الجمعة، 25 يوليو 2014

Herbline Essentials هيرب لاين إسنتشيالز





هيرب لاين إسنتشيالز هي مجموعة من منتجات التجميل الطبيعية للوجه والجسم و الشعر.

جميع المنتجات مصنوعة من مكونات طبيعية 100 ٪ مستخلصة من جبال الهيمالايا وعلى مبادئ الأيورفيدا لتوفر الفائدة على المدى الطويل لصحة الجسم .

الحلو في هذي الشركه انه جميع منجاتها خاليه من  البارابين والبارافين وماتختبر منتجاتها على الحيوانات ، ومصنوعه في الامارات .

وصلتني هالكيسه الجميله منهم ، اولا حبيت التصميم هو بسيط بس آحب التصاميم اللي اساسها اللون الرمادي بدرجاته . 

نشوف محتوياتها : 


ارسلو لي ٤ منتجات ، ٢ اخترتهم بنفسي و٢ هم اختاروه لي للي يناسب بشرتي 

من اليمين : 

- تونك بماء الورد والخيار للبشره العاديه والجافه . 
- جل للعيون مناسب لجميع انواع البشرات . 
- مقشر لمعالجه مشاكل البشره للبشره العاديه الى الدهنيه .
- مرطب للشفايف . 


انا اخترت المقشر و المرطب ، وبصراحه جربت كل شي ولحد الان حلوين بشرتي ماتضررت منهم بشي 
بس اكيد بكمل فيهم وبكتب رائي الصريح فيهم . 


الماركه هذي موجوده في اغلب الصيدليات بالامارات او ممكن تطلبون من الموقع الشحن مجاني لداخل الامارات 
ولخارج الامارات تحسب تكلفه الشحن . 

الموقع الرسمي وممكن الطلب منه :www.herbline-essentials.com
،،

لاتنسوا الاشتراك بالمدونه عشان يوصلكم كل جديد 

الاثنين، 21 يوليو 2014

تشكيلة العيد من آيكونيك





اقترب حلول موسم العيد الذي ننتظره بشوق، وحان الوقت لتتألقي بأروع حلّة. تشكيلة العيد من "آيكونيك" هي الأسلوب الأمثل لإضفاء لمسة من التألق على احتفالات العيد مع من تحبين.  

فالعيد مناسبة تجتمع فيها العائلة والأصدقاء للاحتفال والامتنان للنعم التي يعيشونها، ولا تكتمل الاحتفالات بدون لمسة وافية من أحدث صيحات الموضة. تألقي مع أبرز قطع التشكيلة مثل الفستان الطويل الملفوف، أثواب السهرة، الرداء الفضفاض من طبقات، البلوزة الواسعة المزينة بالترتر، البلوزة بقصة فضفاضة – ارتديها مع بنطلون بأرجل ضيقة رفيعة لإطلالة تعكس أناقة فائقة. وسواء كنت ستحضرين حفلات ساهرة أو تستضيفين حفلات في منزلك، فإن ستكونين محط الأنظار والإعجاب متألقة بنقوش مثل الألوان المتماوجة ونقش الثعبان والأزهار التجريدية التي تتميز وتتألق بعيداً عن خطوط الموضة المعتادة.


قليل من البريق واللمعان هو لا شك مرافق لإطلالة احتفالية، لذا تركز هذه التشكيلة على التفاصيل بشكل كبير، ويظهر ذلك من خلال الزخارف اليديوية والترتر المصفوف على أقمشة فاخرة مثل المخمل والجاكار والجورجيت والكريب والجيرسي بألوان معدنية والتافتا. ولكن عليك الانتباه وعدم الوقوع في فخ المبالغة في هذه المناسبة، فما يميزك هو إطلالة متألقة مستعدة للاحتفال مع لمسة هادئة من الأناقة ومجموعة درجات لونية ملائمة. أضيفي إلى إطلالتك مجموعة من الألوان مثل الأسود الحالك والعاجي والأحمر القاني والبني الداكن والبرونزي والأزرق البارد والمرجاني والوردي، وأضيفي القدر المناسب من التألق والرقي إلى مجموعة أزيائك هذا العيد.













