ماسك الفحم من ديرمالوجيكا Charcoal Rescue Masque

ماسك الفحم من ديرمالوجيكا  Charcoal Rescue Masque 

ماسك الفحم من ديرمالوجيكا  Charcoal Rescue Masque 

السلام عليكم 

ماركة ديرمالوجيكا من الماركات المحببة جدا لقلبي ، استخدمها من سنين وفعلا شفت تغيير جميل جدا على بشرتي الحمدلله . ماسكات الفحم معروفه بفوائدها وماشاء الله بالفترة الاخيرة منتشرة في كل الماركات ،صار لي فترة طويلة وانا استخدم هالماسك ووايد حابته




 ماسك بالفحم يقشر وينظف البشرة .. يزيل السموم الدهون والشوائب - ينور الوجة مع الاستخدام المتكرر

فيه نوعين من التقشير العادي و الكيميائي الكيميائي بتحسون فيه مع الاستخدام المتكرر .. .

طريقة الاستخدام :
يمد على كامل الوجة ولمدة ٣-٥ دقايق " ممكن تحسين ب لسعات او قرص - بس بعد كم دقيقة يختفي "




بعدها نبلل الأيدين بشوي ماي ونبدأ نقشر البشرة  نشف الماسك وتبين حبيبات التقشير , هالحبوب تساعد في التقشير القوي للبشرة ، وبعدها نغسل الوجة عادي .

- الماسك يترك البشرة ناعمه جدا
- يشيل كل الدهون من البشرة
- ينظف المسام بشكل جميل جدا
- يشيل الجلد الميت 

 يخلي البشرة بعد الاستخدام شوي حمرا بس بعد ١٠ دقايق يروح اللون


من افضل ماسكات الفحم المقشرة بالنسبة لي 👏🏻 يستاهل التجربة 👏🏻👏🏻👏🏻


 مناسب للبشرة العادية والدهنية

 ماانصح فيه ابدا للبشرة الحساسة والمتهيجة
لانه قوي جدا جدا ، انا بشرتي مختلطة الى دهنية ، ف ناسبني اقدر استخدمه مره بالأسبوع او مره كل اسبوعين

 بعد ماسك الفحم لاززززززم ترطيب قوي ، مممكن تستخدمين ماسك مرطب للبشرة 

January Empties 2016 | اشياء خلصتها في يناير + مر شهرين على التحدي

January  Empties 2016 | اشياء خلصتها في يناير + مر شهرين على التحدي

السلام عليكم 

مر شهر جميل بكل تفاصيلة ، شهر يناير كنت اغلبة مسافرة وحاولت استخدم اشياء اكثر 

بس للاسف ماخلصت وايد اشياء ، ويوم رجعت من السفر ركزت على الاشياء اللي اخذتها معاي بالسفرة

وحاولت اخلصها لانه اصلا صغيرة و مابقى شي فيها .. 

نشوف الاشياء اللي خلصتها 

من اليمين : 

- لوشن للجسم من بالمزر بزبدة زيت الزيتون ، حبيت اللوشن جدا ، ناعم علي البشرة ويرطب بشكل جميل جدا ورييحته حلوه، اول منتج من بالمزر يعجبني ، لانه ابدا مااقدر اتقبل ريحة زبدة الكاكاو مع انها ممتازه بس مااحبها بس هذا عجيب ..

- سامبل لعطر من Yardley ب ريحة  English Daisy ، هالماركة اللي ابدا ماكنت انتبه لها لا عطور ولا كريمات ، حبيت من قبل كريم للجسم وعجبني ، هالمره بعد هالعطر حبيته خفيف ومنعش .. 

- سامبل كريم اساس بج ايزي من بينيفت ، عجبني خفيف وبس بنفس الوقت يغطي .

- خيط للاسنان من اورال بي ، احب هالماركة جدا ، وهالنوع ممتاز لانه ضعيف ويدخل بين الاسنان . 

