الأحد، 28 يناير 2018

تحدي استخدام المكياج لمدة سنة كاملة ! كم استخدمت ؟ كم صرفت على المكياج ؟


تحدي استخدام المكياج لمدة سنة كاملة !
 كم استخدمت ؟ كم صرفت على المكياج ؟


السلام عليكم 


اتمنى تكونين بصحه وعافيه .. شايفين انه خلال هالسنة بديت الاسعار ترتفع شوي خصوصي مع الضريبة ف حلو انه الواحد يوفر شوي شوي .. 

 خلال سنة ٢٠١٧ كنت اسوي تحدي خفيف وسهل .. اني استخدم المكياج اللي عندي وكل شي كنت استخدمه واخلصه احطه في علبة واجمعهم الى نهاية السنة واشوف العدد اللي خلصته و قيمة هالمنتجات .. 

الكمية اللي استخدمتها تعتبر ممتازة بالنسبة لي خصوصي اني مااحط مكياج بشكل يومي ، ف استهلاكي للمكياج يعتبر وسط الى قليل 

خلال هالفترة عرفت الاشياء اللي اقدر اخلصها بسرعه والاشياء اللي تاخذ فتره اطول 



خلال سنة ٢٠١٧ خلصت ٤١ منتج وسعر هالمنتجات كلها ٣٥٩٤درهم

!!!!!

تشوفون العدد اللي في الصوره قليل جدا ،مع ذلك السعر مرتفع على هالمنتجات !! صراحة انصدمت شوي ماتوقعت انه هذا السعر للمجموعة كامله !!!

الاشياء اللي خلصتها خلال سنة كاملة 
















....


ف قررت اني لسنة ٢٠١٨ اكمل هالتحدي واكمل ل سنة ثانية استخدم المكياج اللي عندي واحاول اخلص اكبر عدد اقدر عليه الهدف اللي ابي اوصل له اني اخلص مجموعة يوصل سعرها الى ٣٦٠٠ درهم 

-----

تحدي المكياج ل ٢٠١٨ 

فكرة التحدي ؟
نستخدم المكياج اللي عندنا ، نخفف العدد لو بشكل بسيط ، منها نشوف هل هالمنتج حلو ؟ يناسبني ؟ يستاهل اشتريه مره ثانية ؟ يكون من مفضلاتي ؟ 

يعني بدال مايكون عندنا ١٠ اكحال باللون الاسود يكون عندنا ٣ ممتازين جدا وتكونين واثقة انهم مايسيحون .. افضل من ١٠ عاديين ولا يستحقون الشراء 


كيف الطريقة ؟ 

اول شي جرد المكياج بالكااااااامل .. 

تشوفين المكياج اللي عندج بالكامل ارواج كريم اساس برايمر ايشدو كحل وغيره 

اول شي تشوفين الاشياء اللي ممكن تكون قديمة او تغيرت تركيبتها او ريحتها .. او انتهت صلاحيتها 



" انا طلعت كمية حلوه فيه اشياء تركيبتها تغيرت ، وفيه منتجات انا خلاص ماحبيتها او ماناسبتني ، وفيه منتجات اعرف اني ماراح استخدمها او عندي نفسه " 

مثلا عندج ايشدو وردي فاقع ، روج برتقالي ايشدو اصفر ، اذا انتي عارفة انج ماتستخدمينهم خلاص طلعيهم 
..

اذا فيه اشياء جديدة ممكن تعطينها لاي شخص انتي تعرفينه 

" ممكن توقفين شراء المكياج لمدة شهر او ٢ " لانه انتي فعليا ماتحتاجين شي كل شي موجود عندج 

لانه خلال الفترة اللي ماراح تشترين فيها شي راح تعرفين انه المنتج ياخذ وقت طويل لين يخلص ف عادي يعني لو شهر او شهرين ماشريتي شي 

---

الخطوة الثانية :

ترتيب المكياج بالكامل ، تنظيف العلب 
هالشي راح يخليج تحبين مكياجك اكثر بما انه مرتب وكل شي له مكانه الخاص .. 

الخطوة الثالثة :

تختارين مجموعة بسيطة من المكياج اللي انتي حابه تخلصينه ، مثلا روج باقي فيه شوي .. كحل وصلتي فيه الا النص .. 
برايمر باقي فيه ربع العلبة .. 

