‏إظهار الرسائل ذات التسميات مطاعم للفطور في دبي. إظهار كافة الرسائل
‏إظهار الرسائل ذات التسميات مطاعم للفطور في دبي. إظهار كافة الرسائل

السبت، 4 فبراير 2017

مطعم كرك هاوس | Karak House


مطعم كرك هاوس | Karak House



السلام عليكم 


اتمنى انكم بخير وعافيه ، ويارب كل شي جميل تحلمون فيه تحققونه بإذن الله تعالى

ب هالاجواء الجميله نحتاج نطلع ونغير جو ، اختيارنا هالمره كان لمطعم كرك هاوس ، المتواجد في الداون تاون
في بوليفارد محمد بن راشد ، هالمطعم اشتهر بالكرك واللي يقدمه بالطريقة التقليدية 

مطعم يقدم اكل عربي وهندي بس بطريقة شوي جديدة ومختلفة مع وجود بعض الاكلات التقليدية 
وله جلسات خارجية وداخلية .. اللي حبيته بالجلسات الداخلية كانها خارجية مع الديكور اللي كانج في حديقة صغيرة 
المطعم يناسب للكل العائلة والأطفال والأفراد ..


زيارتي له كانت لفطور مع صديقاتي الجميلات قلبا وقالبا ..

طلبنا كذا شي ، واول شي قدموا لنا ضيافة من عندهم ، خبز محمص مع صوص للتغميس 


حبيت اللبنة اكثر ، الصوص الثاني مااعجبني .. 

..




وصل اول طبق  " شكشوكة " لذييييذة لذيذة لذيذة جدا ، كلنا حبيناها ، مكوناتها بيض / لحم / باذنجان مدخن وطماطم 
لذيذة جدا وتستاهل التجربة ، يقدمون هالطبق مع سلة متنوعة من الخبز .. 



و الطبق الجميل واللذيذ جدا ، صراحة مااعرف اسمه بس هو ذكر لنا هالطبق وعجبنا ، وافل وعليه كذا خلطة 
فول ، وطماطم مشوية ، فطر مع خلطة لذيذة ، اخر شي حمسه بطاط وشوي حاره .. وفي الوسط بيضة مع نقانق 
هالطبق لذيذ جدا ومتنوع .. مشبع وينفع مشاركة لشخصين او اكثر .. 

اللي عرفته انه هالطبق لفترة معينة .. 

و وصل الحبيييييب ، الكرك لذيذ جدا جدا وشي طبيعي انج تطلبين ٢ مو واحد ، مضبوط جدا جدا مايحتاج اي اضافة لا سكر ولا غيره بالضبط نفس اللي احبه .. والاحلى رشه الزعفران تعطي الكرك طعم خيااال 




ووصل الجباتي ، طلبناه مع جبن ، لذيذ جداجدا وابدا مش دسم ، حبيت انه الكلينكس اللي تحت مافيه ولا قطرة زيت 
 الطلب الواحد فيه ٣ من الجباتي 




احلى شي بسكوت جلكوز مع الكرك ، هذي الطريقة تقليدية عندنا اهل الامارات 





حطيت كم صوره للمكان والاجواء بشكل عام ، ماقدرت اصور اكثر لانه ماشاء الله زحمه 

المكان حلو ويفتح النفس ، حلو للتصوير بعد .. 

من الاماكن اللي ممكن ارجع اجربها ، وودي اجرب الغدا والعشا عندهم بعد ، مكانهم في البوليفارد 
يفتحون من ٩ الصبح الى الساعة ١٢ الليل 

الانستقرام 

الخميس، 15 ديسمبر 2016

فطور Social House


فطور Social House  

السلام عليكم 


وجبة الفطور من أحب الوجبات على قلبي ، وفي كل مره أحب اروح اماكن جديدة واجرب اطباق جديدة 
وهالمره كان الاختيار ل مطعم سوشال هاوس الموجود في دبي مول  ..



منيو الفطور ماشاء الله متنوع وكبير ويناسب كل الاذواق ، زرته ٣ مرات للفطور واعجبني في كل مره 
يستاهل لانه فعلا لذيذ جدا .. 

نشوف المنيو وحاولت اصور كل شي بس ماقدرت 



هذا المنيو وطلبنا انا وصديقتي الجميلة جدا سمية حارب  ، وصورت كذا صوره للمكان الجميل ، صراحه يفتح النفس على الصبح 





...


واول شي لازم لازم لازم القهوه ، وانا من عشاق القهوه السادة ، افضلها جدا جدا وماشاء الله قهوتهم لذيذة وتجيب الراس 
نصحت فيها كذا شخص وومثلي عشقها .. 

..


 ووصل الفطور اللذيذ ، طلبي كان اومليت مع فطر، شي جدا جدا لذيذ ويذوب في الفم ، وفوق جبنة فيلادلفيا لذذذذيذة تنوكل بروحها من لذتها فيه اعشاب وحامضة شوي يمممي لذيذة ، حتى التوست كان لذيذ  .. 



و ك طبق جانبي اخترت بطاط مشوي ، بدون مبالغة لذيييييذ جدا جدا يذوب بالفم ومقرمش شوي من بره وعليه شوي بهارات واعشاب .. اعطيك ١٠٠ من ١٠ .. اعجبني جدا ..



وطلب سمية كان بيض بندكت ، مع تركي و فطر ، جدا جدا اعجبها ، وتمدحه حيل .. 



وكاي بلوقرز يطلعون لانه فيه شوي ميك اب وعطور نسولف عنهم ونصورهم .. 

بشكل عام تجربتي مع سوشال هاوس اعطيها ١٠ على ١٠ كل شي كان جميل ومرتب والاكل لذيذ وخدمتهم حلوه بصراحه ..


