November Empties 2015 | اشياء خلصتها في نوفمبر ٢٠١٥ + ممنوع اشتري اي شي لمده ٤ شهور

November Empties 2015  |  اشياء خلصتها في نوفمبر ٢٠١٥ 

السلام عليكم 

من فترة كتبت نفس هالموضوع بس لشهر ١٠ شوفوه هنا ، ووقتها كنت كاتبة اني ماحبيت خلال فترة ٤ شهور

اكون خلصت كمية قليلة من المنتجات ، ف في شهر ١١ نوفمبر حطيت لي اهداف ، والحمدلله حققتها 

ليش اهداف ، لاني ابي اخلص من وااااايد اشياء عندي سواء احبها او لا ، وشلون احاول استخدمها حتى لو مااحبها 

ف في هالشهر ركزت على كل شي باقي فيه ربع ، و السامبلز ، لاني جمعتهم في مكان واحد وكل يوم اطلع شي

شي شامبو شور جل او حتى كريمات وسيروم .. 

والحمدلله هالشهر خلصت وااايد وهذا اللي ابيه .. هالشي خلاني اقرر قرار يمكن شوي صعب علي بس باذن الله بقدر عليه

من شهر ١٢ ديسبمر الى شهر ٣ ، انا في تحدي مع نفسي اني مااشتري شي ابدا .. 

الحمدلله عندي اللي يكفيني وزيادة واذا خلصت شي ولا عندي له بديل وقتها اشتري .. 

يعني من الحين الى شهر ٣ ممنوع اشتري اي شيء ، لانه ماشاء الله ساعات توصلني اشياء للتجربة وغير اللي انا اشتريه

صار عندي كمية كبيرة من اشياء العناية والميك اب ، ولا اقدر استخدم شي ، انا مو من النوع اللي يحب يكدس الاشياء

وهالشي بدا ينرفزني واصلا ماصار عندي مكان بالغرفة حتى اني ارتب اغراضي واقدر اشوف واستمتع بكل شي عندي 

ف قرار منع الشراء شي لابد منه في هذي الفترة ، الشي الوحيد اللي ابي اشترية هو برايمر للعيون لاني خلصت اللي عندي ولا عندي له بديل 

هذي الاشياء اللي بركز عليها هذي الفترة عشان اخلصها ، مجموعة كاملة ومنوعة 

واتمنى اني اخلص اكثر عدد منهم ويكونون موجودين في موضوع الشهر الجاي لديسمبر 

...

نشوف الاشياء اللي خلصتها هالشهر 

- منظف للمكياج من لوريال ، حلو وكتبت عنه ريفيو كامل هنا ..

- مقشر للوجه من كلين اند كلير ، بعد كتبت عنه ريفيو كامل هنا ..

- مناديل منعشة لتنظيف الوجة من المكياج من نيفيا ، حلوه ومو حلوه بنفس الوقت هي تشيل الميك اب بس لازم تبللينها شوي ب ماي ، لانها شوي جافة مو مثل باقي الماركات .. الحلو فيها انها ماتحرقني مثل جونسن ..

- قطن للتونر وغيره من سيفورا ، ممتاااز بصراحه وخلصت منه كذا واحد فيه ٧٠ حبة ب ٩ دراهم .

وعشان تكلمنا عن مزيلات المكياج نوصل للميك اب اللي خلصته 

- اول روج من كرازا ، لونه برتقالي هادي ، قديم وخلاص حان وقته .. 

- ونفس الشي ل ٣ قلوسات من ريفلون ، شريتهم من المطار ، اخر واحد عشقته تقريبا خلصت نصه ، بس خلاص 

بعد حان وقتهم ، انا كل فترة اشوف الميك اب اللي عندي اذا فيه شي تغيرت ريحته خلاص اطلعة 

- برايمر للعيون من ايسنس ، حلو ورخيص ، كتبت عنه هنا .. 

