الاثنين، 8 أكتوبر 2018

Fendi Furiosa | عطر فندي فيوريوسا



Fendi Furiosa | عطر فندي فيوريوسا 

سلسلة عطر الاثنين 



السلام عليكم 

كل اثنين نكتشف معاكم عطر يديد ، مثل ماتعرفون سلسلة عطر الاثنين مستمرة باذن الله 
عطر اليوم من فندي ، طبعا ماركة فندي عندهم مجموعة من العطور 
بس ماتعتبر عطورهم مشهورة او معروفة بين الناس 

وهالعطر بالذات مو الكل يعرفة او منتبه له ، قلت يمكن بس عندنا و بس بحثت بالنت والكل مايعرف انه فندي عنده هالعطر ، الدعاية كانت قليلة بحق هالعطر ، لانه ريحته حلوه وثباااااته قوي قوي 


Fendi Furiosa | عطر فندي فيوريوسا 

حبيت تصميم زجاجة العطر ، واللي عرفته انه مصمم مجورهرات صمم لهم هالتصميم الجميل

نوتات العطر :
العليا : فلفل وردي - برغموت 
الوسطى : زهر الجدار- ياسمين - غاردينيا
القاعدة : عنبر -خشب الغاياك 

العطر اول ماترشينه ماراح تحبين الريحة ، بس عطية كم دقيقة ويبدا يبرد ويطلع الريحة الجميلة ، كل مايبرد راح يكون اجمل واعمق ، من العطور اللي افضل ترشينها قبل بفترة اذا بتروحين لاحد ، يعني مو عند الباب لالا ابد ماينفع لانج ماراح تحبين الريحة بس يبرد راح تعجبك ريحته ، اكثر ٣ روايح راح تشمينها ، الياسمين العنبر الغاردينيا ، اكثر ٣ روايح بتشمينها
والفلفل الوردي يعطي حده حلوه للعطر 


العطر يمكن مايعجب اي شخص ، ف الافضل تشمينه في المحلات وانتي تقررين بعدها 
بس بالنسبة لي عجبني ، لانه مميز ، وثباته قوي على الجسم والملابس 

جربته اكثر من مره على الجسم ، وتقريبا الريحة تبقى ل ٦ ساعات واكثر ، اما على الملابس ف تقريبا ١٢ ساعه واكثر 


سنة اصدار العطر ٢٠١٤ 
اودوبيرفيوم ، ٥٠ مل و ١٠٠ مل 

الجمعة، 21 سبتمبر 2018

Nishane Vain & Naive عطر نيشان فين أند ناييف



Nishane Vain & Naive عطر نيشان فين أند ناييف 







ماركة نيشان للعطور النيش بدت في الفترة الاخيرة في الانتشار اكثر واكثر 

العطر هذا شرقي شوي ، من الروايح الهادية بس مميز وعجبني جدا مع اني مااحب الروز في العطور بس في هذا العطر اعجبني ♥️




نوتات العطر 
العليا : برغموت .. برتقال 

الوسطى : برقوق .. توت .. ياسمين .. خشب الأرز .. الورد 

القاعدة : التونكا .. الباتشولي .. خشب الصندل .. عنبر .. مسك 

من اول رشه بتحسون انه شوي سويت بس عطوه كم ثانية تبدأ الروايح الثانية تطلع خصوصي نوتات القاعدة بما انها الأقرب لقلبي
حبيت العطر ويستحق التجربه ♥️

الأحد، 2 سبتمبر 2018

ماسك الفحم من ديرمالوجيكا Charcoal Rescue Masque



ماسك الفحم من ديرمالوجيكا  Charcoal Rescue Masque 






ماسك الفحم من ديرمالوجيكا  Charcoal Rescue Masque 

السلام عليكم 




ماركة ديرمالوجيكا من الماركات المحببة جدا لقلبي ، استخدمها من سنين وفعلا شفت تغيير جميل جدا على بشرتي الحمدلله . ماسكات الفحم معروفه بفوائدها وماشاء الله بالفترة الاخيرة منتشرة في كل الماركات ،صار لي فترة طويلة وانا استخدم هالماسك ووايد حابته




 
ماسك بالفحم يقشر وينظف البشرة .. يزيل السموم الدهون والشوائب - ينور الوجة مع الاستخدام المتكرر

فيه نوعين من التقشير العادي و الكيميائي الكيميائي بتحسون فيه مع الاستخدام المتكرر .. .