الأحد، 20 يوليو 2014

Glambox July 2014



السلام عليكم 

وصلتني العلبه الجميله من قلام بوكس لشهر يوليو ، نشوف محتوياتها معاكم ... 




البوكس هالمره منوع وكل اللي فيه جديد علي و هذا هو المطلوب انه العلبه تعرفنا على منتجات جديده ممكن نحبها




من اليمين : 

- عطر من لاكوست ، فخم وراقي ، من العطور اللي تعجبني شخصياا حبيييييته وافكر اشتريه بصراحه . 

- عطر من اسكادا ، من العطور الحلوه يغلب عليها ريحه الزهور بس مو قويه شي انيق ، مااعرف اشرح عدل بس شموه وتعرفون . 

- ٣ ماسكات من اولاي ، يحارب علامات تقدم البشره ، بجربه . سعره بالسوق ٥١ درهم .

- كريم لتخفيف التجاعيد من اولاي  سعره بالسوق ٧٩ درهم 

- امبولات من بانتين ، تجي بعلبه فيها ٣ حبات وسعرها ٢٠ درهم 

- ماسكرا من ماكس فاكتور ، كثير شفت لها ريفيو باليوتيوب ومتحمسه اجربها سعرها ٧٧ درهم . 
....

اذا حابه تشتركين بهالعلبه الجميله من هنا سجلي واختاري المده اللي تبين تسجلين فيها ٣ او ٦ شهور او لمده سنه 

السبت، 19 يوليو 2014

ROYCE' CHOCOLATE




السلام عليكم 


الشوكلاته ، مين مين بس اللي مايحبها ، عشق ابدي خصوصي من النوع الفاخر 
مره اخوي راح لليابان وجاب لنا ككاو لذيذ وخطير ماانسى طعمه بصراحه ، من الذ الانواع 
وعلى كلامه انه كان غالي بس كل غالي جميل ولذيذ .... 


ومن فتره ، انشر بالانستقرام عن هالنوع من الككاو خصوصي انه من اليابان وكنت حابه اجربه وبعدها نسيت السالفه ، 
وعرفت انه صار لهم كشك صغير في محل لافاييت في دبي مول ، والاسبوع اللي راح زرت المحل واخذت علبه 
من باب التجربه ، بس كنت عارفه انه مثل اللي في بالي .. 


...

عندهم صراحه انواع واشكاال ، وعندهم شبس بالككاو جديده هالحركه علي ، وككاو بالويفر و بالمكسرات ، 
انواع بصراحه ، والحلو فيهم انه كل صنف فيه منه ككاو دارك او نص نص  او ككاو بالحليب او ككاو الابيض 
هالشي حلو ..



اخترت النوع اللي ابيه ، وقدمته لي بهالطريقه داخل كيس مبرد ، وفيه داخل كيس ثاني فيه ماده بارده تحفظه لين ماتوصلين للبيت ، وهالشي ممتاااااز جدا ، 


....

طبعا طبعا المفروض اصوره قبل لا ناكل منه ، بس ماعليه صايمين وبعد الفطور الكل يدور شي حلو ، التغليف جدا حلو مرتب .. 

انا واختي اخترنا الككاو الوسط اللي نص دارك ونص ككاو بالحليب افضل هالنوع جدا ،


هذا شكل العلبه من بره ، وطبعا بدون كحول ، لانه في موقعهم فيه انواع فيها كحول ، في كل اللي موجود في دبي بدون كحول ، 

.......


شوفو العذاااااااااااااااب 



تاكلين وححده آآآآه شي ، اصلا مايحتااااج تعضينها ابدابد ، تذوب تذوووووووب اعشق هالنوووع وادووخ فعليا معاه لذيذ
اللي ماجربه اقدر اقول انه اصلا ماجرب اللذه و شسمه ضعت بصراحه وانا اتذكر طمعه ، نصيحه جربوه جربوه ،
اللي يعشق الانواع الحلوه من الككاو ويتفنن فيها لازم يجرب هالشي العجيب ،،،، 




المشكله التصوير ظالم هالقطعه الفنيه اللذيذه 

اسم النوع اللي اخذناه  

Nama Chocolate
[Ecuador Sweet]

والعلبه فيها ٢٠ حبه ، والسعر = ١٠٥ درهم اماراتي 


هذا موقعهم الرسمي 

الثلاثاء، 15 يوليو 2014

Makeup Dupe بدائل المكياج

السلام عليكم 


الكل تقريبا يدور على بديل ل روج معين او ايشدو لماركه معينه مو ملاقيها عندنا 
ويبحث لها على بديل مطابق او مشابه له .. 


