Thursday, 29 December 2016

منظف الفرش من سيقما || Sigmagic Brushampoo


منظف الفرش من سيقما || Sigmagic Brushampoo 



السلام عليكم 


بالبداية مرت سنة كاملة جميلة بكل شيء ، وان شاء الله سنة جديدة وآجمل باذن الله 

اليوم بتكلم عن منتج جديد من سيقما ، منظف الفرش الجديد وهو طبيعي ١٠٠ بالمية  و مافيه عطور 
لأنه غني بالزيوت اللي بتساعد انه يفكك الميك اب من الفرش .. 


اولا المنتج مصنع من زيت جوز الهند واللي الناس تستخدمه باكثر من طريقة ، سيقما استخدمت الزيت بس ل تنظيف الفرش .. 

جربت المنتج الجميل اكثر من مره ، وحبيته .. سهل وعملي جدا في الاستخدام .. 

تحتاجين  كمية بسيطة منه جدا ، وتكفي لتنظيف الفرشة .. تقريبا ضغطتين او ٣ لكل فرشة وتحت الماي شوي وراح تبدا تطلع الرغوة 



 جربته لكذا نوع من الفرش و للايشدو او لكريم الاساس والكونسيلر .. 

عن نفسي حبيته ل كريم الاساس والكونسيلر لانه يفككهم من الفرشه بسهولة .. 

... 

الصور القادمة لتجربتي مع فرشة كريم الاساس .. 





باخر صوره تبين شلون انه المنتج كأنه يتفتت من الفرشة ، خصوصي كريم الاساس مايطلع بسهولة ودايما نعيد الغسيل اكثر من مره لين نتأكد من نظافة الفرشة زين .. والحلو بعد بعد الغسيل يترك الفرشة ناعمة 

وطبعا النتيجة النهاية حطيتها فوق الفرشة نظيفة جدا .. حبيت المنتج واكيد بستخدمة لين اخلصه .. 


Thursday, 15 December 2016

فطور Social House


فطور Social House  

السلام عليكم 


وجبة الفطور من أحب الوجبات على قلبي ، وفي كل مره أحب اروح اماكن جديدة واجرب اطباق جديدة 
وهالمره كان الاختيار ل مطعم سوشال هاوس الموجود في دبي مول  ..



منيو الفطور ماشاء الله متنوع وكبير ويناسب كل الاذواق ، زرته ٣ مرات للفطور واعجبني في كل مره 
يستاهل لانه فعلا لذيذ جدا .. 

نشوف المنيو وحاولت اصور كل شي بس ماقدرت 



هذا المنيو وطلبنا انا وصديقتي الجميلة جدا سمية حارب  ، وصورت كذا صوره للمكان الجميل ، صراحه يفتح النفس على الصبح 





...


واول شي لازم لازم لازم القهوه ، وانا من عشاق القهوه السادة ، افضلها جدا جدا وماشاء الله قهوتهم لذيذة وتجيب الراس 
نصحت فيها كذا شخص وومثلي عشقها .. 

..


 ووصل الفطور اللذيذ ، طلبي كان اومليت مع فطر، شي جدا جدا لذيذ ويذوب في الفم ، وفوق جبنة فيلادلفيا لذذذذيذة تنوكل بروحها من لذتها فيه اعشاب وحامضة شوي يمممي لذيذة ، حتى التوست كان لذيذ  .. 



و ك طبق جانبي اخترت بطاط مشوي ، بدون مبالغة لذيييييذ جدا جدا يذوب بالفم ومقرمش شوي من بره وعليه شوي بهارات واعشاب .. اعطيك ١٠٠ من ١٠ .. اعجبني جدا ..



وطلب سمية كان بيض بندكت ، مع تركي و فطر ، جدا جدا اعجبها ، وتمدحه حيل .. 



وكاي بلوقرز يطلعون لانه فيه شوي ميك اب وعطور نسولف عنهم ونصورهم .. 

بشكل عام تجربتي مع سوشال هاوس اعطيها ١٠ على ١٠ كل شي كان جميل ومرتب والاكل لذيذ وخدمتهم حلوه بصراحه ..


