Thursday, 10 September 2015

نصائح لتوفير فلوسك ! الجزء الأول




السلام عليكم


شلون توفرين فلوسك ؟ وتشترين كل شي بخاطرك ..

موضوعنا لليوم نصايح وافكار تساعدك على توفر مبلغ حلو ، سواء كنتي تبين تحتفظين فيه في حسابك
او اذا تبين تشترين شي عليه القيمة .. " تدليع النفس جميل جدا "

الموضوع راح يكون من جزئين عشان مايكون طويل ، لانه شوي طويل 





...


ساعات يكون عندك مبلغ معين وفي فترة تشوفينة يتبخر قدامج ، ليش وشلون ماتدرين ؟
لانه بكل بساطة يروح لاشياء بسيطة وأغلب الوقت تروح لاشياء مالها داعي .. صح ؟


اولا وقبل كل شي .. شوفي نفسك انتي وين تصرفين فلوسك اكثر شي ؟ ملابس - مطاعم - ميك اب وعناية - احذية - شنط - اجهزة الكترونية

اكتبي كل شي تشترينة وكم سعره ، راح تشوفين اغلب مصروفك وين يروح ؟! 

حددي مبلغ لكل شي ، ماله داعي كل شهر مصروفك او راتبك يروح على كل هالاشياء في كل شهر ، خصصي مثلا كل شهر بتشترين شي واحد سواء غالي او رخيص .. او عادي مثلا يمر شهر بدون ماتشترين شي ..

استثمري فلوسك باشياء جملية انتي تستمتعين فيها ، مااقولك احرمي نفسك ، لا اعتدلي في مصروفك

و اولا شوفي احتياجاتك ، الاشياء اللي من صج تحتاجينها مو الاشياء اللي تبينها .. اشبعي احتياجاتك نفسك بالاول
بعدها دلليها أحلى دلال ..

بعد هالموضوع ودي اكتب عن استثمار فلوسك في نفسك ؟ اذا حابين ؟ اكتبوا لي تحت 

...

اول خطوه واهم خطوه  :

سوي جرد كامل لكل شي انتي تملكينه " ملابس - عطور - مكياج - كريمات - شنط وغيرة "

ليش هالخطوه مهمه ، لانك راح تشوفين كمية الاشياء اللي عندك ، ومنها ترمين اللي مايصلح مثلا كريمات ومكياج صلاحيته انتهت ، ماله داعي وجودهم في حياتك ، ونفس الشي للملابس ، تشوفين القديم والجديد اللي يصلح ومرتب تخلينه ..

اكيد عندك قطع جديدة بس ماعندك شي تلسبسينها معاه
اكتبي بعد شنو تحتاجين عشان تكملين اللبس 

واللي استهلك خلاص ارميه ، واللي جديد ولا حبيته او ماناسبك خلاص حطيه في كيس مرتب والى الجمعيات الخيرية

اذا سويتي هالشي راح تشوفين كمية الاشياء المتبقية عندك ، وتشوفين بعدها شنو تحتاجين

مثلا احتاج شنطة للمناسبات ، بلايز وقمصان للدوام ، اسجلهم في ورقة ، ونفس الشي للكريمات وغيره
كل شي ناقص وفعلا تبينه اكتبيه في الورقة وخليها معاك لين ماتخلصين كل شي .. بعدها تشوفين شنو الاهم الى المهم

ورتبينهم بحسب اهميتهم .. بحيث كل فترة تشترين شي من اللي كتبتيهم في الورقة وبعدها نشطب ..


...

خصصي مبلغ تاخذينه من راتبك او مصروفك كل شهر مبلغ تتصدقين فيه ، والكل عارف فضل الصدقة ، وسبحان الله الصدقة تفتح لك اشياء وتسهل لك امور وايد ، ياما مرت علينا مواقف واحداث عن الصدقة ، وفعلا هذا اللي يصير
مبلغ صغير بنية الصدقة وادعي ربك باللي بخاطرك وربي يستجاب لنا في كل الامور .. 



ومبلغ توفرينه على طول

مثلا نقول مصروفك ١٠٠٠ درهم في الشهر .. طلعي منه ١٠٠ درهم هذي ماتلمسينها ابدا وفريها لاي شي انتي تبينه مثلا شنطة ماركة او ساعة او اسوارة .. خلال سنة كاملة راح راح توفرين ١٢٠٠ درهم ، وهذي تجيب لك اشياء جميلة جدا

يعني اذا اتبعتي هالشي كل سنة تقدين تشترين شي ذهب ، اكسسوار ماركة ، شنطة ، ساعة

هذا المبلغ حاولي ماتصرفينه الا نهاية السنة او كل ٦ شهور تشترين شي .. ياانك تشترين ب ١٢٠٠ درهم
او كل ٦ شهور تشترين شي علية القيمة ب ٦٠٠ درهم . انتي واللي تحبينه

راح يبقى لك ٩٠٠ درهم ، طلعي منها صدقة ، و الباقي رتبية على احتياجاتك بحيث يبقى لك مبلغ
الى نهاية الشهر و وماتكونين محتاجة .. واذا قدرتي وفري منه عشان تزيدنة على ال ١٢٠٠ درهم عشان تشترين شي اغلى

واذا كنتي موظفة :

قسمي راتبك ٤٠ ٪ منه هو مصروفك الشهري منه ، وال ٦٠ ٪ يكون ادخار وتوفير

يعني مو معقولة موظفة وتصرفين كل راتبك على الاشياء العادية ، لا غلط ،

ال ٤٠ ٪ قسميها على لبسك - اكلك - فواتير الموبايل وغيره - عنايتك بنفسك - مكياج وكريمات وغيره

لازم كل انسانة توفر لها مبلغ محترم ، تشترين فيه شي غالي ، تستثمرينه بشي ، تشترين اسهم ، او اي شي يرجع لك مدخول شهري ..


...

اذا تقدرين تفتحين لك حساب ثاني في البنك راح يكون شي جميل جدا ، هالحساب تحطين فيه المبلغ اللي راح تخصمينه من مصروفك كل شهر ، عشان ماتلمسين هالمبلغ ابدا الا انتي يوم تقررين انك تبين هالمبلغ ، طبعا بعد ماتكونين مخططه شنو راح تشترين فيه ..

اي مبالغ تجيك هدية او غيره حطيها في هالحساب ، وجمعيها .. ومبلغ على مبلغ وربي يبارك لك فيه 


..

حلو الواحد يفكر ويخطط لبعيد عشان يعيش حياته باجمل صورها ، يعني تعبنا وشقينا
ولنا حق اننا نستمتع بلذه هالتعب في النهاية ، بس التخطيط الصحيح راح يساعدك 

..


الجزء الثاني يوم السبت باذن الله ، وراح احط فيه كل النصايح ...

4 comments:

  1. موضوع جميل ومفيد جدا يعطيج الصحه والعافيه

    ReplyDelete
    Replies
    1. اهلا مروه ،
      منورتني عزيزتي ، انتي الجميلة يالغاليه واهم شي انه اعجبك
      الله يعافيج يالغاليه

      Delete
  2. موضوع جداً جميل يعطيك العافيه
    وفعلاً الصدقه لها دور وربي يبارك بالمال حتى لو هو قليل
    شكراً لك 💕

    ReplyDelete
    Replies
    1. هلا حبيبتي ، منورتني يالغاليه
      صادقة الصدقة تسهل لك امور وايد كنا نحس انها صعبه او مستحيلة

      العفو حبيبتي

      Delete