ف فتحت قسم في صفحتي الخاصه ب البينترست Pinterest عن بدائل المكياج والمنتجات التجميله 

اولا هالموقع انا اعشقه ودايما فيه ، وشامل لكل شي ، وصفتحي فيه متنوعه ، وفي قسم البدائل بحط اشياء
لها بديل طبعا ...

مو انا اللي لقيت المنتجات وصورتها طبعا كل شي له حقوقه وحقوق اللي تعب فيه كل صوره تحتها اسم المصدر من وين
انا بس جمعتهم في مكان واحد يسهل علي وعلى غيري انه يلقاهم 




كل فتره بضيف شي جديد باذن الله ،  الصفحه من هناااااا  واشتركو فيها عشان يوصلكم كل جديد 

وهنا للشتراك بالبورد كامل او صفحتي كامله بكل محتوياتها هناااااااا



وطبعا لا تنسو الاشتراك بالمدونه عشان توصلكم كل مواضيعي الجديده 

الاثنين، 14 يوليو 2014

أفضل العادات الصحية في رمضان

رموش رائعه مع neuLASH





السلام عليكم 

كلنا نحب تكون رموشنا حلوه طويله وكثيفه و كل فتره ندور على منتج جديد يساعدنا ويعطينا اللي نبيه ...

بعد البحث طحت على هالموقع الجميل ولقيت مبتغاي فيه ..  


عندهم ٣ منتجات فقط 

- سيروم للرموش 
- سيروم للحواجب 
- سيروم للشعر 

وشفت صور قبل وبعد على النتائج بعد الاستخدام لمده ٣٠ يوم 



جدا تحمست بعد ماشفت الصور وقررت اجربه .. 

تواصلت معاهم وماقصرو ارسلو لي عينات من سيروم الرموش .. 



...

ومرفق معاه كتيب صغير فيه طريقه الاستخدام و شرح لجميع منتجاتهم مع الصور ، 


وفيه كرت صغير جدا عجبني 



تحطين صح في كل مربع ، كل يوم له مربع ولين تنتهين من ال ٣٠ يوم وتشوفين النتيجه ، 




انا بديت فيه وحاليا اليوم بيكون ١٢ ، وان شاء الله اول مااخلص ال ٣٠ يوم بكتب رايي عنه . 


الموقع يوصل للامارات كلها والتوصيل مجاني و ويوصل لباقي الدول بتكلف تضاف الى قيمه المشتريات . 

هنا موقعهم وفيه كل معلوماتهم والاسعار والشرح 


السبت، 12 يوليو 2014

Nutridiet نظام غذائي قليل السعرات الحرارية



السلام عليكم


Nutridiet  نظام غذائي قليل السعرات الحرارية




تقريبا من حوالي الشهر والنص بديت في حميه او رجيم جديد، Nutridiet .


Nutridiet هو استبدال الطعام بهذا المنتج وهو وجبة عالية بروتين الصويا، ويحتوي على جميع العناصر الغذائية التي يحتاجها جسمك ولكنه منخفض جدا في محتواها من السعرات الحرارية لها - فقط حوالي 110 سعرة حرارية لكل وجبة. عن طريق استبدال كل أو بعض وجبات الطعام الخاصة بك مع Nutridiet، يمكنك خفض وزنك بأمان وسهولة. تكوين Nutridiet يقلل من الرغبة الشديدة الخاص الجوع ويضمن أن يتم الاحتفاظ كتلة العضلات أثناء فقدان الوزن الخاص بك. وطعمها كبيرة جدا!

