٧ X ٧ | اسبوع الشامبو

٧ X ٧  | اسبوع الشامبو 

سلسلة جديدة بديت فيها على الانستقرام  ، ٧ ايام اتكلم عن نوع معين من المنتجات اقول رائي فيهم بشكل موسع 

٧ منتجات في ٧ ايام ، اخترت في البداية اتكلم عن الشامبو جربت بالفترة الاخيرة كذا نوع وحبيت انقل تجربتي فيهم 

السلسلة راح تكون في الانستقرام وبعد مايخلص الاسبوع انقل كل شي للمدونة عشان يكون موثق ومرجع للكل في موضوع واحد 

.....

٧ X ٧  | اسبوع الشامبو 

شامبو بيرت بلس بخلاصة الحنة 🍃

Pert plus with Henna Extracts 🍃 .

.

ماركة بيرت بلس من زمان كنت اشتري منتجاتها ووقفتها من زمان حباً في تجربة شي جديد بس في الفترة الاخيرة رجعت لها .. اخترت اللي بالحنة اولا الشامبو ابدا ابدا مافيه ريحة حنة بالعكس ريحته جمييييلة جدا .. الشامبو ممتاز ينظف الشعر بدون مايثقلة او حتى يخليه دهني .. .

.

انا شعري دهني ف ناسبني جدا .. وبرجع أشتريه مره ثانية 🛍👍🏻 

...

شامبو من بول متشل 🍃 Shampoo One Paul Mitchell 🍃

.

.

عندهم اكثر من نوع ، لكن جربت النوع العادي وعجبني جدا - ريحته عادية وخفيفة جدا - ينظف الشعر بشكل جمييييل جدا ، وتحتاجين منه كمية بسيطة جدا - يعطي الشعر لمعه جمييييلة جدا جدا - مناسب للشعر المعالج او المصبوغ - كمية راهيه ٣٠٠ مل ، راح يطول في الاستخدام 

سعره بين ال ٧٠ و ال ١١٠ حسب المكان اللي بتشترينه منه 

موجود على النت في بعض الموقع او في محلات نزية 

...

شامبو ٢ في ١ من بانتين " صحي ونظيف " ✨

2 in 1 Pantene Daily Care ✨

.

.

شامبو مناسب للاستخدام اليومي ، ينظف ويرطب الشعر بنفس الوقت .. حلو للي شعرها عادي الى جاف .. الدهني ماانصح فيه لانه ممكن يدهن الشعر بسرعه معاه 

...

شامبو Bain Divlent من كيراستاس 🌿

احلى شامبو استخدمته لحد الحين ❤️ من مفضلاتي دايما وأبدا ❤️❤️❤️ الشامبو مخصص للشعر الدهني واللي أطراف الشعر شوي جافة .. هذا بالضبط شعري .. صعب صعب ألاقي شامبو ينظف الشعر الدهني بدون مايجفف الاطراف ويتبعها .. بس هذا مافيه مثله😍😍😍 .

.

.

.. ترى الشامبو من افضل المنتجات مبيعا .. وغير هذا ماخذ جوائز 🥇 .

.

- ممتاز للشعر الدهني ، والاطراف الجافة - ينظف فروة الرأس بشكل ممتاز ، ويرطب أطراف الشعر - الشعر يكون فيه حيوية، خفيف ، ناعم وفيه لمعه .. الشعر الدهني متعب لانه بعض انواع الشامبو تجففه جدا لدرجة انه يفرز دهون اكثر .. او انه ينظف او يرطب الشعر ويكون ثقيل ومافيه حياه ف يرجع يلصق بالفروة - ممكن استخدامه بشكل يومي 

هل برجع اشترية ؟ طبعا 👏🏻😍❤️ .

. سعره = ١٣٠ درهم ، اللي بالصوره هو بالشكل القديم .. .

.

واكثر سؤال يوصل لي من وين نشتري منتجات ماركة كيراستاس ؟ .

.

في اي صالون معتمد في الامارات راح تلاقين ستاند خاص فيهم وفيه كل المنتجات .. عندهم صالونهم الخاص اللي بصراحة ناوية أزوره مكانهم في السيتي ووك ❤️ .

.

وعندهم موقع إلكتروني للطلب ، تطلبين اللي حابته ويوصل لج الطلب للبيت 🍃

....