- جل لاينر على شكل قلم من بينيفت ، خلصته وكتبت عنه هنا ..

- بيوتي بلندر لي ولاختي خلاص بدلناهم ب ٢ جدد ، وفي الاخير فرشتين عطوني عمرهم ، خلصت عمرهم الافتراضي 

ومشكورين ماقصروا معاي في رحلتهم ... 

- سيروم مضاد للتجاعيد من كودالي ، خلصته كله ، بس ماشفت نتيجة واااااو ، لا كان عادي .. 

- كريم للعيون من افين حلو بس مشكلته ماتقدرين تستخدمينه كل يوم ، انا استخدمه بالليل بس يوم ايه ويوم لا ، لانه قوي على البشرة ، نتيجة حلوه على العين بس اذا استخدمه كل يوم اعلى منطقة في الخد تكون حساسة بزيادة .. 

- كريم الوجة خاص لليل نفس كريم العيون ، حلو جدا ، ونفس الشي استخدمه يوم ايه ويوم لا ...

- جل للعيون من كلارنس Eye Contour Gel ، هالماركة اللي كل شي جربته منهم حلو ، جل للعيون باااارد يستخدم الصبح يخفف من الاتفاخ و الهالات السودا ، هو يخفف الانتفاخ اكثر من الهالات ، يمكن لانه هالاتي غامقة ف ماراح يبين معاي الفرق ..

سامبلز من اليمين :

- كريم للرقبة من Klapp ، كريم عادي مافيه شي مميز .. 

- سيروم للعيون من ديرمالوجيكا احب هالماركة عندي منهم عينات ابي اخلصها قبل ماافتح السيروم الجديد نفسه 

افضل ماركة استخدمها وارتحت عليها هي ديرمالوجيكا ...

- تونر من كيلز ، على انه عينة الا اني استخدمته ٣ مرات ، هو تونر منقي ، بس طلع لي حبوب ، ممكن انه طلع لي الحبوب اللي كانت بتطلع بعد فترة بما انه منقي ..

- جل للوجه من لوكستيان ، خفيف وباااارد على الوجه ، عادي ماحسيت انه وااااو .. 

...

- لصقات بيوريه ، افضل في في السوق للرؤوس السودا ، خصوصي اللي مكتوب عليها الترا ، افضل وقت تستخدمينها فيه ، بعد شور دافي حطيها وانتي بالحمام لانه المسامات تكون مفتوحه ، واطلعي من الحمام وخليها الى ان تنشف تقريبا ١٥ دقيقة ، على ماانتي تلبسين وتحطين كريماتك الا هي جافة .. بتشوفين شي ماشفتيه من قبل اذا كانت عندك رؤوس سودا وبيضا .. 

- النوع الثاني اللي ب زيت شجرة الشاي ، كلش ماانصح فيه ، اصلا ماتلصق زين وتطيح ، وماتسوي شي ابدا .. 

- اخر شي امواس للوجة ، انا استخدمها بين جلسات الليزر .. حلوين ، انا اخذهم من دايسو 

- شريت فرشة جديدة ل جهاز تنظيف الوجة من كلينك ، احب هالجهاااز جدا .. هذي القديمة خلاص انتهت 

اما الجديدة احلى وشكله الشعر منفوش واحلى .. 

....

وخلصنا عطرين 

- Diva Rose ، بارد وخفيف علي ورد شوي  احب استخدمه بالبيت .

- Paris Amour من باث اند بودي ، كتبت عنه هنا .. 

نوصل ل العناية بالجسم 

- زبدة الجسم بزيت الارغان من بودي شوب ، رائعععععععة جدا جدا ، هذي مكتوب عليها ترطبيها لمده ٢٤ ساعة 

غير عن باقي الزبدات اللي عندهم ، انا حبيتها جدا .. 

