الاثنين، 23 أكتوبر 2017

Oud Assoluto Valentino | عود اسولوتو من فالنتينو


Oud Assoluto Valentino | عود اسولوتو من فالنتينو 

سلسلة عطر الاثنين 



السلام عليكم 

كل يوم اثنين لازم اعطركم بعطر جميل جدا، عطر اليوم من العطور اللي احبها جدا
وتمثلني .. شخصيا انجذب لهالنوعين من العطور ..

احب العطور القوية والثقيلة ، احب شي يجيب راسي من اول رشه 

وعطر اليوم حقق لي كل هالمقاييس واكثر 




Oud Assoluto Valentino | عود اسولوتو من فالنتينو 


مجموعة فالنتينا من فالنتينو المجموعة فيها اكثر من ٩ عطور كل سنة ينزلون عطر تقريبا 
هالعطر حبيته لانه من مكوناته العود والجلد والبهارات 
احب هالنوعينة من العطور يعجبني جدا نتاغم النوتات مع بعض ، الريحة قوية قوية قوية وشي خنييييييين
من العطور اللي اشمها واقول الله من جمالها .. كل مايبرد يكون احلى واحلى 

نوتات العطر :
العليا: زهرة البرتقال - هيل 
الوسطى : عود - ورد بلغاري - جلد 
القاعدة : زعفران - فانيلا - خشب 

العطر مسائي .. ممتاز للمناسبات والاعياد .. ويناسب الشتا
العطر يستاهل انه يكون في مجموعة عطورك اذا انتي تحبين هالنوعية من العطور 
ثبات العطر جدا عالي ، اكثر من ٦ ساعات 

عطر مميز بصراحة ومن العطور اللي راح تكون في مجموعة عطوري علي طول 


سنة الاصدار ٢٠١٣ 
٨٠ مل ، ادو بيرفيوم 

سعره = ٥٥٠ درهم 

الاثنين، 16 أكتوبر 2017

Boucheron Quatre | عطر بوشرون كاتر



Boucheron Quatre | عطر بوشرون كاتر

سلسلة عطر الاثنين 


عطر اليوم من ماركة انا اول مره اجرب عطورهم ، ماركة بوشرون العريقة في صناعة المجموهرات
لهم خط انتاج خاص بالعطور من زمااان ، ولهم عطور قديمة معروفة ومميزة جدا 

بس عطر اليوم هو 


Boucheron Quatre ، مستوحى من خاتم بوشرون المعروف

وتشوفون اصلا انه غطا العطر بنفس شكل الخاتم 

حبيت التصميم جدا ، بسييط وانيق بنفس الوقت 

العطر ريحته جدا جدا حلوه وتحسين انج شامتها من قبل ، من العطور الكلاسيكية 
من العطور اللي تستاهل انها تكون عندج 
العطر من مجموعة الحمضيات و فواكهه وشوي سويت  

نوتات العطر :

العليا : غريب فروت - ليمون - برتقال - يوسفي
الوسطى : تفاح اخضر - ياسمين - خوخ - فراولة - ورد
القاعدة : كاراميل - كشمير - فانيلا- مسك - خشب الارز 

هادي وبارد ،العطر مناسب لكل وقت صبح وظهر وليل ، مناسب انه يكون يومي للدوامات ، ماينفع للسهرات 

ثباته روعه تقريبا اكثر من ٦ ساعات على الجسم 

من العطور اللي برجع اشتريها لاني حبيتها علي 


 سنة الاصدار ٢٠١٥ ،ادو بيرفيوم 
العطر اودي فيرفيوم فيه منه ٣ احجام
١٠٠ مل - ٥٠ مل - ٣٠ مل 



السبت، 14 أكتوبر 2017

Philips Sonicare Airfloss Ultra | جهاز فيلبس ايرفلوس الترا لتنظيف الاسنان



Philips Sonicare Airfloss Ultra | جهاز فيلبس ايرفلوس الترا لتنظيف الاسنان 




السلام عليكم 



جهاز Philips Sonicare Airfloss Ultra  لتنظيف الاسنان بديل ممتاز للخيط ، حل عملي وسهل جدا
خلال دقيقة تخلصين من عملية تنظيف الاسنان 

...

