Saturday, 10 January 2015

Velvet Smooth Scholl | مبرد القدم الالكتروني من شول + تجربتي


السلام عليكم 

كلنا نحلم باقدام ناعمه ونسعى لهالشيء ، سواء بالتقشير او بالبوديكير او غيره من عنايتنا اليوميه والاسبوعيه

ماركة شول Scholl المعروفة قدمت لنا شي جديد يتخص بهذا المجال  ... 




قدمت لنا مبرد الالكتروني عشان يعطينا افضل نعومة لاقدامنا .. 

من فتره تواصلوا معاي عشان اجرب المنتج واعطي رايي فيه بكل صراحه ، وبيني وبينكم احب هالنوع من التحديات
والاجهزه عشان اشوف نتيجه حلوه ، قبلت وماقصروا ارسلوا لي واحد و ٢ هدية لمتابعاتي .. 

...

فكره الجهاز :
بديل سريع والالكتروني ل مبرد القدم اللي دائما نستخدمه ، سريع ، يستخدم فقط على الاماكن الخشنه بالقدم ..
ويوعدنا ببشرة ناعمة بعد الاستخدام الاول ... 






تجربتي معاه : 

بالاول تقريبا بعد كل شور افرك اقدامي عشان اتخلص من اي جلد ميت اول باول ، وتقريبا كل شهر او شهر وشوي
اروح لاي صالون اسوي بوديكير ، ف هالمره تركت رجولي بدون اي شي خليتها كذا على طبيعتها .. لمده شهر ونص 

كنت عادي اغسل رجولي و ارطبها بس بدون اي محاوله لازاله الجلد الميت .. 


صوره لقدمي " قبل اي شي ء " 

اول شي سويته ، غسلت اقدامي وجففتها زين وانتظرت شوي لين حسيت انها ناشفه تماما ، بعدها بديت استخدم الجهاز 
الصوت شوي بالبدايه بتحسينه مزعج بس عادي راح تتعودين ... 


بديت جزء جزء امشي واعيد علي نفس المكان اذا حسيت انه بعده فيه جلد ميت ، راح تنصدمون من كميه الجلد الميت 
واللي راح تطلع مع الجهاز على شكل بودره بيضاء ، واحاول مااطول في المكان نفسه امشي شوي شوي واركز على
جزء شوي وبعدها ارجع امشي على رجلي كامله من تحت .. لين ماحسيت انه خلاص تقريبا مافيه شي .. 

بعدها اغسلي رجولك ونشفيها ورطبيها وشوفي النعومة 


النتيجة : بكل صراحه انصدمت فعلا كل كلمه قالوها واكتبوها صح .. بشرة ناعمه من اول استخدام .. 
            روعه بكل المقايسس ، حبيتها حبيتها حبييتها ، البشرة ناعمه وابد ابد ماتحسين باي مكان ناشف او سميك من الجلد الميت ، ابدا الجلد كله علي مستوى واحد وناااااااعم ، جربت اجيب قطنه وامشيها على رجولي ولا شي علق فيها ...

تحسين بالفرق اذا لمستيها واذا مشيتي حافيه فيه فرق واضح 


رائعه ، تستاهل كل درهم فيها ، انصح فيها وبشده ، تريحك بشكل كبير ، وسريعه جدا ، ومناسبه لاي شخص رجال او نساء ... 

++ هذا رايي بكل صراحه وابدا مو دعايه عشانه هديه لي ، اللي بتحربه بتعرف انه فعلا هذا اللي صار 

ولا تتوقعون انه بيخلي رجولك بيضا وصافيه ولونها متوحد ، لا طبعا هو بس راح يشيل الجلد الميت ، هو راح يرجع 
رجلك لطبيعتها ، اللي بتلاحظ انه قدمها صارت افتح او غيره هذا بس لانك شلتي الجلد الميت اللي لونه اغمق من لونك
الطبيعي ...


جربتها لامي ، حبتها لانه اصلا امي بشرتها جافه تختلف عني ، وشفت نتيجه معاها احلى مني وبكل صراحه 
اعجبتها وتبيها لها من جمالها ...

....

جربتها لابوي ، وبما انه رجل ف اقدامهم غير مو مثلنا وبعنايتنا ، صراحه اللي مومهتم كثير ، بياخذ وقت طويل عشان يوصل للنعومه ، واذا كذا عادي قسموها على ايام ... بس النتيجه جميييله ... 


...



رايي في الجهاز نفسه ، خفيف ويشتغل بالبطاريه ، له غطا يحمي  المبرد ، وافضل انكم ترفعونه فيه مكان بعيد عن الاطفال
لانه ممكن يأذون نفسهم لانه مبرد ويجرحهم ... 

العلبه محتوياتها الجهاز + غطا الحماية + ٤ بطاريات + مبرد واحد ... 
...