- العشششق ، زيت الجسم من نوكس ، ماتوقعت اني راح احبه واعشقة بعد ، زيت للجسم خياااالي يرطب الجسم بثواني ولا يترك اثر زيتي على البشرة ، شي ممتااااز ، اللي يحب الترطيب يجربه .. وحلو بعد لو تخلطونه مع اي كريم للجسم .. راح يكون شي ممتاااااز .. 

..

- ديودرنت من ليدي سبيد ، ماادري ليش شريته ، قبل كان وايد افضل ، الحين لا ، حتى ماخلصته ماعجبني مثل اول .

- الحب ، من ريكسونا ، من احلى اللي استخدمتهم وهذا ريحته حلوه من اسمه شاور كلين ، شي نظيف .

- شول جل من skin therapy ,عادي جدا مافيه شي مميز . 

- كريم الوجة من لوكستيان بالفاونيا ، عجبني بصراحة وكنت متكلمه عنه من قبل هناااا 

...

- العشق ، سبرية للجسم ، ريحته تهبل ، بارده ونظافة وكل شي ، دايما اتكلم عنه وارجع اشتريه .

- بلسم للشعر من كيلز ، للشعر الجاف جدا و المتضرر ، مااحس انه للشعر الجاف جدا ، يعني من العادي الى الجاف 

ترطيبة حلو بس مو وايد قوي ، يعني لاتتخيلين انه شعرك راح يطلع زبدة بعد ماتستخدمينه ، هل راح ارجع اشتريه لا جربت افضل منه .. 

- ماوث وووش او غسول للاسنان هذا وصفته لي دكتورة التقويم ، لانه الاسنان تتحرك واللثة بعد تتحرك 

مع التفريش اليومي كانت اللثة تنزف دم شوي ف هذا كان ممتاز لعلاج هالشي ، ريحة قوية ومنعشة ، بس الطعم بعد الاستعمال كان شي ابدا مو حلو .. المهم خلصته وعالجنا المشكله ..

...

هالشمعة اللي عششششقتها جدا جدا ، وتحسفت اني مااخذت منها اكثر ريحتها جميله وهااااادية جدا 

مريحة خصوصا بالليل .. 

..

ساااامبلززز 

-واقي الشمس من ذا فيس شوب ، حلو وبعد لانه بدون زيت .. 

- كريم للوجة والرقبة من klapp، خفيف وحلو بسرعة البشرة تتشربة .. ناعم جدا ..

- كريم للعيون وللهالات من elemis ، مااقدر احكم عليه من سامبل صغير بس الملمس والنعومة شي حلو .. 

- غسول رغوي من كلينك عنية مع جهاز الوجة اللي شريته ، هي قالت لي راح يعجبك و ماصدقتها ، بس صج صج صج 

خياااال مع الجهاز ، عجبني جدا ، افكر اشتريه اذا خلصت اللي عندي .. 

- الذهبي ، هذا سيروم للشعر ب ذرات الذهب ، عادي ماشفت شي وااو حبيت استخدم السامبل قبل ماافتح العلبة اللي عندي، ماحسيت انه شي وااو عادي . 

- الحب barrier repair من ديرمالوجيكا ، عشق عشق انا مع هالكريم ، ممتاز لانه يشيل القشور ، يجدد البشرة 

جدا احبه ، خلصت العلبة الكبيرة وحاليا ابي اخلص السامبلز اللي عندي منه قبل مااشتري الجديد . 

٣ سامبلز من ديرما اي 

الاول للسترج مارك ، مكوناته جدا حلوه ومرطبة ، فيتامين اي و زيت الارغان و زبدة الككاو ، كترطيب حلو لكن السامبل صغير عشان احكم عليه وعلى نتايجة . 

- كريم العيون ، عجبني بصراحة كترطيب جدا حلو وخفيف . 

- كريم ليلي مرطب للوجة ، عجبني وكاني استخدمته واحد من قبل ، عندي مجموعة منه وبستخدمهم باذن الله

بس حبيت الترطيب ويخلي البشرة ناعمة بعد استخدامه .. 

...

