February Empties 2016 | اشياء خلصتها في فبراير + ٣ شهور على التحدي

February Empties 2016 | اشياء خلصتها في فبراير + ٣ شهور على التحدي

السلام عليكم 

عوده لهالموضوع الجميل وتحدي اجمل 

هالشهر ولله الحمد خلصت كمية حلوه من المنتجات كنت حاطة في بالي ابي اخلص ٢٠ منتج ، وحققتها شي منتجات بالحجم الكبير وشي حجم عادي وشي سامبلز .. بس المهم اني حققت هدفي .. 

- بسلم للشعر من هيربل اسنس ، خلصت الشامبو من فترة .. ومثل مامكتوب بلسم مرطب ، فعلا يرطب الشعر الجاف 

عجبني ، وحلو للاستخدام المتكرر .. 

- شامبو التنقية من ايف روشية ، جميييييل جدا جدا وناسب شعري الدهني .. كمية صغيرة منه تكفي .. انا مااستخدمه في كل مره تقريبا مره في الاسبوع .. بس جدا جدا ممتاز ، واكيييد برجع اشتري منه .. 

- سيروم من غارنيية لنمو الشعر ، خلصته وماحسيت باي شي ف ماراح ارجع اشترية ..

- كريم للشعر من كيلز ، له ريفيو على الانستقرام .. حلو بس فيه افضل منه .. 

..

- كريم فيتامين e من ديرما اي ، جدا جدا حبيته ، وله ريفيو مفصل على الانتسقرام .. ممتاز في ترطيب الجسم 

- غسول للوجة من كلينيك ، حلو للبشرة العادية الى الدهنية .. لانه ساعات يجفف المناطق الجافة اللي عندي .. اللي حبيته النوع الثاني الفوم ، كان ممتاااز .. 

- شور جل من باث اند بودي .. كان باقي فيه ربع وخلصته ، ريحته حلوه وفرش ..

- كريم للجسم من تيد بيكر ، عجبني بسرعة البشرة تتشربه ولا يترك اثر زيتي ..

- فيتامين c &e ، فوايد هالفيتامينات جدا حلوه للبشرة .. 

...

- مرطب للشفايف ب زيدة الشيا ، عجبني وخلصته 

- عطر سامبل .. عادي من ذوقي بس خلصته .. مااحب اخلي شي يكون زيادة عدد 

..

- شمعة من باث اند بودي ، ريحتها قوية وتعبي المكان وساعات تزعجني  واصدع منها .. 

- عطر بريحة شجرة الليمون من لش ، شوي قوية الريحة صرت استخدمه للغرفة .. انتعاش 

..

- غسول للفم من اورال بي ، يعجبني ويعطي نفس حلو ، ومع التقويم لازم استخدمه .

- قطن للوجة من دايسو جدا جدا عجبني ، طبعا ماخلصته كله بس شلته من العلبة وحطيته بعلبة ثانية ، بس ممتاز جدا

وبرجع اشتري منه بس مشكلته اني ماالاقيه دايما .. 

..

- عينة من كريم العيون من ديرما اي ، جدا عجبني يرطب العين ويشيل الجفاف كله .. وحلو قبل الميك اب ..

- غسول الفووم من كلينيك ، جدا جدا عجبني وهذي اخر عينة منه 

- قطن استخدمه للمناكير 

...

- خلصت فكس بلس من ماك ، ممتااااز طبعا 

- بيبي كريم من ذ بودي شوب ، خفيف وحلو لكل يوم .. ومافيه لون قوي 

- ماسكرا من ريميل .. كتبت عنها هنا ريفيو كامل . 

- مزيل للميك اب من ماكس اون ، حلو للوجة بس للعين يحررررررق .. 

...

وهالفتره انا جالسة اشوف الميك اب القديم او اللي ماعجبني واطلعة .. وهذي الحصيلة .. 

فيه اشياء شلتها من العلب وحطيتها في ال زي بالت .. و وفرت علي مكان 

وبس هذا كل اللي خلصته هالفترة .. 

.......