المبرد بعد استعمالات كثير وطويله يمكن ماتحسون انه بنفس فعاليته ، بالامكان انهم تشترون مبرد اضافي وتركبونه
لانه التركيب سهل اصلا .. 


+ ممكن تشترون جهاز واحد وكذا مبرد ، بحيث كل واحد يكون له مبرده الخاص 
+ المبرد بعد كل استعمال تفكينه وتغسلينه بالماي ، وبعد ماينشف ركبيه بمكانه الخاص ، وممكن ترشين عليه بخاخ معقم .

سعره = ١٩٩ درهم .. في الصيدليات والمحلات الكبيره وايام بالسوبرماركت الكبير .. 

.....


هديتنا الحلوة المقدمة من شول ل ٢ من متابعاتي .. 




١- كل اللي عليك تكونين من متابعاتي بالمدونة " اشتركي من هنا عند المستطيل الازرق " 
٢- تكتبين لي بالردود  اي شي سؤال مثلا ؟ او شي تبيني اكتب عنه ؟ شلون عرفتي عن مدونتي ؟ 
وبس 
٣- الاعلان عن الفائزات بتاريخ ٣١/ ١/ ٢٠١٥ 

هذي صفحة شول على الفيس بوك Scholl
الموقع الالكتروني schollvelvetsmooth.com


" استغفر الله واتوب اليه " 

44 comments:

  1. جميل جدا ما شاء الله .. تتهني ..

    ReplyDelete
  2. ماشاء الله تتهني فيه ياااارب ❤️❤️❤️

    ReplyDelete
  3. ما شاء الله صارت ناعمة والجلد أنزال

    تكلمي أكثر عن مواضيع العناية بالجسم وكريمات التبييض للمناطق الحساسه =)

    ReplyDelete
  4. ماشاء الله ما توقعت كذا بتكون نتيجته حمستيني اجربه
    <3 😍

    ReplyDelete
  5. ماشاء الله تبارك الله جميل

    ReplyDelete
  6. I really love your reviews it's really helpful

    ReplyDelete
  7. ماشاء الله مرره عجبني حمستيني اجربه.

    ReplyDelete
  8. مرررره حبيته ماشاء الله ان شاء الله أشتري اذا مافزت فيه ههههه

    ReplyDelete
  9. حمستيني أجربه *.* ، طيب ما أدري ليه بس جا على بالي انه الأحسن تترطب بعدين أستخدم الجهاز ؛ إذا قد جربتي كلامي علميني إذا هو المفروض تكون جافة عشان يبان فعالية الجهاز ولا كيف ؟

    ReplyDelete
  10. شكراً حماس للت ربة

    ReplyDelete
  11. كنت متخووفه انه يقشر رجوولي لكن بعد هالكلام والشرح المميز تحمست لتجربته ..

    ReplyDelete
  12. يعطيك العافية عالبوست المفيد . شفت الجهاز بالاعلانات بس ما اعطيتو اهمية ومن رأيك عنو وتجربتك معا اتحمست اجربه

    ReplyDelete
  13. كثير متحمسة أجربها بس ماحصلتها بالرياض , عرفت مدونتك من رنيم الانسانه اللي فوق ردي =0 شكرا

    ReplyDelete
  14. يعطيج العافيه
    اختي متخبله عليه تبا اتجربه لانه اتشوف اعلانات عنه ع اليوتيوب يبالي اجرربه
    و يا حيي لو فزت فيه من صوبج ^^

    امم عرفت اكاونتج بالانستغرام بالصدفه عقب تابعت المدوونه الرائعه ^^

    ReplyDelete
  15. يحمس! مرة ناوية عليه لو ما فزت 😍
    ممم مدونتك عرفتها من انستقرامك، انستقرامك بتابعك فيه وحدة أتابعها ✌

    ReplyDelete
  16. يعطيك العافيه.... مررره استفيد من تجاربك ♡

    ReplyDelete
  17. جزاكِ الله خيرا حبيبتي.. بستفاد كتيير من ريفيوهاتك

    ReplyDelete
  18. صراحة من بعد هديتك الماسكات وانا اثق بكل شيء تكتبينه مرره نفعت معي وحبيتها مسامات الانف عندي صغرت وقلت ووجهي صار ناعم اذكر كتبتي انها في كارفور بس مادورت حبيتها كثير وبرجع اشتري منها ان شاء الله

    ReplyDelete
  19. ماشاءالله تتهني فيه ، اتحمست اشتريه من كلامك 😁 ان شاءالله ويعطيك العافية

    ReplyDelete
  20. الله يعطيج العافية، ما قصرتي ♡

    ReplyDelete
  21. شكرا حبيت التدوينة .. ممكن تكتبين عن افضل كريم اساس جربتيه؟ :*)

    ReplyDelete
  22. يعطيك العافية ، جميل الجهاز 😍

    ReplyDelete
  23. This comment has been removed by a blog administrator.

