My Little Pleasures علبة السعادة الشهرية

My Little Pleasures

السلام عليكم 

الفترة الاخيرة بدت تنتشر عندنا اكثر خدمات العلب الشهرية اللي توصل لمشتركينها، وMy Little Pleasures احد هالشركات الجديدة في الامارات ومن العلب المميييزة جدا .. 

لانهم يشتغلون عليها صح ، كل شهر لهم ثيم معين يختلف تماما عن الشهر اللس قبله .. ممكن تشوفون كل العلب السابقة وشنو قدموا فيها .. 

بصراحة انا اول شي لفت نظري في العلب هو التصاميم اللي يقدمونها وهالفن الجميل اللي انا شخصيا اعشقة 

ف كل شهر ادخل واشوف تصميمه لاني احب هالنوع من الرسومات الجميلة .. 

هالشهر كان للعيد و لماركتي العشق لوكستيان .. فشي طبيعي اني وقعت في حب محتويات العلبة ... 

اول شي العلبة قوية وتنفع انج تخليها ك ديكور وتخزين بعد ، واول ماتفتحين العلبة راح تشوفين رسالة منهم ومع بروشور 

فيه شرح لكل منتج .. 

أعشق التفاصيل الصغيرة في التغليف .. 

حبيييييت راح ابروز هالورقة واعلقها في مكتبي .. 

...

Néroli & Orchidée Eau de Toilette

هالعطر الفتنة اللي احبه ووقعت في حبة بعد مااستخدمته اكثر واكثر ، عندي من قبل مجموعة السفر الصغيرة وخلصتها

وحبيت انهم حطوا هالعطر لانه جميييل جدا .. حجمه ٣٠ ميل 

ميدالية جميلة جدا من لوكستيان .. حبييييتها 

شنطة صغيرة فيها ٣ منتجات 

كريم اليدين باللوز ، جميل جدا هالكريم وناعم على اليدين .

شامبو لاصلاح الشعر الجاف والتعبان ، جربته من قبل وهالجحم جدا حلو .. 

ومنتج للشفايف جديد علي تحسسست اجربة ، مرطب للشفايف وفيه لون ..

..

واخر شي هالجماااال كله ، تحطين فيها الشاي الورق وتحطينها بالكوب وتستمتعين بطعم الشاي اللذيذ 

حبيت الفكره والشكل جدا حلووو .. 

..

حبيت العلبة ومحتوياتها كلها بصراحة ، ومافيه اي سامبل صغير بالعكس كله شي بالحجم العادي او الحجم الاصغر 

العلبة تستحق انج تشتركين فيها .. 

الموقع فيه كل التفاصيل .. والاشتراك شهر .. ٣ شهور .. ٦ شهور او سنة كاملة .. 

موقعهم : http://www.mylittlepleasures.com

الانستقرام : https://www.instagram.com/mylittlepleasures_uae

December Glambox 2015 | قلام بوكس لشهر ديسبمر ٢٠١٥

December Glambox 2015 | قلام بوكس لشهر ديسبمر ٢٠١٥

السلام عليكم 

اخر بوكس لهذي السنة ، وباقي باشتراكي معاهم ٣ شهور او ٤ شهور ولحد الحين ماقررت هل برجع اشترك معاهم او لا 

نشوف بعدين نقرر ..

نشوف هالشهر شنو محتويات البوكس 

بوكس البروشرات والخصومات ..

خصم IBX معالج للاظافر ، خصم من درمالوجيكا بقيمة ١٥٠ درهم لاي علاج تسوينه عندهم " حبيت هالشي كانهم يدرون اني ناوية علي فيشل قريب " .

خصم على تطبيق  Vaniday , وخصم ٢٥ ٪ على موقع isaw it first

..

لصقات لازالة الرؤوس السوداء بالفحم من بيورييه ، انا جربت النوع العادي بس اللي بالفحم اول مره 

بجربة لاني احب منتجات بيورييه .. 

...

عدسات من فرش لوك ، عسلية ، تمنيت لو انها نظر لاني البس عدسات بس ماعليه 

من اليمين : 

- زيت جوز الهند من برشوت ريحته خفيفة جدا ، هو يقوي الشعر ويزيد سماكته .. 

