Thursday, 31 March 2016

What's In My Bag?


What's In My Bag


السلام عليكم 


حبيت اغير شوي عن مواضيع الميك اب والعناية ، ونشوف شنو في شنطتي 


اول شي بتكلم عن الشنطة هي من ماركة ايكو ، والمعروفين بجلودهم المميزة .. 
من زمان وانا بخاطري شنطة ولونها بنفسجي اعشق هاللون .. اللي حبيه ب هالشنطة انه اولا كبيرة وفيها اماكن وايد 
وتقسيمها حلو من الداخل .. والجلد واقف ويابس صعب انه ينثني وهذا حلو بعد .. 


فيها سحابين على الاطراف حلوه اذا بحط اوراق او كلنكس .. وبعد بالوسط فيها واحد صغير ، اذا بتحطين شي ماتبين احد يشوفه لانه الشنطة مفتوحة .. 

فيها مكانين تحطين الاغراض جيوب كبيرة وصراحة تشيل وااايد بس مااحب اني احط وايد فيها لانها تكون ثقيلة شوي ..

..
احاول احط الاشياء الاساسية فيها فقط .. بس ساعات تتحول الى كل شي .. 


بوك او محفظة من ديور .. مفتاح البيت وعليه بطاقات الاشتراك بكم محل .. كريم للايدين من كلارنس " ممتاااز " 
مرطب للشفايف من ريميل .. عطر خفيف من فكتوريا سيكرت .. وعطر لاليك .. انا حطيته في هذي العلبة من دايسو عشان مااشيل العطر بالحجم الكبير .. 

...


مراية صغيرة كانت هدية من دولتشي اند غبانا .. معقم لليدين من باث اند بودي .. بطاقة لموعد من ديرمالوجيكا .. 
شنطة صغيرة للبزنس كارد .. 

...


شاحن متنقل للموبايل طبعا .. و بندول .. و سيور للتقويم .. 

هذي غالبا الاشياء اللي تكون في شنطتي مع كلينكس طبعا .. 

وبس 

Monday, 28 March 2016

زيت الارغان من Lovage


زيت الارغان من Lovage 


السلام عليكم 


زيت الارغان من اجود انواع الزيوت واللي بالفترة الاخيرة انتشر بشكل خيااالي
كل الماركات صارت تنزل منتجات تحتوي على زيت الارغان ، اما انه يكون صافي او يكون احد مكوناته 

وفوائدة ماشاء الله كثيرة للشعر والبشرة كلها الوجة والجسم .. 

جربت زيت الارغان من ماركة لوفاج حبيت اجرب ماركة اماراتية وادعمهم .. 



زيت الارغان غني ب فيتامين E ، اوميقا ٦ ف هو راح يساعد على ترطيب البشرة وتحفيز نمو الخلايا .
وينعم الشعر اذا استخدمتية باستمرار .. وحلو بعد للاظافر ل ترطيب الجلد اللي حوالي الاظفر .. 

انا استخدمته لكل شي شعري وجسمي ، حبيته اكثر لجسمي اخلطة مع اي كريم للجسم 
خصوصي بعد الشور ، ينعم الجسم ويرطبة الى يوم كامل تقريبا .. 

ريحته عادية ومو قوية وهالشي حبيته عشان اقدر احط اي كريم للجسم او عطر بدون ماياثر على الريحة 
وقوامة جدا حلو صح انه زيت بس الجسم يتشربة ولا يترك اثر دهني على الجسم .

سعره = ٢٥٠ درهم 

موقع لوفاج : lovage.co
وممكن تطلبون منه 

الماركة عندهم منتجات وايد و باذن الله قريب بكتب رايي بمجموعة من منتجاتهم ..

Sunday, 13 March 2016

February Empties 2016 | اشياء خلصتها في فبراير + ٣ شهور على التحدي


February Empties 2016 | اشياء خلصتها في فبراير + ٣ شهور على التحدي


السلام عليكم 



عوده لهالموضوع الجميل وتحدي اجمل 

هالشهر ولله الحمد خلصت كمية حلوه من المنتجات كنت حاطة في بالي ابي اخلص ٢٠ منتج ، وحققتها شي منتجات بالحجم الكبير وشي حجم عادي وشي سامبلز .. بس المهم اني حققت هدفي .. 


