السبت، 20 سبتمبر 2014

سلسلة العناية بالشعر - فيتامين الشعر،البشرة والاظافر

السلام عليكم 


صار لي فتره طويله استخدم هالفيتامين ، ومن حبي له قررت اكتب عنه ، 




فيتامين للشعر والبشره والاظافر + انه فيتامينات عامه 

وهذا الشي انا ادور عليه لانه اكلي نص نص واحاول اخليه ممتاز بس اكيد احتاج فيتامينات
لاني مااكل كل شي ، وحابه اعوض الاشياء اللي ناقصتني ... 

استشرت الصيدلي ونصحني بهذا الفيتامين ، من شركة نيتشر باونتي الامريكية 

بكتب كل اللي شفته ، حسيته .. 



+ الاظافر تطول اسرع من المعتاد .
+ هالفيتامين ماتحتاجين معاه فيتامينات كامله هذي تكفي ، ٣ حبات باليوم بعد كل وجبه .
+ حجمها عادي مثل البندول ، ومالها طعم قوي .
+ تاثيرها على البشره ، انا حسيت انه بشتري اصفى والحبوب تطلع بس بشكل خفيف ، بس يوم وقفتها
حسيت بالفرق ، بديت اشوف حبوب اكثر من قبل مثل قبل مااخذ الفيتامين .
+ تطول الشعر بسرعه ، هذا شفته علي ، وتقلل من التساقط بس بشكل خفيف ، يعني مو مره وحده في شهر مابتلاقين شي يتساقط ، لا تاخذ فتره لين تحسين انه شعرك بدا يقل تساقطه . 
+ فيها ٣٠٠٠ من البايوتين وهذا ممتااااز وعلى كلام الصيدلي هذا المقدار المناسب لليوم . 
+ العلبه  فيها ٦٠ حبه ف فما بتكفي لشهر اذا بتاخذينها كل يوم ٣ مرات ، اما اذا بتاخذين حبتين باليوم تكفي ، وانا اشوف السعر ممتاز لشهر . 
+ الحبوب هذي خفيفه على المعده و ماتسبب اي شي ، انا اصلا معدتي حساسه وتتعبني باي شي ، وعلى طول اعرف اذا الشي اللي اكلته زين ولا لا ، وهذي الحمدلله ماحسيت باي شي معاها .
+ ماتسبب لك صداع او غثيان او اي شي من هالقبيل . 
+موجوده باي صيدليه ، ودايما اخذها من بوتس باي فرع .
+ سعر الفيتامين مو غالي حوالي ٨٠ درهم ل ٦٠ حبه .

+++ خلصت تقريبا ٣ علب من هالفيتامين ، وبرجع اشتريه لاني ارتتحت عليه ، وشفت منه نتايج ترضيني . 

هناك 23 تعليقًا:

  1. يعطيكي العافيه هناء , شفت ريفيو عن هذا الفيتامين في اليوتيوب بس نسيت مين , افتكر كنت استخدم حبوب فيتامين بس اغلبها كان حديد و زنك و كانت تتعبني شكلي حاجرب دا خصوصا انو اكلي مش و لابد , شكرا لك :)

    ردحذف
    الردود
    1. هلا الاء ، منوره
      ايه وايد يتكلمون عنها باليوتيوب وهم اللي حمسوني عليها وخصوصي اني لقيتها قدامي
      وجربتها وحبيتها ، واكثر شي عجبني انه ماتأذي المعده

      جربيها وان شاء الله تعجبك

      حذف
  2. يعطيك العافية حبيبتي والله ،، حمستيني اجربه لأن لي فترة طويلة ابحث عن شي متكامل لكن اتردد واتخوف ومادري وش اللي يمنعني ،،
    لكن بإذن الله بجربه واستمر عليه ان ناسبني
    ربي يعطيك الصحة والعافيه

    ردحذف
    الردود
    1. هلا حبيبتي ،
      الله يعافيك يغاليه ومنوره المدونه ،
      الفيتامين جميل بصراحه وماشفت عليه اي اثر او جانب سلبي ، بالعكس جدا ممتاز وحابته
      وان شاء الله يناسبك وتستمرين عليه

