Clear Complexion Whitening || Himalaya

 Clear Complexion Whitening  || Himalaya

السلام عليكم 

مشاكل البشرة متعبة نعالج شيء ، ونرتاح ويطلع لنا شي جديد ونرجع نعالجة 

اذا تذكرون كتبت موضوع من فترة عن المشاكل اللي اعاني منها خصوصي الحبوب وقلت لكم اني كنت ابحث عن علاج لها ، هنا الموضوع للي ماشافه ، الغسول جدا حلو ونفع معاي واستخدمه لحد الحين 
ومكمله عليه .. بس بعد ماتخلصت من الحبوب ظل الاثر للحبة نفسها !!

و قلت بجرب اشياء من هملايا بعد تساعدني على علاج هالمشكله ف اخذت منتجين للبشرة 

الاول مقشر للبشرة

Clear Complexion Whitening Daily Scrub

مقشر يومي للبشرة 

مقشر يومي خفيف للبشرة  ، مناسب للاستخدام من مره الى مرتين بالاسبوع  .. ينظف البشرة ونقيها ..

مكونات المقشر اليومي : عرق السوس والصمغ الابيض Fuller's earth  ، معروفين من زمان انهم يساعدون في تفتيح البشرة وهذا اللي انا ابيه انه يفتح لي الاماكن الغامقة في بشرتي .. خصوصي اثار الحبوب .. حبيبات المشمش هي اللي راح تساعد في ازالة الرؤوس السوداء و الجلد الميت .. 

المقشر حلو وخفيف ماياذي البشرة بس يقشرها بشكل ناعم ولطيف جدا ، وريحته حلوه اعجبتني ..
حبيته لانه ماحسس لي بشرتي او هيجها .. كان لطيف على بشرتي .. حبيت النتيجة اللي قدمها لي خلال هالفترة .. ينظف الوجة و يقشر الوجة يشيل كل الخلايا والجلد الميت خصوصي اللي تكون حوالي الحبوب .. ويفتح مكانها بشكل خفيف .. 

سعره = ٢٣ درهم 

وطبعا بعد اي مقشر نحتاج مرطب فعال للبشرة يكمل اللي يسوية  .. 

ف اخترت من نفس المجموعة كريم مرطب للوجة 

Clear Complexion Whitening Day Cream

وطبعا بما انه نفس المجموعة ف نفس المكونات والمواد الفعالة .. 

كريم خفيف للبشرة وغير دهني ابدا ، بسرعه البشرة تتشربة وانا احب هالنوع جدا ..

استخدمه صباحا ومساءا كل يوم .. حبيت تركيبته انه خفيف والبشرة تتشربة خصوصي بعد المقشر 
وترطيبة جدا جدا ممتاز يرطب ومايدهن المناطق الدهنية .. كل شي يكون متوازن وهذا هو الصح .. في اي كريم مرطب للبشرة .. 

 حلو يكون قبل المكياج بعد عشان مايدهن البشرة ويخرب المكياج كله .. وريحته حلوه بعد .. 

بعد استخدامي له لفترة ، حبيت جدا النتيجة فتح لي اثار الحبوب خصوصي الغامقة بديت الاحظ انه درجة اللون بدت تصير افتح .. وهذا هو المطلوووووب .. راح استمر في استخدام الكريم الى انه اخلصه لاني شفت نتيجة جدا حلوه وان شاء الله كل اثار الحبوب تروح ولونها يفتح ..

سعره = ٣٥ درهم 

...

وك صاحبة مدونة احب الماركات اللي لها خبرة طويلة في عالم العناية بالبشرة ، اولا لانها تكون ثقة 
وثانيا كل منتج يوفي بوعدة .. اللي خاص بالتفتيح او الترطيب او تنظيف البشرة .. 
لانهم يستخدمون اشياء طبيعية ومعروف انها تساعد في حل هالمشكلات اللي تواجهنا .. 

ولانه الماركة تستخدم مكونات طبيعية ف هي مناسبة للكل حتي الحوامل . 

اماكن توفر ماركة هملايا .. في جميع السوبرماركت الكبير والصغير .. واسعار الماركة جدا ممتازة ومناسبة للكل .

