Thursday, 9 January 2014

مشترياتي من باث اند بودي & فكتوريا سيكرت


السلام عليكم 

تدوينه سريعه وبسيطه 



امس كنت في زياره سريعه لدبي مول وكنت رايحه مخصوص ل فكتوريا سيكرت 
بعد مانزل وزني تغيرت مقاساتي جذريا واخذت انواع من البرا وخصوصي انا مجربه نوع من قبل 
وعلى قد ماحبيته رجعت اجيب منه اكثر ، ونوعت هالمره بس طبعا غير قابلين للعرض هنا 

بس للي حاب يجرب منهم حاليا عندهم عروض حلوه والاجمل انك تخلينهم ياخذون قياسك مضبوط 
بس عالم من الرفاييه في مكان غرفه القياااس ، الحلو انهم ياخذون قياسك مضبوط وتجربين كذا نوع برا

الى ان ترتاحين وهم يشوفون انها قياسك مضبوط بعدها تسجل لك القياس في كرت صغير 
مع جميع انواع البرا اللي حبيتيهم ، وبعدها تطلع معاك بره للمحل وتراويك اماكن البرا اللي اعجبتك وتعطيك 
وش يناسبك ، واللي حبيته فيهم تسالك من الاول تبين مع القسم العادي او اللي عليه تخفيض وهالشي جدا عجبني

* والكرت ينكتب فيه اسمك ، تاريخ الزياره ، مكان المحل في اي مول ، القياس والانواع " الكرت بيقى عندك " 
وفي كل زياره تطلعين لهم الكرت وبسرعه يساعدونك .


كاني كثرت بالكلام نجي للشي القابل عرضه هنا 




من جهه الشنط والاكسسوارات اخذت هالشنطه الوسط ب ٥٠ درهم وكانت ب ١٠٠ درهم 

وهالشنطه الصغيره ب ٢٥ درهم وكانت ب ٥٠ درهم 



وهذي اخذتها لاختي نفس حجم الشنطه اللي فوق ب ٥٠ درهم وكانت ب ١٠٠ درهم 

اللي حاب هالنوع من الشنط والاكسسوارات فيه كثييير واشكال بس اخذت على حسب حاجتي 

وعندهم بجايم روعه انيقه وناعمه  على ١٢٠ درهم بس حاليا عندي اكتفاء ذاتي من البجايم بس مايمنع اذا فهت نفسي
اجيب لي خصوصي اني احبهم وعندي اخت مجنونه بجايم يعني العدوى تنتقل . 


نروح لباث اند بودي  لاول مره ادخله وتكون مشترياتي منه معقوله " الحمدلله " 

وقليله جدا [ احد قرارتي هالسنه اني اجيب شي على قد حاجتي ] 

لاني هالسنه في مرحله وصلت انه يكون عندي ١٦ لوشن للجسم وكلهم مفتوحين بنفس الوقت 
ومده الصلاحيه لبعضهم اما قربت او شي خلص فخلاص توبه 





من اليمين عطر Amber Blush و بودي سبريه 

هالريحه جديده و جننتني ، شميته من اسبوع في الامارات مول رشيته على يدي واول ماشميته 
حسيت ريحته دوا فتركته ومشيت ، طول ماانا بالمول والى السياره وانا اشمه تغيرت الريحه تمااااما 
صار كانه ريحه عطر فرنسي راقي ، حتى اعجب امي واختي مع اني اختي مو اي شي يعجبها بالعطور وبسرعه
تمل من اي عطر ...

فحطيته في بالي واخذت المست ولقيت العطر الصغير عند الكاشير واخذته . 

المست ب ٨٥ درهم مافيه تخفيض لانه جديد 
العطر ب ٢٠ درهم وسعره الاصلي ٣٠ درهم .

واخر شي كريم للجسم عالنوع احبه لانه بترطيب ثلاثي بريحه توايلايت ووود 
هذي الريحه المفضله لي من باث اند بودي اعشقها ولا امل منها 

سعره ب ٢٥ درهم بعد التخفيض 


وبس هذي كل مشترياتي 

6 comments:

  1. حبببيتت حبييت التدوينة
    وأخيراً أشوف مدونة اماراتية كنت بفقد الأمل هههههه شكراً لمنتدى الاقلاع.
    أنا مريت عليه الويكند اللي طاف بس مادخلت مادري ليش
    أول مرة أعرف هالمعلومة عن تخزين بياناتج أحسها وايد حلوة.
    وما شاء الله الشنط وايد حلوة وكككككيوت
    تتهنين فيها
    يبالي أشتري وحدة للمكياج وهالسوالف.
    وبضيفج للستة المدونات اللي اتابعها :*
    انا بسوي مدونة من زمان وانشغل وحالة بس ان شاء الله بحاول افتحها في اجازة بين الفصلين

    بالتوفييق ^ـ^ا

    ReplyDelete
  2. هلا والله اختي الغاليه المها \منوره المكان كله
    فديت قلبج حبيبتي ، واعذريني على التقصير

    فيه مدونات من الامارات بس العدد جدا قليل ويالله نباج معانا ان شاء الله
    واكيد بيكون لج بصمه حلوه في عالم التدوين

    ....

    هيه في فكتوريا خدمتهم روعه بصراحه وفوق الوصف روحي وجربي وتقدرين تخلينهم ياخذون القياس
    ومب شرط انك تشترين

    وعلى الشنط عندهم من هالسوالف وايد والاسعار تقريبا النص على كل شي وموجودين بكميات كبيره بعد

    وترى اتريا مدونتج

    ReplyDelete
  3. التوايلات وود المفضل عندي من باث آند بودي ووركس ريحته توديج لبعيد ههههه شكرا لتدويناتج

    ReplyDelete
    Replies
    1. صدقتي ، اعشق هالريحه وفعلا اروح لعالم ثاني معاها ، شرفتيني حبيبتي

      Delete
  4. ماشاء الله كتير حلوين
    بس حبيت اسالك متى تكون تخفيضاتهم لهم مواعيد ثابته او لا ؟؟؟

    ReplyDelete
    Replies
    1. هلا نانسي ،

      ايه في شهر ١ يناير وشهر ٦ يونيو هذي كل سنه تكون تخفيضاتهم السنويه واللي توصل الى ٧٥ بالميه

      Delete