      تسلمين يالغاليه

      حذف
  3. الردود
    1. هلا اختي ام سعيد ،
      منورتي ، لا ابد مايمتن ، انا استخدمه الحين ووزني ثابت ايام واايام ينزل بعد لاني احاول احافظ عليه

      حذف
  4. ان شاء الله راح اجربها بس انا وصيت عليها من امريكا

    ردحذف
    الردود
    1. ان شاء الله يعجبك ، وتشوفين نتيجة حلوه

      حذف
  5. ايش نوع الجلاتين اللي مستخدم فيها
    Nature’s Bounty
    يستخدمون عاده جلاتين بقري " bovine"
    و مستخلص من الخنزير "porcine "

    عندك فكره ايهم مستخدم؟

    ردحذف
    الردود
    1. اللي اعرفة انه جيلاتين بقري ، خصوصي انه في الامارات مايدخلون المنتجات اللي تدخل فيها اشياء من الخنازير في الادوية الطبية

      حذف
  6. هذا الفيتامين سمعت عنه من فتره واعجبني ولما قررت اطلبه من الانستقرام حصلت الأسعار غاليه .. وبعد بحث حصلت موقع اي هيرب يوصل مباشرة للسعودية واسعارهم رخيصة جدا (علبة 60 حبه ب 29ريال)..لكن ترددت لأن الشركة ماوضحت نوع الجيلاتين المستخدم ..لكن اذا بالأمارات متوفر بالسوق ف بتطمن واشتريه ...
    اشكرك على موضوعك المفيد

    ردحذف
    الردود
    1. هلا نوره ، منورتني حبيبتي
      ايه في اي هيرب ارخص وبوايد بعد ، بس اخذي نفس هالنوع بالضبط لانه الانواع الثانية فيها جيلاتين
      وماتدخل الامارات عشان هذا السبب

      اخذيها وانتي مرتاحة واااايد فادتني وارتحت عليها

      تسلمين ياعسل انتي

      حذف
    2. هلا نوره ، منورتني حبيبتي
      ايه في اي هيرب ارخص وبوايد بعد ، بس اخذي نفس هالنوع بالضبط لانه الانواع الثانية فيها جيلاتين
      وماتدخل الامارات عشان هذا السبب

      اخذيها وانتي مرتاحة واااايد فادتني وارتحت عليها

      تسلمين ياعسل انتي

      حذف
  7. ابغى اسال ايش الفرق بين هذي واللي لونها وردي لان اخذتها من بوتس وطلعت هذي لكن كان قصدي الورية وايهم افضل ؟؟

    ردحذف
    الردود
    1. هلا روج ، منوره ياعسل

      اذا قصدك لون العلبة وردي ف هي نفس الشي بس ساعات يختلف الانتاج ونوع العلبة

      اما ااذا قصدك لون الحبه وردي لا تاخذينها على كلام الصيدلي انه فيها جيلاتين
      ف ماافضل لك تاخذين شي موعارفين شنو مصدره والغالب انه جيلاتين خنزير عشان كذا مو متوفر في الامارات

      حذف
  8. أزال أحد مشرفي المدونة هذا التعليق.

    ردحذف
  9. بس المنتج الاصلي تكون الحبوب لونها احمر عنابي تقريبا لان انا عندي نفسهم من امريكا

    ردحذف
  10. اها توني قريت تعليقج عن اللون !
    بجرب النوع للي هني نفس الي تتكلمين عنه
    مشكوره اختي 😊

    ردحذف
  11. اها توني قريت تعليقج عن اللون !
    بجرب النوع للي هني نفس الي تتكلمين عنه
    مشكوره اختي 😊

    ردحذف
  12. مشكوووووره....ان شاء الله تشوفي النتيجه اللي ترضيكي
    العنايه بالشعر
    http://kony-onsa2.blogspot.com.eg/2016/06/blog-post_12.html

    ردحذف
  13. اناحابه اعرف تنفع للمرضع لوو لا

    ردحذف