Friday, 8 April 2016

March Favourites 2016


March Favourites 2016



السلام عليكم 

مفضلاتي لشهر مارس ٢٠١٦ ، مو وايد اكتب عن مفضلاتي لاني دايما اجرب اشياء جديدة
وماارجع اشتري نفس الاشياء .. 

لكن هالفترة جربت اشياء حبيتها وقلت لازم اكتب عنهم .. 

...

العناية بالشعر 


- سيروم للشعر من كيراستاس  Elixir Ultime Oleo-Complexe
سيروم للشعر احب استخدمه على اطراف الشعر يعطي لمعة حلوه ويشيل النفشة شوي ، احب استخدمه وشعري رطب ،
وممكن تستخدمينه بعد قبل الشاور تحطين كمية منه على شعرك كله كانه ماسك وبعدين عادي تغسلينه ، 
وممكن كم ضغطة منه مع الماسك العادي لشعرك ، عشان يساعد في ترطيب الشعر . 
هذا الحجم الصغير وللاسف ماينباع انا جاني هالحجم كهدية مع مشتريات ثانية . 

كل ماركة كيراستاس متوفرة فقط في الصالونات الكبيرة والمعروفة . 

- كريم مرطب للشعر من كافيار Replenishing Moisture Milk - Caviar 
هالفترة صايرة استخدم منتجات وايد من هالماركة ارسلوا لي مجموعة اجربها واكتب رايي فيها ، ولحد الحين كل شي جربته جميل ، باذن الله بخصص موضوع كامل بس لهذي الماركة . 

نرجع للكريم المرطب ، كريم للشعر تخلينه على شعرك ماتغسلينه ، حبيت انه خالي من اغلب المواد الضارة ،
حبيت ترطيبة للشعر وحتى لو زدت الكمية شوي مايدهن الشعر ، وحبيت انه رش وخفيف جدا على الشعر 
وريحته حلوه قشر ليمون .

...


- شامبو فوليوم للشعر Xl Volume Shampoo 
عجبني جدا صح انه ينشف الشعر شوي ، بس يعطي حجم لجذور الشعر ، حلو للي شعرها دهني مثلي او ناعم بزيادة ويلصق في فروة الراس .. بس بعدة لازم بلسم او ماسك لترطيب الشعر .. وماانصحج تحطين على الفروة عشان مايروح الحجم ، وفيه كولاجين بعد .

- ماسك للشعر MiraCoil us ، هذا ماسك خاص بالترطيييب ، عجبني جدا جدا 
خفيف على الشعر ولا يثقلة مع انه خاص بالترطيب .. حلو للشعر العادي الى الجاف شوي 
اما شديد الجفاف راح يكون كانه بلسم عادي بالنسبة لهم .. حبيت انه ماسك لمدة دقيقتين فقط ، حلو للشاور السريع .
ريحته جميلللللة جدا ريحة لبان او علك .. 

ماركة مارك هيل Mark Hill متوفرة حصريا في بوتس .


...

خلصنا من الشعر ونروح للعناية الجسم 


هالشهر حبيت ٤ منتجات ومركزة عليهم عشان اخلصهم في شهر ابريل 

- كريم للجسم من كلارنس ، Moisture-Rich Body Lotion
فيه زبدة الشيا وممتاز للبشرة الجافة ، عجبني وانا حسيته ممتاز للبشرة العادية مو الجافة 
يعطي ترطيب حلو والبشرة تتشربة بسرعة ولا يترك اثر دهني مع انه فيه زبدة الشيا .. 

- زيت الارغان من لوفاج ، كتبت عنه موضوع كامل هنااا  ، عجبني وحبيته جدا .

- لوشن الترطيب بزبدة الشيا من ايف روشية Repair Lotion 
كتبت عنه في الانستقرام ، صراحة من الكريمات اللي اقول ويني عنها من زمااااان ترطيب خيالي ويبقى لفترة طويلة جدا
انصح فيه جدا ، من الكريمات اللي برجع اشتريها اذا خلصت اغلب اللي عندي . ممتاااااز .

