الأربعاء، 19 نوفمبر 2014

سلسلة العناية بالشعر ٢ - زيت جدايل للشعر




السلام عليكم 

رجعنا نكمل سلسله الشعر اللي بديتها ، وان شاء الله كل فتره احط شي تابع لموضوع الشعر
والعناية فيه ... 


اليوم عن تجربتي مع زيت جدايل للشعر من عبد الصمد القرشي 



...



بالبدايه بذكر ليش من الاساس استخدمت هالزيت ؟ 

اللي متابعني من الاول يعرف اني نزلت وزني وااايد وكتبت عن هالشي بالمدونه ب سلسله الحياه الصحيه ، وآثار نزول وزني ، شعري تاثر جدا ، يتساقط بشكل خيالي شي مو طبيعي ، فيه اماكن صار فيها فراغات وخف واااايد عن اول

وشعري بطبيعته زين الشعره ناعمه بس ويفي ، عاجبني من الاول ولحد الحين ، ماحبيت اشوف انه يتساقط 
حاولت اعدل اكلي اكل سلطه اكثر واكثر من الجرجير لانه معروف بفوايده للشعر ، ماشفت تحسن واضح 

ف بحثت بالنت ولقيت تجربه وحده عن هالزيت ، وفعلا رحت ل القرشي واخذت لي علبه من الزيت الخاص بالتساقط ..
وكان ب ٥٠ درهم و الحين كانه ب ٧٠  .. من زمان ماشريته بصراحه " وغيروا شكل العلبه " 

...




طريقه استعمالي له :    " نفس الطريقه اللي مكتوبه على العلبه " 

اخذ شوي واحطه بعلبه او صحن صغير واسخنه شوي يا بالمايكروويف او على النار ، بس شوي يكون دافي مو حار 
وبعدها اخذه بقطنه اغمسها بالزيت وابدا احطه على فروه الراس بس على الجذور ، امشي على كل راسي بالزيت 

وبعد مااخلص احاول اسوي مساج للراس لمده دقيقه الى دقيقتين ،اذا خلصت لفيت شعري ورفعته لمده ساعه 
وبعدها اخذ شور 

الزيت مايطلع بسرعه من الشعر وهذا عيبه بس افضل طريقه ، تطلعين اي زيت من شعرك 
حطي شامبو اول قبل ماتبللين شعرك ، ادري بتقولون غلط ، بس جربوبها ،، حاولي تدخلينه بكل شعرك 
وبعدها بلليه بشويه ماي ، وبعدها حاولي تغسلينه زين كذا راح يبدا يرغي اكثر وماتحتاجين تغسلين شعرك ٣ او ٤ مرات بالشامبو ... 

هذي طريقه 

والطريقه الثانيه وسبق كتبت عنها 

اني كنت اروح لصالون او مشغل ، اخليهم يحطون لي الزيت بنفس الطريقه ويكون دافي 
ويسوون لي مساج من قلب لراسي ، واذا خلصت يحطون لي بخار لمده نص ساعه او اكثر ،
،اذا خلصت اخليهم مره ثانيه يسسون لي مساج وبعدها يغسلون شعري وخلاص 

بس كنت اروح لهم كل اسبوع مره وتقريبا لمده شهرين ، وبعدها كل مارحت للصالون اخذ الزيت معاي واخليهم يحطونه لي

... 

خلال هالشهرييين شفت العجب ، التساقط قل ، انا اشوف هالشي بعيني اذا امشطه اشوفه اقل بالفرشه وحتى بالحمام مايطيح وايد ، وهي لاحظت بعد انه مايطيح بايدها مثل كل مره ... 

الحلو انه بعد هالشهرين كنت اروح واسوي شعري مرتين بالشهر تكاسلت نوعا ما ، بس مره سشورت شعري بنفسي 
وانصدمت من كميه الشعر الصغير ، ماشاء الله ، حبيت هالشي وعشقت شعري من جديد 

... 