- مقشر الجسم بعد ب زيت الارغان ، تقشير خفيف اذا جسمك مبلل ، بس صرت اقشر جسمي وهو جاف قبل ماادخل الشور و التقشير افضل بهالطريقة مع المقشرات الناعمة شوي .. 

- زيت Divine من كودالي ، هذا للوجة والشعر والجسم ، انا استخدمته للجسم بس ، وعجبني هو زيت جاف يعني مايخلك مزيته ، انا اخلطه مع اي كريم للجسم او زبدة عشان  ارطب جسمي زين .. هذي عينة صغيرة ..

- شور كريم للجسم من سيفورا ، عينات عندي منهم ويمكن باقي لي واحد ، صراحة حبيته ناعم على الجسم ويرطب .

- امبولات لتساقط الشعر ، جدا احبها ولا استغني عنها .. وخلصت علب وايد منها .. 

- شامبو ريحاب من لش ، اعششششقة كتبت عنه من قبل هنا ..

- شامبو لتساقط الشعر من EST ، هالماركة موجودة في بوتس ، وشعر الشامبو ١٦٠ درهم ، صراحة عادي ماشفت شي انه قلل التساقط او لا ، لكن بشكل عام شعري قل تساقطة ولله الحمد .. 

- شامبو وبلسم من Nanogen ، يكثف الشعر ، اعجبوني بصراحة ، ناعم جدا على الشعر ويرطب ، وريحتهم حلووووه حيل

مااعرف من وين مممكن اشتريهم بس ببحث عنهم اكثر ..

- شامبو وبلسم من rahua ، عادي مافيه زود ..

وبس هذا كل اللي خلصته في هالشهر ، وان شاء الله احاول اخلص اكثر الشهر الجاي 

....

June Empties 2015 | أشياء خلصتها في يونيو ٢٠١٥

June Empties 2015 | أشياء خلصتها في يونيو ٢٠١٥

السلام عليكم 

نرجع لموضوع انا احبه شخصيا ، الاشياء اللي خلصتها 

نشوف شنو خلصت هالشهر ، مو وايد لكن ماعليه حاولت اخلص الاشياء اللي باقي فيها 

شوي عشان ابدا بالجديد ..

..

من اليمين 

- عطر بخاخ للغرفة والمفارش من الشايع للعطور اسمه سكون ، ريحته حلوه لكنها ماتدوم لفترة طويلة .

- عطر urbanist من عطورات الحرمين ، العطر عربي طبعا بس جميل جدا ، بس ثباته من خفيف الى متوسط . 

- ماء تنظيف ميسلر ٣ في ١ من نيفيا، كتبت عنه ريفيو كامل هنا طلوا عليه .

- لوشن للجسم من سيتافيل ، رائع جدا ، يرطب الجسم وتشربة البشرة بسرعة ، والحلو فيه انه طبي ، ومافيه اي ريحة ويناسب البشرة الحساسة ، وممتاز للي عندهم اكزيما .

..

- مقشر سبا من بودي شوب ، مقشر بالملح ، اول ماشريته كان روعه بصرحه بس بعدين ماادري حسيته عادي

ومايسوي شي واو ، تقشيرة خفيف جدا ، صرت استخدمه بالفترة الاخيره وجسمي جاف عشان يقشر ، عادي وماراح اشترية مره ثانية .

- لصقات الانف من بيرويه ، لازالة الرؤوس السوداء ، احب هالنوع ومرتاحة عليه اجرب كذا شي ، بس ارجع لهالنوع ، واللي مكتوب عليه تحت الترا ، لاني احسه اقوى ويشيل اكثر . 

- كريم للعيون من essentials , كريم جل بالصبار ، بارد ومنعش ، مااحسة سوى شي غير انه يبرد عيني ، 

وصرت استخدمه لوجهي بعد اي جلسة ليزر لانه يهدي الوجة ، ماانصح فيه .