التحدي صراحة واجهت شوية صعوبة فيه خصوصي هالشهر لانه في دبي كان مهرجان التسوق

وكل المحلات تقريبا كان عندهم تنزيلات وعروض رائعة بصراحة ، ف مسكت نفسي جدا 

بس ضعفت عند باث اند بودي وركس ، شريت منهم ٣ بدي سبرية للجسم و شمعتين 

الاسعار كانت شي خيالي يعني الشموع ب ١٥ درهم .. 

ف صح خربطت شوي لكن باذن الله راجعة بقوة اني مااشتري اي شي 

وابي اكمل هالتحدي الى ٣ شهور زيادة يعني الى شهر ٦ اللي هو اصلا بعد راح يكون مهرجان صيف دبي 

وفيه بعد تنزيلات .. ف القرار تم اني مااشتري اي شي بعد لانه اللي عندي يكفيني ولله الحمد واذا نقص شي ولا عندي له بديل وقتها اشتري .. 

بكل صراحة وصلت لمرحلة انه ماعندي مكان احط اي شي جديد ، وابي استخدم اللي عندي و استمتعت بكل اللي شريته

وصرفته .. 

حاليا اخترت ٢٠ منتج بحاول اركز عليهم هالفترة ، البعد باقي فيه شوي ، والبعض نص ، ف راح اركز عليهم
لين اخلصهم او اخلي فيهم شوي يكونون من الاهداف للشهر الجاي ..

باذن الله الشهر الجاي احقق اهدافي واخلص مجموعة حلوه منهم

..

ويارب يحقق لكم كل احلامكم  

November Empties 2015 | اشياء خلصتها في نوفمبر ٢٠١٥ + ممنوع اشتري اي شي لمده ٤ شهور

November Empties 2015  |  اشياء خلصتها في نوفمبر ٢٠١٥ 

السلام عليكم 

من فترة كتبت نفس هالموضوع بس لشهر ١٠ شوفوه هنا ، ووقتها كنت كاتبة اني ماحبيت خلال فترة ٤ شهور

اكون خلصت كمية قليلة من المنتجات ، ف في شهر ١١ نوفمبر حطيت لي اهداف ، والحمدلله حققتها 

ليش اهداف ، لاني ابي اخلص من وااااايد اشياء عندي سواء احبها او لا ، وشلون احاول استخدمها حتى لو مااحبها 

ف في هالشهر ركزت على كل شي باقي فيه ربع ، و السامبلز ، لاني جمعتهم في مكان واحد وكل يوم اطلع شي

شي شامبو شور جل او حتى كريمات وسيروم .. 

والحمدلله هالشهر خلصت وااايد وهذا اللي ابيه .. هالشي خلاني اقرر قرار يمكن شوي صعب علي بس باذن الله بقدر عليه

من شهر ١٢ ديسبمر الى شهر ٣ ، انا في تحدي مع نفسي اني مااشتري شي ابدا .. 

الحمدلله عندي اللي يكفيني وزيادة واذا خلصت شي ولا عندي له بديل وقتها اشتري .. 

يعني من الحين الى شهر ٣ ممنوع اشتري اي شيء ، لانه ماشاء الله ساعات توصلني اشياء للتجربة وغير اللي انا اشتريه

صار عندي كمية كبيرة من اشياء العناية والميك اب ، ولا اقدر استخدم شي ، انا مو من النوع اللي يحب يكدس الاشياء

وهالشي بدا ينرفزني واصلا ماصار عندي مكان بالغرفة حتى اني ارتب اغراضي واقدر اشوف واستمتع بكل شي عندي 

ف قرار منع الشراء شي لابد منه في هذي الفترة ، الشي الوحيد اللي ابي اشترية هو برايمر للعيون لاني خلصت اللي عندي ولا عندي له بديل 

هذي الاشياء اللي بركز عليها هذي الفترة عشان اخلصها ، مجموعة كاملة ومنوعة 

واتمنى اني اخلص اكثر عدد منهم ويكونون موجودين في موضوع الشهر الجاي لديسمبر 

...