طريقة الاستخدام :
يمد على كامل الوجة ولمدة ٣-٥ دقايق " ممكن تحسين ب لسعات او قرص - بس بعد كم دقيقة يختفي "




بعدها نبلل الأيدين بشوي ماي ونبدأ نقشر البشرة  نشف الماسك وتبين حبيبات التقشير , هالحبوب تساعد في التقشير القوي للبشرة ، وبعدها نغسل الوجة عادي .

- الماسك يترك البشرة ناعمه جدا
- يشيل كل الدهون من البشرة
- ينظف المسام بشكل جميل جدا
- يشيل الجلد الميت 

 يخلي البشرة بعد الاستخدام شوي حمرا بس بعد ١٠ دقايق يروح اللون


من افضل ماسكات الفحم المقشرة بالنسبة لي 👏🏻 يستاهل التجربة 👏🏻👏🏻👏🏻


 مناسب للبشرة العادية والدهنية

 ماانصح فيه ابدا للبشرة الحساسة والمتهيجة
لانه قوي جدا جدا ، انا بشرتي مختلطة الى دهنية ، ف ناسبني اقدر استخدمه مره بالأسبوع او مره كل اسبوعين

 بعد ماسك الفحم لاززززززم ترطيب قوي ، مممكن تستخدمين ماسك مرطب للبشرة 


السبت، 14 يوليو 2018

فكس بلس من ماك | MAC Fix Plus MATTE & Shimmer





فكس بلس من ماك | MAC Fix Plus MATTE & Shimmer


   
السلام عليكم 


ماك فكس بلس ، منو بس مايحبه ويستخدمه بشكل يومي 
انا عن نفسي احبه ولازم استخدمه كل ماحطيت مكياج .. يعتبر من الاساسيات عندي 
جربت بديل له من اكثر من ماركة بس هو رقم ١ بالنسبة لي 

..

عائلة الفكس بلس بدت تكبر اكثر واكثر .. شفنا بالفترة الاخيرة نزلوا فكس بلس بروائح مختلفة 
باللافندر - الروز - جوز الهند ، ويعتبر شي حلو لمحبين هالروايح ، بس انا عن نفسي احب النوع العادي بدون رائحه 

...

بس من فترة بسيطة جدا نزلوا نوعين جدد وانضموا للعائلة ، فكس بلس مات 
و فكس بلس بشمر لمعه خفيفة .. 




نزل بلونين الذهبي والوردي 

حبيت اللي فيهم لمعة ، يعطونج لوك ديوي بلمعه جميلة جدا ، استخدمه فقط ك اضاءة حلوه على الخدود او على الجسم 
 اللمعه جميلة جدا وناعمه يفضل انج ترشينه من مسافة شوي بعيدة عشان اللمعه ماتتكتل 




 ولازم لازم ترجين العلبة بشكل جيد جدا .. عشان الشمر يتوزع صح في العلبة ..

 


من احلى وانجح الافكار اللي سووها ماك ، مناسب للبشرات الدهنية والمختلطة ، اللي تدهن بسرعه بعد المكياج 
يعطي لوك مات بس بشكل حلو بس يشيل اللمعه من الوجة ، يشيل الدهون الزايدة ف يخلي شكل الميك اب فرش 

مناسب انج ترشينه خلال اليوم كله ، كل مادهن شوي الوجة .. هالشي حلو عشان ماتحطين بودرة كل شوي تخففين شكل الدهون 

بعد لازم ترجين العلبة بشكل جيد عشان يختلط الباودر مع الفكس بلس 

...




سعر الفكس بلس = ١٠٠ درهم 
حطيت لكم الروابط للشراء من موقع ماك 

الجمعة، 20 أبريل 2018

امبولات بيو سيل لنمو الشعر ومنع التساقط | Bio Seal



امبولات بيو سيل لنمو الشعر ومنع التساقط | Bio-SealHair Growth And Anti Hair Loss Shampoo 




السلام عليكم 


الشعر هو تاج الجمال بالنسبة لي ، احب شعري واحب اعتني فيه ، بس يعور قلبي اذا شفته يتساقط 
مو التساقط العادي ، لا التساقط اللي تشوفين خصل صغيره تطيح بايدج 


التساقط له اسباب كثيرة ، منها نقص بالفيتامينات او اذا كنتي تتبعين رجيم قاسي  او لمرض لاسمح الله 
اول شي المفروض نعرف اسبابه عشان نعالجها وبعدها نقدر نستخدم الاشياء الثانية الفيتامينات والعلاجات 
...