Project Pan All L'occitane

Project Pan All L'occitane 

السلام عليكم 

موضوع اليوم شوي غير عن المواضيع اللي سويتها من قبل ..Project Pan ..

اذا تتعابون اليوتيوب ومدمنين مثلي اكيد بتكونون مريتوا على فيديو او مجموعة منهم باسم Project Pan

ولهم شعبية كبيرة .. 

شنو ال Project Pan بروجت بان ؟ 

تختارين مثلا ١٠ منتجات مكياج او عناية وتستخدمينهم لفترة معينة مثلا ٣ شهور ، وخلال هالفترة ماتشترين شي 

لين تخلصين كل اللي اخترتيه ، هالشي سووه عشان اولا يستخدمون الميك اب اللي عندهم وعشان مايتكود وهم مااستخدموه

وثانيا تعرفين اذا المنتج نفسه فعلا يستاهل انك ترجعين تشترينه مره ثانية او لا ؟ وتعرفين اذا فعلا ناسبك 

واخر شي تتخلصين من اغلب الاشياء اللي عندي خصوصي اللي باقي فيها شوي .. 

انا اخترت اني اسوي لماركة معينة واخترت لوكستيان ، ليش لاني عندي كمية من منتجاتهم واحبها بصراحة 

وودي استخدمها واستمتع فيها ، بس ماراح اشتري شي وقتها .. الا اذا ماكان عندي له بديل 

والمده راح تكون ٣ شهور 

انا بديت ب تاريخ ٩  / ٥ قبل يومين من تاريخ كتابة الموضوع 

الى ٩  / ٧ باذن الله .. وكل شهر بحط النتايج اذا خلصت منتج ووين وصلت بالمنتجات 

اللي ماشاف مشترياتي من لوكستيان يدخل هالموضوعين ١ & ٢ 

واللي مايعرف لوكستيان عندهم موقع الكتروني للطلب اون لاين 

ف نشوف المنتجات اللي عندي كلها وبعدها بحط العدد بالكامل ونشوف نهاية كل شهر كم منتج اخلص 

من اليمين : 

-SHEA ULTRA RICH LIP BALM || إصبع بلسم الشّفاه من زبدة الشيا 

- SHEA BUTTER LIP BALM STICK||إصبع بلسم الشّفاه من زبدة الشيا

- SHEA BUTTER BODY LOTION || لوشن الجسم بزبدة الشيا

- IMMORTELLE ESSENTIAL WATER|مياه الخلود الأساسيّة

...

- VERBENA SHOWER GEL || شور جل رعي الحمام

- VERBENA BODY LOTION || لوشن الجسم من رعي الحمام

- ALMOND SHOWER OIL || شور جل باللوز 

-  ROSES ET REINES SILKY SHOWER GEL || شور جل بالورد 

- ROSES ET REINES BEAUTIFYING BODY MILK || الحليب المجمّل للجسم من الورود والملكات

- عطر FOLIE FLORALE من زهر الكرز

- أو دو تواليت NÉROLI & ORCHIDÉE

-NÉROLI & ORCHIDÉE BODY MILK || حليب الجسم المعطّر من NÉROLI & ORCHIDÉE

- سامبل من نفس العطر 

...

- عطر العود & الورد الشرقي الجديد

- OUD & ROSE SHIMMERING SHOWER GEL || شور جل العود والورد 

- OUD & ROSE SHIMMERING BODY MILK || لوشن العود والورد المتلألئ للجسم

- مرطب للشفايف بالورد || Ultra Soft BALM 

- CHERRY BLOSSOM FOLIE FLORALE PETAL-SOFT BODY MILK ||حليب الجسم FOLIE FLORALE الناعم من زهر الكرز

كريمات اليدين .. اكتشفت انه عندي وايد منهم !! طبعا كلهم واضحين 

- كريم مرطب للوجه .

- - كريم للقدم ||  SHEA BUTTER FOOT CREAM

- صابونة اللوز 

- صابونة الشيا بالحليب ، هذي جدا حلوووه وريحتها ناعمه 

- صابونة الشيا ب ريحة رعي الحمام او الليمون .