- ماسك للوجة والرقبة من abeeco,الماركة جديدة اول مره اعرفها .. نجربة ونشوف 

- صابونة بالليمون من لوكسيتان ، حلوه الصابونة حاليا استخدمها ، ريحتها قوية وحلوه ..

- زبدة الشيا من DXB، حبيت انهم حطو ماركة اماراتية في البوكس ، وهالزبدة عندي منها واستخدمها جدا حلووووه وممتازة .

- صبغ للاظافر ماركة Misa .

وبس هذا كل اللي بالبوكس .. 

للاشتراك بالبوكس من هنا 

November glambox 2015 | علبة قلام بوكس لشهر نوفمبر ٢٠١٥

November glambox 2015 | علبة قلام بوكس لشهر نوفمبر ٢٠١٥

السلام عليكم 

العلبة الجميلة قلام بوكس ، ماشاء الله وصلنا الى نهاية السنة ، باقي شهر وان شاء الله

تكون سنة حلوه و السنة الجاية احلى باذن الله ، اتمنى انكم تكونون حققتوا كل امانيكم واحلامكم 

وابدوا بالتخطيط للسنة القادمة ، وان شاء الله تكون سنة انجاز 

..

نشوف علبتنا ل شهر نوفمبر 

اجمل تصميم شفته لهم ياليت لو يعتمدونة لهم لانه ناعم و راقي جداا، جدا عجبني التصميم حييييل 

ونشوف محتوياتها 

مجموعة عناية جديدة من بايوديرما ، مجموعة خاصة بالترطيب القوي للبشرة الجافة جدا ، حبيت انهم اضافوا شي جديد

وهالنوع لانه جديد حلو الواحد يجربه قبل مايشتري الاحجام الكبيرة .. 

وبايودرما اول مره ينزلون شي خاص بالبشرة الجافة .. 

الحجم الكبير هو سيروم للترطيب 

وهذي عينات 

من اليمين كريم للترطيب مع حماية من الشمس ٣٠ 

اللي بعده سيروم للترطيب نفس الحجم الكبير 

الاخير كريم مرطب للبشرة الجافة الى الجافة جدا .. 

ان شاء الله تكون مجموعة حلوه واكيييد راح اكتب رايي فيها اول مااستخدمها 

...

تونر للوجة بالصبار من ذا بودي شوب ، مناسب للبشرة الحساسة ، بصراحة احتاج لتونر جديد 

...

عطور من الرصاصي ، تيستر عطرين جاذبية 

حبيت انهم اضافوا ماركات جديدة ، خصوصي الرصاصي بما انها ماركة قديمة ومعروفة 

...

زيت للاظافر ، الماركة جديدة على فيه فيتامين اي و زبدة الشيا 

احس هالشي ممتاز يكون عن كل بنت لانها لازم تهتم ب الجلد اللي حلو الاظافر 

...

وهذي كوبونات خصم ، كل علبة يكون فيها كوبونات ، وحبيتهم هالمره ..

وبس هذا كل اللي كان بالعلبة 

اذا حابه تشتركين بهالعلبة الجملية من هنا 

October 2015 GlamBox | قلام بوكس لشهر اكتوبر ٢٠١٥

October 2015 GlamBox | قلام بوكس لشهر اكتوبر ٢٠١٥

السلام عليكم 

وقرب شهر اكتوبر يخلص وماشاء الله باقي على نهاية السنة شهرين بس ، يارب تكونون حققتوا

احلامكم واهدافكم لهذي السنة .. 

علبة هالشهر استلمتها متاخر لاني كنت مسافرة ، و شفت كم صورة بالانستقرام لعلبة هالشهر 

يعني صراحة ماتحمست على اشياء وايد .. بس نشوف مع بعض ..

من اليمين :

قناع التفتيح الطبيعي للوجة من VLCC، لجميع انواع البشرة ويستخدم مرتين باليوم .

مزيل للعرق من نيفيا علي شكل بخاخ ، بريحة البورة ، ريحته حلوه واعجبتني بصراحة ، والحجم صغير وحلو .

ماء جوز الهند واييد سمعت انه مفيد للجسم ، اول مره اجربة وان شاء الله يطلع حلو ولذيذ ..

