SHIFFA Skin Balancing Facial Toner | تونر موازن للبشرة من شفا
السلام عليكم
مسائكم ورد ، اليوم بتكلم عن ماركة كنت دائما اشوفها في سيفورا بس مااشوف لها ريفيو وايد
مع انها ماركة اماراتية ، ماركة شفا ماركة اماراتية وتصنع منتجاتها في بريطانيا
واسعار الماركة شوي مرتفعة مثل باقي الماركات الغالية ...
تواصلوا معاي ماركة شفا وقدموا لي ٣ منتجات ، حاليا استخدم منتجين بس والاخير مقشر للجسم ، ماودي افتحة لين اخلص كم مقشر
مع انه يحمس خصوصي انه مقشر بالقهوه ..
اول منتج بكتب عنه هو تونر للبشرة
تعليب الماركة فخم واعجبني ، كل علبة لون الغطا غير و كل علبة عليها شريطة وتعرفين انه محد فتح العلبة الا انتي ، وانا اقدر هالشيء ..
علبة التونر نفسها بلاستك وخفيفة
التونر هذا مناسب لجميع انواع البشرة بما فيها الحساسة .
من مكوناته : ماء الورد - الصبار - طحالب بحرية ، صالح لمدة ٦ شهور من تاريخ الفتح .
نوع بشرتي مختلطة الى جافة + انها حساسة ، اللي عجبني انه ابدا هالتونر ابدا ماسبب لي اي هيجان في البشرة ، وهالشيء ممتاااز
ينظف البشرة من الدهون الزايدة و يعيد توازنها بشكل حلو ، مايسبب جفاف للمناطق الجافة في بشرتي .
تونر حلو خفيف ولطيف على البشرة ، وحلو اللي تدور على شي طبيعي ومافيه مواد ضارة .
الماركة متوفرة في سيفورا ، وسعر التونر اما ١٩٥ درهم او ٢٢٥ درهم نسيت بصراحة
موقع شفا الالكتروني
ليست هناك تعليقات:
إرسال تعليق