حبيت اقتني هالجهاز العملي وايد سمعت عليه مدح ف حبيت اجربه ، خصوصي اني مااحب الخيط وايد بس استخدمه
هالجهاز بديل للخيط ، هو جهاز الكتروني تشحنينة وتستخدمينه 

الجهاز طبعا بدون اي واير ف راح يكون سهل استخدامه وتخزينة بالحمام 

...



أهم مميزات الجهاز : 

١- تنظيف الاسنان بالكامل خلال دقيقة .
٢- يحسن من صحة الفم .
٣- يساعد على ازالة الترسبات والجير بين الاسنان .
٤- يحسن من صحة اللثة . 
٥- مناسب للكل .. اللي مركبين اسنان زراعة او قشرة ، وبعد ممتاااااز لكل شخص مركب تقويم .

فكرة الجهاز هو خليط بين خيط الاسنان و بين جهاز تنظيف الاسنان عند الدكتور 
الدكتور دايما يستخدم الهواء والماي القوي في التنظيف ، هذا نفس الشي بس قوه دفع الهوا اقل لانه جهاز منزلي 

..



الجهاز خفيف وسهل جدا في الاستخدام ، له زر تشغيل واحد  ، تضغطين ضغطة طويلة وراح يشتغل ونفس الشي للتسكير  .. وتحددين عدد ضخات الماي مره او مرتيين متتاليتين 
او ٣ مرات متتالية 
" اذا نسيتي الجهاز يشتغل ولا سكرتيه راح يسكر من نفسه " 


وزر ثاني اللي يضخ الماي .. 


الجاهز له فتحة لتعبئة الماي .. تعبينها كل ماخلص .. وممكن تعبينها ماي مع غسول للفم 



...


الجهاز بعد له اكثر من راس للتبديل ، يفضل كل ٦ شهور او اقل تبدلين الراس بواحد جديد 

ولانه له اكثر من رأس ف ممكن تتشاركين فيه مع اي احد ، بحيث كل شخص له رأس خاص فيه 



لازم تتاكدون من اسم الجهاز اذا بتاخذون الرآس الاضافي ، لانه كل موديل له راس مختلف 


...

طريقة الاستخدام : 




بعد شحن الجهاز ، تفتحين خزان الماي وتعبينه ماي او ماي مع غسول الفم ، او بس غسول للفم ، بعدها تحددين عدد الضخات للماي . مره ولا ٢ او ٣ متتالية ، وبعدها تضغطين الزر لفوق عشان يبدا يضخ الماي 

اول شي تحطين الراس بين كل سن وسن ، بالوسط بالضبط واضغي وراح يبدا يشتغل ، بالنسبة لي اسهل طريقة بعد ماتعودت عليه ، احط الراس واسكر فمي شوي واكمل كل الاسنان ومن جميع الجهات ، ليش شوي اسكر الفم عشان الماي مايحوس الدنيا 



تجربتي مع الجهاز : 

صار لي تقريبا اكثر من ٣ شهور انا استخدمته ، حبيته حبيته حبيته ، وندمت اني مااشتريته وقت ماكنت حاطة التقويم لانه كان راح يسهل علي مهمه تنظيف الاسنان .. الجهاز سهل وعملي وسريييع جدا يعني في اقل من دقيقة واخلصت تنظيف الاسنان كلها .. قبل كنت اخذ فترة اطول في التنظيف .. قوه الماي مع دفع الهوا ممتازة لانها تدخل بين الاسنان واللثة 

اذا كانت عندج اللثة تعبانه او ملتهبة ف انصحج فيه ، لانه راح تنظف اول باول .. صح في اول كم مره من الاستخدام راح ينزل دم بشكل خفيف بس عادي جدا ، كملي كل يوم وراح تشوفين تحسن ملحوظ في اللثة الالتهابات راح تقل .. 

في خلال اسبوعين من الاستخدام راح تلاحظين تحسن كبير في اللثة ..

مافيه روايح غير محببة .. لانه الماي والهوا يوصل لكل مكان ماكنتي توصلين له من قبل .. خصوصي الاسنان الخلفية اخر شي في الفك العلوي .. لانه اصعب مكان .. ف مع الجهاز راح تنتهي هالمشكله .. 