- كحل سائل بني من الف ، عادي جدا ، ووصل لي الفرشة خربانه ومااقدر ارسم فيه زين . 

- قلوس من كرازا ، خلاص قديم وانا اصلا ماصرت احب القلوسات .

..

- امبولات للشعر ، خلصت علب وايد منها وكل مره بقول بكتب عنها ، وانسى بصراحة بس بحاول هالفترة اكتب عنهم ، ممتازييييين ، وخففوا من تساقط شعري . 

- العشششق الابدي ، فيتامين الشعر والبشرة والاظافر شي شي شي ، كتبت عنهم موضوع كامل هنا . 

هالاثنين اخذوهم وانتوا مغمضين .

..

من افشل الاشياء اللي جربتها اللي تختص ب علاج تساقط الشعر ، كتبت عنهم في الانستقرام ، و وايد نفس مشكلتي .

ماودي اتكلم عنهم اكثر ، غاليين ولا لهم تنيجة تذكر .

..

- سامبل لكريم للعيون من ديرمالوجيكا ، حبيته صراحة ، وعندي بعد كذا واحد بخلصهم باذن الله ، اللي عجبني انه خفيف و فيه حماية من الشمس . 

- سامبل عطر انجل ، رائع جدا اتوقع مافيه احد مايعرفه او شمه من قبل ، جميل جدا .

- سيروم لتطويل الرموش ممتاز بصراحة وكتبت عنه منه قبل هنا . 

- سامبل من اولاي ، مركب لتخفيف التجاعيد ، صراحة حلو ، انا عندي خطوط بجبهتي ومااحبها ، واستخدمت هذا ويخففها بس بس بشكل خفيف ، بس حلو لانك تشوفين الفرق . 

- سامبل لغسول من ماركة Derma ، حلو ، مااعرف وين ممكن اننا نشتري منه لانه وصلني من قلام بوكس .

- كريم من كودالي لجميع انواع البشرة ، فيه لون خفيف و يساعد البشرة انها تخفف من التصبغات اللي فيها ، حلو وعندي منه حجم كبير . 

- سيروم مرطب للبشرة بعد من كودالي ، بكل صراحة راااااائع جدا ، يرطب البشرة من الداخل ، وخفيف وبسرعة بشرتي تتشربة ، احطه بعدين احط الكريم اللي استخدمه كل يوم ، رائع وفعلا بشرتي ارتاحت عليه ، ويوم خلصته حسيت بالفرق ، منتجات كودالي رائعه استخدم منهم كذا شي وجدا حلوين ، والماركة بدت تنتشر عندنا اكثر واكثر ، متوفره ب سيفورا و صيدليات ابن سينا ، انصحكم بمنتجاتهم و وقريب بكتب عن تجاربي مع هالماركة الفرنسية . 

وبس هذا كل اللي خلصته .

"اللهم .. لاتدع لنا ذنبا الا غفرته "

ونشوفكم في مواضيع جميلة ، ولا تنسوا الاشتراك بالمدونة ، اشتراكم يدعمني .. 

February Empties 2015 || أشياء خلصتها في فبراير ٢٠١٥

February Empties 2015 || أشياء خلصتها في فبراير ٢٠١٥

السلام عليكم

عوده لهذا الموضوع الجميل ، انا احب اسويه واحب اقراه من البلوقرز ..

اشياء خلصتها في فبراير وشوي من مارس نشوفها سوا ..

..

قبل كل شي اذا ماكنتي متابعتني نوريني مع الغاليات 

...

من اليمين :

- من Dermato Poietin .. General Purpose Skin ,سيروم للسيليولات يستخدم كل يوم مع شويه مساج ،

    خلصته بس صراحه ماشفت نتيجه اقدر اقول عنها واااو لكن خففها بشكل بسيط جدا .. " مااعرف من وين ممكن احد يشتريه بس انا وصلني من علبه زانيدو ويبيعونه عندهم بالموقع ..