- بسلم للشعر من هيربل اسنس ، خلصت الشامبو من فترة .. ومثل مامكتوب بلسم مرطب ، فعلا يرطب الشعر الجاف 
عجبني ، وحلو للاستخدام المتكرر .. 
- شامبو التنقية من ايف روشية ، جميييييل جدا جدا وناسب شعري الدهني .. كمية صغيرة منه تكفي .. انا مااستخدمه في كل مره تقريبا مره في الاسبوع .. بس جدا جدا ممتاز ، واكيييد برجع اشتري منه .. 
- سيروم من غارنيية لنمو الشعر ، خلصته وماحسيت باي شي ف ماراح ارجع اشترية ..
- كريم للشعر من كيلز ، له ريفيو على الانستقرام .. حلو بس فيه افضل منه .. 

..

- كريم فيتامين e من ديرما اي ، جدا جدا حبيته ، وله ريفيو مفصل على الانتسقرام .. ممتاز في ترطيب الجسم 
- غسول للوجة من كلينيك ، حلو للبشرة العادية الى الدهنية .. لانه ساعات يجفف المناطق الجافة اللي عندي .. اللي حبيته النوع الثاني الفوم ، كان ممتاااز .. 
- شور جل من باث اند بودي .. كان باقي فيه ربع وخلصته ، ريحته حلوه وفرش ..
- كريم للجسم من تيد بيكر ، عجبني بسرعة البشرة تتشربه ولا يترك اثر زيتي ..
- فيتامين c &e ، فوايد هالفيتامينات جدا حلوه للبشرة .. 

...

- مرطب للشفايف ب زيدة الشيا ، عجبني وخلصته 
- عطر سامبل .. عادي من ذوقي بس خلصته .. مااحب اخلي شي يكون زيادة عدد 

..


- شمعة من باث اند بودي ، ريحتها قوية وتعبي المكان وساعات تزعجني  واصدع منها .. 
- عطر بريحة شجرة الليمون من لش ، شوي قوية الريحة صرت استخدمه للغرفة .. انتعاش 

..


- غسول للفم من اورال بي ، يعجبني ويعطي نفس حلو ، ومع التقويم لازم استخدمه .
- قطن للوجة من دايسو جدا جدا عجبني ، طبعا ماخلصته كله بس شلته من العلبة وحطيته بعلبة ثانية ، بس ممتاز جدا
وبرجع اشتري منه بس مشكلته اني ماالاقيه دايما .. 

..


- عينة من كريم العيون من ديرما اي ، جدا عجبني يرطب العين ويشيل الجفاف كله .. وحلو قبل الميك اب ..
- غسول الفووم من كلينيك ، جدا جدا عجبني وهذي اخر عينة منه 
- قطن استخدمه للمناكير 

...


- خلصت فكس بلس من ماك ، ممتااااز طبعا 
- بيبي كريم من ذ بودي شوب ، خفيف وحلو لكل يوم .. ومافيه لون قوي 
- ماسكرا من ريميل .. كتبت عنها هنا ريفيو كامل
- مزيل للميك اب من ماكس اون ، حلو للوجة بس للعين يحررررررق .. 

...


وهالفتره انا جالسة اشوف الميك اب القديم او اللي ماعجبني واطلعة .. وهذي الحصيلة .. 
فيه اشياء شلتها من العلب وحطيتها في ال زي بالت .. و وفرت علي مكان 

وبس هذا كل اللي خلصته هالفترة .. 

.......

التحدي ولله الحمدلل مرت ٣ شهور والحمدلله على هالشي .. نظرتي تغيرت صراحة صرت اطلع عادي و صار عادي جدا اني اطلع ومااشتري شي .. اشوف وامتع عيوني بس مااشتري لاني حاطه في بالي هدف والحمدلله قاعدة اشوف نتايج حلوه ... اذا حسيت بفتره اني مليت او ودي اشتري شي .. اطلع اشياء جديدة من عندي وادخل القديم 
وبهالشي اخدع نفسي انه عندي شي جديد واستمتعت فيه لين امل منه او اخلصه .. وهذا اللي صاير 
صرت اذا خلصت الشي اتحمس اروح ادور له بديل بين الادراج وكاني شريت شي جديد .. 