شامبو Bain Satin 1 من كيراستاس 🍃

شامبو مخصص للترطيب ، مناسب للشعر العادي الى الجاف .. ترطيبة جدا جميل .. ريحته حلوه .. يرطب الشعر من الجذور الى الاطراف .. يعطي لمعه حلوه للشعر وملمسه يكون ناعم 

انصح فيه للي شعرها عادي الى شوي جاف 

اما اللي شعرها جاف الى جااااااف جدا ، فيه نوع ثاني بنفس الاسم بس الرقم يختلف بدال ال ١ ، ٢ 

رقم ٢ ممتاااااز جدا جدا للي شعرها جاف جدا ، رقم ٢ اخذ جوائز بعد ... للي شعرها دهني مثلي تبتعد عنه .. لانه راح شوي يدهن الشعر .. بس انصح فيه للي شعرها عادي الى جاف تأخذ رقم ١ ، او أذا جاف جدا رقم ٢ .

.

سعره = ١٣٠ درهم 

...

شامبو بزيت الزيتون من بالمرز 🍃

Palmer’s Olive Oil Formula 🍃

.

.

شامبو بزيت الزيتون و فيتامين E ،من بالمرز 

الشامبو ريحته حلوه ولطيفة ، يرطب وينعم الشعر 

يعطي لمعه حلوه للشعر .. ينظف الشعر من بقايا المنتجات مثل الجل السبرية وغيرهم 

اذا كان شعرك كيرلي او ويفي ، راح يهذب شكلهم 

الشامبو خالي من السولفات .. الباربين .. مناسب للكل .. بس اذا شعرك دهني بزياده ماانصحج فيه تستخدمينه بشكل يومي 

..

 Bain Densite من كيراستاس 🍃

شامبو منقي للشعر ، يستخدم ك علاج للشعر يعطي الشعر امتلاء مع الوقت .. اذا راح تستخدمين المجموعة كامله مع الامبولات الخاصة فيه .. من زمان كتبت موضوع طويل على المدونة عن امبولات للشعر تنشط الشعر وتكثفة 😍❤️ الامبولات من مفضلاتي وكل فتره ارجع اشتري علبة واستخدمها وفعلا احس بالفرق بعد مااخلص استخدامها .. لانه يطّلع لي شعر من جديد انصح فيهم وبشددددددة من اروع مااستخدمت ، اشتريتهم ٤ مرات وبرجع اشتريهم بعد ❤️ اذا حابه تقرين عن تجربتي مع الامبولات على المدونة او ادخلي هالهاشتاق وشوفي تجربتي بالكامل 

#cwh_haircare .

.

الشامبو راح يساعدج انج تشوفين نتيجة حلوه مع استخدامج للامبولات .. انا جربت المجموعة بالكامل الشامبو - البلسم - الماسك - الامبولات .

.

اذا برجع اشتري شي من هالمجموعة باخذ بس الامبولات .. صح الشامبو يساعد انه الفروة تكون نظيفة بس بصراحة مااحتاجه الامبولات ممتازه .

.

سعر الشامبو =١٣٠ درهم 

....

ان شاء الله السلسلة تعجبكم ، كل فترة راح يكون الموضوع عن منتجات غير باذن الله 

October Empties اشياء خلصتها في اكتوبر

السلام عليكم 

منتجات خلصتها في شهر اكتوبر وهالمره خلصت اكثر وودي اخلص كل السامبلز اللي عندي

بس طبعا هو مو شي مستحيل بس احاول كل فتره اطلع شي وابدا استخدمه .. 

...

...

متابعتكم لي تعني لي الكثير 

...

من اليمين : 

- شامبو بانتين للشعر الجاف ، صار لك فتره وهو باقي فيه ربع ، خلصته وفضينا مكان بالحمام ، حلو مافيه شي ..

- بلسم دوف من المجموعه اللي فيه زيت مغذي ، ماناسبني ابدا لا البلسم ولا الشامبو ، يثقل شعري ويخليه يدهن اسرع .. هو خلقه مو ناقص انه يدهن .. احس مناسب للي شعرها جااااف جدددا .. 

- شامبو معالج من ويلا ، ممتاااز صراحه على سعره واداءه جميل جدا ، حتى البلسم حلو ، بس بعدني ماخلصت البلسم 

ماادري شلون الناس تخلص البلسم قبل الشامبو ، هذا الشي مستحيل عندي ... 

- امبولات كسراستاس ، كتبت عنها هنا ، خلصتها من زماااان بصراحه بس خليتها عشان اكتب عنها بس ممتازه جدا ...

انصح فيها ... 

...

- مانيتكس ، مزيل للمناكير ، هالشي ممتااز يشيل اللون بشكل حلو وسريع ومايجفف الاظافر ابد ، والشي الحلو انه كل منديل مغلف بروحه وهالشي حلو ، ممكن تاخذين حبه معاك لاي مكان . 