- كريم للجسم من جرجنز بالصبار المريح ، كريم لطيف للجسم وبسرعه تتشربه البشره و ريحته حلوووه بصراحه ...

  ممكن ارجع اشتريه اذا خلصت اللي عندي ..

- ديودرنت من ريكسونا تكلمت عنه وااايد من افضل اللي استخدمتهم ، وهذا ريحته شور فرش جدا حلوه ..

..

- الشامبو الجاف من صانسيك هذا خاص بالشعر الدهني ، بكتب عنه ريفيو قريب هو مع باقي الانواع ..

- سيروم للشعر المتقصف من لوريال كتبت رايي عنه هنا ، شي ماكتبته بالموضوع هو اكتشفته بعد ماخلصته ،

المنتج كميه قليله يعني ٣ اسابيع الى اسبوعين وهو مخلص ، اذا تستخدمينه على فترات متباعده اما اذا كل يوم اتوقع اسبوعين او اقل وهو مخلص .. بس ماشفت نتيجه وااااو في شعري هذا هو ماتغير ..

- فيتامينات للشعر ،البشره والاظافر ، احبها واعشقها جدا ، حاليا وقفتها و جالسه اجرب شي جديد ، كتبت عن الفيتامينات

هنا ريفيو كامل ..

...

- عطر للجسم ، خيااااال ، احب هالريحه بشكل مو طبيعي ، نسخه طبق الاصل من توايلات وود من باث ان بودي ..

- elite musk ، هالشي العجيب وتكلمت عنه من قبل انه نسخه طبق الاصل من مسك عبدالصمد القرشي ، انا المسك زين مااتسبح فيه ، اعشق هالريحه نظافه .. للاسف خلص ولا ادري وين ممكن الاقيه في دبي ، بالسعوديه موجود ، بس اي وحده تشوفه لازم تاخذه ، ريحته جميله وقويه ..

- عطر من باث اند بودي ، اسمه ps i love you ,ريحته عاديه ، ماحبيته علي على جسمي فصرت استخدمه ك معطر للغرفه .. ماراح ارجع اشتريه ..

..

- ultracalming mist من دريمالوجيكا ، هالماركه بكبرها روعه واحبها مااستخدمت شي منهم وندمت عليه والفيشل عندهم خطير ، انا اخذت برنامج عناية كامل من عندهم ووايد ناسبني ، هذا مست او تونر على كلامهم ترشينه بعد غسيل الوجه ،

ميزته انه يكون يحفظ الرطوبه بالوجه لمده ٢٤ ساعه ، يوازن الدهون بالوجه ، و مهدء للبشره الحساسه ، جدا جدا ناسبني

وصراحه من خلص بشرتي احس انها تغيرت شوي ، الحبوب كانت شبه مختفيه او اذا اطلعت يومين وتروح .. هذا اللي لازم ارجع اشتريه ..

- بخاخ افين للوجه ، احبه ويساعد جداا على حماية البشره من الجفاف ، وكتبت عنه قبل هنا 

- غسول للوجه من مراد ، حلو ينظف ويقشر البشره بشكل لطيف ولا يزعج ، وكتبت عنه هنا

- كريمين للعيون اللي علبتهم بيضا وفضيه ، من الفضي يشيل الهالات و الخطوط الرفيعه اللي حوالي العين والانتفاخ تحت العين ، يستخدم لمده شهر كل يوم مرتين ، والشهر اللي بعده استخدم الابيض وميزه الابيض انه كله فيتامينات تساعد العين انها تبين اصغر ويستخدم لمده شهر ، وبعدها ارجع استخدم الكريم الفضي مره ثانيه لمده شهر ..

صراحه النتيجه حلوه بس حبيت ترطيب الكريم اللي علبته فضيه اكثر وبشرتي تتشربه اكثر ، اما الابيض زين بس كنت احس انه شوي ثقيل على منطقه العيون ، وياخذ وقت لين تتشربه البشره .. بس بشكل عام حلوين ..

