800 Degrees Neapolitan Pizzeria
السلام عليكم
الاسبوع الماضي كنت معزومة لتجربة مطعم 800 Degrees Neapolitan Pizzeria
، الجديد في الامارات مول ، وهذا ثاني فرع
لهم في دبي بعد فرعهم الاول في سيتي سنتر معيصم ، وان شاء الله الفترة القادمة راح يفتحون بعد فرعين .
انا جربته مع بنات خالاتي يوم افتتاح الطابق الجديد لمول الامارات بس حبيت البي دعوتهم لي .
فكرة المطعم حلوة ، تختارين نوع عجينة البيتزا والصوص وبعدها تنتقلين الى الاضافات ، الفكرة كانت
من الشيف
روزاريو أكاريا واللي كان متواجد وقتها وهو بنفسه كان يسوي لنا البيتزا ..
والحلو انه البيتزا تاخذ ٩٠ ثانية بس عشان تجهز ، لانه الفرن حاااار وجدا ..
...
تختارين نوع العجيبنة ، العادية او اللي خالية من القلوتين ، وهذا شي حلو
ونوع الصلصة + جبن الموزريلا الفرش ، انا جربت النوعين اللي بالصلصة الحمرا الاساسية و البسيتو .. كل شي طازج قدامج ..
و ننطلق للاضافات ، كمية كبيرة ماشاء الله ، كل شي يخطر على بالك راح تلاقينة قدامك ، اللي عجبني بعد انه مثلا فيه ذرة مشوية ، بصل مكرمل ، فطر مشوح على النار ، احب هالشغلات يعني مو بس فطر طازج وبس بدون طعم ونكهة ..
كل شي كاتبين اسمه ، وواضح ..
وبعدها قسم خاص بالسلطات ، وكل شي واضح وقدامك ، نوع الخس و الاضافات ، حتى عندهم جبنة البوراتا
وفي الاخير المشروبات ، كل شي ايطالي طبعا ، عصاير طازجة ، مياة غازية وغيرها ..
وتدفعين بعدها ، وهم يوصلون لك طلبك للطاولة ..
...
الطلب الاول ، بيتزا بصوص البيستو ، اعشق البيستو بكل شي ، ونادر ماالاقي مطاعم تضيف البيستو للبيتزا ، اخترت هالاضافات ، دجاج - فطر - زيتون - وشوي زيت زيتون - صنوبر - جبن بارميزان
لذيذة جددددددا ، كررت طلبي لها بالمره الثانية من لذتها ..
وهذي بصوص المارقريتا مع البيبروني و السلامي و فطر ، و خليناها سبايسي ، لذيذة والله ، بس شوي دسمه عشان اللحم يعني .. بس يمي
وهذا طلب المدونة الجميلة واللي احب اتابعها هلا الجريد صاحبة مدونة وين؟
تابعوها هالانسانة تستحق المتابعة ، والله يوفقها يارب ، طلبها كان بيتزا بالفقع ، وذقتها لذيذة والله ..
...
عندهم قهوه والماركة جميلة ولذيذة جذا ، وبالاخير جربت الجيلاتو ، اخذت الفستق ، خفيف ولذيذ جدا ، ابد مو ثقيل علي المعدة ، حتى بعد البيتزا ..
...
بحط كم صوره للبيتزا من تصويرهم
بشكل عام ، مكان حلو ناس تخدمك بطريقة تخليك فرحان ، الاسعار حلوه ، بس الاكل يستاهل
ويستحق التجربة ..
الفرع الاول سيتي سنتر معيصم
الفرع الثاني في مول الامارات الطابق الثاني ، بجانب السينما الجديدة
لمزيد من المعلومات يرجى زيارة:
ليست هناك تعليقات:
إرسال تعليق