هل بعيد تجربتي مره ثانية ؟ طبعا واصلا رجعت لهم مره ثانية للفطور بعد 

Saturday, 26 November 2016

Cailyn Cosmetics || ماركة كيلن


Cailyn Cosmetics || ماركة كيلن



السلام عليكم 


حبيت اعرفكم علي ماركة جديدة علينا في سوقنا الخليجي Cailyn Cosmetics  ماركة كيلن

الماركة ماشاء الله بدت تنتشر اكثر بدايتها كانت في الكويت والحين الامارات ، ولاني دايما اسمع عن الماركة انها ممتازة وجودتها عالية ف حبيت ازورهم واشوف واجرب الماركة بنفسي .. 

لهم محل خاص داخل محلات دبنهامز في كل الامارات ، ف رحت الفرع اللي في دبي مول 
وصورت لكم المكان وبعض المنتجات اللي حبيتها .. 

اول شي تصميم الماركة والتعليب كله بسيط بس عملي بنفس الوقت ، راح تشوفون كحل مع فرشته الخاصة
باودر مع فرشته الخاصة .. 

والماركة ماشاء الله جودة منتجاتهم جدا جدا عالية وانصح فيها ، بما اني جربت كذا شغلة بس الماركة تستااااهل 


الاكحال .. فيه اكثر من شكل القلم العادي و فيه الجل .. القلم جربته في المحل وممتااااز بصراحه ، اما الجل كان عندي منه من قبل اللون الاسود والزيتي ، شي رااااائع جدا الجل لاينر فرشته منه وفيه اللي فوق فرشة وتحت الجل نفسه .. 
واحب هالفكرة جدا .. خصوصي انه الفرشة ممتازة .. 



ونفس شكل التعليب فيه الارواج ، عندهم خيارات منوعة من الارواج بجميييع الانواع العادية والمات والسائلة و العادية واللمعة وكل شي .. 

هم ماشاء الله متميززين في الارواج وفعلا احترت شنو اخذ وشنو اجرب من كثرهم .. الروج اللي بالصورة مكتوب انه لب بالم ، بس ابدا هو مش لب بالم روج عادي بس جمييييل جدا .. اعجبني بصراحة .. 


حاولت بهالصورة اطلع كل الارواج اللي عندهم بس للاسف ماقدرت هم اكثر من اللي تشوفونه .. 
فيه الوان مجنونة مثل الازرق الاصفر الاخضر والاسود ، وغير باقي الدرجات اليومية .. الارواج اللي على شكل قلم حلوين للاستخدام اليومي .. بعد حبيتهم .. 


وهذا الشي الجميل جدا وبعد من المنتجات اللي تنباع بشكل حلو ، cocoon Lip Stain .. مثل القلوس تحطينه على الشفايف لفترة واذا جف تشيلين الطبقة ويبقى الاثر للروج جدا حلو هالمنتج .. وفيه منه باكثر من لون .. 


الارواج السائلة والمات ، صعب اقولكم عن جمالهم شي ماشاء الله رائع جدا جدا ، انتوا تتخيلون انه عندهم منهم ٨٤ لون
ماشاء الله تبارك الله ٨٤ درجة من الارواج ومش درجات غريبة ومحد يحطها لالا لا درجات الكل يقدر يستخدمها وبشكل يومي ، المشكله انه الستاند مايكفي كل هالدرجات للاسف الشديد .. كل درجة تبينها بتلاقينها .. الالوان النيود فيه حوالي ال ٢٠ درجة .. شي ماشاء الله روعه .. بكتب بعدين تجربتي مع الدرجات اللي عندي بالتفاصيل ..

..

وعندهم مجموعة للايشدو ، هذا اللي بالصورة شي قاتل ، اللمعة جميلة جدا جدا ، للاسف نسيت اصورها على ايدي بس بمر المحل مره ثانية واصور لكم ، كمية بسيطة منه ممكن تغير لج اللوك بالكامل .. شي لذيذ 




واجمل شي خليته للاخيييير ، باليت كونتور ، بس فيه اكثر من ميزه حلوه ، فيه كنتور واضاءه و بودرة للوجة .. 
وبعد برايمر للوجه .. الباليت عملي صراحة وفيه اكثر من شي ممتاز للسفر لانه فيه كل الأساسيات .. 