التحدي ولله الحمدلل مرت ٣ شهور والحمدلله على هالشي .. نظرتي تغيرت صراحة صرت اطلع عادي و صار عادي جدا اني اطلع ومااشتري شي .. اشوف وامتع عيوني بس مااشتري لاني حاطه في بالي هدف والحمدلله قاعدة اشوف نتايج حلوه ... اذا حسيت بفتره اني مليت او ودي اشتري شي .. اطلع اشياء جديدة من عندي وادخل القديم 

وبهالشي اخدع نفسي انه عندي شي جديد واستمتعت فيه لين امل منه او اخلصه .. وهذا اللي صاير 

صرت اذا خلصت الشي اتحمس اروح ادور له بديل بين الادراج وكاني شريت شي جديد .. 

ان شاء الله شهر مارس يكون شهر جميل واحقق فيه اهداف اجمل .. 

الهدف لهذا الشهر اني استخدم ٢٠ منتج " كبير او صغير " 

ونشوف ب نهاية الشهر اذا حققته او لا .. 

وباذن الله راح اقدر 

January Empties 2016 | اشياء خلصتها في يناير + مر شهرين على التحدي

January  Empties 2016 | اشياء خلصتها في يناير + مر شهرين على التحدي

السلام عليكم 

مر شهر جميل بكل تفاصيلة ، شهر يناير كنت اغلبة مسافرة وحاولت استخدم اشياء اكثر 

بس للاسف ماخلصت وايد اشياء ، ويوم رجعت من السفر ركزت على الاشياء اللي اخذتها معاي بالسفرة

وحاولت اخلصها لانه اصلا صغيرة و مابقى شي فيها .. 

نشوف الاشياء اللي خلصتها 

من اليمين : 

- لوشن للجسم من بالمزر بزبدة زيت الزيتون ، حبيت اللوشن جدا ، ناعم علي البشرة ويرطب بشكل جميل جدا ورييحته حلوه، اول منتج من بالمزر يعجبني ، لانه ابدا مااقدر اتقبل ريحة زبدة الكاكاو مع انها ممتازه بس مااحبها بس هذا عجيب ..

- سامبل لعطر من Yardley ب ريحة  English Daisy ، هالماركة اللي ابدا ماكنت انتبه لها لا عطور ولا كريمات ، حبيت من قبل كريم للجسم وعجبني ، هالمره بعد هالعطر حبيته خفيف ومنعش .. 

- سامبل كريم اساس بج ايزي من بينيفت ، عجبني خفيف وبس بنفس الوقت يغطي .

- خيط للاسنان من اورال بي ، احب هالماركة جدا ، وهالنوع ممتاز لانه ضعيف ويدخل بين الاسنان . 

- العشششق ، زيت الجسم من نوكس ، ماتوقعت اني راح احبه واعشقة بعد ، زيت للجسم خياااالي يرطب الجسم بثواني ولا يترك اثر زيتي على البشرة ، شي ممتااااز ، اللي يحب الترطيب يجربه .. وحلو بعد لو تخلطونه مع اي كريم للجسم .. راح يكون شي ممتاااااز .. 

..

- ديودرنت من ليدي سبيد ، ماادري ليش شريته ، قبل كان وايد افضل ، الحين لا ، حتى ماخلصته ماعجبني مثل اول .

- الحب ، من ريكسونا ، من احلى اللي استخدمتهم وهذا ريحته حلوه من اسمه شاور كلين ، شي نظيف .

- شول جل من skin therapy ,عادي جدا مافيه شي مميز . 

- كريم الوجة من لوكستيان بالفاونيا ، عجبني بصراحة وكنت متكلمه عنه من قبل هناااا 

...

- العشق ، سبرية للجسم ، ريحته تهبل ، بارده ونظافة وكل شي ، دايما اتكلم عنه وارجع اشتريه .

- بلسم للشعر من كيلز ، للشعر الجاف جدا و المتضرر ، مااحس انه للشعر الجاف جدا ، يعني من العادي الى الجاف 

ترطيبة حلو بس مو وايد قوي ، يعني لاتتخيلين انه شعرك راح يطلع زبدة بعد ماتستخدمينه ، هل راح ارجع اشتريه لا جربت افضل منه .. 

- ماوث وووش او غسول للاسنان هذا وصفته لي دكتورة التقويم ، لانه الاسنان تتحرك واللثة بعد تتحرك 

مع التفريش اليومي كانت اللثة تنزف دم شوي ف هذا كان ممتاز لعلاج هالشي ، ريحة قوية ومنعشة ، بس الطعم بعد الاستعمال كان شي ابدا مو حلو .. المهم خلصته وعالجنا المشكله ..

