف شعري 
وانا اسشوره انه في صغر صغار وصار اطول وبدا يدخل مع الشعر الطويل .. 

شي سلبي مااشوف شي سلبي بس شوي سعره مرتفع .. 

هل بعيد التجربه ايه نعم وان شاء الله وباذن الله  لمده ٣ شهور .. 


.....

سعر العلبه الوحده ب ٦٥٠ درهم 
ومتوفره باغلب الصالونات الكبيره  ، انا اخذتها من صالون باتشي اند لوتشي اللي في جميرا
بس شفت منتجات كيراستاس في اغلب الصالونات 

اذا انتي مو من الامارات ، اي صالون في الدور الاول في دبي مول عندهم 
+ فيه كذا صالون قريبين من محل ماك للميك اب ، سسترز او ذا لوفت ... 

9 comments:

  1. كيراستاس دنسيفيك منشط كثافة الشعر Kérastase Densifique Capillaire Hair Density. السلام عليكم. تقرير بسيط لتجربتي مع هالمنتج ، من فتره ... ekerastasedensifique.blogspot.com

    ReplyDelete
  2. أخني أنا مترددة جداً في الشراء،حابة أسألك حسيتي بجفاف في فروة الرأس او عادي، وهل في اثار جانبية

    ReplyDelete
    Replies
    1. هلا حبيبتي ، لا ابدا ماحسيت باي شي ولله الحمد
      انا جربته واختي بعد وانا شعري دهني وجاف من الاطراف و هي جاااف جدا وماحسينا بشي
      جربيه وباذن الله راح تحبينه لانه فعلا ممتااااز ، ويستاهل كل فلس

      Delete
  3. ممكن. أسأل وين ينباع لأن انا بالرياض وموموجود عندنا

    ReplyDelete
    Replies
    1. هلا حبيبتي
      موجود عندكم بالمشاغل الكبيرة ، او فيه موقعهم الالكتروني صارو عندهم موقع ويوصلون للسعودية والامارات

      Delete
  4. وهل ممكن ينباع بالطايف

    ReplyDelete
    Replies
    1. هلا حبيبتي
      موجود عندكم بالمشاغل الكبيرة ، او فيه موقعهم الالكتروني صارو عندهم موقع ويوصلون للسعودية والامارات

      Delete
  5. اختي الله يسعدك انا مسويه بروتين من 5شهور والحمدلله مرتاحه عليه بس شعري مشكلته خفيف وباهت ينفع استخدم هالانبولات ولا لا؟ وهل يتوقف التساقط مع الاستمرار عليه .��

    ReplyDelete
    Replies
    1. هلا حبيبتي
      هالامبولات ماتضر الشعر ابدا ، بس هذي تطلع الشعر الخامد .. ماتوقف التساقط لانها مو للتساقط

      Delete