من سنين وانا استخدم هالامبولات، ومرتاحة عليها ، كل فترة ارجع لها عشان احافظ على شعري


اول مره استخدمها من باب التجربة ، ماتوقعت اني راح احبها لهذي الدرجة اللي لحد الحين استخدمهم
 علبة وفيها ١٢ امبولة فيها خلاصة الاعشاب والعسل الملكي ، تغذي البصيلات 

طريقة الاستخدام مثل اي امبولة تكون على شعر توه مغسول ونظيف ، تاخذين الامبولة تكسرينها وتستخدمين كل اللي فيها
على كامل فروة الراس وتدلكين الراس بالكامل عشان تتغلل للبصيلات 

الامبوله فيها ريحة بس لطيفة وبسرعه تختفي ، واصلا فروة الراس بتتشرب الامبولة بالكامل ، وبعدها
تكلمين طريقة العناية بشعرك مثل كل مره بعد الشاور 

الامبولة ابدا ماتدهن الشعر ، مثل الماي شوي وينشف اصلا .. بس الافضل تاخذين راحتج بالتدليك عشان الشعر يتغذي 

تستخدمين الامبولات ٣ مرات في الاسبوع ، يعني العلبة راح تخلص خلال شهر 

....




النتيجة اللي شفتها خلال ٣ اسبوع التساقط يقل وبشكل تدريجي وانتي بتلاحظين هالشي ، استمريت على الامبولات 
لمدة ٣ شهور متتالية و النتيجة ماشاء الله ممتاااااازة 

التساقط اقدر اقول انه صار بالشكل الطبيعي ، واقصد بالطبيعي انه يطيح بس عادي لانه لازم باليوم بتطيح كم شعره
وهذا عااااااادي جدا .. بس مايرجع يطيح بالشكل السابق 

بعد ال٣ شهور بتحسين انه في شعر يطلع مكان اللي طاح والشهر الرابع تبدين تشوفين الشعر الصغير اكثر 
اقدر اقول بتكونين في فترة من الفترات تعانين من الشعر الصغيرة هذا وماتخلين شي ماتحطين عليه عشان يترتب بس
شي جميل انه الشعر بدا ينمو 

....

هل انصح فيه ؟ 

طبعااااااااا خصوصي اني اشوف النتيجة بعيوني ، صح شوي يطول الموضوع بس المهم فيه نتيجة جميلة جدا وراضية عنها ، واللي يثبت هالشي اني لحد الحين ارجع اشتري الامبولات منها 

عشان اغذي شعري ، وهذا اللي انصح فيه اذا خلصتي كورس العلاج مدتة ٣ شهور ممكن بعد فترة ترجعين تستخدمينه لمدة شهر مره ثانيه .. او تقلليل عدد الاستخدام يعني مرتين في الاسبوع 

.....

سعر العلبة = ٦٥ درهم ل ١٢ امبولة 

مكان الشراء : محلات نزية في الامارات ، وجمعيات الاتحاد التعاونية في دبي 
صناعتها ايطالية  

الاثنين، 16 أبريل 2018

ماسك الجينسنغ الصيني والأرز من بودي شوب



Chinese Ginseng and Rice Clarifying Polishing Mask
ماسك الجينسينغ الصيني والأرز







السلام عليكم 



الفترة الاخيرة صرت احب اعتني ببشرتي اكثر واركز عليها اكثر ، اهتم فيها اكثر من خلال الماسكات 
جربت هالماسك من بودي شوب ، وماتوقعت اني ممكن ارجع اشتري ماسك حبيته ، غالبا كل مره احب اجرب شي جديد 
بس من باب التغير بس هذا الماسك شريته مره ثانية لانه يستاهل 



ماسك الجينسينغ الصيني والأرز





ماسك كريمي مقشر للبشرة ، من مكوناته عشبة الجينسينغ الصينية و مسحوق الأرز 
ينقي البشرة ويعطيها نضاره .. يخفف البقع مع الاستمرار في الاستخدام ، وينور الوجة