وهذي الاشياء اللي عندي من هالماركة ، والماركة بعد انشهرت بالفرش الجميلة جدا خصوصي الفرشة اللي بالصورة 
ووايد لها تقليد بس الاصل من عندهم طبعا .. باختصار هالفرشة سحر في فرشة ، ناعمة على الوجه بشكل وحلوه لكل شي
كونسيلر ، كريم الاساس وكنتور .. واااايد حلوه .. وعندهم فرش بعد ثانية بس مااخذتهم بس بحط لكم موقع الماركة وتقدرون تشوفون كل شي عندهم .. 

Tuesday, 25 October 2016

THEY'RE REAL BIG GLAM LIP KIT



THEY'RE REAL BIG GLAM LIP KIT


السلام عليكم 

ماركة بنفت دايما تعودنا على المميز دائما وابدا ، كل فترة يطلعون لنا بمنتج جديد
هالمرة مجموعة جميلة من الارواج ، لكن تشبة شكل الماسكرا 



تحمست جدا يوم وصلت لي العلبة عشان اجربها واكتب رائي عنها .. 
اول شي مثل ماتشوفون علبة وبداخلها ٤ أرواج ب ٤ درجات مختلفة .. 

الشي المميز في هالارواج انها ٢ في ١ ، روج ومحدد للشفايف بنفس الوقت 
الروج اصلا ك فكرة اعطيه ١٠ على ١٠ لانه عملي وسهل وسريع ، وبعد الروج يعطي شكل امتلاء للشفايف .. 



انا من الناس اللي اقدر محددات الشفايف واحبها ولا استغني عنها مهما كان ف شي حلو ..

Flame game


Pink thrills

Revved up red

Lusty rose




مدة الثبات الى ٨ ساعات / انا بالنسبة لي ٤ ساعات .. وطبعا اللون يخف مع الاكل والشرب 
بس الحلو انه الشفايف تظل مترطبة طول الوقت .. وهذا الشي جدا حبيته .. 



اكثر لون حبيته هو Lusty rose  اللي هو اخر واحد مناسب انه يكون روجك اليومي .. 

باقي الالوان حلوه بعد بس انا مااحب الارواج البرتقالية ف ماناسبني Flame game للاسف  .. 

الارواج متوفرة في موقع وجوه الاكتروني من تاريخ ١٥ اكتوبر 
و في محلات وجوه من تاريخ ١ نوفمبر 

وسعر العلبة ب ١٤٥ درهم 

#DoubleMylips 

Thursday, 20 October 2016

زيارة لصيدليات المنارة


السلام عليكم 

زيارة سريعة لصيدلية المنارة القريبة مني .. الصيدلية ماشاء الله شاملة كل شي
الأدوية جميعها وبعد كل منتجات العناية 
" اطفال - رجال - نساء " 

نبدأ الجولة .. 












وبس هذي كانت الجولة ، الصيدلية فيها كل شي تقريبا واللي رحت لها تعتبر صغيرة في صيدليات اكبر 
وفيها منتجات اكثر .. 

..


Sunday, 9 October 2016

أماكن للفطور في دبي


السلام عليكم 


دبي مدينتي الجميلة .. دائما توصل لي اسئلة وين افضل مكان ووين هذا المكان 
ف قررت اني ابدأ سلسلة عن دبي وكل مره راح اتكلم عن شي معين 


اليوم اخترت اماكن للفطور في دبي 

بكتب لكم الاشياء اللي جربتها شخصيا واللي عندي لها صور عشان تشوفون كل شي .. 

١- ذا براس The Brass 

اولا الكوفي صاحبة اماراتي وفخوره بهالشيء ، المكان هذا قهوه ويقدم فطور وغدا وعشا وحلى ايضا 
الحلو في هالمكان انه مكان مختص بالقهوه بكل انواعها من الذ انواع القهوه اللي شربتها 
اولا لانه القهوه تطحن عندهم وحسب الطلب وثانيا لانه تحميص القهوة يكون اسبوعيا 
عشاااق القهوه راح يفهمون كلامي .. عندهم نكهات بالقهوه ممكن ما تلاقونها في اماكن ثانية مثل كابيشينو الافندر
او بجوز الهند ..