- زبده الشيا من بودي شوب ، من احب الانواع على قلبي ، ترطيب جميل جدا وبشرتي تتشرب الزبده هذي بشكل حلو 

وريحتها حلوه ومميزه ، اكييد برجع اشتريها ... 

- لوشن للجسم بريحه الخيار والبطيخ من باث اند بودي ، ريحته يعني حليوه ، وانا ماافضل اللوشن منهم احب الزبده اكثر .. بشتري الزبده بس مو بهذي الريحه .. 

- محلول للعدسات ، حبيته هذي ثاني علبه اخلصها ، وباقي لي علبه صغيره فيها النص .. بس جميل ومريح للعين ..

....

- عطر من لوفي ، جمييل حبيته بصراحه بس تمنيت لو ثباته اكثر ،، بس حلو وعجبني 

- شمعه بريحه التفاح الاخضر ، هي خلصت بس ماخلصت ، فيه انواع من الشموع ماتذوب عدل وهذي منهم .. 

...

- قطن للوجه والمناكير من جونسن ، حلو بس فيه احلى منه " سانيتا الظاهر " 

- ماسك للوجه من اولاي ، ماشفت شي مبهر منه ، وباقي لك واحد واخلصه منه .. 

- ماسك مرطب للوجه من كلارنس لترطيب الوجه ، حبييييييته فعلا يرطب وينفع بالايام الجايه اللي بيبرد فيها الجو الجميل..

- عطر سامبلز ، ماحبيت ولا واحد منهم .. 

- امبوله من بانتين ، المفروض انه ترطب وتسوي شي جميل ، عاديه جدا كانها بلسم ماتفرق عن البلسم باي شي .. ماانصح فيها ... 

...

- شور كريم من Elemis ، هالشي خيااااالي خيالي خيالي ناعم على الجسم ، والريحه شي شي شي شي شي روعه روعه روعه ، حبيتها ابي اشتري الحجم الكبيييير و عرفت انه عندهم عطور بعد هالماركه وودي لو القى نفس هالريحه عطر لاني بشتريه من كثر ماعجبني شي والله .. 

- كريم لليد والاظافر من ديرمالوجيكا ، هالكريم يحتاج وقفه وتصفيق حار جدا له ، بطل شوي عليه ، multivitamin hand and nail treatment , رائع جدا جدا جدا ، لازم تجربونه ، يعطي نعومه حلوه تحسين ايدك رجعت لها الحياه من جديد ... 

- كريم لليد والاظافر بعد من كودالي ، جميييييل جدا هالكريم والكريم اللي فوقه وقعت في حبهم ، هذا كريم تحسينه شوي ثقيل وخفيف بنفس الوقت تسوين شويه مساج خفيف وتتشربه البشره بثواني ، بس ترطيب حلو بصراحه مو دبق ابدا .. 

هالثلاث اشياء ابي ارجع اشتريهم ... 

....

وبس هذا كل اللي خلصته هالشهر .. 

وفيه اشياء بديت اخلصها وان شاء الله اكتب عنها وتكون لشهر ١١ ... 

كيراستاس دنسيفيك منشط كثافة الشعر Kérastase Densifique Capillaire Hair Density

السلام عليكم 

تقرير بسيط لتجربتي مع هالمنتج ، من فتره شوي طويله ، قررت اقص وارتب شعري 

وكنت اتكلم مع نانسي الجميله من صالون باتشي اند لوتشي عن شعري وقتها خف التساقط والحمدلله

بس فيه فراغات بشعري وماصار يطلع فيها شعر و انه يطول على مايطلع ، قالت لي اخلص قص واراويك منتج جميل 

عطتني هالمنتج وهو عباره عن امبولات تستخدم يوميا على الشعر وتزيد كثافته وتطلع الشعر اللي في فتره الخمول

مااعرف اذا تعرفون هالمعلومه انه الشعره تمر بمرحله خمول وهالمنتج ينشطها ، وفعلا مكتوب هالشي على العلبه 

و مكتوب بعد انه هالمنتج يطلع ١٧٠٠ شعره اذا استخدم لمده ٣ شهور متتاليه ... 

هذا وصفها بشكل عام و عن نفسي حبيت الكلام و شركه كيراستاس اثق فيها ماجربت منها شي مافادني 

.... 

بالبدايه

- هالمنتج ينفع للرجال والنساء 

- افضل استخدام له عشان تشوفين نتيجه حلوه لمده ٣ شهور . 