نشوف الاشياء اللي خلصتها هالشهر 

- منظف للمكياج من لوريال ، حلو وكتبت عنه ريفيو كامل هنا ..

- مقشر للوجه من كلين اند كلير ، بعد كتبت عنه ريفيو كامل هنا ..

- مناديل منعشة لتنظيف الوجة من المكياج من نيفيا ، حلوه ومو حلوه بنفس الوقت هي تشيل الميك اب بس لازم تبللينها شوي ب ماي ، لانها شوي جافة مو مثل باقي الماركات .. الحلو فيها انها ماتحرقني مثل جونسن ..

- قطن للتونر وغيره من سيفورا ، ممتاااز بصراحه وخلصت منه كذا واحد فيه ٧٠ حبة ب ٩ دراهم .

وعشان تكلمنا عن مزيلات المكياج نوصل للميك اب اللي خلصته 

- اول روج من كرازا ، لونه برتقالي هادي ، قديم وخلاص حان وقته .. 

- ونفس الشي ل ٣ قلوسات من ريفلون ، شريتهم من المطار ، اخر واحد عشقته تقريبا خلصت نصه ، بس خلاص 

بعد حان وقتهم ، انا كل فترة اشوف الميك اب اللي عندي اذا فيه شي تغيرت ريحته خلاص اطلعة 

- برايمر للعيون من ايسنس ، حلو ورخيص ، كتبت عنه هنا .. 

- جل لاينر على شكل قلم من بينيفت ، خلصته وكتبت عنه هنا ..

- بيوتي بلندر لي ولاختي خلاص بدلناهم ب ٢ جدد ، وفي الاخير فرشتين عطوني عمرهم ، خلصت عمرهم الافتراضي 

ومشكورين ماقصروا معاي في رحلتهم ... 

- سيروم مضاد للتجاعيد من كودالي ، خلصته كله ، بس ماشفت نتيجة واااااو ، لا كان عادي .. 

- كريم للعيون من افين حلو بس مشكلته ماتقدرين تستخدمينه كل يوم ، انا استخدمه بالليل بس يوم ايه ويوم لا ، لانه قوي على البشرة ، نتيجة حلوه على العين بس اذا استخدمه كل يوم اعلى منطقة في الخد تكون حساسة بزيادة .. 

- كريم الوجة خاص لليل نفس كريم العيون ، حلو جدا ، ونفس الشي استخدمه يوم ايه ويوم لا ...

- جل للعيون من كلارنس Eye Contour Gel ، هالماركة اللي كل شي جربته منهم حلو ، جل للعيون باااارد يستخدم الصبح يخفف من الاتفاخ و الهالات السودا ، هو يخفف الانتفاخ اكثر من الهالات ، يمكن لانه هالاتي غامقة ف ماراح يبين معاي الفرق ..

سامبلز من اليمين :

- كريم للرقبة من Klapp ، كريم عادي مافيه شي مميز .. 

- سيروم للعيون من ديرمالوجيكا احب هالماركة عندي منهم عينات ابي اخلصها قبل ماافتح السيروم الجديد نفسه 

افضل ماركة استخدمها وارتحت عليها هي ديرمالوجيكا ...

- تونر من كيلز ، على انه عينة الا اني استخدمته ٣ مرات ، هو تونر منقي ، بس طلع لي حبوب ، ممكن انه طلع لي الحبوب اللي كانت بتطلع بعد فترة بما انه منقي ..

- جل للوجه من لوكستيان ، خفيف وباااارد على الوجه ، عادي ماحسيت انه وااااو .. 

...

- لصقات بيوريه ، افضل في في السوق للرؤوس السودا ، خصوصي اللي مكتوب عليها الترا ، افضل وقت تستخدمينها فيه ، بعد شور دافي حطيها وانتي بالحمام لانه المسامات تكون مفتوحه ، واطلعي من الحمام وخليها الى ان تنشف تقريبا ١٥ دقيقة ، على ماانتي تلبسين وتحطين كريماتك الا هي جافة .. بتشوفين شي ماشفتيه من قبل اذا كانت عندك رؤوس سودا وبيضا .. 