...

هالشمعة اللي عششششقتها جدا جدا ، وتحسفت اني مااخذت منها اكثر ريحتها جميله وهااااادية جدا 

مريحة خصوصا بالليل .. 

..

ساااامبلززز 

-واقي الشمس من ذا فيس شوب ، حلو وبعد لانه بدون زيت .. 

- كريم للوجة والرقبة من klapp، خفيف وحلو بسرعة البشرة تتشربة .. ناعم جدا ..

- كريم للعيون وللهالات من elemis ، مااقدر احكم عليه من سامبل صغير بس الملمس والنعومة شي حلو .. 

- غسول رغوي من كلينك عنية مع جهاز الوجة اللي شريته ، هي قالت لي راح يعجبك و ماصدقتها ، بس صج صج صج 

خياااال مع الجهاز ، عجبني جدا ، افكر اشتريه اذا خلصت اللي عندي .. 

- الذهبي ، هذا سيروم للشعر ب ذرات الذهب ، عادي ماشفت شي وااو حبيت استخدم السامبل قبل ماافتح العلبة اللي عندي، ماحسيت انه شي وااو عادي . 

- الحب barrier repair من ديرمالوجيكا ، عشق عشق انا مع هالكريم ، ممتاز لانه يشيل القشور ، يجدد البشرة 

جدا احبه ، خلصت العلبة الكبيرة وحاليا ابي اخلص السامبلز اللي عندي منه قبل مااشتري الجديد . 

٣ سامبلز من ديرما اي 

الاول للسترج مارك ، مكوناته جدا حلوه ومرطبة ، فيتامين اي و زيت الارغان و زبدة الككاو ، كترطيب حلو لكن السامبل صغير عشان احكم عليه وعلى نتايجة . 

- كريم العيون ، عجبني بصراحة كترطيب جدا حلو وخفيف . 

- كريم ليلي مرطب للوجة ، عجبني وكاني استخدمته واحد من قبل ، عندي مجموعة منه وبستخدمهم باذن الله

بس حبيت الترطيب ويخلي البشرة ناعمة بعد استخدامه .. 

...

التحدي صراحة واجهت شوية صعوبة فيه خصوصي هالشهر لانه في دبي كان مهرجان التسوق

وكل المحلات تقريبا كان عندهم تنزيلات وعروض رائعة بصراحة ، ف مسكت نفسي جدا 

بس ضعفت عند باث اند بودي وركس ، شريت منهم ٣ بدي سبرية للجسم و شمعتين 

الاسعار كانت شي خيالي يعني الشموع ب ١٥ درهم .. 

ف صح خربطت شوي لكن باذن الله راجعة بقوة اني مااشتري اي شي 

وابي اكمل هالتحدي الى ٣ شهور زيادة يعني الى شهر ٦ اللي هو اصلا بعد راح يكون مهرجان صيف دبي 

وفيه بعد تنزيلات .. ف القرار تم اني مااشتري اي شي بعد لانه اللي عندي يكفيني ولله الحمد واذا نقص شي ولا عندي له بديل وقتها اشتري .. 

بكل صراحة وصلت لمرحلة انه ماعندي مكان احط اي شي جديد ، وابي استخدم اللي عندي و استمتعت بكل اللي شريته

وصرفته .. 

حاليا اخترت ٢٠ منتج بحاول اركز عليهم هالفترة ، البعد باقي فيه شوي ، والبعض نص ، ف راح اركز عليهم
لين اخلصهم او اخلي فيهم شوي يكونون من الاهداف للشهر الجاي ..

باذن الله الشهر الجاي احقق اهدافي واخلص مجموعة حلوه منهم

..

ويارب يحقق لكم كل احلامكم  

December Empties 2015 | اشياء خلصتها في ديسمبر + مر شهر على التحدي

December Empties 2015 | اشياء خلصتها في ديسمبر + مر شهر على التحدي

السلام عليكم 

مرت سنة كاملة اتمنى انها كانت سنة حلوة عليكم ، الحمدلله على كل شي ربي اعطانا اياه والحمدلله على كل النعم 

سنة جديدة وباذن الله تكون سنة جميلة بكل مافيها ، اتمنى اني ربي يحقق لي كل احلامي واحلامكم يارب 

الحمدلله على الصحة و الامن والامان 

كل بداية سنة نخطط لسنة جديدة اهداف واحلام نحاول نحققها ، انا في نهاية شهر ١١ قرر اني مااشتري اشياء لمدة ٤ شهور ، ممكن صعب للبعض بس الحمدلله قدرت على هالشيء ، ومافيه شي مستحيل اذا ارادتك قوية وان شاء الله استمر ل ٣ شهور على هالقرار الجميل .. 