- لازم لازم تعرفين انه برنامج عنايه ماينفع يوم ايه و١٠ لا وتكاسلت لا ماينفع . 

.... 

تجربتي انا ، انا اشتريت علبه وحده بس يعني لشهر واحد فقط من باب التجربه .. وبكتب النتايج اللي شفتها ... 

العلبه مثل ماتشوفون شوي كبيره وفيها ٣٠ امبوله ، كل وحده ليوم ومرقمه بالترتيب ، ويجي معاهم عصار 

اول شي وقبل الاستخدام تكونين ماخذه شور وشعرك نظيف و يفظل انك تغسلينه بشامبو منقي 

واذا بتستخدمين بلسم لا تحطينه ابدا على الفروه ابداااا ... نبي الفروه تكون نظيفه عشان الامبوله .. 

بعد الشور جففي شعرك بالمنشفه ...  اخذي الامبوله وافتحيها واخذي العصار وركبيها مثل الصوره ... 

وكذا صارت جاهزه للاستخدام ، شي سهل وسريع واهم شي انه ماتحتاجين انك تكسرين الامبوله لاني استخدمت شي كذا وساعات مااقدر اكسرها .. 

حطي الامبوله على كل فروه راسك  امشي خصله خلصه بالطول من مقده الراس الى نهايته .. خلصيها كلها 

وبعدها سوي مساج خفيف للفروه عشان تتشرب المنتج ... 

لا يدخل ابد في عينك ، محذرين من هالشي ... 

اول مره بتحطين المنتج على شعرك بتحسين بحراره خفيفه ، عادي لا تخافين هالحراره لمده كم ثانيه وتروح ...

ريحته شوي قويه بس ريحه شي لطيف نوعا ما ... 

المنتج بسرعه تتشربه الفروه و اصلا ماتحسين انه فيه شي حطيته كانه تبخر ، وتقدرين تسوين اي شي بشعرك 

تخلينه عادي او سشوار او اللي تبين مايهم ، والشعر يكون نظيف .. 

++ انا كنت اغسل شعري كل يومين لانه اليوم الثاني يكون شعري شي ماادري شلون صاير ، ولانه شعري دهني يعني 

ماينفع اطلع فيه ولا اسوي فيه شي ، اختي جربت هالعلاج بعد ونفس الاحساس بعد اليوم الثاني شعرها ماادري شلون 

مع انه جااااف جدا .... حطي هالشي ببالك اذا انتي تداومين بمكان ماتغطين شعرك فيه .. 

الاشياء اللي كنت احس فيها اول اسبوعين ، حكه بالفروه ، وكلها بعد مو جزء او جانب واحد كل راسي 

بس مو شي مزعج او انه يأذي ، بس شي غير ... 

بنهايه اول اسبوعين بديت احس  بشي بشعري ومااعرف شنو هو على الاسبوع الثالث 

بديت المس فروه راسي واحس بشعر صغاااار جدا كانه دبابيس وين مااحط اصبعي احس بهالشي ، مو بس استانست

الا طرت من الفرحه بصراحه ، اشوف نتيجه الشي اللي استخدمه وقداااامي  ، شي يونسسسسس 

الشعره اللي تطلع تكون اسمك وانا لاحظت هالشي لانه شعرتي نفسها خفيفه و الحين صار مكس بس حلو بصراحه ...

+ برنامج العنايه هذا يحتاج وقت من يومك لازم تكونين عارفه هالشيء .. اذا ل ٣ شهور اعرفي انك قادره تسوين هالشي

كل يوم يعني ٩٠ يوم .. فكوني جاده مع نفسك .. 

انا عن نفسي شهر وشوي تملين من الموضوع بس النتيجه رووووعه ، واحلى شي بعد شهرين انه اشوف شعري 

وانا اسشوره انه في صغر صغار وصار اطول وبدا يدخل مع الشعر الطويل .. 

شي سلبي مااشوف شي سلبي بس شوي سعره مرتفع .. 

هل بعيد التجربه ايه نعم وان شاء الله وباذن الله  لمده ٣ شهور .. 

.....

سعر العلبه الوحده ب ٦٥٠ درهم 

ومتوفره باغلب الصالونات الكبيره  ، انا اخذتها من صالون باتشي اند لوتشي اللي في جميرا

بس شفت منتجات كيراستاس في اغلب الصالونات 

اذا انتي مو من الامارات ، اي صالون في الدور الاول في دبي مول عندهم 

+ فيه كذا صالون قريبين من محل ماك للميك اب ، سسترز او ذا لوفت ...