- النوع الثاني اللي ب زيت شجرة الشاي ، كلش ماانصح فيه ، اصلا ماتلصق زين وتطيح ، وماتسوي شي ابدا .. 

- اخر شي امواس للوجة ، انا استخدمها بين جلسات الليزر .. حلوين ، انا اخذهم من دايسو 

- شريت فرشة جديدة ل جهاز تنظيف الوجة من كلينك ، احب هالجهاااز جدا .. هذي القديمة خلاص انتهت 

اما الجديدة احلى وشكله الشعر منفوش واحلى .. 

....

وخلصنا عطرين 

- Diva Rose ، بارد وخفيف علي ورد شوي  احب استخدمه بالبيت .

- Paris Amour من باث اند بودي ، كتبت عنه هنا .. 

نوصل ل العناية بالجسم 

- زبدة الجسم بزيت الارغان من بودي شوب ، رائعععععععة جدا جدا ، هذي مكتوب عليها ترطبيها لمده ٢٤ ساعة 

غير عن باقي الزبدات اللي عندهم ، انا حبيتها جدا .. 

- مقشر الجسم بعد ب زيت الارغان ، تقشير خفيف اذا جسمك مبلل ، بس صرت اقشر جسمي وهو جاف قبل ماادخل الشور و التقشير افضل بهالطريقة مع المقشرات الناعمة شوي .. 

- زيت Divine من كودالي ، هذا للوجة والشعر والجسم ، انا استخدمته للجسم بس ، وعجبني هو زيت جاف يعني مايخلك مزيته ، انا اخلطه مع اي كريم للجسم او زبدة عشان  ارطب جسمي زين .. هذي عينة صغيرة ..

- شور كريم للجسم من سيفورا ، عينات عندي منهم ويمكن باقي لي واحد ، صراحة حبيته ناعم على الجسم ويرطب .

- امبولات لتساقط الشعر ، جدا احبها ولا استغني عنها .. وخلصت علب وايد منها .. 

- شامبو ريحاب من لش ، اعششششقة كتبت عنه من قبل هنا ..

- شامبو لتساقط الشعر من EST ، هالماركة موجودة في بوتس ، وشعر الشامبو ١٦٠ درهم ، صراحة عادي ماشفت شي انه قلل التساقط او لا ، لكن بشكل عام شعري قل تساقطة ولله الحمد .. 

- شامبو وبلسم من Nanogen ، يكثف الشعر ، اعجبوني بصراحة ، ناعم جدا على الشعر ويرطب ، وريحتهم حلووووه حيل

مااعرف من وين مممكن اشتريهم بس ببحث عنهم اكثر ..

- شامبو وبلسم من rahua ، عادي مافيه زود ..

وبس هذا كل اللي خلصته في هالشهر ، وان شاء الله احاول اخلص اكثر الشهر الجاي 

....

June Empties 2015 | أشياء خلصتها في يونيو ٢٠١٥

June Empties 2015 | أشياء خلصتها في يونيو ٢٠١٥

السلام عليكم 

نرجع لموضوع انا احبه شخصيا ، الاشياء اللي خلصتها 

نشوف شنو خلصت هالشهر ، مو وايد لكن ماعليه حاولت اخلص الاشياء اللي باقي فيها 

شوي عشان ابدا بالجديد ..

..

من اليمين 

- عطر بخاخ للغرفة والمفارش من الشايع للعطور اسمه سكون ، ريحته حلوه لكنها ماتدوم لفترة طويلة .

- عطر urbanist من عطورات الحرمين ، العطر عربي طبعا بس جميل جدا ، بس ثباته من خفيف الى متوسط . 

- ماء تنظيف ميسلر ٣ في ١ من نيفيا، كتبت عنه ريفيو كامل هنا طلوا عليه .