ان شاء الله شهر مارس يكون شهر جميل واحقق فيه اهداف اجمل .. 

الهدف لهذا الشهر اني استخدم ٢٠ منتج " كبير او صغير " 

ونشوف ب نهاية الشهر اذا حققته او لا .. 

وباذن الله راح اقدر 

Monday, 7 March 2016

MAC Velveteasa Lip Pencils | أرواج ماك فلفتيز


MAC Velveteasa Lip Pencils | أرواج ماك فلفتيز



السلام عليكم 


ماك وعشق البنات لماك ماله حدود ، وماشاء الله دايما عندهم مجموعات جديدة ، ومتجددين دائما ..
هالمره ارسوا لي روج من مجموعة جديدة راح تنزل نهاية الشهر .. 

MAC Velveteasa Lip Pencils | أرواج ماك فلفتيز

الروج فكرتة حلوه واتواقع جديدة على ماك ، روج على شكل قلم طبعا مايحتاج براية ، بس لفي القلم من تحت ويطلع الروج ..
الروج مات طبعا من اسمه ، بس المات الحلو مو الجاف بزيادة ، جدا حلو على الشفايف و خفيف ابدا مو ثقيل على الشفايف .. 



الروج اللي عندي حبيييييته وحبيت درجته ، مو احمر احمر ، احمر على وردي ، اسم الدرجة Anything Goes
ثبات الروج حلو ، من ساعتين الا ٤ ، واذا تشربين اي شي عادي ، لكن مع الاكل الدسم راح يخف تدريجيا .. 
الروج راح يكون من ضمن المجموعة الدائمة في ماك .. 

راح يتوفر في نهاية مارس ٢٠١٦ 

Thursday, 3 March 2016

Rimmel Super Curler Mascara

Rimmel Super Curler Mascara


السلام عليكم 



الماسكرا تعطي تقوس وحجم للرموش يخليك تستغنين عن عاقصة الرموش ! 


ماسكرا جديدة نوعا ما من ريميل نزلت تقريبا في شهر ١٠ اكتوبر ، وجربتها لمدة كافية اني اقول رايي فيها ... 


سوادها جدا حلو على العين .. مكتوب انها تعطي حجم وتقوس للرموش لمدة ٢٤ ساعة ، بس مستحيل اخلي الميك اب لكل هالمدة ، ف مااقدر اقول انها ثابته لطول هالوقت .. 

اول مااحطها على عيني حلوه تعطي حجم للرمش من المنبت والسواد حلو يعطي نتيجة انه الرموش اكثف ، والتقوس اللي تعطية بالبداية حلو ، بس بعدين يخف يعني من اول ساعة احس رموشي صارت عادية واختفة التقوس وبدت الرموش تنام او ترجع لطبيعتها .. هالشي ماحبيته بحكم انهم كاتبين انها ثابته لمدة ٢٤ ساعة .. 

ممكن لانه رموشي طويلة شوي ، مع اني شفتها على غيري ورموشهم قصيرة وجدا حلوه الماسكرا عليهم .. بس علي لا ماحبيتها ، شكلها عادي جدا على عيني .. 



شكل فرشة الماسكرا ، مقوس وعلى شكل الرموش .. توصل من بداية الرمش الى نهايتة ولا تدخل بالعين .. وايضا مناسبة للعيون الحساسة ، لانها ماحسست عيني ولله الحمد .. 

اذا استخدمتيها من العكس الجهة المقوسة تكون نتيجتها احلى ...

هل برجع اشتريها ؟ لا لاني جربت غيرها افضل وطلعت عيني بشكل احلى 

سعرها ٤٥ درهم .. متوفرة في لايف ستايل - ماكس - بوتس - كارفور .