وبشكل عام صحة الفم راح تكون افضل ، لانج حليتي كل المشكال اذا كنتي تعانين منها .. هل الجهاز فعلا مفيد ؟
ايه ممتاااز جدا ويستاهل الشراء .. 



الجهاز موجود في اغلب الصيدليات الكبيرة .. بوتس ابن سينا وغيرهم 
وفي محلات الالكترونيات ، او في السوبوماركت مثل كارفور
سعره ٥٧٠ ، في كل مكان بتلقون سعره مختلف شوي ، ف ابحثوا وشوفوا السعر المناسب لكم 

البعض يكون عندهم عروض على الجاهز + فرشة اسنان الكترونية ف يعني ابحثوا اول عن العرض المناسب لكم 

الجهاز له اكثر من اصدار جديد ومحسن ، شوفوا اخر نوع نزل للسوق واذا عجبكم ومن ضمن احتياكم اخذوه 

...


الاثنين، 9 أكتوبر 2017

Néroli & Orchidée | عطر النيرولي من لوكسيتان



Néroli & Orchidée | عطر النيرولي من لوكسيتان

سلسلة عطر الاثنين 



السلام عليكم 


كل يوم اثنين احب اعطركم بعطر جميل ، اليوم وقع الاختيار على عطر من محل لوكسيتان
هالمحل اللي احبه ، الماركة لها ٣٥ سنة ف عندهم خبرة كافية في صناعة العطور 

عطري المفضل من عنهم العنبر بس بالاصدار القديم كان جميل جدا ..



اما عطر اليوم بعد من عطوري المفضلة من المحل ، عطر النيرولي او زهرة البرتقال 

العطر هذا نزل في سنة ٢٠١٤ ، العطر " ورد - حمضيات - شوي سويت "

هالمزيج غالبا مايعجبني شخصيا ، بس هالعطر غير 

نشوف النوتات :

العليا :البرتقال - اليوسفي
الوسطى : زهرة البرتقال - خوخ - تين - زهرة زنبق الوادي
القاعدة: زهرة الاوركيد - مسك - زهرة السوسن 

ثبات العطر : من ٣- ٤ ساعات على الجسم .. 

العطر جميل جدا من افضل مبيعا في المحل ، الريحة هادية وشوي فواحة يعني انتي واللي حولج يشمونها
من الروايح اللي كل يوم تبين تشمينها .. مناسبة لاي وقت في اليوم صبح وليل وبعد الشاور

عندهم بعد زيت للجسم بنفس الريحة ، ف ممكن تاخذينه وتحطين الزيت على جسمك كله بعد الشاور وبعدها رشي العطر 
ياسلام على الريحة الجميلة 

من العطور اللي ارجع اشتريها دايما من جماله .. يعجبني جدا 

الحجم اللي عندي صغير ٣٠ مل كان في مجموعة 
اما الحجم العادي ٧٥ مل سعره = ٢٩٩ 



الاثنين، 2 أكتوبر 2017

عطر عود زعفران من مونتال




عطر عود زعفران من مونتال

سلسلة عطر الاثنين 



السلام عليكم



كل يوم اثنين راح يكون ريفيو ل عطر من مجموعة عطوري 

عطر اليوم عود زعفران من مونتال 


ماركة مونتال للعطور معروفة ولها عطور وايد مميزة ، غالبا كل شخص يكون له عطر مفضل من مونتال
عندهم تنوع في العطور من العطور الباردة الى الحارة والغنية والثقيلة .. وعطر اليوم ثقيل وفخم بس جميل جدا من العطور المحببة لقلبي خاصة للمناسبات والاعياد ...

سنة اصدار العطر ٢٠٠٩ ، العطر مناسب للرجال والنساء 

العطر ثقيل وفخممم من اسمه عود وزعفوان ، لازم يكون فخم .. مناسب للسهرات والاعياد والمناسبات جميل جدا مع البخور وكم نقطة دهن عود ..


ماينفع يكون عطر صباحي لانه قوي .. 