اشتريت شي واحد بس وكنت كاتبه اني راح اشترية اللي هو برايمر العين اخذت لي واحد من اربن ديكاي 

وبس هذا اللي اشتريتة في هالشهر ..

نشوف الاشياء اللي خلصتها هالشهر ، شوي بس الحمدلله راضية عن انجازي 

...

الميك اب : 

- كحل ممتاز ضد الماي من ماركة باري ام موجودة في صيدلية بوتس ، صراحة القلم ممتاااز وانصح فيه احبه لداخل وخارج العين . 

- ايلاينر قلتر من H&M ، عادي واحس انه نشف بسرعه . 

- ماسكرا من توفيسد ، كلش ماحبيتها ابدا ابدا ، ناشفة شوي وتتكل ، وبعد فترة تشوفين اشياء تحت العين .

...

كريمات واشياء للعناية : 

- سامبل من carita من علبة قلام بوكس ، عادي ماشفت اي شي منه استخدمته مرتين .

- سامبل من بايودريما المجموعة الجديدة اللي باللون الازرق ، هالمجموعة ممتازة للبشرة الجافة 

هالكريم خاص للنهار لانه فيه حماية من الشمس ، رائع بصراحة حبيته جدا ، وتكلمت عنه كذا مره بالسناب .

- العشق مرطب للشفايف من Sebamed ، رائع رائع رائع ممتاز للشفايف خصوصي اذا كانت ناشفة شوي .

- زيت ارغان بالورد ، كان بعلبة قلام بوكس ، هو للوجة بس ماحبيت استخدمة لوجهي ، استخدمته للرقبة والشعر شوي 

حبيته للرقبة ، ترطيب حلو ولا يدبق ابدا .. وريحته حلوه .

- سكراب للجسم من skin therapy ، عادي جدا جدا جدا اصلا ماتحسين بالتقشير ابدا ابدا ، خلصته واكييييد ماراح اشتري منه .

...

- سامبل من بايودريما ، كريم واقي من الشمس ، ماحبيته بصراحة يخلي الوجة ابيض وبعد فترة يقلب رمادي ، ماحبيته .

- كريم للوجة ثقيل شوي من المجموعة الجديدة من بايودريما هالمجموعة ممتازة جدا ، وهالكريم حبيته جدا اللي بشرتها جافة هالمجموعة حلوه .

- زيت للوجة من كودالي من مجموعة المضادة للتجاعيد ، ماناسبني لانه طلع لي حبوب ببشرتي ، مع انه فيه وايد ناسبهم وحبوه بس انا للاسف ماناسبني ، بس صرت استخدمة لجسمي مع اي كريم للجسم .

...

- كريمين لليدين من ذا فيس شوب ، ترطيبهم عادي وخفيف واصلا ماحبيتهم لليدين واستخدمتهم لجسمي ، ماراح اشتري منهم مره ثانية .

- الكريم اللي احبه من دوف ، ريحته بس شي خياااااالي نظافة ياليت لو يسسون عطر منه ، عادي اتسبح فيه من جماله ، كترطيب خفيف والبشرة تتشربة بسرعة . 

- ثاني سيروم من كودالي مضاد للتجاعيد هذا كانت لاختي ولا حبته ، كان للنص تقريبا وانا كملته بس عادي ماشفت شي مع انه ثاني علبة اخلصها منه .

- وخلصت شمعة ريحتها ناعمة وهادية جدا ..

...

- مقشر للقدم من Pedi Peel ، اول مره اجرب مقشر للقدم بس حبيييييت النتيجة جدا جدا ، انا حطيته يوم الجمعة و بددت تتقشر بعد ٥ ايام تقريبا ، بس نتيجة ولا اروع .. حبيييت ..

- ماسك للشفايف من Dermal ، شكله حلو كانها شفايف بس كبيررررة كانها قطعة سيلكون ، تحطينه على الشفايف لمدة ٢٠ دقيقة .. نتيجة حلوه والله رطب لي الشفايف ولانها قطعة شوي كبيرة رطب لي المنطقة اللي حوالي الشفايف بعد .