- وفيه صابونه نسيت اصورها بعد من مجموعة رعي الحمام علي شكل ورقة شجر . 

-  سامبل شامبو مصحّح للشّعر الجاف والمتضرّر

- شامبو مصحّح للشّعر الجاف والمتضرّر

- البلسم المصحّح للشعر الجاف والمتضرّر

- سامبل كريم للوجة بزهرة الخلود 

- سامبل كريم للوجة بالشيا 

- كريم للقدم ||  SHEA BUTTER FOOT CREAM

- زيت الأظافر والجلد حول الأظافر المغذي واللامع

- الزيت المريح للوجه بزبدة الشيا

- كريم مهدئ للوجه بزبدة الشيا

- كريم الايدين بالحجم الكبير 

- أو دو تواليت الجريب فروت والراوند

- أو دو تواليت الياسمين وزهرة الخلود والنيرولي

-أو دو تواليت فلورا الفاوانيا

هذي كل المنتجات اللي عندي من لوكستان وايد بس حلوين وعسل على قلبي لاني احب الماركة واستمتع فيها 

عندي ٤٩ منتج منهم منتوعين بين الاحجام الكبيرة - الوسط والعينات .. 

ف اول شي راح استخدم كل العينات وبعدها الاحجام الصغيرة وبعدها باذن الله الاشياء الكبيرة .. 

وكل ماخلصت شي راح يكون له ريفيو في الموضوع الجاي اللي بعرض فيه اللي استخدمته واللي لا 

وشاركوني تجاربكم ب منتجات تحبونها من لوكستيان ؟ والاشياء اللي ماتستغنون عنها ؟ 

موقع لوكستيان الالكتروني

MAC Backstage + My Review

السلام عليكم 

تأخرت شوي في طرح الموضوع عشان اعطيكم رائي في المنتجات .. موضوعنا اليوم هو عن  ماك كامل مكمل 

من فترة وصلتني مجموعة منتجات من ماك ك دعوة منهم لحضور الباك ستيج لماك لتجهيزهم للعارضات ل اسبوع الفاشن في دبي .. واللي يقام كل سنة في دبي .. وماك طبعا هم المسؤولين عن العارضات ويسوون لهم الميكاج كله وباللوكات الجميلة .. 

في الاخيرة بعرض لكم بعض الصور للعارضات .. 

حبيت اجرب المجموعة كاملة واقولكم رائي فيها .. 

المجموعة تتكون من ٦ منتجات .. ونشوف اول منتج 

اول شي قلم الحواجب Eye Brows Crayon Pour Les Sourcils ودرجة Brunette 

انا اول مره اجربة وجدا جدا عجبني اولا الدرجة جدا حلوه وتناسبني لانها شوي تفتح لون حواجبي ، والقلم نفسه نحيييف جدا ف يساعد انج ترسمين الشكل اللي تحبينه انا حواجبي كثيفة ومااحتاج رسم وايد بس اعبي الفراغ شوي وخلاص 

جدا عجبني .. في الصورة حطيته بشكل ثقيل وحطيته بعد بشكل خفيف .. عشان ابين لكم انج تقدرين تخففينه وتثقلينه بنفس الوقت .. 

..

قلم كحل باللون الكحلي على ازرق الدرجة حلوه Auto -De-Blu 

كريمي وسهل جدا بالرسم حلو داخل وخارج العين ولا سبب لي حساسية الحمدلله .. والحلو بعد انه مايحتاج بري بس لفيه وخلصنا .. وممكن تستخدمينه ك قاعدة للظل .. بعد راح يطلع حلو ..

..

وبما اننا في اللون الازرق نوصل للظل .. طبعا ماك مشهورين بالظل بكل الالوان والانواع .. الدرجة اسمها Moon's Reelection

..الدرجة ازرق سماوي وفيها شمر شوي .. انا بصراحة ماتستهويني هالالوان .. بس حلو هاللون مع الكحل اللي قبله يفتح درجة الكحل ..

...

