Tuesday, 11 November 2014

September Empties منتجات خلصتها في شهر سبتمبر

السلام عليكم 

اشياء خلصتها في شهر سبتمبر ، مو وايد بس خلصت كذا شغله ... 



...




من اليمين : 

كريم للجسم من باث اند بودي ، احب هالنوع وهالريحه عشق ، هذا والزبده بالنسبه لي افضل من اللوشن ، اللوشن احس بشرتي ماتتشربه مثل هذا والزبده ... 

كريم للوجه من ديرمالوجيكا  skin smoothing cream ... اروع واحلى كريم للوجه استخدمته ، ريحته شوي قويه
بالبدايه ماتحبينها او تتقبلينها بسرعه بس خلاص صار عادي عندي ، جميل جميل جميل اخذته بعد ماسويت فيشل عندهم
المكان جميل من احلى الاماكن المختصه بالفيشل لانه طبيه وناس فاهمه شغلها ، وماعندي مشكله ادفع بشي ممتاز ويناسبني ... 

بودره جونسن للاطفال ، هالشي عشق ابدي ومااستغني عنها ابدا ومن سنين وانا استخدمتها ... 

مست للجسم من كول اند كول ، عادي اوصل لمرحله اني اشربه من كثر مااحبه ، ريحه بودره ونظافه واتسبح فيه مو اتعطر 
احبه اذا بطلع بره ارشه علي جسمي وملابسي وعبايتي ،، لاني اصلا مااحط عطر وانا طالعه ابدا .. فاحب كذا شي ريحته خفيفه ولطيفه .. 



....


زيت للاظافر من ايسنس ، جميل وفعلا يرطب الاظافر وكميته حلوه جدا ، اصلا ماتحتاجين كثير ، وسعره حلو على مفعوله الجميل ب ١١ او ١٥ درهم بس 

عطر سامبل من اسكادا ، ريحته على ورد اكثر ، مو ستايلي بس خلصته لاني ابي اخلص من الاشياء اللي متكوده عندي ..

شامبو وبلسم للشعر سامبلز من فليب بي ، هالمجموعه مجموعه عود رويال ، ريحتها خياااااليه جميله جدا حق مناسبه وريحته تظل بالشعر لفتره ، حلوين ،، البلسم فيه قلتر هو ليش ماادري مكتوب شاين على العلبه بس القلتر ماله داعي واصلا مااشوفه على شعري بعد ماغسله .. يعني حسيته دلع فقط لا غير ... 


عطر وسامبل بعد ، عادي جدا وماحبيته ، رشيته بالغرفه على السرير.. 


ماسكرا ايسينس سويت عنها ريفيو هنا ، حليوه بس مابرجع اشتريها بسرعه نشفت ، و الالياف اللي فيها ازعجتني مع العدسات ... 

...



عطر سامبل من ايلي صعب ، انا احب العطر اللي نزله اول واحد ، فخم وحلو ، هذا النوع بعد حلو بس صيفي وخفيف ..

مناديل انا احبها للشنطه ، ممتاااازه رطبه وتنظف من قلب وغير هالشي ، ريحتها ريحتها ريحتها شي شي شي ريحه بودره واطفال وشي لذيذ ومنعش وجميل ، احب هالروايح واعشقها ... 




كريم العيون من ديرمالوكيجا ، intensive eye repair ... من اروع كريمات العيون اللي استخدمتها بحياتي كلها 
اجمل كريم عيون ، يرطب يرطب يرطب ، جميل جميل جميل ، لو شنو ماتكون عيونك هذا برطبها ، المنطقه متقشره او لا 
هذا يعالجها تقريبا بيومين ، شي جميل جدا صح غالي شوي حوالي ١٨٠ درهم او شي كذا ، طبعا فيه كريمات عيون باسعار خياليه ، بس هذا يستاهل كل ريال ، والحلو اصلا بكريمات ديرمالوجيكا انه صالحه للاستخدام لمده ٢٤ شهر 
يعني سنتين بالضبط ، 

لاني شريت مجموعه كامله للسكن كيرر من عندهم حوالي ال ٢٠٠٠ درهم ، بس يستاهلون واكثررررر بعد كل شي شريته حبيته وبرجع اشتريهم باذن الله ، بس اخلص من البلاوي اللي عندي ... 


وبس هذي كل المنتجات اللي خلصتها في شهر ٩ ،، بعد كم يوم بحط لشهر ١٠ لاني ماحبيت الموضوع يكون طويل 

... 

اذا جربتوا شي منهم قولوا لي رايكم فيهم ... 

No comments:

Post a Comment