عطرين تسيتر من ياردلي ، انا مع روايح الورد البحته مو اصحاب ، ف بجربهم باذن الله واكتب عنهم ، ولا مره جربت عطورهم ، بس مره جربت كريم وكتبت عنه كان لونه بنفسجي ، اعجبتني ريحته ..

لابيلو بريحة البطيخ ، وفيه لون خفيف ، من زماااان عن منتجاتهم ..

وبالاخير سامبل صغير واقي للشمس من ديرما اي هالماركة الطبية الجديدة في الامارات

وماشاء الله هالشهر بطاقات الخصومات اكثر من كل مره ، وان شاء الله استخدمهم هالفترة ..

العلبة هالشهر يعني مو وااااو ، اغلب المنتجات عادية مافيها شي مميز ، اتمنى الشهر الجاي يكون افضل 

اذا حابه تشتركين بهالعلبة الجملية من هنا 

September 2015 GlamBox | قلام بوكس لشهر سبتمبر ٢٠١٥

September 2015 GlamBox | قلام بوكس لشهر سبتمبر ٢٠١٥ 

السلام عليكم 

تاخرت في عرض محتويات بوكس شهر سبتمبر لانهم شحنوا العلب بعد العيد 

وهالشي افضل خصوصي انه الاغلب اجازة ومو موجودين بالبيت لاستلام العلبة 

..

نشوف محتويات هالشهر 

شامبو وبلسم من لوريال الفيف 

انا احب ماركة لوريال وخصوصي منتجاتهم للشعر ، تناسب شعري ، على حبي لهم الا اني ماجربت 

هالنوع ، ف فرصة حلوه اني اجرب هالنوع ، لاني دايما اخذ السيروم وكريم الشعر بنفس هاللاين بس ولا مره اخذت الشامبو والبلسم .. 

..

كريم للايدين من لوكستيان ، احب هالكريم حب مو طبيعي وهالحجم الكيوت جدا مناسب للشنطة .

لوشن للجسم من بالمرز بزبدة الزيتون ، شي جميل انه عندهم غير زبدة الككاو هي حلوة بس مااستحمل ريحتها ابدا 

وهالنوع افضل بالنسبة لي الريحة وااااايد حلوه بعكس زبدة الككاو .

..

كوبون خصم ١٥ بالمية من موقع لوكستيان ، وعلى فكرة الموقع صار يوصل للامارات والسعودية 

عينة عطر ميكاليف بشنطة صغيرة .

والاخير عينة عطر من كارتير ب صراحة مااعرف ليش حاطينة يعني بس اشم الورقة مثلا 

ش سوي فيها ، ماحبيت هالحركة منهم .

وبس هذا كل اللي في العلبة لهذا الشهر ، اتمنى انه الشهر القادم يكون افضل 

اذا حابة تشتركين من هنا 

وهذا كود خصم ٢٠ ٪ YOUTUBE

August Glambox 2015 | قلام بوكس لشهر أغسطس ٢٠١٥

السلام عليكم 

قرب يخلص شهر ٨ ، يعني علبتنا الجميلة وصلت لنا ، علبة قلام بوكس 

اللي احبها وتعجبني منتجاتها .. نشوف محتويات هالشهر .. 

اذا حابه تشتركين بهالعلبة الجملية من هنا 

واستخدمي كود الخصم لانه راح يخصم لك ٣٠ ٪   GBHANAN

...

اول شي في العلبة 
بديل الزيت المغذي من رويال الفيف ، عندي منه من الاول وجدا جدا ممتاز ، احبه لشعري لانه اطراف شعري جافة ،وهذا الشي العجيب ينعم الشعر ويخليه متغذي ، عجبني انهم حطوه لنا لاني اكيد اكيد راح استخدمه خصوصي اللي عندي باقي فيه شوي .. سعر الحجم الكبير ب ٢٥ درهم .  " انصح فيه وبشدة "

عطر من كنزو Flower by Kenzo L'Elixir 
عطور كنزو لها ريحة مميزة وتطلعينها من بين اي عطر ، عجبني بصراحة  
سعر الحجم الكبير ب ٤٢٠ درهم . 

غسول للوجة من VLCC، منقي لطيف ، بالكركم البري ، ثاني مره يحطون لنا منتجات من VLCC 
صراحة ماجربت شي منهم لحد الحين بس ناوية عليهم خصوصي انه احجامهم حلوه وصغيرة 
بخلص من اللي استخدمه حاليا وابدا فيهم .. سعر الحجم الكبير ب ٢٣ درهم .