اختاري مجموعة بسيطة تبدين فيها .. تحاولين تركزين عليهم هالفترة لين يخلصون وبعدها تحطين بدالهم 

مثال خلص البرايمر ، حطي بداله واحد ثاني وكملي عادي 
اهم شي تخلصين من المنتجات اللي باقي فيها كميات بسيطة 
 تتخلصين منها وتستخدميها ، وتطلعين برايمر جديد او برايمر بديتي فيه من فتره 


هالطريقة بتخليج كل فترة تخلصين من المنتج بوقت اسرع لانه تركيزج كامل عليه بدال ماتستخدمين كل يوم برايمر غير ، ركزي على ١ او ٢ ويخلص وبعدها انتقلي للي بعده ..

-----

التحدي بشكل عام راح يهذبج من ناحية الشراء لانج عرفتي انه المنتجات تاخذ وقت في الاستخدام ف طبيعي انج راح تقللين من نسبة الشراء وتفكرين اكثر من مره 

اذا فيه منتج حابه تشترينه ، تحدي نفسج انج تخلصين منتجين قبل ماتشترينه ، بهالطريقة راح يكون عندج هدف تمشين عليه 
حتى لو شريتي منتج واحد بس انتي استخدمتي ٢ 

وممكن انتي تحطين لج اهدافج ، اذا انتي من النوع اللي تحبين المكياج وايد وماتقدرين ماتشترين ، تحدي نفسج مثلا كل ٥ منتجات تخلصينها تشترين منتج واحد فقط 

---


المنتجات اللي اخترت اني اخلصها هالفترة 
" كل ماخلصت شي استبدله بمنتج جديد " 

مثل ماقلت حابه اني اتحدى نفسي واخلص خلال هالسنة منتجات بقمية ٣٦٠٠ درهم ، واذا خلصت اكثر خير وبركة 

اخترت مجموعة بسيطة ابدا فيها هالسنة 



اخترت هالماسكرتين في البداية اني اخلصهم ، انا اخلص الماسكرات واستهلكم ف نشوف هالسنة كم ماسكرا اخلص 


اخترت هال كونسيلر تارت باقي فيه الربع ، كوركتر اربن ديكاي استخدمت ربع العلبة ، كونسيلر ماك باقي فيه كمية بسيطة جدا وحابه اني اخلصه 

كريم اساس ومخفي للمسام من بنفت  باقي فيه شوي وحابه اخلصه ، كريم اساسي المعتمد من SLA وايد احبه وتقريبا وصلت للنص فيه ، بستمر عليه لين اخلصه .. لانه عندي باك اب منه وعندي انواع ثانية حابه اجربها 



فكس بلس من ماك باقي فيه كمية بسيطة جدا ، ابي اخلصه لانه عندي باك اب وعندي انواع ثانية حابة اجربهم 
برايمر للبشرة من مسليين باقي فيه شوي حابه اني اركز عليه هالفترة لين اخلصه لانه عندي اكثر من برايمر وحابه اني استخدمهم 


بودرة الوجة من كراجا ، " شعور جميل يوم تشوفين انج مستخدمه المكياج " حابه اخلصها 
 بلشر كريمي من لانكوم حابه اني استخدمه وجميل جدا على البشرة 




باليت من تارت ، حابه اني اركز عليه هالسنة واخلص اللي اقدر عليه منه .. اللي يهمني اني استخدم الايشدو لانه البلشر اعرف اني ماراح اخلصه 


بحاول كل فترة احط لكم الاشياء اللي خلصتها من المكياج يعني كل شهرين تقريبا ، او كل ماشفت انجاز حلو يستاهل التصوير 
---

افكار استخدام المكياج باكثر من طريقة : 

- استخدام البرونزر المات ك ايشدو والعكس صحيح 
- استخدام الايشدو اللي فيه لمعة خفيفة ك اضاءة للوجه ، والعكس بعد ينفع اذا عندج اضاءه حلوه عادي حطيها ك ايشدو 
- استخدام الايشدو الفاتح ك بودرة لتثبيت الكونسيلر 
- استخدام الكحل وبعدها حطي فوقه ايشدو اسود للثبات ، منها استخدمتي الايشدو الاسود ومنها ثبتي الكحل لفترة طويلة 
- استخدمي البلشر الكريمي وحطي فوقه بلشر باودر 
- استخدمي الايشدو البني ب باودر للحواجب 
- استخدام الكونسيلر ك بيس للايشدو

اذا عندكم بعد افكار لاستخدام المكياج اكتبوا لي بالتعليقات منها نستفيد اكثر 

وبس هذا موضوعنا لليوم ، الموضوع شوي طويل بس ان شاء الله يكون مفيد لكم وتبدون التحدي معاي لهذي السنة 

السبت، 27 يناير 2018

علبة لحفظ الفرش من جولي شيك


علبة لحفظ الفرش من جولي شيك 





السلام عليكم 


اتمنى تكونون بصحة وعافية ، من حوالي السنة وانا استخدم منتج جميل للفرش
كلنا نحب نحافظ على الفرش اللي عندنا ماتتكس فوق بعض ، يخرب شكل الفرشة 
او تتعرض بشكل دايم للغبار 