ارواج ماك الجميلة .. الدرجة هذا ماقدرت اطلع لونها الصجي .. احمر على وردي وشوي فاقعة الدرجة بس حلووووه وماااااات.. افضل شي تكون شفايفج مرطبة عدل قبلها ..

ولون الدرجة Relentlessly Red 

والقلوس بصراحة انا مو من محبين القلوس بس هذا جميل جدا صح انه شوي يدبق بس لونه حلو ومع الروج هذا بعد .. حلوين مع بعض .. القلوس هذا فيه فرشة مو مثل باقي القلوسات اللي فيه الاداة تكون اسفنجة .. وفيه قلتر 

واسمه Venetian

اليمين القلوس - الوسط الروج مع القلوس - اليسار الروج فقط 

..

ونوصل للشي الجميل واللذيذ جدا جدا .. Mineralize  Skinfinish Natural ولون الدرجة Sunny Side 

كنت شايفة صور من قبل عن هالجمال كله ، بس ماتوقعت انه راح يوصل لي .. الدرجة جدا حلوه بس للاسف ماناسبتني تناسب البشرات اللي اغمج مني .. بس صرت استخدم كل لون بروحة .. و صرت استخدم بعض الالوان ك ظل للعيون ..

وهذي الدرجات .. بصراحة لو انا اللي مختارة راح اختار الدرجة الافتح عشان استخدمها كباودر وتناسبني اكثر .. 

فممكن ارجع اخذ اللون الافتح .. لاني حبيت نعومة الباودر نفسه .. 

...

ماسكرا Zoom Fast Black Lash 

للاسف الشديد الماسكرا ابدا ابدا ماناسبتني ، تكتل رموشي بشكل مو حلو .. وبعد اذا فتحتها يطلع وايد من المنتج

على الفرشة يعني ماتقدرين حتى تشيلين منه شوي .. لانه لازم تشيلين وايد منه عشان تقدرين تستخدمينها .. 

وبعد الماسكرا رطبة وتحتاج وقت لين تنشف ، ف راح تخرب لك الميك اب 

بالنسبة لي افضل شوي استخدمها للرموش السفلية بس بشكل خفيف جدا 

...

وسويت لوك بسيط من هالمنتجات 

قلم الحواجب كان ابداع بصراحة ، استخدم في الظل بودرة Sunny Side ، البني والبيج والمشمشي .. وتحت الحاجب استخدمت نايلون .. وللكحل استخدمت الكحل الازرق وحطيت فوقة من الايشدو .. ومع الماسكرا .. 

واستخدمت الروج و القلوس .. 

وللوجة كله استخدمت Sunny Side

... 

وبحط لكم كم صورة من لوكات العارضات بلمساات ماك 

مشترياتي من موقع لوكستيان الالكتروني للمره الثانية

السلام عليكم 

الجمال الباريسي والحب لوكستيان ، احب هالمحل جدا جدا جدا ، راقي بكل شي صراحة 

ومااذكر اني جربت منتج ولا عجبني .. كنت كاتبة من قبل موضوع عن محلهم الالكتروني واللي سهل علينا واااايد 

خصوصي انج تشوفين كل منتج ووصفة وسعره جدامج وتشترين اللي تبينه .. 

وفيه بعض العروض بس موجودة حصريا في موقعهم الالكتروني .. وصراحة اشجعهم تشترون منه ..

هذا موضوع المشتريات .. تقريبا خلصت كل شي شريته اما كريمات اليدين ماكانوا لي ، بس حلوين وعندي حاليا منهم مجموعة جميلة ومتنوعة .. 

اخذت اشياء اغلبها من العروض ..  ابي اجرب منتجات جديدة علي ،  اعرف اذا راح تعجبني او لا .. واذا اعجبتني اكييد راح اشتري الحجم الاكبر  ..

احلى شي فيه العروض انها تكون فيه شنطة صغيرة ، وانا احب هالشنط استفيد منها وايد .. 

...

اول شنطة اخترتها هالجميلة اللي بالصورة ترى تشيل وحجمها حلو .. 

- كريم وشور جل للجسم بالورد ، الريحة جدا حلوه مع اني شحصيا مو من محبين الورد في روايح العطور او منتجات العناية بالبشرة والجسم .. بس ريحة الورد عندهم جميلة جدا وناعمه وابدا مو مزعجة .. 

