Wednesday, May 24, 2017

سوي بنفسك سكراب القهوة | DIY Coffee Scrub


سوي بنفسك سكراب القهوة | DIY Coffee Scrub




السلام عليكم 


القهوة انا من عشاقها وإدمان بالنسبة لي ، عندي جهاز نسبريسو وعندي نوع من الكبسولات ماحبيت طعمها
للاسف الشديد ، ف خطرت في بالي فكرة اني اسوي منها سكراب القهوة للجسم 



بدال ما اتخلص منها ومافيه احد راح يشربها 

...

الاشياء اللي نحتاجها : 
قهوه " انا استخدمت الكبسولات " بس ممكن اي بن قهوة تطحنينها تستخدمينه ، سكر ، واي نوع من زيوت الجسم 
واذا عندج زبدة شيا او زبدة جوز الهند بعد ممتازة .. 

للسكر انا استخدمت كوب كامل ، احب السكراب يكون خشن شوي 

علبة نحط فيها السكراب بعد ماننتهي وهي نفس العلبة اللي خلطت فيها كل المكونات ، استخدمت علبة فاضية لشمعة 

...

اول شي حطيت القهوة بعد ماطلعتها من الكبسولات 



والسكر 

والزيت ، انا استخدمت زيت الأرغان  


وحطيت شوي من زبدة الشيا 

...

خلطت كل المكونات مع بعض ، وانتي ممكن تسوينه على حسب انتي شو حابه ، تبين شوي خفيف مافيه سكر وايد
او بسكر اكثر ، او جاف اكثر مايكون فيه زيت وايد ، انتي واللي تحبينه و تفضلينه

انا احبه خشن فيه سكر اكثر وفيه زيت اكثر عشان يرطب جسمي بنفس الوقت  


وهذا شكله ، وايد حبيته ، يقشر الجسم ويرطبه ، والاحلى ريحته قهوة 



وعادي تقدرين تحفظينه عندك ، استخدميه وتدلعي .

Thursday, May 18, 2017

Cailyn Dizzolv it



Cailyn Dizzolv it



السلام عليكم 

 المكياج وحبنا الأبدي له ، نحبه ونعشقه بس للاسف الشديد مانحب اننا نمسحة ونشيلة اخر اليوم 
خصوصي بعد تعب او يوم طويل .. عندي منتج جميل سهل وسريع بالنسبة لي سحر في علبة 


Cailyn Dizzolv it ، هالمنتج الجميل جدا من ماركة كيلين ، انتجوا لنا منتج حلو 
" بالم كلنزر " او كريم هلامي .. كانها زبدة او كريم تاخذين شوي منه وتمسحين المكياج فيه 
وبس بهذه السهولة .. بتشوفون الخطوات والسهولة 


اللي حبيته في المنتج :
- يزيل كل انواع المكياج " العادي - ضد الماي "
- كريم ويتحول الى زيت 
- يترك البشرة نظيفة ناعمة ورطبة و، ما يجففها ابدا 
- سهل عملي سريع ، مناسب للسفر 

الحلو بعد في العلبة انها مسكرة يحمي المنتج من الماء ، وبعد فيه أداة تشيلين فيها البالم عشان ماتحطين اصابعك في المنتج .. 

وهذا شكله بالم لونه وردي فاتح ..

...

حطيت على ايدي كذا منتج " ماسكرا وكحل ضد الماء ، كريم اساس ، محدد للشفايف - شادو كريمي ثابت - روج سائل ومات " 



تاخذين كمية مناسبة لج ، وبتشوفين انها يتحول من الكريم أو البالم إلى زيت ، وهذا المطلوب 


و توزيعنها على كل الوجه و تبدين تسوين مساج لكل الوجة العيون الشفايف الوجه بالكامل ، اخذي راحتج وانتي تسوين المساج ، لانه بهذه الطريقة انتي تفككين تركيبة المكياج ويبدأ الزيت يدخل 


وبعد المساج تشوفين بعض الاشياء بدأت تتفكك وتروح ، وراح يتغير لون الزيت 


بعدين تبدين تحطين شوي ماي وبعد ارجعي سوي مساج شوي شوي راح تشوفين التركيبة بدت تتغير كانه غسول ويبدأ لون الزيت يتحول الى الابيض او الرمادي 


وخلاص الحين اغسلي وجهك بالماي اكثر وبعدها خلاص اما انج تمسحيه بفوطة مخصصة لهذا الشيء او باي اسفنجة عندج ..  وممكن بالماي بعد لين تشوفين الوجه نظييييف .. 


وهذا بعد ما غسلته بالماء ، شوفوا شلون اليد نظيفة ورطبة 

وبعدها عادي اكمل روتيني اليومي اغسل وجهي بالغسول وبعدها التونر وكريماتي المعتادة 

وايد حبيته سهل وسريع وترى ماياخذ وقت ابدا ممكن تحسين انه شي طويل ومتعب إلا أنه خلال ٣ دقايق بالكثير انتي خلصتي وغسلتي بالغسول وخلاص كل شي تمام ..
...




المنتج موجود في كاونتر كيلين في محلات دبنهامز
سعره = ١٦٥ درهم 
مصنوع في كوريا 
صالح لمدة ١٢ شهر من تاريخ فتح العلبة 

Sunday, May 7, 2017

HERVE GAMBS || الابداع الفرنسي





 HERVE GAMBS || الابداع الفرنسي 






 HERVE GAMBS هيرفه غامبس بدآ حياته المهنية كمصمم داخلي وصانع ومنسق للزهور ، أعطى مفهموم جديد
للعطور الفرنسية بحيث انها تجمع الديكور والعطور .. 