- لوشن للجسم من سيتافيل ، رائع جدا ، يرطب الجسم وتشربة البشرة بسرعة ، والحلو فيه انه طبي ، ومافيه اي ريحة ويناسب البشرة الحساسة ، وممتاز للي عندهم اكزيما .

..

- مقشر سبا من بودي شوب ، مقشر بالملح ، اول ماشريته كان روعه بصرحه بس بعدين ماادري حسيته عادي

ومايسوي شي واو ، تقشيرة خفيف جدا ، صرت استخدمه بالفترة الاخيره وجسمي جاف عشان يقشر ، عادي وماراح اشترية مره ثانية .

- لصقات الانف من بيرويه ، لازالة الرؤوس السوداء ، احب هالنوع ومرتاحة عليه اجرب كذا شي ، بس ارجع لهالنوع ، واللي مكتوب عليه تحت الترا ، لاني احسه اقوى ويشيل اكثر . 

- كريم للعيون من essentials , كريم جل بالصبار ، بارد ومنعش ، مااحسة سوى شي غير انه يبرد عيني ، 

وصرت استخدمه لوجهي بعد اي جلسة ليزر لانه يهدي الوجة ، ماانصح فيه .

- كحل سائل بني من الف ، عادي جدا ، ووصل لي الفرشة خربانه ومااقدر ارسم فيه زين . 

- قلوس من كرازا ، خلاص قديم وانا اصلا ماصرت احب القلوسات .

..

- امبولات للشعر ، خلصت علب وايد منها وكل مره بقول بكتب عنها ، وانسى بصراحة بس بحاول هالفترة اكتب عنهم ، ممتازييييين ، وخففوا من تساقط شعري . 

- العشششق الابدي ، فيتامين الشعر والبشرة والاظافر شي شي شي ، كتبت عنهم موضوع كامل هنا . 

هالاثنين اخذوهم وانتوا مغمضين .

..

من افشل الاشياء اللي جربتها اللي تختص ب علاج تساقط الشعر ، كتبت عنهم في الانستقرام ، و وايد نفس مشكلتي .

ماودي اتكلم عنهم اكثر ، غاليين ولا لهم تنيجة تذكر .

..

- سامبل لكريم للعيون من ديرمالوجيكا ، حبيته صراحة ، وعندي بعد كذا واحد بخلصهم باذن الله ، اللي عجبني انه خفيف و فيه حماية من الشمس . 

- سامبل عطر انجل ، رائع جدا اتوقع مافيه احد مايعرفه او شمه من قبل ، جميل جدا .

- سيروم لتطويل الرموش ممتاز بصراحة وكتبت عنه منه قبل هنا . 

- سامبل من اولاي ، مركب لتخفيف التجاعيد ، صراحة حلو ، انا عندي خطوط بجبهتي ومااحبها ، واستخدمت هذا ويخففها بس بس بشكل خفيف ، بس حلو لانك تشوفين الفرق . 

- سامبل لغسول من ماركة Derma ، حلو ، مااعرف وين ممكن اننا نشتري منه لانه وصلني من قلام بوكس .

- كريم من كودالي لجميع انواع البشرة ، فيه لون خفيف و يساعد البشرة انها تخفف من التصبغات اللي فيها ، حلو وعندي منه حجم كبير . 

- سيروم مرطب للبشرة بعد من كودالي ، بكل صراحة راااااائع جدا ، يرطب البشرة من الداخل ، وخفيف وبسرعة بشرتي تتشربة ، احطه بعدين احط الكريم اللي استخدمه كل يوم ، رائع وفعلا بشرتي ارتاحت عليه ، ويوم خلصته حسيت بالفرق ، منتجات كودالي رائعه استخدم منهم كذا شي وجدا حلوين ، والماركة بدت تنتشر عندنا اكثر واكثر ، متوفره ب سيفورا و صيدليات ابن سينا ، انصحكم بمنتجاتهم و وقريب بكتب عن تجاربي مع هالماركة الفرنسية . 

وبس هذا كل اللي خلصته .