نشوف مكونات العطر :
راح تستغربون انه العطر فيه ٣ مكونات بسسسس 

النونة العليا : العود 
الوسطى : الورد
القاعدة : الزعفران 

العطر في البداية تشمين فيه العود بعدها بفترة تطلع ريحة الزعفران الجميلة اللذيذة ، شخصيا مااشم ريحة الورد بوضوح
لانه ريحة الزعفران طاغية اكثر .. من العطور الجميلة جدا وتناسب الكل الا اللي مايحب الروايح القوية او ريحة الزعفران 

ثبات العطر : من ٥ - ٧ ساعات  يستاهل الاقتناء 

سعره مااتذكر بالضبط ، بس حوالي ال ٤٠٠ درهم 

كل عطور مونتال متوفرة في محلات الجزيرة في كل الخليج وفرنسا 

في الامارات 

ابوظبي : ابوظبي مول - مارينا مول 
العين : العين مول 
دبي : دبي مول 

الاثنين، 25 سبتمبر 2017

عطر الاثنين : Exotic Paradise من مكياجي



Exotic Paradise من مكياجي

سلسلة عطر الاثنين 




السلام عليكم 

العطور وحبي لها، احب العطور واحب اجرب اكثر من ماركة، في الفترة الاخيرة ماركة مكياجي بدت تتطور للافضل
في كل شي ، حتى في العطور ...

احب عطورهم وفيه كذا عطر من عندهم من مفضلاتي عطر اليوم 



Exotic Paradise Eau De Perfum

تصميم الزجاجة حلو وسهل انج تحطينة في اي شنطة ، واللون احب هالدرجة من البنفسجي 

نشوف نوتات العطر

العليا: التوت البري - المندرين
الوسطى : زهر العسل - غاردينيا - الياسمين
القاعدة : عنبر - كاراميل - فانيلا - خشب الصندل - حلوى اللوز 

 مكونات العطر فاكهة ، ورد ، سويت ، عنبر وصندل 
العطر مزيج بين كل هالمكونات ، بس حلو لكل يوم ، حلو للدوام وللصباح اذا تبين شي خفيف 
كل مايبرد يطلع احلى خصوصي مع العنبر و الصندل 

ثباته وسط من ساعتين على ٣ ساعات 
عجبني بصراحة مناسب لكل وقت ،ممكن ارجع اشترية 

العطر موجود في كل محلات مكياجي 
سعره = ٩٩ درهم 


الجمعة، 22 سبتمبر 2017

منتجات غيرت بشرتي للأفضل


منتجات غيرت بشرتي للأفضل 


السلام عليكم



كل بنت تحلم ببشرة مثالية او اقرب للمثالية ، ونحاول كل فترة نجرب منتج جديد يمكن يكون هو المنتج المعجزة

الموضوع هذا اهداء للجميلة قلبا وقالبا فاطمة من skinoverdose، حطيت مدونتها وبعد هذا الانستقرام الخاص فيها هالانسانة المبدعة مرجعي في عالم العناية بالبشرة
وكل المنتجات اللي في هذا الموضوع كان بنصيحة منها .. ولا ندمت عليهم ابدا .. فعليا بشرتي تغيرت بالكااااامل ولله الحمد ... ماشاء الله عليج فاطمة , تابعوها لانه اختياراتها جميلة جدا 


...


نبدا باول منتج تونر بكسي الشهير
 Pixi Glow Tonic 
Exfoliating Tone

تونر مقشر للبشرة ، فيه حمض الجليكوليك بنسبة ٥٪ 

المنتج يوعدج ب ٥ اشياء :
- يوحد لون البشرة
- يقشر البشرة ويشيل الجلد الميت 
- يعطي نظارة
- يغير ملمس البشرة
- يخلي البشرة صافية اكثر

هل حقق لي المنتج هذي الاهداف ، طببببببعا طبعا طبعا .. هذي ثالث علبة لي من هالتونر

انا بشرتي مختلطة ، وبين فترة وفترة تطلع لي حبوب ، استخدمه مرتين باليوم صباحا ومساءا ، بعد مااغسل وجهي بالغسول المناسب ، احط منه في قطنة وامسح وجهي بالكامل فيه مع الرقبة .. 