نوصل لمنتج الشهر .. كريم اساس من محل ذا فيس شوب ، تقنية جديدة وهي الكريم الاساس كوشن 
من الاشياء الكورية الجديدة ،اللي كنت محتمسة اجرب شي منهم .. 

المنتج فيه حماية من الشمس بنسبة ٥٠ ، مدة ثباته عالية ، وخالي من الزيوت 
مااقدر احكم عليه الحين يبي له تجربه واكثر من مره ، جربته حاليا سريع وعملي ..

بكتب رايي فيه بعد اكثر من استعمال ، حاطين لنا المنتج بالحجم الكبير وسعره ١٢٠ درهم 

وهذا شكله من الداخل ، بصراحة يونس ومغري للاستخدام لانه شي جديد ، والاسفنجة اللي معاه حلوه 

وبعد حاطين لنا تعبئة للكريم اساس ، ف شي حلو ، مااعرف كم سعر التعبئة او انه بالاساس هي تجي معاه .. 

مافتحته عشان يبقى جديد ولا يدخله هوا .. 

وبس هذي كل منتجات هالشهر ، وانا اشوف انها حلوه يعني شي للشعر ومكياج وللبشرة 

وعطر .. انا احب هالاشياء .. 

وان شاء الله اننتوا بعد تعجبكم .. 

..

Box Therapy July 2015

Box Therapy July 2015

السلام عليكم 

منو مايحب المفاجأت ؟ انا احبها واحب فكرة العلب اللي توصلك بشكل شهري 

وتكتشفين اشياء جديدة وغريبة .. 

Box Therapy  شركة جديدة بتكمل سنة من بدايتها في اول علبة ، انا اشتركت معاهم لمدة ٣ شهور 

وحبيت كل اللي وصل لي منهم ، كان اشتراكي معاهم لشهر ١ و ٢ و٣ ، وخلص الاشتراك ولا جددته .. 

وهنا اول بوكس لي ورايي فيه 

وتواصلوا معاي هالشهر وارسلوا لي علبة شهر ٧ يوليو ..  ف يالله نشوف .. 

اول شي ، والذ شي .... علبة لخليط الكب كيك ، بنكهة البلوبري والليمون " انا تاكدت انهم يعرفون ذوقي مية بالمية ، اللي عجبني في هالماركة انه خاليه من الجلوتين و البيض و منتجات الالبان والحليب ، ف مناسبة جدا للي عندهم حساسية من هذي الاشياء  .. بجربها ان شاء الله وبقولكم رايي في الانستقرام .. 

ولازم مع الكب كيك الورق الخاص فيه من wilton ، ممتازه هالماركة جدا وانا استخدمها من الاول ، احب تصاميمهم والوانهم ، تلاقون الماركة في محلات تافولا او محل wilton الموجود في ميركاتو .. 

..

ولازم ولا بد من العناية ب ايادينا الجميلة ، مجموعة جميلة للعناية باليدين ، من ماركة Alessandro مناكير شفاف يبيض الاظافر ، مناسب جدا للي دايما تحط مناكير ولون الاظفر يبدا يتغير فهذا يرجع لون الاظفر الى الابيض .. 

و مبرد من enigma ,كريم لليدين من kinetics بحجم السفر ب ريحة ylang-ylang & madagascar vanilla ورد الايلنغ والفانيليا من مدغشقر الريحة رائعة جداااااا جدا وهادية جدا حبيت الريحة ، مااعرف من وين ممكن نشتري هالكريم 

بس عجيييب .. 

و ٣ سامبلز من ماركة Klapp ، بجربهم واقول رايي فيهم بعدين .. 

..

قسيمة ل دخول كلاس زومبا ، كلاس جميييل جدا ودخلت له من قبل بالنادي ، حلو انهم يحطون لك اشياء عناية ومنتجات يومية واشياء تستمتعين فيها مثل كلاس الزومبا .. 

و كان بعد فيه قسيمة خصم ١٠ بالمية من قيمة الفاتورة لمطعم على النار في سيتي ووك .. بس ماصورته بروحه بتلاقون له صورة تحت .. 

...