"اللهم .. لاتدع لنا ذنبا الا غفرته "

ونشوفكم في مواضيع جميلة ، ولا تنسوا الاشتراك بالمدونة ، اشتراكم يدعمني .. 

بشرتك جافة و متقشرة ؟ حليها معاي

السلام عليكم 

كلنا نتعرض لهالموقف .. بشرة جافة .. متقشرة .. حساسة .. 

ومع الميك اب ! !! الوضع مو حلو ابد ومهما حاولتي في ترقيع الموضوع النهاية الميك اب مو حلو

والبشرة تبين تعبانه .. 

الحل سهل وموجود عند كل بنت .. ب ٤ خطوات راح نغير بشرتنا الى شي جميل احنا نتمناه دائما .. 

بس اول شي لازم نعرف الاسباب اللي خلت بشرتنا تصير ب هذا الشكل ؟

- عدم شرب الماء الكافي + تغييرات الجو + التكييف يسبب الجفاف + وشرب الكثير من المنبهات 

اول شي زيادة كمية شرب الماي لانها فعلا تغير اشياء وايد ب اجسامنا .. اذا التزمنا بهالشي وايد اشياء بتتغير 

ونرتاح عليها .. 

...

٤ خطوات ناجحة لبشرة خالية من القشور و مترطبة : 

١- التقشير :

قشري او سنفري وجههك مرتين بالاسبوع .. هالشي يضمن لك انك تشيلين كل القشور اللي ممكن تطلع لك 

المهم تستخدمين مقشر مناسب لبشرتك  " اذا حساسة او عادية او دهنية "

انا استخدم هذا المقشر المميز من ديرمالوجيكا Daily Microfoliant - Dermalogica

المقشر ممتااااز جدا انصح فيه لكل البشرات ماعادا الدهنية والمعرضة للحبوب ، ليش ماانصح اللي عندها حبوب باستخدامه ، لانه ممكن تنقلين البكتيريا من الحبوب الى مكان ثاني بوجهك وهو مافيه حبوب ، وبالتالي تتكون عندك حبوب جديدة ، انتي في غنى عنها .. 

لباقي البشرات انصح فيه ، استخدمه انا مرتين بالاسبوع و ساعات مره بالاسبوع حسب احتياج بشرتي له .. 

اللي يميز هالمقشر انه بودرة رز مع انزيمات ، تبدا بالتفاعل اذا خلطتيها بالماي ..

طريقة الاستخدام :

انتي تخلطين كمية منه مع كم قطره ماي وتكونين معجون ، وبعدها تستخدمينه على بشرة 

مغسولة بغسولك .. تحركين المقشر بشكل دائري علي وجهك كله ، ماعادا منطقة العيون طبعا .. 

+ هالمنتج بالذات ابد ابد لا تقربينه لعينك باي شكل من الاشكال ، واغسلي ايدك واصابعك وتحت اظافرك قبل ماتلمسين عينك ، لانه اذا دخل في العين مشكله ، يحرررررق وفوق كل هذا العين تظل فتره مغوشه ، ف يعني لانه دخل في عيني اكثر 

من مره ، ف تبت خلاص .. بس الافضل تنتبهين وقت الاستعمال والغسيل .. 

النتيجة ، روعه مااستغني عن هالمقشر ، ممتاز جدا ...  صراحه مااذكر سعره 

بس متوفر في محلهم في دبي مول في الطابق الاول - بجانب محل لوكستيان .. او في صيدليات بوتس في دبي 

...

٢- ماسك مرطب : 

بعد اي تقشير الافضل استخدام ماسك مرطب للبشرة ، اي ماسك مرطب انتي ترتاحين عليه 

انا استخدم بعد من ديرمالوجيكا ..Skin Hydrating Masque -Dermalogica

ماسك يوضع على البشرة من ١٠ - ١٥ دقيقة .. اللي احبه بهذا الماسك انه يرطب يرطب يرطب .. 

احساسي بعد الماسك ، بشتري شاربة مرطب وماى مع بعض .. لدرجة اني بعد هالماسك مااحط مرطب لوجهي 

يكفي الترطيب اللي اخذته .. جدا حلوو .. وبشرتي تحبه .. 