بعدها اخذت زيت التساقط مع زيت تطويل الشعر ، خلطتهم مع بعض بكميات متساويه 
ورجعت للصالون من جديد ومع الاستمرار ، 



والنتيجه شعري تساقطه اقلللل بكثير اقرب الى الطبيعي جدا ، وشعري اطول 
مااقول انه طول ١٥ سانتي لا بس اطول من المعتاد واسسسسرع ، وهالشي حلو لاني اشوفه بعيني 
وانا اعرف شعري 

...




اللي بتقول تروحين الصالون كل اسبوع وتدفعين ايه ماعندي مشكله دام هالشي راح يحل مشكله شعري 
وعادي مو شرط اكشخ صالون بدبي ، اي صالون نظيف ومرتب وامين ، واغلب الصالونات او المشاغل يكوون
عندهم عروض بنص الاسبوع ممكن تستغلون هالايام وتسوون هالشغله بنص السعر وهذا اللي كنت انا اسويه 

او كنت اخذ بكج كامل اسوي ٤ مرات حمام زيت واخذ شي فري ... 



+ اللي عندها جهاز البخار بالبيت هالشي ممتااااز لانها بترتاح من الروحه والرجعه 

+ الزيت اشتريه من المحل نفسه لا تشترينه من مكان ثاني عطار او غيره 

احنا في دبي ينباع بالمحل وبنباع في جمعيه الاتحاد التعاونيه لانهم موزع معتمد 

...

مواضيع ممكن تفيدك ولها علاقه بالعنايه بالشعر 

الجزء الاول 





هناك 7 تعليقات:

  1. مساء السعادة ~
    تقبليني كزائرة جديده لمدونتك الجميله ودائمة اكيد ؛*
    طبعا حاليا طيران على باقي التدوينات السابقه عن هالموضوع لأنه شدني
    بس حبيت اذكر تجربتي معاه قبل لا اصبغ شعري فعلا تساقط شعري قل وكنت الاحظ الطول اكثر
    يطول شعري بشكل سريع جدا عن المعتاد
    حاليا ودي ارجعله بس مادري منو الي مخوفني من الزيوت للشعر المصبوغ لوول
    عموما تدوينة جميلة جدا جدا
    حبيت اهتمامك و الريفيو وكل شي ;$
    بانتظار جديدك ~

    ردحذف
    الردود
    1. مساء الورد حبيبتي ،
      حياتي انتي حياك يالغاليه بيتك مو زايره ،

      ايه فعلا يعطي طول واسرع من المعتاااد ، بس شي حلو صراحه تشوفين شعرك يرجع يطول
      انا احب اتابع واشوف اذا فعلا الشي يفيدي ويتغير او لا

      ارجعي له ، ايه هم يقولون ماينفع ينه ممكن يغير لون الصبغه والافضل حمام زيت مو زيت عادي
      بس صراحه مايهمني انا المهم اعالج شعري اطوله واقلل من هالتساقط اللي ذبحني

      شكرا حبيبتي من ذوقك يالغاليه

      حذف
  2. اشتقت لمدونتك ومواضيعك الجميلة
    حبيت الزيت ودي اجربه واضح انه كويس
    بس كيف ريحته؟؟

    ان شالله احصله بالسعودية
    يعطيك العافية ياعسل

    ردحذف
    الردود
    1. هلا بالزين والنور كله ،
      يختي اشتقت لك وحيل بعد ،
      جربيه ممتااااز صراحه ، هو شوي ريحته موحلوه بس شي شيييين مره بس يعني مو شي لطيف
      بس خلاص انا تعودت عليه

      بس مثلا اذا عندك مناسبه يفضل تحطينه قبلها بكم يوم عشان الريحه ، او بخري شعرك وخلاص ماتشمينها

      ايه متوفر انا شفته من قبل
      الله يعافيك يالغاليه ويالله اشتقنا لك

      حذف
  3. حبيت التدوينة كثير و استفدت منها
    و إن شاء الله بجربه :)
    الله يعطيك العافية ❤

    ردحذف
    الردود
    1. هلا والله يالغاليه ،
      الله يحلي ايامك يااارب ،
      وان شاء الله بعد ماتجربينه ترتاحين عليه وتشوفين منه الفايده اللي بتعجبك ياااارب

      الله يعافيك حبيبتي

      حذف
  4. أزال أحد مشرفي المدونة هذا التعليق.

    ردحذف