في كل مره راح تلاحظين انه بشرتك صارت احلى واحلى ، وراح تحبينه اكثر .. اول مابديت استخدمه كنت استخدمه مرتين في الاسبوع شوي شوي اخلي البشرة تتعود عليه خصوصي لانه فيه حمض وراح يقشر لي بشرتي بشكل خفيف .. وبعدها بديت اتدرج في استخدامه الاسبوع اللي بعده ٣ مرات ولين وصلت اني استتخدمه مرتين في اليوم 

في اول كم استخدام ممكن تحسين انه يحرقك لثواني ، وهذا عادي .. وراح تطلع لج حبوب عادي جدا جدا 
لانه هو تونر مقشر للبشرة يعني يشيل الجلد الميت وراح تطلع الحبوب اللي تحت الجلد تدريجيا ، ممكن تحسين انها الحبوب واااايد لكن عادي هذي كانت راح تطلع اصلا في الايام والاسابيع القادمة .. 

خلال اول شهرين من الاستخدام بشرتي بدت تتغير ، اول شي الحبوب بدت تقل ، لون البشرة بدا يصير متوحد 
وانا عندي الجبهه والذقن اذا كنت المسهم قبل ماكانوا متوحدين بالملس يعني بشرتي شوي كانت texture ، ف مع الاستخدام المتكرر هالملمس بدا يختفي تدريجيا ... والاجمل انه الوجة صار صحي اكثر وانور لانه لون البشرة صار متوحد اكثر .

هل انصح فيه ؟ طبعا 
هل برجع اشتريه ؟ طبعااااا

سعره = من ٨٠ درهم الى ١٤٠ درهم حسب المكان اللي تشترينه منه 
...

المنتج الثاني يشابه للاول بس هذا اقوى والنسبة اعلى ، لاني وصلت لمرحلة ابي شي احلى اقوى وسالت فاطمة ورشحت لي هالمنتج الجميل 



تونر للبشرة من كلارنس Gentle Exfoliator
Brightening Toner 


لانه المنتج قوي مااستخدمه بشكل اسبوعي من ٣ ال٤ مرات في الاسبوع وساعات اقل 
المنتج يسوي نفس الاشياء اللي يسويها تونر بكسي بس اقوى ، يعني تونر بكسي يقشر بنسبة ٥٪ اما تونر كلارنس بنسبة ٢٥٪ بالمية .. ف التقشير مضاعف 

المنتج جميل جميل جميل يقشر البشرة ، يقلل من الحبوب حتى الحبوب اللي تطلع مع تغير الهرمونات تطلع بس بشكل اقل وخفيفة جدا .. نظارة البشرة بعده ولا اروع .. الوجة يكون صحي اكثر ملمسة احلى وناعم اكثر 

يقلل ويصغر المسامات ، الرؤوس السوداء والبيضا تبدأ تقل تدريجيا ، تنظيفها يكون اسهل ..

اي وحده بتشتري هالتونر استخدميه مره مره وحده بس في الاسبوع ، يعني اول شهر مره بس كل اسبوع 
الشهر الثاني مرتين في الاسبوع ، ليش لانه قوي يحرق اول وثاني مره بس البشرة تحتاح تتعود عليه ولانه مقشر قوي ف راح تطلع لج حبوب يمكن في اماكن ماتطلع لج فيها دايما عاااااادي جدا ، انا بالنسبة لي كملت استخدامه ولحد الحين استخدمه 


هل انصح فيه ؟ طبعا 
هل برجع اشتريه ؟ طبعااااا

سعره= ١٦٥ درهم تقريبا 
....

ثالث منتج المعجزة المنتج اللي لو اشكر فاطمة عليه من الحين الى كم سنة مااوفى لها حقها ابدا ابدا ابدا



كريم العيون من فيرسو Verso 
Super Eye Serum 
With Retinol 8 

اولا مشكله عيوني ، عندي هالات وغايرة شوي عندي خطوط حوالي العين 
جربت وايد كريمات ماشفت منهم الا الترطيب ، رحت لاكثر من دكتور وسويت تحاليل الحمدلله ماعندي اي مشكله صحيه تخلي الهالات غامقة شوي ، انا انسانه مااحط مكياج بشكل يومي وعادي عندي اطلع بدون اي نقطة ميك اب بس دايما اسمع هذا التعليق انتي تعبانه مريضة اكيد عندج مرض بالكلى ، كنت اكرهه هالشي بس دايما اقول الحمدلله دام اني بصحة وعافيه هذا هو المهم .. الكل ينصح بالفلر ، بس انا مااحب واخاف من الابر بالوجة وخصوصي انه منطقة العيون حساسة ولاسمح الله يصير شي .. ف هالخيار كان مرفوض تمام مني .. 