العطور مناسبة للرجال والنساء ..




ابداعاته منقسمه ل ٣ أقسام : 

عطور .. شموع .. ورد فواح " ديكور و معطر للغرف " 

من فترة زرت محلهم الخاص في روبنسونس في فيستفال سيتي ، وصورت كم صورة .. 









...



اخذت ٣ اشياء من عندهم .. شمعة و عطر للغرفة و هالقطعة الفنية الجميلة .. 



اول شي بتكلم عن المعطر و التفحة الجميلة اللي شدتني اصلا للماركة ، وردة مصنوعة من القطن ترشين عليها المعطر وتظل تفوح بالعطر لاكثر وقت ممكن .. الريحة روعه والشكل اروع ماشاء الله .. 

عندهم انواع من الورد و وبعد القواعد بلون مختلف ابيض او اسود ، وانتي تختارين اللون اللي حابته .. 
اخترت الحجم الاصغر مناسب لغرفتي وحجمها .. وممكن تختارين الاكبر للصالات والمجالس او الممرات 
لانها اولا قطعة ديكور جميلة و تعطر لج البيت بنفس الوقت .. مناسبة جدا ل مدخل البيت .. 




العطر اللي اخترته هو BOIS DE CASHMERE

حبيت ريحته وتناسب ذوقي ، النوتات اللي فيه برغموت ، باتشولي ، عنبر واخر شي تشمون عود بس بشكل خفيف 
انا احب هالمزيج من الروايح .. الريحة قوية وثاباتها ل كم ساعة .. ساعات ابخ من العطر واطلع ، واذا رجعت بعد كم ساعة بعد اشم هالريحة الجميلة .. 

انا فعليا وقعت في غرام هالماركة ، لانها تجمع بين اشياء انا احبها الورد والديكور والعطور 

...



اخذت شمعة وحدة من عندهم للتجربة .. OMBRE PATCHOULI
والاسم بس كفيل انه يعبر حق عشقي للباتشولي والعنبر 

الريحة قوية وتنتشر بشكل حلو في الغرفة ، تستاهل الشراء مره ثانية .. 


..



وعندهم بعد مجموعة عطور بس مااخذت من العطور بس بعد روعه .. العطور في الدور الارضي من المحل 
والشموع والورد والمعطرات في الدور الثاني من محل روبنسونس .. 

الماركة موجودة في محل روبنسونس في فستيفال مول - دبي 

لهم موقع الكتروني للطلب ويوصلون لكم

Saturday, March 18, 2017

أرواج ريميل The Only One & The Only One Matte


أرواج ريميل The Only One & The Only One Matte 


السلام عليكم 



ماركة ريميل اللندنية الجميلة ، نزلوا السنة الماضية مجموعات جديدة من الارواج بالتركيبة العادية و المطفية 
 ف حبيت اجرب منهم ، ما اشتريتهم مرة وحدة كل فترة اخذ لي لون .. 

اولا حبيت شكل التعليب تغير وصار مميز عن باقي الماركات ، واحب انه في كل منتجاتهم تحطون طبعة التاج الملكي 
انا شخصيا احبها .. المجموعتين فيهم رائحة ارواج ريميل ، هي مو شي مزعج بس فيه ناس مايحبون الروائح في الارواج 




نشوف المجموعة الاولى The Only One

اللون واضح وغني يطلع بسهولة على الشفايف ، التركيبة سلسلة جدا على الشفايف تمد بسهولة بس كريمية 
يعني لازم شوية حذر وانتي تحطين الروج عشان مايطلع برا حدود الشفايف .. 

والترطيب رائع جدا لأنها غنية بفيتامين E ، الترطيب موجود في الوقت اللي انتي حاطة فيه الروج او حتى بعد ما تمسحينه الترطيب موجود ، هالشي جدا حبيته .. لانه مافيه احد يحب الشفايف الجافة .. 



المجموعة فيها ١٠ درجات انا عندي ٤ منهم 




....



المجموعة الثانية المطفية The Only One Matte
" شخصيا أحبها أكثر " 

 لون العلبة مختلف عن المجموعة السابقة ، لونها احمر مطفي .. من احلى الارواج المطفية اللي ممكن تجربونها ، ناعمة جدا سلسة جدا علي الشفايف وقت ماتمدينها 
اللون واااااضح وقوي من أول مرة ، لون غني وغير لامع .. ماتحسين انه فيه شي على شفايفك وثقيل لا لا ابدا ..



متوفرة ب ١٠ درجات ، وثبات اللون حلو يخف تدريجيا مع الاكل والشرب .. بس رائعه جدا جدا جدا .. 
ترطيبها حلو ماتترك الشفايف جافة ابدا 



...

عندي نفس الدرجة من كل مجموعة اذا تلاحظون ، رقم ٨١٠  ف شوفوا الفرق بين اللمعة والمات 


وتعمدت اصور بإضاءة ثانية عشان تشوفون الفرق في الدرجات 


سعر الأرواج = ٤٧ درهم 
متوفرة في كل مكان فيه ريميل : كارفور - لايف ستايل - سبينس - بوتس - ماكس وغيرهم