 

انا زرت الكوفي ٨ مرات ٢ منها للفطور و الباقي للكوفي طبعا 


اخترت هالطبق الذيذ  
كرواسون محشي بالبيض  ويقدم مع سلطة ، حبيت هالطبق جدا .. 
اختي جربت الاومليت بس نوعا ما كان ثقيل لانه فيه جبن واختي مو اي نوع جبن تحبه .. 
بالنسبة لها ماكان خيار موفق .. بس بالمرات القادمة قالت بجرب بدون الجبن .. 

عادي جدا ارجع اطلب هالطلب اكثر من مره .. لانه عجبني جدا 
الاكل لذيذ بصراحة اللي انا جربته يعني وايضا الحلى او المخبوزات ، لانه كل شي يسوونه داخل الكوفي . 

مكانهم في السيتي ووك التوسعة الجديدة 
و في ذا بيتش 

...

٢- تشيز كيك فاكتوري

طبعا هالمطعم مشهور معروف بالاكل واطباقة الذيذة و الكبيرة بالحجم 
بدون مبالغة مااذكر كم مره رحت له ، احب اروح له اذا بسوي شوبغ في دبي مول لانه اكل واشبع ولله الحمد وبعدها اتسوق ومااتغدا بعدها .. لانه اطباقهم حجمها كبير .. 

عندهم كذا طبق للفطور ويوم الجمعة والسبت فيه اطباق غير عن باقي ايام الاسبوع 



طبقي المفضل عندي وعند اختي هو بيض باي طريقة انتي تحبيها ومعاه بطاط بالفرن وتوست لذيذ جدا ومشبع 

وجربنا مره منهم الوافل حلو طعمه بس حجمه كبيييير جدا ماقدرنا نخلصه انا واختي .. 

مكانهم في دبي مول - ذا بيتش - فستيفال سيتي - مول الإمارات 

...

٣- Mo's كافية 



احب فطورهم جدا ورحت له ٤ او ٥ مرات وعلي فترات متباعة وماشاء الله ولا تغير طعمه 
القهوه عندهم لذيذة انا احب القهوه الامريكية .. وبعد التوست الاسمر عندهم لذيييييذ جدا .. 


طبقي المعتاد بيض مع بطاط ومعاه بصل وفلفل احمر بارد هذا بروحه لذيذ 
يقدمون مع الطبق سلة التوست مع الزبدة والمربى 



لذيذ جدا ومكان هادي وبعيد عن الزحمه وخدمتهم بعد حلوه .. 

مكانهم الوحيد في السيتي ووك مقابل النافورة 

...

٤- المخبز الفرنسي 

معروفين طبعا بالخبز والحلويات 
بس بعد الفطور عندهم حلو منتوع .. طبقي المعتاد بيض و بطاط بالفرن 
الكمية ممتااااازة جدا .. وتكفي وتخلصينها كلها .. 



ويقدمون لج مع كل طلب سلة خبز انتي تختارينة و مربى وزبدة .. 
والقهوة عندهم جيدة .. 

فيه عندهم فطور عربي وامريكي وعندهم عروض فطور رخيصة .. بس ماجربت شي غير هالطلب .. 

مكانهم اللي اروح له دايما في الوصل فيتا في شارع الوصل 

...

٥- كافية دوم 

من الاماكن القديمة والمعروفة في دبي .. اكلهم حلو من الاماكن اللي تروحين لها وانتي تبين تغيرين جو 
ليش ؟ لانه مكان هادي جدا وخدمتهم جدا حلو وابدا مايزعجونج .. احب اروح لفرعهم اللي في دبي مول
والصبح طبعا .. لانه يطل على التزلج وتشوفين الناس  وهي فعلا مرتاحة ويلعبون 

طبقي دايما البيض ، صراحة احبه سواء بره او بالبيت بس افضل بره يعني لانه الصبح مالي خلق اسوي شي
يحتاج حوسه لاني مااقدر استوعب صح الا بعد كوب قهوه .. ولاني مااقدر اشرب قهوه على معدة فاضية 
ف اكل اسهل شي .. جبن وتوست وهالاشياء .. 



عندهم انواع من البيض .. وبعد وافل وبان كيك بس ماجربتهم بصراحة .. 

بس الكرك عندهم لذيذ جدا جدا احببببه وساعات اروح عشانه .. 

لهم افرع وايد في دبي 


وبس هذا الجزء الاول واكيد كل فترة بكتب حزء ثاني