- كريم Eldoquin 2% cream ,رحت للصدليه وطلبت كريم يفتح الجسم ، لانه ايدي اليمين وكوعي اغمج من كل جسمي ، لانه الشمس اغلب الوقت عليها ،ويبين فيه فيه باللون ف اعطتني هذا الكريم واستخدمته وحلو فتح لي ايدي تقريبا بدرجتين ، بعد ابي ارجع اشتريه مره ثانيه لانه بعده اللون غامج مو مثل باقي جسمي او ايدي اليسار ...

- كونسيلر او بي بي كريم للعيون من غارنيه ، ماخلصته ، صراحه ابد ابد ماناسبني ، من احطه عيوني تدمع وتحكني

وفيه ريحه قويه تاثر بعد على عيني .. ماحبيته ولا ابي استخدمه ابدا ..

..

- ماسكات للوجه والرقبة كتبت عنهم هنا ..

- سامبل من نيفيا ، بلسم للبشرة ، حلو واحسه يناسب الناس السريعه اللي وراها دوام وماتبي تحط لوشن وتتاخر ..

- اخر شي قطن للوجه من بوتس ، الكيس فيه ١٠٠ حبه ، ماحبيت هالنوع على شكل مستطيل صغير بس يتناثر ..

ماعجبني ولا راح اشتريه مره ثانيه ..

وبس هذا كل شي خلصته في هالفتره ..

February Glambox 2015 || علبة شهر فبراير من قلام بوكس

السلام عليكم 

شهر جديدة وعلبة جديدة من قلام بوكس ، نشوف محتوياتها معاكم 

اول ماافتح العلبة دائما يحكون كوبونات هدايا هالمره ل منكيير مجانا .. وشي حلو 

من اليمين : 

- سامبل عطر من اسكادا ، عطر صيفي مزيج من الورود والمندرين والصندل  ريحته هاديه وحلوه .. سعر الحجم ٧٥ ميلي ب ٢٥٥

- زيت للشعر يقلل من نكشه الشعر سعر ال ٣٠ ميلي ب ٨٥ درهم وال ١٠٠ ميلي ب ١٧٩ درهم 

- بخاخ حامي من حراره الشمس من نيفيا واساسه ماء يعني مايدبق ، جربته خفيف وحلو على البشره ب ٥٣ درهم

- لوشن للجسم بزبده الككاو من نيفيا ، ترطيب هالكريم روعه ، مع اني مااحب ريحه زبده الككاو ابدا مااطيقها

بس بهذا اللوشن شوي اخف ب ١٤ درهم 

- روج من من قلام قلاس مااات ، احمر ، ورائع درجه اللون حلوه وثابته ب ٣٩ درهم 

... 

البوكس هالمره حلو وكل الاشياء اللي فيه بستخدمها ان شاء الله .. 

3in1 Micellar Cleansing Water Nivea \\ ماء تنظيف ميسلر ٣ في ١ من نيفيا

السلام عليكم

  3in1 Micellar Cleansing Water \\ ماء تنظيف ميسلر ٣ في ١ 

تقريبا كل شركه قامت تنزل هالنوع من مزيل المكياج ، وانا وحده احب اجرب ، ممكن الاقي شي افضل او ارخص

بنفس المفعول ، المنتج الجميل وصل لي من علبة قلام البوكس اللي مشركه فيها لمده سنة .. وهنا الموضوع 

+ لجميع انواع البشرة .

+ سعره ب ٢٣ درهم اماراتي .

+٢٠٠ ميلي .

+ يتوفر باي مكان يوفر منتجات نيفيا .

+ العلبة جميلة وشفافه وتبين لك كم باقي من المنظف . 

+ خالي من البارابين والعطور .

+ مافيه ريحه قويه بس تشمينها بالعلبه نفسها ، اما عند الاستخدام ابدا .