اللي عجبني جدا هالحلللق الجميييل جدا ، انا احب الاكسسوارات والاشياء الغريبة ، هالحلق دخل مزاجي جدا وعلى ذوقي تماما ، وشكله انيق جدا باللبس ، حبيييييته .. 

..

واخر واجملللل شي وصل لي واللي جد ماتوقعته دفتر او نوته باسمي .. استانست بصراحة ، لاني ماتوقعت انهم راح يطبعون اسم كل شخص مشترك 

الجماااال كله ، عندي عشق للدفاتر هوس تجميع .. 

...

وهذي صورة جماعية لكل شي .. اعجبتني كل محتويات العلبة ومتشوقة اشوف علبة الشهر القادم شنو فيها من جماااال 

...

الحلو في هالشركة انك ابدا ماتتوقعين شنو راح يوصلك لانها اشياء عامة وعملية تحتاجينها في حياتك اليومية 

وهالشي حلو جدا .. واغلب الاشياء بحجمها الاصلي و كم سامبلز للتجربة ، ف هذا جميييل لانك راح تاخذين اشياء تساوي او تفوق الملبلغ اللي دفعتيه .. 

واللي حاب يشترك ممكن يدخل على الموقع ويختار الاشتراك اللي حابه 

فيه شهر - ٣ شهور - ٦ شهور - سنة كاملة 

الموقع : www.boxtherapy.com

تويتر :twitter.com/boxtherapy

الانستقرام : instagram.com/boxtherapy

July's Exclusive Givenchy GlamBox + Giveaways

السلام عليكم 

عودة من بعد اجازة بسيطة استمتعت فيها جدا ، وراجعة باذن الله ب افكار واشياء جديدة 

بس بالاول لازم اشوف هديتي لنفسي كل شهر واللي هي طبعا علبتي الجملية من قلام بوكس 

اذا حابه تشتركين ب هالعلبة بكتب كل التفاصيل تحت و فيه كود خصم جديد لكم 

هالشهر كانوا متعاونين مع جيفنشي هالماركة الفرنسية الجميلة ، فكل منتجات العلبة لهذا الشهر منهم ..

حبيت هالحركة لانها تعرفني على الماركة ومنتجاتها اكثر واكثر ، صراحة مااذكر اني شريت شي منهم 

غير العطور ف شي حلو انه اجرب مكياجهم ، بعض منتجات العناية بالبشرة .. 

ف نشوف الجمال .. 

..

من اليمين : 

Le Soin Noir  كريم جوهرة الوجة ، عناية شاملة لنضارة البشرة 

هالكريم يعيد للوجة حيويته ونضارته وغيره من الاشياء المميزة ، متحمسة اجربة .. سعره ب ١٦٨٥ درهم للحجم الكامل .

Le Rouge Lipstick  روج من مجموعتهم الجديدة عجبني لونه ورقمه ٢٠٢ ، الحلو بعد فيه انه اذا راح الروج يبقى اثر للون على الشفايف .. حبيت هالشي .. سعر الروج ١٧٠ درهم .

Noir Mascara Couture ماسكرا ٤ في ١ ، تكثف ، تطول ، تعقص الرموش و تعتني فيهم ، ماجربتها لحد الحين 

سعر الماسكرا ب ١٧٠ درهم .

Hydra Sparkling First Step Luminescence Moisturizing Lotion 

لوشن مرطب للوجة ، يغذي ويرطب البشرة ، جربته مره وحدة بس ، جميل جدا وبسرعة تتشربة البشرة 

يستعل مرتين باليوم الصبح والمساء .. سعره ١٦٥ درهم .

منتجات جيفنشي متوفرة في سيفورا ، وجوه ، باريس غاليري ، فافافوم و اريج . 

اذا حابه تشتركين بهالعلبة الجملية من هنا 

واستخدمي كود الخصم لانه راح يخصم لك ٣٠ ٪   GBHANAN

ولاجمل متابعات ٣ منكم راح يفوزون ب هالعلبة الجميلة  من اليوم الى يوم السبت وبعدها بعلن النتيجة باذن الله .. 

بختار وحدة من المدونة و٢ من الانستقرام 

في المدونة اكتبي لي شي في الردود  ، واللي من الانستقرام راح انزل صورة ومكتوب عليها مسابقة وتشاركون فيها ب ريبوست و هاش تاق