- مقشر الوجة من سيام ، Honey Facial scrub

هو مقشر للوجة فعلا يقشر ويخلي البشرة رطبة بعدة بس انا مااحب العسل في اي شي ابدا لا اكل ولا في المنتجات 
وصرت استخدمه لجسمي ، وحبيييييييته للجسم ، تاخذين كمية منه وتفركينه شوي مع الماي وبعدها قشوي جسمك
عجبني جدا لانه يقشر ويرطب الجسم في نفس الوقت .. 


وهذا شكله من الداخل 
...

 العناية بالبشرة 


- غسول للبشرة من ديرما اي Anti- Wrinkle VitaminA Glycolic Cleanser 
غسول للبشرة يستخدمه صباحا ومساءا وفيه فيتامين A , الحلو فيه انه غسول وبنفس الوقت مقشر لطيف جدا للبشرة 
مع انه مافيه اي حبوب او غيره لكن لانه فيه مادة الGlycolic واللي بدورها راح تقشر لك البشرة وتشيل التصبغات 
والبقع بعد فترة من الاستخدام .. الغسول شفاف .. وتحتاجين كمية بسيطة جدا جدا منه 
الغسول عندي من زماااااان وتوني اوصل الى نص العلبة .

اللي عجبني فيه انه لطيف على البشرة ينظفها بعمق بس مايشيل كل الترطيب اللي بالبشرة ، ممتاز انج تستخدمية يوميا
واحبه بعد المكياج لاني اشيل كل الميك اب وبعدين اغسل ويهي فيه ينظف بس وييهي بعده رطب وحلو ..

ماركة ديرما اي من الماركة الحلوه بصراحة وطبية مية بالمية وكل اللي استخدمته منهم عجبني والحلو انه منتجاتهم ماسببت لي حساسية ابدا .. 

- سيروم مرطب من بايودريما Hydrabio 
تكلمت عنه من قبل في موضوع كامل مع باقي الكريمات من نفس المجموعة ، رائع جدا جدا .

- ماسك للبشرة من كودالي Instant Detox Mask 
احبه ولا استغني عنه ، تقريبا استخدمه مره كل اسبوع ، حلو للمسامات .. وكتبت عنه موضوع كامل هنا ..

- فرشة الوجة سونك من كلينك Clinique Purifying Cleansing Brush
فرشة لتنظيف الوجة ممتاااازة جدا استخدمها مرتين بالاسبوع تقريبا او بعد ميك اب ثقيل جدا ، تنظف الوجة بشكل جمييييل جدا ، ابدا ماانصح فيها يوميا لانها قوية علي البشرة .. اعشقها ولا يمكن استغني عنها 
اللي عجبني انها تهتز فقط ماتدور .. لانه بشرتي حساسة ولا ينفع لها حركة الفرشة السريعة 
تستاهل كل درهم .. 

...

نوصل للميك اب 


- برايمر للبشرة من توفيس Hangover Replenishing Face Primer 

برايمر للبشرة قبل الميك اب ، اخذ ضجة كبيرة في اليوتيوب ، وكنت حابة اجربة ،بصراحة يستاهل كل كلمه انقالت عنه ، برايمر من صج يثبت الميك اب لفترة طويلة وابدا مو ثقيل على البشرة .. ملمسة كاي كريم للبشرة 
وفيه ماي جوز الهند وممكن استعمالة ك كريم عادي لليل لانه راح يغذي البشرة .. جربته في كل الحالات وعجبني ، ك كريم ليلي و ك برايمر لكن شخصيا افضلة برايمر او ماتحطينه عادي بس بعد كم ثانية تحسينه كانه لزج شوي وعلى طول حطي كريم الاساس بعده .. انصح فيه ..