هل بعيد تجربتي مره ثانية ؟ طبعا واصلا رجعت لهم مره ثانية للفطور بعد 

الأحد، 9 أكتوبر 2016

أماكن للفطور في دبي


السلام عليكم 


دبي مدينتي الجميلة .. دائما توصل لي اسئلة وين افضل مكان ووين هذا المكان 
ف قررت اني ابدأ سلسلة عن دبي وكل مره راح اتكلم عن شي معين 


اليوم اخترت اماكن للفطور في دبي 

بكتب لكم الاشياء اللي جربتها شخصيا واللي عندي لها صور عشان تشوفون كل شي .. 

١- ذا براس The Brass 

اولا الكوفي صاحبة اماراتي وفخوره بهالشيء ، المكان هذا قهوه ويقدم فطور وغدا وعشا وحلى ايضا 
الحلو في هالمكان انه مكان مختص بالقهوه بكل انواعها من الذ انواع القهوه اللي شربتها 
اولا لانه القهوه تطحن عندهم وحسب الطلب وثانيا لانه تحميص القهوة يكون اسبوعيا 
عشاااق القهوه راح يفهمون كلامي .. عندهم نكهات بالقهوه ممكن ما تلاقونها في اماكن ثانية مثل كابيشينو الافندر
او بجوز الهند ..

 

انا زرت الكوفي ٨ مرات ٢ منها للفطور و الباقي للكوفي طبعا 


اخترت هالطبق الذيذ  
كرواسون محشي بالبيض  ويقدم مع سلطة ، حبيت هالطبق جدا .. 
اختي جربت الاومليت بس نوعا ما كان ثقيل لانه فيه جبن واختي مو اي نوع جبن تحبه .. 
بالنسبة لها ماكان خيار موفق .. بس بالمرات القادمة قالت بجرب بدون الجبن .. 

عادي جدا ارجع اطلب هالطلب اكثر من مره .. لانه عجبني جدا 
الاكل لذيذ بصراحة اللي انا جربته يعني وايضا الحلى او المخبوزات ، لانه كل شي يسوونه داخل الكوفي . 

مكانهم في السيتي ووك التوسعة الجديدة 
و في ذا بيتش 

...

٢- تشيز كيك فاكتوري

طبعا هالمطعم مشهور معروف بالاكل واطباقة الذيذة و الكبيرة بالحجم 
بدون مبالغة مااذكر كم مره رحت له ، احب اروح له اذا بسوي شوبغ في دبي مول لانه اكل واشبع ولله الحمد وبعدها اتسوق ومااتغدا بعدها .. لانه اطباقهم حجمها كبير .. 

عندهم كذا طبق للفطور ويوم الجمعة والسبت فيه اطباق غير عن باقي ايام الاسبوع 



طبقي المفضل عندي وعند اختي هو بيض باي طريقة انتي تحبيها ومعاه بطاط بالفرن وتوست لذيذ جدا ومشبع 

وجربنا مره منهم الوافل حلو طعمه بس حجمه كبيييير جدا ماقدرنا نخلصه انا واختي .. 

مكانهم في دبي مول - ذا بيتش - فستيفال سيتي - مول الإمارات 

...

٣- Mo's كافية 



احب فطورهم جدا ورحت له ٤ او ٥ مرات وعلي فترات متباعة وماشاء الله ولا تغير طعمه 
القهوه عندهم لذيذة انا احب القهوه الامريكية .. وبعد التوست الاسمر عندهم لذيييييذ جدا .. 


طبقي المعتاد بيض مع بطاط ومعاه بصل وفلفل احمر بارد هذا بروحه لذيذ 
يقدمون مع الطبق سلة التوست مع الزبدة والمربى 



لذيذ جدا ومكان هادي وبعيد عن الزحمه وخدمتهم بعد حلوه .. 

مكانهم الوحيد في السيتي ووك مقابل النافورة 

...

٤- المخبز الفرنسي 

معروفين طبعا بالخبز والحلويات 
بس بعد الفطور عندهم حلو منتوع .. طبقي المعتاد بيض و بطاط بالفرن 
الكمية ممتااااازة جدا .. وتكفي وتخلصينها كلها .. 



ويقدمون لج مع كل طلب سلة خبز انتي تختارينة و مربى وزبدة .. 
والقهوة عندهم جيدة .. 

فيه عندهم فطور عربي وامريكي وعندهم عروض فطور رخيصة .. بس ماجربت شي غير هالطلب .. 

مكانهم اللي اروح له دايما في الوصل فيتا في شارع الوصل 

...

٥- كافية دوم 

من الاماكن القديمة والمعروفة في دبي .. اكلهم حلو من الاماكن اللي تروحين لها وانتي تبين تغيرين جو 
ليش ؟ لانه مكان هادي جدا وخدمتهم جدا حلو وابدا مايزعجونج .. احب اروح لفرعهم اللي في دبي مول
والصبح طبعا .. لانه يطل على التزلج وتشوفين الناس  وهي فعلا مرتاحة ويلعبون 

طبقي دايما البيض ، صراحة احبه سواء بره او بالبيت بس افضل بره يعني لانه الصبح مالي خلق اسوي شي
يحتاج حوسه لاني مااقدر استوعب صح الا بعد كوب قهوه .. ولاني مااقدر اشرب قهوه على معدة فاضية 
ف اكل اسهل شي .. جبن وتوست وهالاشياء .. 



عندهم انواع من البيض .. وبعد وافل وبان كيك بس ماجربتهم بصراحة .. 

بس الكرك عندهم لذيذ جدا جدا احببببه وساعات اروح عشانه .. 

لهم افرع وايد في دبي 


وبس هذا الجزء الاول واكيد كل فترة بكتب حزء ثاني