طريقة الاستخدام : 

مثل اي ماسك تمدينه على البشرة لمدة ١٠ - ١٥ دقيقة وبعدها يغسل 
بس طريقة غسله شوي مختلفة لانه ماسك مقشر ، بعد مايجف بالكامل تحطين شوي ماي على اليدين وتحركين بشكل دائري
لتقشير البشرة بالكامل ، ويغسل




النتيجة :

الماسك ينظف بشكل ممتاز ، ينعش البشرة ويخليها ناعمه وتتنفس ، يشيل الجلد الميت 
بتشوفين  انه الوجة ينور ، مع الاستخدام المتكرر راح تشوفين نتيجة احلى بعد كل استخدام 

من الماسكات اللي انصح فيها ، اللي يعيبها بس انه السعر شوي مرتفع حوالي ال ١١٩ درهم 
والعلبة يعني متوسطة 

اذا راح تستخدمينه مره في الاسبوع او مرتين بسرعه بيخلص



سعره ١١٩ درهم
ماسك طبيعي ونباتي
خالي من : السيلكون - البارفين - البارابين - الزيوت المعدنية 

الأربعاء، 21 فبراير 2018

٧ X ٧ | اسبوع الشامبو


٧ X ٧  | اسبوع الشامبو 


سلسلة جديدة بديت فيها على الانستقرام  ، ٧ ايام اتكلم عن نوع معين من المنتجات اقول رائي فيهم بشكل موسع 

٧ منتجات في ٧ ايام ، اخترت في البداية اتكلم عن الشامبو جربت بالفترة الاخيرة كذا نوع وحبيت انقل تجربتي فيهم 

السلسلة راح تكون في الانستقرام وبعد مايخلص الاسبوع انقل كل شي للمدونة عشان يكون موثق ومرجع للكل في موضوع واحد 

.....

٧ X ٧  | اسبوع الشامبو 


شامبو بيرت بلس بخلاصة الحنة 🍃

Pert plus with Henna Extracts 🍃 .
.
ماركة بيرت بلس من زمان كنت اشتري منتجاتها ووقفتها من زمان حباً في تجربة شي جديد بس في الفترة الاخيرة رجعت لها .. اخترت اللي بالحنة اولا الشامبو ابدا ابدا مافيه ريحة حنة بالعكس ريحته جمييييلة جدا .. الشامبو ممتاز ينظف الشعر بدون مايثقلة او حتى يخليه دهني .. .
.

انا شعري دهني ف ناسبني جدا .. وبرجع أشتريه مره ثانية 🛍👍🏻 



...



شامبو من بول متشل 🍃 Shampoo One Paul Mitchell 🍃
.
.
عندهم اكثر من نوع ، لكن جربت النوع العادي وعجبني جدا - ريحته عادية وخفيفة جدا - ينظف الشعر بشكل جمييييل جدا ، وتحتاجين منه كمية بسيطة جدا - يعطي الشعر لمعه جمييييلة جدا جدا - مناسب للشعر المعالج او المصبوغ - كمية راهيه ٣٠٠ مل ، راح يطول في الاستخدام 
سعره بين ال ٧٠ و ال ١١٠ حسب المكان اللي بتشترينه منه 

موجود على النت في بعض الموقع او في محلات نزية 


...


شامبو ٢ في ١ من بانتين " صحي ونظيف " ✨

2 in 1 Pantene Daily Care ✨
.
.
شامبو مناسب للاستخدام اليومي ، ينظف ويرطب الشعر بنفس الوقت .. حلو للي شعرها عادي الى جاف .. الدهني ماانصح فيه لانه ممكن يدهن الشعر بسرعه معاه 



...