وطبعا كل هالمشاكل مع المكياج تبين ، ف دايما ادور على كونسيلر مناسب وشي مايخطط ولا يخلي الهالات تبين ، ومايجفف المنطقة ، ف كان شي صعب جدا بالنسبة لي 

نصحتني فاطمة فيه وشكرا شكراااااا فاطمة على هالشي العجيب ، قالت لي جربيه وراح يعجبك اكييد 

جربته في نهاية شهر ٣ الى اليوم طبعا ، تقريبا ٦ شهور وانا استخدم المنتج ولحد الحين ماشاء الله ماخلص ،عندي باك اب منه من جماله .. 

خلال هال ٦ شهور شنو شفت ، تغييييييير تغيييير جذري لعيني ، اللي يعرفني شخصيا يقولي متغيرة او مسويه شي خفيف .. الخطوط حاليا راحت كلها ، عندي خطين تحت العين شوي ثقال بس بدو يقلووون تدريجيا ، الهالات صارت افتح بواااايد .. المنطقة كلها مترطبة 

اذا قارت صوري فيه فرق كبييير كبير شكلي صاير اصغر ، لانه الخطوط راحت شكل العين نفسه تغير ، وااايد وايد حابته وراح استمر عليه لانه فعلا هالمنتج انقذني شخصيا .. 

المنتج فيه رتنول ف مايناسب الحامل ولا المرضعة ، وقوي بصراحة ، ممكن اول كم استخدام يحرق ويتقشر المكان 
ف اول كم يوم استخدميه يوم وبعدها راحة يومين وبعدين يوم ، لين تتعود بشرتك عليه ، تحتاجين شوي وقت معاه 
والافضل اول فترة تستخدمينه بس بالليل وبعدها لين تتعود عليه بشرتك تستخدمينه مرتين باليوم 

متى بديت اشوف النتايج ؟
النتايج الاولية بتشوفينها خلال شهر تقريبا
بس التغيير الجذري تقريبا بعد ٣ شهور ، يعني طولي بالج عليه استخدميه وانسي الموضوع فجاءة بتلاحظين وايد اشياء تغيرت وهذا بصراحة كان اجمل شعور ...

هل انصح فيه ؟ طبعا 
هل برجع اشتريه ؟ طبعااااا

سعره= حوالي ال ٣٦٥ درهم 

...

اخر منتجين يتشابهون في الاداء 

منتجات تعالج الحبوب بيوم او يومين 



Clinique Anti-blemish Solutions 

فيه نوعين من هالمنتج ، فيه الجل وفيه اللوشن انا عندي اللوشن ، وهذا الحجم الصغير لانه اصلا ماتحتاجين منه كمية كبيرة ، انا احطه بس على الحبة مرتين باليوم وتدرجيا تخف بعد يومين .. الحلو فيه انه مايبقى اثر للحبة بقع او غيره 
المنتج بعد على نصيحة فاطمة بس هي مدحت لي الجل .. ومالقيته واخذت اللوشن اجربه 
سعره = ٤٩ درهم 



Blue Herbal Spot Treatment 
من كيلز 
هالمنتج وايد حبيته وبالنسبة لي اقوى من منتج كلينك ، هذا احطه علي اي حبه عندي مرتين باليوم 
وباجر الصبح ماتلاقينها موجوده تقشرينها وتروح بالكامل ، كانج تشيلين طبقة كامله ومافيه اي اثر للحبة ، طبعا يختلف يعني اذا كانت الحبة كبيرة او صغيرة 

من المنتجات اللي لازم تكون عندي ، لاني حبيت النتيجة وحبيت بعد انه مافيه اثر للحبة 

...

الحمدلله بشرتي وايد وايد تغيرت للافضل الحمدلله على هالشيء ، هذي اهم المنتجات اللي فعلا غيرت لي بشرتي ، بستمر عليها ، دايما الا اذا لقيت شي افضل ، بتشوفون اني ماحطيت غسول او كريم للوجة لاني كل فترة اجرب شي جديد بس المنتجات اللي ذكرتها غيرت بشرتي ١٨٠ درجة 

بشررتي تغيرت ايه حتى اذا رحت اسوي فيشل لبشرتي انا معتمدة مكان واحد من ٢٠١٣ اللي هو دريمالوجيكا 
حتى هم لاحظوا الفرق ، لاني تركتهم فترة خلال استخدامي لهذي المنتجات وبشرتي تغيرت 
لانه من خلال الفحص اللي تسويه لج قبل كل فيشل وايد من المشاكل انحلت وصرت اسوي فيشل لاشياء ثانية لاني حليت اهم المشاكل اللي كانت مزعجتني .. 