- برايمر مرطب من ميك اب فور ايفر Step 1 Nourishing Primer

برايمر مرطب من ميك اب فور ايفر اللي عندي عينه وممكن ارجع اشتري منه ، ممتاز للبشرة الجافة او العادية او البشرة المختلطة الى جافة .. احبه قبل الميك اب لانه يرطب لي المناطق الجافة في البشرة ويهيء البشرة للميك اب .. 

...


- قلم للحواجب Pro Sculpting Brow 

قلم للحواجب من ميك اب فور ايفر جديد وفكرته اصلا حلوه لانه ٣ في واحد ، قلم للحواجب + هايلاتر لتحت الحاجب و مشط او سبولي للحواجب .. الدرجة اللي عندي ٤٠ ومناسبة لي 
يعطي لوك حلو للحاجب ، بس تاكدي انج تسكرينه زين لانه شوي نشف عندي .. بس حبيته .. 

- ماسكرا من قوش Rebel Eyes 

ماسكرا جميلة جدا جدا تعطي طووول مع شويه كثافة للرموش ، نتيجتها على العين جميلة وسوادها حلو
اعجبتني جدا وثابته طول اليوم .. 

- العشق الابدي كريم اساس Ultra HD من ميك اب فور ايفر 

انا من عشاق النوع القديم وحبيت الجديد بعد ، يعطي لوك ديوي حلو وخفيف على البشرة ماكاني حاطة طبقة على وييهي  ، تغطيته حلوه يخلي الويه صحي .. ثباته من ٤ -٥ ساعات ، بس اثبت كل شي بالبودرة 
عاجبني واكيد برجع اشترية . 

- روج ساىل من وجوه LipStuck 

روج سائل ومطفي من وجوه من الاشياء الجديدة نوعا ما في محلهم ، روج ثابت ، ثباته حلو لكم ساعة ..
واللون اللي عندي حلو ك لون يومي OUD ROSE ، جميلة هالدرجة . 

- ماسكرا للحواجب من بينيفت Gimme Brow 

ماادري ليش مافكرت اجربها من قبل بس شكرا بينفت ارسلوها لي ووقعت في غرامها ، انا حواجبي كثيفة نوعا ما بس فيه كم فراغ اعبيه بالقلم شوي وبعدها خلاص بالماسكرا هذي وخلاص كل شي يكون مثل مااحب .. تثبت الحواجب ولا تتحرك من مكانها ، حلوه لو كان شعرك حواجبك طويل ويتحرك .. 
تستاهل التجربة .. اللون اللي عندي الوسط ومناسب لي .. 

- بلشر من برجوا Blush Bourjois 

بلشر من برجوا منو ماجرب بلاشرات برجوا ، كلنا وخصوصي يوم كنا صغار 
رجعت اجربه وحبيته جدا جدا وخصوصي هالدرجة رقمها ٧٤ Rose Ambre 
حبيتها لانها مطفية ومودايما نلاقي بلشر مطفي في الماركات الدرق ستور 

....


- هايلايتر بيكا شامبين بوب 

الجمال الجمال الجمال ، عادي اتسبح فيه من جماله اضاءة جميلة  

...


فرش ميك اب فور ايفر ، اللي جربها يعرف انه رائعة جدا جودتها عالية جدا وكل فرشة آحلى من الثانية 
حابتهم هالفتره جدا ، اليمين ممتازة للحواجب ، تاخذين شوي من منتج الحواجب اللي تحبينه بودرة او جل 
وترسمين بشكل خفيف يطلع لك الحاجب جميل .. اذا جربتوها راح تفهمون قصدي ..

الثانية الجمال كله ، ممتازة للظل اذا بتحطينه بطريقة الطبطبة ، وحلوه اذا بتحطين قلتر علي العين .. 
وبعد هالفرشة ممتازة للكونسلير حبيتها اكثر للكونسيلر ..