+ يشيل مكياج العيون بشكل حلو خصوصي الماسكرا .

+ جربته في اثقل ميك اب ، كنت رايحه لعرس او زواج ، والميك اب ثقيل وشي ضد الماي والروج المات والثابت 

   ابهرني بصراحه ، شال كحل ميك اب فور ايفر ضد الماي ، وروج سيفورا لب ستين ، بشكل حلو . 

+ طريقتي فيه احطه على القطنه واحطه على عيني لمده ١٠ او ١٥ ثانيه يتغلغل ويفكك الكحل و الماسكرا بدون ماافرك عيني

   خصوصي انه منطقه العين حساسه ورقيقه ، وانا اصلا عيني حساسه ، وهالمنتج ابد ماسبب لي اي حساسيه . 

+ المنتج مافيه اي طعم ، ادري بتستغربون بس يوم امسح الروج لازم كذا لحسه للشفايف ، مافيه اي طعم غريب ،

    بعكس بايودرما .

+ يترك البشرة حلوه ومترطبة بعد ماتزيلين كل المكياج ، ومايترك اثر زيتي او شي لا لا ابدا .. 

بشكل عام ايه حبيته وماعندي مشكله ارجع اشتريه ، سعره حلو وكميته حلوه .. 

- اذا بتسافرين وبتاخذين معاك العلبه افضل تحطين لصقه علي العلبه عشان ماتنفتح ، لانه احس ممكن انها تنفتح

  اذا كانت شنطه الميك اب او شنطه الكريمات مليانه .. 

وهذا رايي فيه بكل صراحه 

"اللهم .. لاتدع لنا ذنبا الا غفرته "

ونشوفكم في مواضيع جميلة ، ولا تنسوا الاشتراك بالمدونة ، اشتراكم يدعمني .. 

December Glambox 2014 || علبة شهر ديسمبر من قلام بوكس

السلام عليكم 

عوده للبوكس الجميل والهديه الشهريه لنفسي ، احب ادلع نفسي ، واذا احد يعرف عن اي خدمه

تقدم مثل هالعلب انا مستعده اجربها بس تكون في دبي بليز ... 

هالشهر علبتي خاست في ارامكس ، ويوم اتصلت وبكل برود يردون علي هي ماوصلت لك اصلا ! 

عيل ليش دقيت مثلا ! 

 هالمره العلبه مافيها اي خصم او اي اعلانات ، وتوقعاتي لشهر يناير بخصومات اكثر .. 

هالشهر يعني .. 

- مزيل الميك اب من نيفيا ، شي جديد بالسوق ، وبكتب عنه ريفيو بس اجربه زين ... سعره ٢٢ درهم - بس في سبينس ب ٢٣ درهم ... 

- Toppik .. الياف تغطي اماكن الفراغات بالشعر ، من زماااان ودي اجرب هالشي ، والحجم حلو ...

- مرطب الشفايف من لابيلو بنكهه الفانيلا والماكاديما ، كان عندي من قبل وترطيبه حلو ، ب ٩ ونص درهم ..

- ماسك من دكتور جي  صراحه متحمسه اجربه ، سعر هالماسك وهو لاستخدام واحد ب ١٠٠ درهم 

- اخر شي عينات من  dermale وكلها خاصه بالترطيب ، كريم ليلي - كريم للعيون و غسول .. بجربها 

هالمره كلها اشياء جديده علي ماعادا المرطب ، بس شي حلو بصراحه نجرب اشياء جديده وممكن نحبها بالمستقبل 

...

اذا حابه تشتركين بهالعلبه الجميله من هنا سجلي واختاري المده اللي تبين تسجلين فيها ٣ او ٦ شهور او لمده سنه 

من هنااااااااا

..

عندي كود خصم  ٢٠٪ هديه مني لكم 

TWu93raj6T

...