وانا هذي كانت مشكلتني مع الغبار انا عندي حساسية منه ، جسمي و وجهي يتحسسون منه
ف الفرش دايما معرضة للغبار ، مهما حاولت احطها في شنطة او علبة مسكرة 

شفت هالعلبة الجميلة في موقع جولي شيك وطلبتها .. افضل حل للفرش 





العبة مثل ماتشوفون اكريلك ، وهالنوع ممتااااز طبعا ، ويعيش معاج 
العلبة احلى شي فيها انها تتسكر ف الغبار مايدخل ابدا .. هذا المطلوب اصلا 

سهله وعملية في الاستخدام .. واللولو مع العلبة ، كان فيه لون ابيض بعد بس يوم اشتريها كان مخلص ف اخذت الوردي وجميل 


فيه حجمين من العلب  كبير وصغير ، اللي عندي الكبير ، اخذته لانه خفت انه الفرش الكبيرة والطويلة شوي ماتدخل .. بس ممتااازة اطول فرشه عندي تدخل وتتسكر العلبة بدون ماتلمس شعر الفرشة 



العلبة كبيرة وتشيل فرش وااااايد والله طبعا على حسب الاحجام اللي بتحطينها 

بس اكثر عدد حطيته داخل ٢٦ فرشه بين فرش العيون والوجة اللي بالعادة تكون كبيرة 

بس انتي لو عندج مجموعة اكبر ممكن تاخدين ٢ على حسب احتياجك .. بس بالنسبة لي ١ تكفيني حاليا 




العلبة جميلة وتستاهل .. اخذتها من موقع جولي شيك 

بشكل عام موقع جولي شيك فيه افكار حلوه لتنظيم المكياج والمنتجات 
فيه علب ثانية حلوه للبيوتي بلندر والارواج وغيرهم ، ادخلوا قسم المنظمات وبتشوفون الجمال 

الثلاثاء، 23 يناير 2018

عطر جنون لذر | Junoon Leather



عطر جنون من الرصاصي 


العطور وعالم العطور ، مافيه احد مايجب انه يتعطر باجمل عطر .. كل فترة ندور لنا على عطر جميل مميز 
اخترت هالمره عطر جديد من مجموعة جنون الجديدة في محلات الرصاصي 

مجموعة جنون فيها ٣ عطور نسائية و ٣ عطور رجالية 

اخترت عطر جنون لاذر | Junoon Leather



احب العطور اللي من مكوناتها الجلد ، وحاليا هالفترة اغلب العطورات صارت بالجلد وبالنسبة لي شي وايد حلو لانه صار متواجد بكثره وباكثر من توليفة ف يناسب الكل .. لانه قبل اي عطر من مكوناته الجلد يكون نوعا ما سعره مرتفع شوي ..

بس دايما عطورات الرصاصي اسعارها جدا حلوه ومناسبة للجميع .. 

العطر قوي قوي قوي ، اللي يحب العطور القوية الثقيلة اللي تحتاجين منها رشتين و وتعدل المزاج انصح بهالعطر 

اول ماترشين العطر تكون الريحة قوية ، ف تحتاجين رشتين منه ، بس اذا برد احلى واحلى  تبدا باقي النوتات تطلع .. 

جربته خلال الفترة اللي راحته اكثر من مره ، علي الجسم مااشم ريحة الجلد بشكل واضح اشم باقي المكونات ..



اما على الملابس اشم ريحة اكثر .. ف هذي النقطة انتبوا لها ، طبعا كل جسم له طريقة بالتفاعل مع العطور .. بس بكل الحالات العطر جميل جدا وعلى مزاجي بالضبط 

العطر مسائي ، للمناسبات انا مااشوفه صباحي ابدا .. حلو مع الدهن عود الاصلي والبخور يطلع شي جمييييل 

ثباته وايد حلو من ٦ الى ٨ ساعات ، ويثبت على الملابس بشكل حلو ليوم كامل تقريبا .. 

مكونات العطر :

النوتات العليا : زعفران - حمضيات 
النوتات الوسطى : باتشولي - روز - خشب الارز - ياسمين
قاعدة العطر : عنبر - مسك - جلد - خشب الصندل - عود 



شايفين مكونات العطر جميلة جدا ، قاعدة العطر هي الاجمل والاقرب لقلبي في الروايح ، ودايما واحب العطور اللي فيها هالمكونات 


سعر العطر = ٢٥٠ درهم
متوفر في كل محلات الرصاصي