- ماسك من اولاي ، والله حلو نعومة وترطيب وفتح لي بشرتي شوي ، كنت مستخدمته من قبل كان عادي بس هالمره اعجبتني النتيجة .. 

- غسول للبشرة من ذا فيس شوب ، عادي بصراحة .

...

سامبلززز : 

- كريم مرطب للبششرة الجافة من كلارنس ، حبيت هالمرطب جدا ، يرطب بشكل حلو ولا يدهن البشرة او انه يكون ثقيل بشكل مزعج ، عجبني وعندي من حجم وسط وبعد سامبلز .. 

- دبل سيروم من كلارنس ، صح سامبل ولا شفت اي نتيجة ، لكن ملمسة ناعم جدا على البشرة حبيت الشعور اللي يعطيني اياه بعد الاستخدام .

- غسول فوم مع كلينك هذا عطتني منه مجموعة يوم شريت جهاز تنظيف البشرة من عندهم ، وممتاز مع الجهاز ، حبيت الاثنين مع بعض كمية صغيرة منه ترغي وتنظف الوجة .. عجبني جدا .. 

- شاور كريم من سيفورا ، حبيته وهذا اخر واحد منهم للاسف ، بس ماعليه استمتعت فيهم وانا استخدمهم .

- كريم من KLAPP , ترطيب حلو وناعم انا استخدمته للرقبة ..

- شاور ومقشر ناعم للبشرة من المنس ، ناعم وخفيف على الجسم ، وريحته تهبل .

- غسول منظف للبشرة من ديرما اي للبشرة الجافة ، حلو وناعم على البشرة ولا يهيجها ابدا ، عجبني .

- جل واقي للشمس من ذا فيس شوب حبيت انه جل مو كريم عشان مايعطيني لون ابيض على الوجة .

...

العطور : كلها سامبلز 

- عطر ياردلي روز ، حلو مع انه روز بس حلو كسامبل بس ماافكر اشتريه 

- عطر من كودالي ، عادي بصراحة .

- الجمال اللي بالوسط حبيتهم بصراحة ، بس ماادري من وين ممكن اشتريهم ، ببحث عنهم .

- عطرين من الرصاصي ، نوعين جدد منهم كلهم بالمسك طبعا ، بس حبيت واحد اكثر من الثاني ، بس نسيت اي واحد 

دخل مزاجي . 

...

وبس هذا كل اللي خلصته هالشهر ، وان شاء الله شهر يناير يكون شي اجمل نحقق فيه لو جزء بسيط من احلامنا

وآمالنا .. 

مافيه شي صعب ب هالحياة احنا نستصعب الامور ، لكن التخطيط السليم يساعدك على الانجاز .

November Empties 2015 | اشياء خلصتها في نوفمبر ٢٠١٥ + ممنوع اشتري اي شي لمده ٤ شهور

November Empties 2015  |  اشياء خلصتها في نوفمبر ٢٠١٥ 

السلام عليكم 

من فترة كتبت نفس هالموضوع بس لشهر ١٠ شوفوه هنا ، ووقتها كنت كاتبة اني ماحبيت خلال فترة ٤ شهور

اكون خلصت كمية قليلة من المنتجات ، ف في شهر ١١ نوفمبر حطيت لي اهداف ، والحمدلله حققتها 

ليش اهداف ، لاني ابي اخلص من وااااايد اشياء عندي سواء احبها او لا ، وشلون احاول استخدمها حتى لو مااحبها 

ف في هالشهر ركزت على كل شي باقي فيه ربع ، و السامبلز ، لاني جمعتهم في مكان واحد وكل يوم اطلع شي

شي شامبو شور جل او حتى كريمات وسيروم .. 

والحمدلله هالشهر خلصت وااايد وهذا اللي ابيه .. هالشي خلاني اقرر قرار يمكن شوي صعب علي بس باذن الله بقدر عليه

من شهر ١٢ ديسبمر الى شهر ٣ ، انا في تحدي مع نفسي اني مااشتري شي ابدا .. 

الحمدلله عندي اللي يكفيني وزيادة واذا خلصت شي ولا عندي له بديل وقتها اشتري .. 

