Sunday, 12 July 2015

أشياء حابتها هالفترة ؟!


أشياء حابتها هالفترة ؟




السلام عليكم

صايرة هالفترة كسولة في المواضيع بس هي فترة راحة وبعدها ان شاء الله ارجع بقوة ..

ف قلت بكتب عن الاشياء اللي استخدمها هالفترة واجربها واللي اعجبتني بشكل مبدئي

.. وبعدها اسوي عنهم ريفيو كامل بعد مااستخدهم لفترة طويلة ..

..



تونر للبشرة .. حاليا استخدم هالنوعين

- تونر Eau Roma Water ، باللافندر كتبت عنه من فتره في موضوع مشترياتي من لش ، حلو وينظف البشرة بشكل لطيف
وريحته جميلة .. يناسب البشرة الجافة والحساسة ..

- Skin Balancing Facial Toner من ماركة شفا الاماراتية ، هالماركة جميلة واجرب كذا شي منهم ، بس هالتونر عجيييب
ينظف من قلب ولا يحرق ، ويعادل توازن البشرة ، يشيل الدهون الزايدة من البشرة ولا يجفف الاماكن الجافة .. عجبني جدا

تلقون هالماركة في سيفورا .

...



ماسك Detox من كودالي ، هالماركة اللي احبها كل اللي جربته منهم جميل ، الماسك حلو وينظف البشرة عدل والحلو انه مايجفف البشرة بعد استخدامة .. ماركة كودالي موجودة في سيفورا ...

ماسك من ماركة كيلز ، Ultra Facial Overnight Hydrating ، ماسك ليلي تحطينة بعد عنايتك الليلية ، انا اغسل وجهي وارطب بكريم العيون والتونر وبعدها احط الماسك واخلية الليل كله واغسلة الصبح .. جمييييل ويرطب البشرة عدددل تحسين انه البشرة شاربة ماااي ..

...


كريم للعيون من كودالي ، هالكريم ترطيبة حلو والمفروض انه يفتح الهالات ، ماشفت اي نتيجة للهالات لحد الحين بس بكمل استخدمة و صلت الى نص العلبة وبكملها للاخير ..

سيروم للعيون من كيلز ، سيروم يخفف من الخطوط و يخلي منطقة العيون ناعمة ومشدودة ، اللي لاحظتة لحد الحين انه رطب لي منطقة العيون بشكل جميييييل جدا ، بكمل استخدم السيروم وبعدها بكتب عنه ،ماركة كيلز صايرة تغريني بمنتجاتهم ...

العشق واللي اقول ويني عنه من زمااااان Healing Balm من شفا ، شي شي شي عجيب ، استخداماته متعددة ، انا احبه للشفايف يشيل الجفاف بسرعة ، وممتاز للبشرة المتهيجة ، وممكن يخفف الحبوب مع الاستخدام المتكرر

كريم واقي من الشمس من شيسيدو ، رائع جدددا ، وكتبت عنه ريفيو كامل هناا 

كريم للوجة من  urban veda ، ماركة جديدة على اسواق دبي و عندي هالكريم عينة ، عجبني خفيف والبشره تتشربة ولا يترك اثر زيتي ، بس ريحته جمييلللللللة جميللللة جمييييلة ، انا حبيتها بس ممكن اللي مايحبها ماراح يعجبة لانه الريحة تظل لفترة .


منظف للفرش من سيفورا ، حلو وسهل وعملي ، بخي بختين وعلى طول تشوفين اللون على الكلينكس ..

كريم للجسم من انشانتر ، ريحته حلوه و الكريم يرطب البشرة ، صراحة ماتوقعته بهالشكل الجميييل و انا اللي عندي عينة بس افكر اشتري الحجم الكبير ..

inhibitif ، هالاختراع العجيب موجود في بوتس الامارات ، هالشي يقلل نمو الشعر بالجسم ، حاليا استخدمه واجربه عشان اكتب لهم تجربتي الكاملة معاه ، بس لحد الحين اقدر اقول انه ممتااااز وفعلا شفت فيه فرق .. 

كريم لليد بعد موجود في بوتس ، ممتاااااز ، على كلامهم انه يرجع ايدك ل ١٠ سنين ، انا اللي لاحظته انه يشيل الخطوط الناعمه اللي بايدي واتوقع انه راح يكون مناسب للكبار بالسن واللي تبي تحافظ على جمال ايدها ، وهالكريم رقم واحد في المبيعات في بوتس بريطانيا .. 

..


ماركة Jessicurl، كنت اسمع عنها وايد باليوتيوب انها ممتازة للشعر الويفي والكيرلي ، عندي مجموعة من منتجاتهم " ٦ "
صراحة المجموعة رائعة غيرت لي شعري تمااااما ، شي عجيب وممييييز ، اللي شعرها ويفي مثلي راح تحب شعرها بطريقة ثانية ، فعلا غير لي شعري واستخدم هالمنتجات وماتتعبة ابدا ... انا اصلا احب شعري لاني اقدر اسوي فيه اي شي و عمري مافكرت اني اسوي كيراتين او اي شي من هالعلاجات الجديدة ، بس هالمجموعة حببتني بشعري بزياده ..

وان شاء الله بكتب ريفيو كامل عنهم ، شعرك يستاهل انك تعتنين فيه وتحبينه لانه اصلا جميل .. 

كريم للشعر من كيلز ،Damage Repairing & Rehydrating ، مناسب للشعر الجاف جدا والمتضرر ، انا اطراف شعري جافة ، واستخدم هالكريم بعد الشاور ، عجبني لانه يرطب وبنفس الوقت خفيف مايدهن الشعر اذا كثرتي منه .. 

ترطيبة حلو ، وريحته حلووووه 


وبس هذي كل المنتجات اللي استخدمتها واللي هي تحت التجربة حاليا وحبيتها .. 

اذا جربتوا شي منهم شاركوني تجاربكم .. 


4 comments:

  1. فيه منتجات جديدة علي ، تحمس عليها مره
    منتظرة البوستات اللي بتتكلمين عنهم بشكل مفصل

    يعطيك العافية ...

    ReplyDelete
    Replies
    1. ايه الاغلب منتجات جديدة ، واجربها هالفترة عشان اسوي عنها ريفيوو قريب
      وان شاء الله تعجبكم مثل مابعض الاشياء حبيتها

      Delete
  2. inhibitif كم سعره وطريقة الإستعمال ؟

    ReplyDelete
  3. inhibitif كم سعره وطريقة الإستعمال ؟

    ReplyDelete