الخميس، 29 يناير 2015

زيارتي لـ ايدو كافية || Edo Cafe



السلام عليكم 

من فتره زرت محل جميل دايما اشوفه في سيتي ووك ، احد الاماكن المفضلة عندي،
زرت المحل بدعوة منهم ... 




قابلت الجميله كرستين وبدت تتكلم عن المحل و شنو فكرته ومن وين ؟.. 

المحل بدأ من دبي بس تميز بشغله جديده هي " الموتشي " ، وهي حلوى يابانية مشهوره ،
مصنوعه من كعكة الازر اللزجة او traditional Asian sticky rice cake ، ومعروف عن اليابان عشقهم للارز ولهم استخدامات كثيره فيه .. " اليابانيين يقدمون هالنوع من الحلوى بس لضيوفهم في رأس السنة فقط " 
اصحاب المحل حبوا انهم يقدمون شي جديد في الخليج ... 




كل شي يدخل في صناعة الموتشي طبيعي مافيه اي مواد حافظه او اي شيء ، كل شي طبيعي
ومعتدل ، مع انها حلى ، بس ابدا مو حاليه بزياده بالعكس اشوفها معتدله جدا .. 
مميزات الموتشي انها قليله السعرات وصحيه ، تناسب الاطفال والكبار 
...

انواع الموتشي اللي يقدمونه " كريم و ايسكريم " 
النوع اللي جربته واللي بتشوفونه هو الكريم 

عندهم ٢٠ نكهة من الموتشي 
" شاي اخضر - ككاو ابيض - ككاو مع حليب - مانجو - تشيز كيك -ليمون -فستق -ذره -خوخ
- بلوبري - مكس بيري - موز وغيرهم "




النكهات من اليمين " فستق - مانجو - ذره - تشيز كيك - ككاو ابيض " 







الطعم يم يميي ، انا وحده احب الفستق باي شي وطعمه هنا لذيذ جدا تشوفين الفستق مطحون ، والمانجو فعلا نفس الطعم،
اما الذره كان شي غريب بالبدايه وهي تتكلم عنه بس والله حلو طعمه الذره مافيه كريم من داخل ، بعدها التيشز كيك 
كاني اكل قطعه تشيز كيك حتى البسكوت المطحون حاشينه داخل ، اما الاخيره واللي ابدا ابدا ماتوقعت انها راح تعجبني
هي الككاو الابيض انا ابدا مو من محبين الككاو الابيض بس روووووعه رووووعه رقم واحد في المبيعات 
يوم اكلته قلت لها عرفت ليه هو رقم واحد ، لذيذ .. 

...

ناخذكم بجوله صغيره للمحل نفسه 










الديكور جميل انيق وبيسط ، له جلسات داخليه وخارجيه ..

..

غير الموتشي يقدمون قهوه بانواعها و ايضا شاي بانواعه الفاخره 
عندهم الشاي الورده اللي تتفتح 

انا جربت القهوه وصراحه روعه وانا انسانه عاشقه للقهوه اعرف اطلع النوع الزين واللي يجيب الراس 
وهذي حلوووه حبيتها ..






..

في النهايه ماقصروا معاي واعطوني هديه لذيذه استمتع فيها مع اهلي 








تحفظينها بالفريزر لانها صالحه لمده سنه ، وقبل الاكل طلعيها بره لمده ٥ دقائق

وقطعيها لآربعه اجزاء و استمتعي بالطعم .. 


رايي بكل صراحه : 
شي اول مره اجربه كطعم وفكره وكل شي ، ماتوقعت ابدا ابدا اني راح احبه ،
خصوصي من وصفه ، يعني عجينه مطاطيه شوي ومحشيه فاكهه وكريم ، احب الفاكهه 
بس الكريم ابدا و مو صديقي ابدا ، بس هالموتشي عكس كل شي ، لذيذ وحبيته 
طعم الطبقه اللي فوق كانه طعم الحلاو المطاط اللي نشتريه بالوزن من المولات ، وطعم الفاكهه 
والكريم روعه مع بعض ، حبيت توليفه الطعم شي يدغدغ المشاعر .. 

برجع اشتري منه ؟ 
ايه ، بس مو شي دائما يعني من فتره لفتره كتغيير 
حبه وحده كافيه من كوب من القهوه 
...

المحل له فرعين في دبي كل فرع يقدم الموتشي بس كل فرع فيه شي مميز غير عن الثاني
فرع سيتي ووك يقدم سلطات ، وفرع مردف يقدم اطباق خاصه بالفطور 
وافل ، بانكيك وكريب 

موقعهم : www.edosweets.com
الفيس بوك : Edo-Cafe
انستقرام : edocafe

عندهم خدمة توصيل للمنازل 
يقدمون خدماتهم لاي مناسبة زواج ،اعياد ميلاد وغيره .

هناك تعليقان (2):

  1. شجعتيني الصراحه يبالي ازوره... تسلمين حنون ♡♡

    ردحذف
    الردود
    1. هلا حبيبتي ،
      منورتي يالغاليه ،جربيه واكتبي لي رايك
      هو شي جديد يمكن يعجبك ويمكن لا
      فيه ناس حبته ولا ابدا ماحبته ، وان شاء الله يعجبك

      حذف