يعني من الحين الى شهر ٣ ممنوع اشتري اي شيء ، لانه ماشاء الله ساعات توصلني اشياء للتجربة وغير اللي انا اشتريه

صار عندي كمية كبيرة من اشياء العناية والميك اب ، ولا اقدر استخدم شي ، انا مو من النوع اللي يحب يكدس الاشياء

وهالشي بدا ينرفزني واصلا ماصار عندي مكان بالغرفة حتى اني ارتب اغراضي واقدر اشوف واستمتع بكل شي عندي 

ف قرار منع الشراء شي لابد منه في هذي الفترة ، الشي الوحيد اللي ابي اشترية هو برايمر للعيون لاني خلصت اللي عندي ولا عندي له بديل 

هذي الاشياء اللي بركز عليها هذي الفترة عشان اخلصها ، مجموعة كاملة ومنوعة 

واتمنى اني اخلص اكثر عدد منهم ويكونون موجودين في موضوع الشهر الجاي لديسمبر 

...

نشوف الاشياء اللي خلصتها هالشهر 

- منظف للمكياج من لوريال ، حلو وكتبت عنه ريفيو كامل هنا ..

- مقشر للوجه من كلين اند كلير ، بعد كتبت عنه ريفيو كامل هنا ..

- مناديل منعشة لتنظيف الوجة من المكياج من نيفيا ، حلوه ومو حلوه بنفس الوقت هي تشيل الميك اب بس لازم تبللينها شوي ب ماي ، لانها شوي جافة مو مثل باقي الماركات .. الحلو فيها انها ماتحرقني مثل جونسن ..

- قطن للتونر وغيره من سيفورا ، ممتاااز بصراحه وخلصت منه كذا واحد فيه ٧٠ حبة ب ٩ دراهم .

وعشان تكلمنا عن مزيلات المكياج نوصل للميك اب اللي خلصته 

- اول روج من كرازا ، لونه برتقالي هادي ، قديم وخلاص حان وقته .. 

- ونفس الشي ل ٣ قلوسات من ريفلون ، شريتهم من المطار ، اخر واحد عشقته تقريبا خلصت نصه ، بس خلاص 

بعد حان وقتهم ، انا كل فترة اشوف الميك اب اللي عندي اذا فيه شي تغيرت ريحته خلاص اطلعة 

- برايمر للعيون من ايسنس ، حلو ورخيص ، كتبت عنه هنا .. 

- جل لاينر على شكل قلم من بينيفت ، خلصته وكتبت عنه هنا ..

- بيوتي بلندر لي ولاختي خلاص بدلناهم ب ٢ جدد ، وفي الاخير فرشتين عطوني عمرهم ، خلصت عمرهم الافتراضي 

ومشكورين ماقصروا معاي في رحلتهم ... 

- سيروم مضاد للتجاعيد من كودالي ، خلصته كله ، بس ماشفت نتيجة واااااو ، لا كان عادي .. 

- كريم للعيون من افين حلو بس مشكلته ماتقدرين تستخدمينه كل يوم ، انا استخدمه بالليل بس يوم ايه ويوم لا ، لانه قوي على البشرة ، نتيجة حلوه على العين بس اذا استخدمه كل يوم اعلى منطقة في الخد تكون حساسة بزيادة .. 

- كريم الوجة خاص لليل نفس كريم العيون ، حلو جدا ، ونفس الشي استخدمه يوم ايه ويوم لا ...

- جل للعيون من كلارنس Eye Contour Gel ، هالماركة اللي كل شي جربته منهم حلو ، جل للعيون باااارد يستخدم الصبح يخفف من الاتفاخ و الهالات السودا ، هو يخفف الانتفاخ اكثر من الهالات ، يمكن لانه هالاتي غامقة ف ماراح يبين معاي الفرق ..

سامبلز من اليمين :

- كريم للرقبة من Klapp ، كريم عادي مافيه شي مميز .. 

- سيروم للعيون من ديرمالوجيكا احب هالماركة عندي منهم عينات ابي اخلصها قبل ماافتح السيروم الجديد نفسه 

افضل ماركة استخدمها وارتحت عليها هي ديرمالوجيكا ...

- تونر من كيلز ، على انه عينة الا اني استخدمته ٣ مرات ، هو تونر منقي ، بس طلع لي حبوب ، ممكن انه طلع لي الحبوب اللي كانت بتطلع بعد فترة بما انه منقي ..