صراحه مااذكر سعره 

بس متوفر في محلهم في دبي مول في الطابق الاول - بجانب محل لوكستيان .. او في صيدليات بوتس في دبي 

٣- غسول الوجة :

انا استخدم غسول من افين Gentle Gel Cleanser Avene

اذا بشرتك جافة و حساسة او اذا بشرتك عادية و مختلطة هالغسول مناسب جدا لك .. 

اولا لانه غسول جل خفيف جدا على البشره ، مايرغي ، ف مناسب للبشرة الجافه .. غني بالمياه المعدنية 

احبه لانه مايجفف البشرة ابدا ، احس ينظف بس بشكل لطيف جدا .. 

حلو لانه بشرتك جافه ومتقشره فتحتاج شي مايجففها بزياده ولا فيه مواد عطريه او صابون اللي ممكن يهيج البشرة الحساسة ، ف خيار مناسب لاكثر من نوع بشرة ، وممكن تشيلين فيه مكياج الوجه ، انا ماجربت هالشي .. 

استخدميه مرتين باليوم ، الصبح والليل 

متوفر باي صيدلية ، لانه الماركة طبية ومعروفه من زماان .. 

٤- الترطيب : 

اهم خطوه بعد كل اللي سويناه ، الترطيب اليومي لازم في الصبح والمساء .. 

عن نفسي احب ازيد خطوه زياده ، في بخاخات الماي احب اخليها قريبه مني وابخ وجهي فيها بعد كل مااغسل وجهي

او في اي وقت حسيت بشرتي تحتاج ترطيب .. 

فيه ماركات وايد عندهم نفس هالبخاخ ، افين ، ايفيان ، انا اخذت هذا من محل تاتي في مردف سيتي سنتر

عجبني لانه حجمه كبير مقارنه بسعره ويعتبر ارخص من باقي الماركات ب ١٠ دراهم 

بعد البخاخ استخدم المرطب صبح ومساء بعد من افين Hydrance Optimale  Light 

مرطب حلو خفيف وتتشربة البشرة ، فعلا تحسين انه يدخل داخل البشرة ويرطبها ، يخلي البشرة ناعمه بعده،

مايترك اي اثر دهني على البشرة لانه بالاساس خالي من الدهون .. 

فيه نوعين من هالكريم واحد خفيف وواحد اثقل ، انا اخذت الخفيف لانه يناسبني اكثر ، اما اللي بشرتها جافه جدا

ممكن تاخذ النوع الاثقل .. 

سعره حوالي ال ١١٠ درهم وطبعا متوفر بالصيدليات ... 

..

وفيه حل ثاني .. انا استخدمه من فتره لفتره، كريم ال Bepanthen 

ممتاز للجفاف ، و ترطيبه عالي صراحه ، ممتاز للوجه ولاي مكان بالجسم ، وترى ممتاز لترطيب الشفايف بعد 

انا استخدمه لشفايفي لانه مع التقويم شفايفي تجف يشكل غبي مكان ومكان مع اني ارطبها يوميا بس بعد تحتاج اكثر 

+ اخذوا النوع الكريم اللي عليه خط ازرق ، لانه فيه انواع ثانيه ، وكل نوع لشي .. انا استخدمت هذا ومرتاحه عليه .. 

وسعره رخيص ، كانه ١٢ او ١٥ درهم .. ومتوفر باي صيدلية .. 

وبس هذا كل شي ممكن انه يغير حال بشرتك ويخليها افضل وافضل باذن الله .. 

كل شي بالاعتدال والعناية المستمره يتغير للافضل ، اذا استمريتي على هالنظام ان شاء الله ماتواجهين

هالجفاف والقشور اللي دائما تسبب لنا الحرج و ونروح لمناسباتنا واحنا مو مرتاحين لانه بشرتنا هالمره اخذلتنا ...

وان شاء الله بشرتكم تكون دائما حلوه مثل روحكم الحلوه ..