- كريم اليدين المشهور هذا الشكل ب اصدار محدود حبيته جدا .. وطبعا كريمات اليدين عندهم اشهر من نار على علم وانا ابدا مااستتغني عنهم .. واحد في الشنطة وواحد على المكتب والاخير قريب مني ل قبل النوم .. 

- عينة صغيرة من عطر fleurs-de-cerisier ، عجبني بصراحة وهذا الاصدار الجديد من العطر ناعم وخفيف مناسب للصيف وللصباح .

..

شوفوا الشنطة حبيتها خصوصي السحاب مكانه غير عن كل مره .. 

اخترت هالمجموعة اللي كل مره ادخل المحل واشتري اللي احتاجة وارش من العطر وعلى اساس اني باخذ شي من هالمجموعة ولا اخذ .. مااعرف ليش .. بس حلو انهم مجموعة واجربهم 

مجموعة النيرولي المذهلة

المجموعة ريحتها جدا جدا حلوووووه بدون اي مبالغة اللي يحب هالروايح .. شي اكيد اكيد برجع اخذ الاحجام الكبيرة ، الريحة ناعمه وراقية ، الريحة هذي تستاهل " شور دلع وبعدها بجاما جديدة " شعور لا يوصف صراحة ..  اللي جوها مثلي تروح تاخذ هالمجموعة .. 

- كريم الايدين قوامة اخف من كريم الشيا لانها نسبة الشيا اخف ، ف اللي تحب كريمات اليدين الخفيفة هذا جدا حلو .

- كريم للجسم ، وعينة صغيرة من العطر .. 

حبيت انهم في الفترة الاخيرة انهم صاروا يكتوب بالعربي ، لانه وايد كانوا يقولون ليش مافيه بالعربي .. 

..

هالعلبة العجيبة الغريبة ، كرة وفيها ٤ منتجات من مجموعة وحدة 

مجموعة Verbena Bauble

ريحتها ليمون ، اللي يحب هالريحة راح يحب المجموعة ، الريحة فرش ومنعشة جدا وانا تعجبني هالمجموعة 

لانها حلوه وتنعش خصوصي هالفترة مع بداية الصيف ..

- شور جل - كريم للجسم - كريم لليد  " كلهم جريتهم من قبل وحلوين " 

- صابونة للجسم ، صراحة اول مره بجربها واكيد بقول لكم رائي فيها .. بس بشكل عام احب صوابينهم ..

...

Shea Nail & Cuticle Nourishing Oil

زيت الاظافر ، جدا جدا جدا معروف ومشهور ، بس دايما يكون مخلص من المحل .. بجربة واكيد بكتب رايي في كل المنتجات الجديدة علي  .. بس وايد يمدحون هالزيت .. 

...

مرطب للشفايف بالورد ، فيه زبدة الشيا ١٠ بالمية ، كمية كبيرة .. 

...

كريم لليدين بالشيا ، نفس اللي كان في الشنطة الاولى ، ترى احب كريماتهم .. فعادي يكون عندي وايد منهم .. وحبيت الرسمه اللي عليه .. 

...

ومع كل طلب من الموقع تختارين ٣ انواع من العينات وهم ساعات يحطون لك زيادة .. 

الشامبو اللي فيه العينة جدا جميييل .. 

و الحلو في الموقع انه مع كل طلب فوق ال ٢٩٩ درهم يعطونك هدية .. اداة التدليك .. ممتازة صراحة انا عندي من الطلب الاول وشي حلو بعد انها وصلتني مره ثانية .. حلوه جدا مع زيت اللوز الخاص بالجسم من لوكستيان طبعا .. 

وهذي كل مشترياتي من الحب لوكستيان .. طريقة الطلب جدا سهله وماتحتاج اي شرح .. تسجلون وبعدها توصلهم رسالة تفعيل .. وتدخلون الموقع وتطلبون كل اللي بخاطركم .. وراح يوصلكم ايميل بتفاصيل الطلب مع رقم تتبع الشحنة من ارامكس 

موقع لوكستيان الالكتروني