شامبو Bain Divlent من كيراستاس 🌿


احلى شامبو استخدمته لحد الحين ❤️ من مفضلاتي دايما وأبدا ❤️❤️❤️ الشامبو مخصص للشعر الدهني واللي أطراف الشعر شوي جافة .. هذا بالضبط شعري .. صعب صعب ألاقي شامبو ينظف الشعر الدهني بدون مايجفف الاطراف ويتبعها .. بس هذا مافيه مثله😍😍😍 .
.
.
.. ترى الشامبو من افضل المنتجات مبيعا .. وغير هذا ماخذ جوائز 🥇 .
.
- ممتاز للشعر الدهني ، والاطراف الجافة - ينظف فروة الرأس بشكل ممتاز ، ويرطب أطراف الشعر - الشعر يكون فيه حيوية، خفيف ، ناعم وفيه لمعه .. الشعر الدهني متعب لانه بعض انواع الشامبو تجففه جدا لدرجة انه يفرز دهون اكثر .. او انه ينظف او يرطب الشعر ويكون ثقيل ومافيه حياه ف يرجع يلصق بالفروة - ممكن استخدامه بشكل يومي 
هل برجع اشترية ؟ طبعا 👏🏻😍❤️ .
. سعره = ١٣٠ درهم ، اللي بالصوره هو بالشكل القديم .. .
.

واكثر سؤال يوصل لي من وين نشتري منتجات ماركة كيراستاس ؟ .
.

في اي صالون معتمد في الامارات راح تلاقين ستاند خاص فيهم وفيه كل المنتجات .. عندهم صالونهم الخاص اللي بصراحة ناوية أزوره مكانهم في السيتي ووك ❤️ .
.

وعندهم موقع إلكتروني للطلب ، تطلبين اللي حابته ويوصل لج الطلب للبيت 🍃


....


شامبو Bain Satin 1 من كيراستاس 🍃


شامبو مخصص للترطيب ، مناسب للشعر العادي الى الجاف .. ترطيبة جدا جميل .. ريحته حلوه .. يرطب الشعر من الجذور الى الاطراف .. يعطي لمعه حلوه للشعر وملمسه يكون ناعم 
انصح فيه للي شعرها عادي الى شوي جاف 
اما اللي شعرها جاف الى جااااااف جدا ، فيه نوع ثاني بنفس الاسم بس الرقم يختلف بدال ال ١ ، ٢ 
رقم ٢ ممتاااااز جدا جدا للي شعرها جاف جدا ، رقم ٢ اخذ جوائز بعد ... للي شعرها دهني مثلي تبتعد عنه .. لانه راح شوي يدهن الشعر .. بس انصح فيه للي شعرها عادي الى جاف تأخذ رقم ١ ، او أذا جاف جدا رقم ٢ .
.

سعره = ١٣٠ درهم 


...


شامبو بزيت الزيتون من بالمرز 🍃

Palmer’s Olive Oil Formula 🍃
.
.
شامبو بزيت الزيتون و فيتامين E ،من بالمرز 
الشامبو ريحته حلوه ولطيفة ، يرطب وينعم الشعر 
يعطي لمعه حلوه للشعر .. ينظف الشعر من بقايا المنتجات مثل الجل السبرية وغيرهم 
اذا كان شعرك كيرلي او ويفي ، راح يهذب شكلهم 
الشامبو خالي من السولفات .. الباربين .. مناسب للكل .. بس اذا شعرك دهني بزياده ماانصحج فيه تستخدمينه بشكل يومي 

..



 Bain Densite من كيراستاس 🍃


شامبو منقي للشعر ، يستخدم ك علاج للشعر يعطي الشعر امتلاء مع الوقت .. اذا راح تستخدمين المجموعة كامله مع الامبولات الخاصة فيه .. من زمان كتبت موضوع طويل على المدونة عن امبولات للشعر تنشط الشعر وتكثفة 😍❤️ الامبولات من مفضلاتي وكل فتره ارجع اشتري علبة واستخدمها وفعلا احس بالفرق بعد مااخلص استخدامها .. لانه يطّلع لي شعر من جديد انصح فيهم وبشددددددة من اروع مااستخدمت ، اشتريتهم ٤ مرات وبرجع اشتريهم بعد ❤️ اذا حابه تقرين عن تجربتي مع الامبولات على المدونة او ادخلي هالهاشتاق وشوفي تجربتي بالكامل 
.
الشامبو راح يساعدج انج تشوفين نتيجة حلوه مع استخدامج للامبولات .. انا جربت المجموعة بالكامل الشامبو - البلسم - الماسك - الامبولات .
.
اذا برجع اشتري شي من هالمجموعة باخذ بس الامبولات .. صح الشامبو يساعد انه الفروة تكون نظيفة بس بصراحة مااحتاجه الامبولات ممتازه .
.
سعر الشامبو =١٣٠ درهم 

....


ان شاء الله السلسلة تعجبكم ، كل فترة راح يكون الموضوع عن منتجات غير باذن الله