    ReplyDelete
  24. كنت متحمسه اجربه من فتره بس قريت ريفيو لوحده ما تمدحه كثير والحين تحمست له اكثر من كلامك 😍

    ReplyDelete
  25. مرحبا...شكرا على النصائح والتجارب الجميله والمفيده انا متابعه جديده لك من ابوظبي وعرفت عن مدونتك الجميله من الانستجرام وكثير استفدت منها شكرا ^_^ وسوالي شو احسن كريم يومي للرجول لان للاسف رجولي بسرعه تجف مع اني احاول ارطبها على طول ....اتمنى اكسب معاكي جهاز شول الجديد لان فعلا حبيته من مدحك ليه واتمنى يجيب تنيجه كمان معاي
    شكرا حبيبتي

    ReplyDelete
  26. م كانت ببالي صراحه اول بوست اشوفو عنها وشجعتيني عليها ❤️❤️

    ReplyDelete
  27. يارب افوز متحمسه اجربه وتعرفت على مدونتك من الاكسبلور

    ReplyDelete
  28. اتمنى تسوين ريفيو عن واقي شمس يكون معه كريم اساس

    ReplyDelete
  29. مشكوورة الريفيو واايد مفييد لان الصراحة ماكنت مقتنعة فيه خصوصا حق امي لانها كبيرة ف السن وريولها جافة وايد

    ReplyDelete
  30. شفت ريفيو لكارلي بايبل للالة وزامنها فترة انها نزلت بالخليج ،لك تتخيلين مقدار سعادتي 😭😭.
    مررررة انبسطت لما شفت كلامك للاله وفعلا تحمست لاقتنائها.
    خلاص الطريقة التقليدية مررررة متعبة وتاخذ جهد مش بسيط ،خاصة للي يعانون من"شطوب"قوية.وتضطرين فرك فرك فرك وضرر على اضافرك😭.
    حصلت اماكن توفرها وان شاءالله احصلها،ان شاءالله انا ربحت بالاله 💜💜💜.

    شكرا لوقتك ومجهودك الي تعطينا منوه💚💚💚

    ReplyDelete
  31. ماشاءالله .. حمستيني عليه 😍

    اعرف مدونتك من الانستاقرام ؛) ،، و نبغى مواضيع عن العنايه اكتر ❤️
    يعطيك العافيه ❤️❤️

    ReplyDelete
  32. مرحباً حبيبتي انا اتعرفت على مدونتك من خلال الانستغرام وعجبتني تجربتك عن الجهاز أتمنى اربحه معك عشان اهديه لزوجي بعد مدحك لمزايا الجهاز وانا دايما أتابعك بس المسابقة شجعتني اعمل حساب على جوجل عشان أشارك فيها ... وسؤالي هل الجهاز ًبشيل او بنعم المناطق القاسية بالقدم وشكرا الك 😘

    ReplyDelete
  33. يعطيكي العافيه عل الريفيو الرائع و حمستيني جدا اني اجربه 💗💗..

    ReplyDelete
  34. جميلة ان شاء الله اجربها 😊

    ReplyDelete
  35. من أكثر البلوق اللي أتابعها يوميًا .. فعلًا أثق في رأيك في كثير من المنتجات وأعتبر مدونتك مرجع لي..
    غير أنه في كل موضوع جديد لك ، أكون تعرفت على منتجات جديدة وأضفتها للست عندي
    ما أكذب عليك لو قلت لك أشيّك على مدونتك يوميًا تقريبًا ما عدا آخر فترة لأنّه كانت عندي اختبارات لذلك الآن رجعت لها =)



    عرفت عن مدوّنتك عن طريق الإقلاع

    الله يوفقك ويسعدك يارب

    ReplyDelete
  36. جربتها كتير روعه بس البطاريه ما ضانت كتير هاد الشيء السلبي الوحيد يلي فيها

    ReplyDelete
    Replies
    1. المفروض يخلونه ع الكهرب مباشرة .. افضل

      Delete
  37. وأنا محتارة اشتريه او لا وابحث عن احد استفاد منه ولقيتك

    اكيد راح اشتريه بدون تردد

    ReplyDelete
  38. This comment has been removed by a blog administrator.

    ReplyDelete
  39. شكلو حلو كتير ونفسي اجربو قو ليلي كيف اشتر بالمسابقة

    ReplyDelete
    Replies
    1. هلا والله . انا اسفه جدا المسابقة انتهت من وقت طويل
      ان شاء الله في الفترة القادمة اسوي مسابقة جديدة

      Delete
  40. الاصليه صناعتها ايه بعد اذنك

    ReplyDelete
  41. الاصليه صناعتها ايه بعد اذنك

    ReplyDelete