فرش رييل تكنيك ، هالثنتين روعه روعه روعه .. اللي على اليمين عادي اشتري منها ٣ من جمالها 
ممتازة للبودرة تحت العين حجمها مناسب جدا .. وتاخذ بودرة بكمية مناسبة .. 

والثانية حلوه للكنتور او الاستخدام اللي افضلة ل الكريم اساس رهيييييبة ، احط فيها الاساس كله وتدمجة بنفس الوقت
تعطي تغطية اكثر من البيوتي بلندر ، والحلو بعد انه الاساس مايخطط وانتي تحطين فيها .

بالت z palette 

ممتاز جدا يجمع لك الايشدو والبلشر اللي مفردين او اذا تبين تسوين لك بالت خاص فيك 
وحلوه بعد للسفر اذا تحطين اكثر الايشدو اللي تستخدمينهم مع كم بلاشر وبرونزر وخلاص صار عنك بالت متكامل .. 

...


- منظف الفرش من سيفورا ، سهل وسريع فيه تنظيف الفرش بشكل يومي او اذا بتغيرين لون او شي 
بسرعه تنظف الفرشة وتكون جاهزة للاستخدام .

- سبراي من ميك اب فور ايفر Mist & Fix 
حلو بعد الميك اب رشيه على كامل الوجة ويشيل لك البودرة الزايدة ، رشية على اي فرشة قبل الظل عشان يكون اللون اقوى وثابت اكثر .. 

- مزيل المكياج الزيتي من كودالي Makeup Removing Cleansing Oil 
مزيل للميك اب ، جدا جدا رائع خلصت ربع العلبة تقريبا ، كتبت عنه موضوع كامل هنا 

...

عطور حابتها هالفترة 
- العشق الابدي عطر ايلي مسك ، انا اعشق المسك وعادي اسبح فيه ، هالنوع مطابق لمسك عبدالصمد القرشي.
- عطر المسك الاسود من بودي شوب ، عندي العطر مع الزيت ، وجدا عاجبني ، كتبت عنه هنا 
- عطر مون لايت باث ، من العطور اللي فيها مسك وباردة مناسبة للبيت .

..

افضل قناة يوتيوب احب اتابعها  ، قناة صديقتي وحبيبتي سمية حارب
جميلة قلبا وقالبا اتمنى لها كل التوفيق ومنها للاعلى يارب  



قناتها ماشاء الله جميلة جدا تتكلم عن المكياج والعناية بالبشرة يعني اي شي يختص بالجمال 
تستاهل الغالية وهذي هي قناتها 

...

مكان جميل في دبي 

سيتي ووك التوسعة الجديدة ، من احب الاماكن على قلبي كتبت موضوع عنه وعن الاشياء اللي فيه 

...

كافية وقهوه عاجبتني 

ذا براس The Brass 

مكان يستاهل الزيارة وتذوق كل شي فيه ، خصوصي القهوه مشهورين فيها عندهم كل الانواع وبكذا طريقة 
ان شاء الله بكتب عنهم قريب تقرير كامل 


...

واخر شي صايرة احب القهوه التركية بشكل مو طبيعي 
يوميا صرت اشرب لي كوب منها .. افضل نوع جربته هو محمد افندي 


والموضوع شوي طويل بس من زمااان ماكتبت عن المفضلات 
نشوفكم بموضوع ثاني قريب 

..

2 comments:

  1. حياتي يا حنان❤️❤️❤️❤️❤️
    مفضلاتج حبيتها، اشيا جربتها من قبل واشيا لا فحطيتها في الويش ليست. وشكووووووووووره انج تكلمتي عن قناتي. شكرًا فديتج ع الدعم يا احلا وأطيب صديقة واخت

    ReplyDelete
    Replies
    1. هلا بالزين كله ، الغاليه على قلبي سوسو،
      اذا جربتي اي شي خبريني رايج فيه ، انتي تستاهلين كل خير ،وربي يحقق لك كل اللي تحلمين فيه واكثر يااااارب
      اطيب قلب

      Delete