عندهم ٣ برامج سهله لتخفيض الوزن 

١- تخفيض سريع الوزن ، استبدال كافة الوجبات الغذائية .
٢- تخفيض معتدل للوزن ، استبدال وجبتين من الوجبات الغذائية .
٣- محافظة على الوزن ، استبدال وجبة غذائية واحده . 


تجربتي معاه ...

بالبدايه تحمست بصراحه خصوصي انه شي زين وماشفت احد كاتب عنه انه ضره وسبب له مشاكل ، تواصلت معاهم وماشاء الله ماقصرو معاي ، استلمت العلب فيه علبه كبيره



وبداخلها ٣ علب بنكهات " الشوكولاته - فواكه الغابات - الفراوله " ، مرفق معاهم الكوب الخاص و ورقه فيها تعليمات عن النظام كامل .

كل علبه فيها ١٥ مغلف ، كل مغلف عن وجبه او سناك مثل ماتحبين طبعا



طريقه الاستخدام نفرغ مغلف واحد داخل الكوب و نعبيه ماي باااارد جدا جدا و نرج العلبه لين مانشوف انه البودره ذابت في الماي ، ونشربه على طول . " ماينفع نخليه لوقت طويل " .



انا فكرتي من البدايه ابي انزل وزني لكن بشكل بطيء مااحب فكره النزول السريع بالوزن ، بطيء عشان احافظ عليه واستمر ، فبديت ادخل هالشراب على نظام اكلي لكن ك سناك ، اول اسبوع مره في اليوم وغالبا اخليها بالليل لاني اتعشى على ٩ تقريبا وعلى ال ١١ ونص اجوع فاخذت لي هالسناك .

ثاني وثالث اسبوع نفس الشي مره باليوم وساعات احاول مرتين ، رابع وخامس اسبوع بصراحه اهملته شوي ، سافرت ورديت يعني شوي صارت حوسه ، بس كنت احاول اشربه ٣ مرات بالاسبوع .

يعني في البدايه التزمت شوي وبعدها بدا التخبيص ، بس ماعليه انا راضيه لاني اني نزول بطيء لوزني .



المنتج نفسه كلها فيتامينات ومعادن واللي يحتاجها الجسم يومياا وهالشي ممتاز
المغلف الواحد فيه ١١٢ كالوري ، وممتاز كسناك او كوجبه ، لانه مشبع .

+ الطعم .... انا وحده اصلا مااحب المشروبات البارده ، يعني ملك شيك و انواع القهوه البارده مااقدر استسيغ طعمها ،
وهالشراب ، تقريبا اقدر اقول عنه ملك شيك ، واعاني جدا اذا شربته ، احاول ماافكر وانا اشربه ، حبيت طعم الككاو اكثر وهون شي بالنسبه لي ، ولاني كنت اضيف له شوي قهوه سريعه التحضير فيعني ترقع الموضوع بالنسبه لي ، بس شي صعب لي لاني مااحب شي وصرت اشربه . (( بس فعلا اكرره هالمشروبات البارده باي شكل وباي نوع ومن اي كوفي او محل )))  ...

+ ينصح بشرب كميات كبيره من الماي يوميا وهذا الشي كاتبينه ومأكدين عليه .



وزني وكمت نزلت عليه .. هو مثله مثل اي رجيم لازم معاه رياضه وتخفيف بالاكل
وزني اول مابديت كان     ٧٠،٣ كيلو
وبعدها وصل الى            ٦٨،٤ كيلو

اول شي الحمدلله رب العالمين ، لاني افتكيت من عقده ال ٧٠ كيلو هذي و اني نزلت هالوزن وانا بصحه وعافيه
وثانيا نزلت ١.٩ كيلو ، قريب ال ٢ كيلو بس شي ممتااااز في هالفتره وهالتخبيص اللي كان صاير وغير اني ماكنت احب الطعم اللي اشربه .

هل انصح فيه ؟ ايه
بس اللي يحب المشروبات البارده وماعنده عقد بتذوق الطعم مثلي .
هل فادني المنتج ؟ ايه
نزلت عليه ١.٩ كيلو

هل ممكن اعيد هالتجربه ؟
بصراحه لا ، صح انه النتيجه حلوه بس مااقدر على الطعم لانه مشروب باااارد .