- جل للوجه من لوكستيان ، خفيف وباااارد على الوجه ، عادي ماحسيت انه وااااو .. 

...

- لصقات بيوريه ، افضل في في السوق للرؤوس السودا ، خصوصي اللي مكتوب عليها الترا ، افضل وقت تستخدمينها فيه ، بعد شور دافي حطيها وانتي بالحمام لانه المسامات تكون مفتوحه ، واطلعي من الحمام وخليها الى ان تنشف تقريبا ١٥ دقيقة ، على ماانتي تلبسين وتحطين كريماتك الا هي جافة .. بتشوفين شي ماشفتيه من قبل اذا كانت عندك رؤوس سودا وبيضا .. 

- النوع الثاني اللي ب زيت شجرة الشاي ، كلش ماانصح فيه ، اصلا ماتلصق زين وتطيح ، وماتسوي شي ابدا .. 

- اخر شي امواس للوجة ، انا استخدمها بين جلسات الليزر .. حلوين ، انا اخذهم من دايسو 

- شريت فرشة جديدة ل جهاز تنظيف الوجة من كلينك ، احب هالجهاااز جدا .. هذي القديمة خلاص انتهت 

اما الجديدة احلى وشكله الشعر منفوش واحلى .. 

....

وخلصنا عطرين 

- Diva Rose ، بارد وخفيف علي ورد شوي  احب استخدمه بالبيت .

- Paris Amour من باث اند بودي ، كتبت عنه هنا .. 

نوصل ل العناية بالجسم 

- زبدة الجسم بزيت الارغان من بودي شوب ، رائعععععععة جدا جدا ، هذي مكتوب عليها ترطبيها لمده ٢٤ ساعة 

غير عن باقي الزبدات اللي عندهم ، انا حبيتها جدا .. 

- مقشر الجسم بعد ب زيت الارغان ، تقشير خفيف اذا جسمك مبلل ، بس صرت اقشر جسمي وهو جاف قبل ماادخل الشور و التقشير افضل بهالطريقة مع المقشرات الناعمة شوي .. 

- زيت Divine من كودالي ، هذا للوجة والشعر والجسم ، انا استخدمته للجسم بس ، وعجبني هو زيت جاف يعني مايخلك مزيته ، انا اخلطه مع اي كريم للجسم او زبدة عشان  ارطب جسمي زين .. هذي عينة صغيرة ..

- شور كريم للجسم من سيفورا ، عينات عندي منهم ويمكن باقي لي واحد ، صراحة حبيته ناعم على الجسم ويرطب .

- امبولات لتساقط الشعر ، جدا احبها ولا استغني عنها .. وخلصت علب وايد منها .. 

- شامبو ريحاب من لش ، اعششششقة كتبت عنه من قبل هنا ..

- شامبو لتساقط الشعر من EST ، هالماركة موجودة في بوتس ، وشعر الشامبو ١٦٠ درهم ، صراحة عادي ماشفت شي انه قلل التساقط او لا ، لكن بشكل عام شعري قل تساقطة ولله الحمد .. 

- شامبو وبلسم من Nanogen ، يكثف الشعر ، اعجبوني بصراحة ، ناعم جدا على الشعر ويرطب ، وريحتهم حلووووه حيل

مااعرف من وين مممكن اشتريهم بس ببحث عنهم اكثر ..

- شامبو وبلسم من rahua ، عادي مافيه زود ..

وبس هذا كل اللي خلصته في هالشهر ، وان شاء الله احاول اخلص اكثر الشهر الجاي 

....

June Empties 2015 | أشياء خلصتها في يونيو ٢٠١٥

June Empties 2015 | أشياء خلصتها في يونيو ٢٠١٥

السلام عليكم 

نرجع لموضوع انا احبه شخصيا ، الاشياء اللي خلصتها 

نشوف شنو خلصت هالشهر ، مو وايد لكن ماعليه حاولت اخلص الاشياء اللي باقي فيها 

شوي عشان ابدا بالجديد ..

..

من اليمين 

- عطر بخاخ للغرفة والمفارش من الشايع للعطور اسمه سكون ، ريحته حلوه لكنها ماتدوم لفترة طويلة .

- عطر urbanist من عطورات الحرمين ، العطر عربي طبعا بس جميل جدا ، بس ثباته من خفيف الى متوسط . 