الحمدلله الحمدلله الحمدلله 

التغيير الاحلى صرت اشوفه مع المكياج انه كريم الاساس مايكتل في مناطق ، وشكل الوجه صار احلى فيه نضارة لانه صحي اكثر من قبل ، كمية الكريم اساس صارت اقل من قبل مااحتاج اغطي وايد اشياء ، غيرت كل انواع الكونسيلر اللي عندي صرت استخدم اشياء اخف ، لاني مااحتاج تغطية كبيرة نفس قبل ..

اللي حابه اقولكم في النهاية بشرتك هي فعلا سر جمالك ، اذا كانت البشرة صحية وصافية وخالية من العيوب كل شي يطلع حلو بعدها ، وتبين تعتين فيها اكثر واكثر ، لانها الاساس .. عالجيها اصرفي عليها قد ماتقدرين لانه بعدها اي مكياج بتحطينه بيطلع حلو ومرتب لانه بشرتك جميلة .. 

صح بشرتي تغيرت الحمدلله، لكن بعدني اسعى للافضل وابي الافضل ، اهم شي تعرفين مشاكل بشرتك وتبدين تعالجينها ، والاستمرار في الروتين اليومي الصباحي والمسائي .. لانه هو الاساس 
انا تركيزي اكثر شي على روتين الليل .. اخذ ٢٠ دقيقة تقريبا اغسل و احط الكريمات و اخذ راحتي على الاخر، لانه البشرة تتجدد بالليل .. خلال هال ٢٠ دقيقة في العناية انا احط اي شي اشوفه سواء مسلسل او اشوف قناة في اليوتيوب او اتابع الناس اللي احبها في السناب 

والوقت يمر ، هالشي صار عندي روتين يومي ولا امل منه ابدا ، لاني شفت ولله الحمد فرق كبير ..

الأربعاء، 13 سبتمبر 2017



شامبو منقي للشعر الدهني | Yves Rocher Purifying Shampoo



السلام عليكم 

الشعر الدهني بحد ذاته متعب ، لانه بسرعه يدهن يعني لو سبحتي الصبح الليل شعرك دهن !

وحتى في حياتنا اليومية اذا طالعين او في الدوام ف مغطين الشعر ف الدهون تزيد اكثر! مازلت ادور على افضل الحلول
وأافضل شي لحد الحين لقيته هو اني استخدم شامبو منقي للشعر الدهني ...

من اسمه شامبو ينقي الشعر الدهني من الدهون الزايده ، يعطي الشعر حيوية ويخليه بدون دهون ...
من فترة طويلة استخدم هالشامبو من ايف روشيه ، ووايد وايد حبيته ..

+ شامبو للشعر الدهني
+ مافيه اي لون 
+ خالي من السيلكون
+ خالي من البارابين
+ المكون الاساسي فيه هو بنات القراص Nettle 
+ مدة صلاحيته بعد الفتح هي ٦ شهور 
+ سعره تقريبا ٤٠ درهم او اقل 
+ حجمه ٣٠٠ مل 
ـ ريحته شوي قوية 


رائي فيه :
حبيته ، وايد وايد حلو ينظف الشعر بشكل ممتاز ، يعطي الشعر لمعه حلوه ، ويخليه صحي خالي من الدهون الزايدة
احب استخدمه من ١-٢ اسبوعيا ، ماافضل استخدامه بشكل يومي لانه ممكن شوي يجفف الشعر 

ولانه شوي يجفف الشعر انصح باستخدام بلسم او ماسك بعده ، بس مانحط البلسم او الماسك على فروه الرأس عشان مايثقل الشعر ، خلوه من تحت الاذن الى نهاية الشعر .. " الترطيب شي اساسي مع هالشامبو " عشان الشعر مايتعب 

ممتاز قبل اي مناسبة لانه يعطي حجم لجذور الشعر ، لانه غالبا صاحبات الشعر الدهني تعاني منه انه الشعر " يلصق " في فروة الرأس ... جميل جدا مع السشوار ، استخدميه قبل السشوار وراح تشوفين شعرج احلى لانه فيه حجم .. 