الموقع فيه كل شي ، ومنه تقدرون تطلبون المنتج ، وفيه توصيل للامارات كلها والتوصيل مجاني للامارات والدفع عند الاستلام، وفيه توصيل لدول الخليج .
والمنتج متوفر في اغلب الصيدليات المشهوره في الامارات وهذي الامكان كلها موضحه هنااااااا



اللي حاب يعرف اي شي او عنده سؤال انا تحت امركم ... 

الثلاثاء، 8 يوليو 2014

Zanedo June 2014



السلام عليكم 



من كم يوم وصلت لي هالعلبه لشهر ٦ ، ووكان حجمها ثقيل وتحمسسست بصراحه 

اول مافتحتها شفت شي جميل وجديد 


٣ منتجات بالحجم الاساسي من The Art Of Soap 

هالمحل كان لهم كذا فرع في دبي بس للاسف سكروه واللي عرفته انهم خلاص ماراح يكونون موجودين في الدوله
مع انه هالمحل كل شي فيه طبيعي وصنع اليد ، الماركه تركيه .

...



من اليمين : 

- شور جل للجسم بريحه الزيتون ، ريحته زيت زيتوون اصلي قوي بصراحه والريحه يعني ماحبيتها بصراحه 
ولحد الحين ماجربته اللي يخليني اتردد هو ريحته ، بس معروف انه زيت الزيتون ممتاز للبشره . 

- زيت مساج للجسم ب ريحه اللافندر و زهر البرتقال ، الريحه جميله وريحه سبا ، حلوه وتريح الاعصاب . 

- كريم للوجه بنفس ريحه زيت المساج ، حلوه الريحه بس شوي متخوفه يعني انا بشرتي حساسه وهالكريم ريحته قويه واخاف احسس منه ، ف بجربه واشوف ، متحمسه له لانه طبيعي . 

ان شاء الله اذا حبيت شي برجع اكتب عنه بالمدونه . 

اللي حاب يشتري شي منهم موجودين على هالموقع 

الأربعاء، 2 يوليو 2014

روج بزيت الارقان من بايس Lipstick with Argan oil from PAESE

السلام عليكم 


كتبت من فتره اني بديت اشغل مع شركه بايس للتجميل واعطوني كذا منتج اجربه واكتب رايي عنه 
ومن البدايه قلت ابي بكتب رايي الصريح بعيد عن شغلي معاهم لانه الصراحه والمصداقيه كانت اساس 
الاتفاق معاهم .. هنااااا


..



اليوم ان شاء الله بتكلم عن روج من مجموعتهم واللي حبيته انه كل منتجاتهم فيها مواد طبيعيه 
والروج بشكل خاص فيه زيت الارقان ومعروف انه ذهب مو زيت عادي ، يعطي ترطيب عالي للشفايف
وابد ماتحسين انه يجففها ، حتى بعد ماامسحه احس شفايفي مترطبه . 



واضافه الى زيت الارقان فيه فيتامينات A, C و E . 

اللون قوي وبسرعه يطلع مو من الارواج اللي لازم تعدين عليها كم مره عشان يبان اللون ، وثبات حلو .



الروج فيه ريحه جميله جدا حبيتها وريحه شي طبيعي ، بس حلوه .


عندهم حوالي ٣٠ لون ومنتوعه بين الروج العادي و المات و اللي فيه لمعه اللولو . 



واللي عندي كان رقمه ١٣ ، من الالوان الجميله بصراحه واللي تنفع تكون يوميه . 
السعر = ٣٩ درهم 

موقعهم الرسمي : www.paesecosmetics.com
الفيس بوك : هنــــــــــا
الانستقرام : paese_uae


فروعهم في الامارات 

ابوظبي : مشرف مول 
دبي : دبي مول - ابن بطوطه - سنشري مول 
الشارقه : مركز صحارى - متاجر مول القوز - متاجر مول الخان 
رأس الخيمة : مول رأس الخيمة
الفجيرة : الفجيرة سيتي سنتر