- ماء تنظيف ميسلر ٣ في ١ من نيفيا، كتبت عنه ريفيو كامل هنا طلوا عليه .

- لوشن للجسم من سيتافيل ، رائع جدا ، يرطب الجسم وتشربة البشرة بسرعة ، والحلو فيه انه طبي ، ومافيه اي ريحة ويناسب البشرة الحساسة ، وممتاز للي عندهم اكزيما .

..

- مقشر سبا من بودي شوب ، مقشر بالملح ، اول ماشريته كان روعه بصرحه بس بعدين ماادري حسيته عادي

ومايسوي شي واو ، تقشيرة خفيف جدا ، صرت استخدمه بالفترة الاخيره وجسمي جاف عشان يقشر ، عادي وماراح اشترية مره ثانية .

- لصقات الانف من بيرويه ، لازالة الرؤوس السوداء ، احب هالنوع ومرتاحة عليه اجرب كذا شي ، بس ارجع لهالنوع ، واللي مكتوب عليه تحت الترا ، لاني احسه اقوى ويشيل اكثر . 

- كريم للعيون من essentials , كريم جل بالصبار ، بارد ومنعش ، مااحسة سوى شي غير انه يبرد عيني ، 

وصرت استخدمه لوجهي بعد اي جلسة ليزر لانه يهدي الوجة ، ماانصح فيه .

- كحل سائل بني من الف ، عادي جدا ، ووصل لي الفرشة خربانه ومااقدر ارسم فيه زين . 

- قلوس من كرازا ، خلاص قديم وانا اصلا ماصرت احب القلوسات .

..

- امبولات للشعر ، خلصت علب وايد منها وكل مره بقول بكتب عنها ، وانسى بصراحة بس بحاول هالفترة اكتب عنهم ، ممتازييييين ، وخففوا من تساقط شعري . 

- العشششق الابدي ، فيتامين الشعر والبشرة والاظافر شي شي شي ، كتبت عنهم موضوع كامل هنا . 

هالاثنين اخذوهم وانتوا مغمضين .

..

من افشل الاشياء اللي جربتها اللي تختص ب علاج تساقط الشعر ، كتبت عنهم في الانستقرام ، و وايد نفس مشكلتي .

ماودي اتكلم عنهم اكثر ، غاليين ولا لهم تنيجة تذكر .

..

- سامبل لكريم للعيون من ديرمالوجيكا ، حبيته صراحة ، وعندي بعد كذا واحد بخلصهم باذن الله ، اللي عجبني انه خفيف و فيه حماية من الشمس . 

- سامبل عطر انجل ، رائع جدا اتوقع مافيه احد مايعرفه او شمه من قبل ، جميل جدا .

- سيروم لتطويل الرموش ممتاز بصراحة وكتبت عنه منه قبل هنا . 

- سامبل من اولاي ، مركب لتخفيف التجاعيد ، صراحة حلو ، انا عندي خطوط بجبهتي ومااحبها ، واستخدمت هذا ويخففها بس بس بشكل خفيف ، بس حلو لانك تشوفين الفرق . 

- سامبل لغسول من ماركة Derma ، حلو ، مااعرف وين ممكن اننا نشتري منه لانه وصلني من قلام بوكس .

- كريم من كودالي لجميع انواع البشرة ، فيه لون خفيف و يساعد البشرة انها تخفف من التصبغات اللي فيها ، حلو وعندي منه حجم كبير . 

- سيروم مرطب للبشرة بعد من كودالي ، بكل صراحة راااااائع جدا ، يرطب البشرة من الداخل ، وخفيف وبسرعة بشرتي تتشربة ، احطه بعدين احط الكريم اللي استخدمه كل يوم ، رائع وفعلا بشرتي ارتاحت عليه ، ويوم خلصته حسيت بالفرق ، منتجات كودالي رائعه استخدم منهم كذا شي وجدا حلوين ، والماركة بدت تنتشر عندنا اكثر واكثر ، متوفره ب سيفورا و صيدليات ابن سينا ، انصحكم بمنتجاتهم و وقريب بكتب عن تجاربي مع هالماركة الفرنسية . 

وبس هذا كل اللي خلصته .

"اللهم .. لاتدع لنا ذنبا الا غفرته "

ونشوفكم في مواضيع جميلة ، ولا تنسوا الاشتراك بالمدونة ، اشتراكم يدعمني ..