الشامبو موجود في محلات ايف روشيه، فروع ايف روشيه في الامارات 

الغرير سنتر - سيتي سنتر الشندغة - سوق البحار - ابن بطوطة - ياس مول 


...

الأربعاء، 16 أغسطس 2017

مجموعة عطور سطور من الرصاصي


مجموعة عطور سطور من الرصاصي 


السلام عليكم 



العطور كلنا نحبها ونستتخدمها بشكل يومي ولاكثر من مره ، في كل مره نشتري فيها عطر جديد نبحث عن الافضل والمميز

في جولة على دور العطور لفتتني مجموعة جديدة من محل الرصاصي العريق 
هالمحل اللي بدون مبالغة كل بخورنا اليومي منه .. تعودنا عليه من الصغر خصوصي محلهم اللي في سوق الذهب 

...



عندهم مجموعة جديدة من العطور اسمها سطور مستوحاه من الخط العربي 

حبيت هذا التوجه الجديد خصوصي اننا عرب ونحب اي شيء فيه خط عربي ، لانه يكون مميز 

المجموعة تناسب الرجال والنساء، ٤ عطور كل عطر يحمل حرف من كلمة سطور 

سين طاه واو راء

حبيت تصميم العلب ، بسيط انيق 
....



 س

عطر صباحي بارد وبنفس الوقت هادي ، ثباته حلو من ٣ - ٤ ساعات ، وطبعا ثباته علي الجسم وايد حلو
من العطور اللي حبيتها .. واذا خلصته برجع اشتري منه .. العطر من مكوناته الفواكة بس ابدا ابدا ماتشمونها الريحة جميلة وهادية .. 

نوتات العطر :
العليا : كمثرى و جوافة 
الوسطى: ورد
القاعدة : زهرة البرتقال 

احب العطور اللي تذخل في مكوناتها زهرة البرتقال ، تجذبني شخصيا .. 


...



ط

من العطور اللي تحتوي شوي على البهارات ، داخلة بطريقة حلوه، من المكونات الهيل والفلفل الوردي 
بس القاعدة عنبر وخشب الارز  

احب العطور اللي فيها عنبر بس بهذا العطر ماتشمين ريحه العنبر بشكل واضح خصوصي مع البهارات والهيل 
العطر من المكونات تحسين انها قوي ومسائي .. لا بالعكس العطر فيه انتعاش ، التركيبة تتوقينها برائحة مختلفة بس النتيجة جميلة .. على الملابس تحسين بريحة الانتعاش مع البهارات ، بس على الجسم تبين ريحة العنبر اكثر 

...



و 

من العطور اللي شخصيا حبيتها حبيتها وعلى ذوقي بالضبط 

العطر فيه عود و مزيج من الاخشاب ، الصندل ،الارز خشب الغاياك الدخاني ، العطر راقي مسائي 
حلو للمناسبات الاعياد .. هالعطر مع شوي دهن عود وبخور ياسلام 

من العطور اللي ارجع اشتريها ، احب هالنوع من العطور 

...


ر

هالعطر اول ماشميته حسيته شوي رجالي وغريب شوي .. لكن من العطور اللي غيرت رائي فيها تمااااما 

اول مره اشم هالمزيج وعطر غريب شوي ، ابدا ابدا لا تحكمين عليه من اول رشه .. خليه ياخذ وقته 
وراح تتغير الريحة .. مزيج من الزهور ومع مريج من الحمضيات ، ليمون .. وشوي شوي تطلع لنا ريحة الياسمين 

توليفه المكونات في البداية قلت ماعجبني ابدا ، بس غيرت رائي فيه تماااااما .. استخدمته كذا مره علي الملابس والجسم وايد وايد غير عجبني .. تحتاجين وقت بس عشان تفهمين العطر 


...



المجموعة جميلة وحبيتها من الرصاصي ، متوفرة في جميع فروع محلات الرصاصي في الامارات والخليج عندهم ١٦٥ فرع

العطر ١٠٠ مل وسعر العطر الواحد ب ١٥٠ درهم