فطور Social House

فطور Social House  

السلام عليكم 

وجبة الفطور من أحب الوجبات على قلبي ، وفي كل مره أحب اروح اماكن جديدة واجرب اطباق جديدة 

وهالمره كان الاختيار ل مطعم سوشال هاوس الموجود في دبي مول  ..

منيو الفطور ماشاء الله متنوع وكبير ويناسب كل الاذواق ، زرته ٣ مرات للفطور واعجبني في كل مره 

يستاهل لانه فعلا لذيذ جدا .. 

نشوف المنيو وحاولت اصور كل شي بس ماقدرت 

هذا المنيو وطلبنا انا وصديقتي الجميلة جدا سمية حارب  ، وصورت كذا صوره للمكان الجميل ، صراحه يفتح النفس على الصبح 

...

واول شي لازم لازم لازم القهوه ، وانا من عشاق القهوه السادة ، افضلها جدا جدا وماشاء الله قهوتهم لذيذة وتجيب الراس 

نصحت فيها كذا شخص وومثلي عشقها .. 

..

 ووصل الفطور اللذيذ ، طلبي كان اومليت مع فطر، شي جدا جدا لذيذ ويذوب في الفم ، وفوق جبنة فيلادلفيا لذذذذيذة تنوكل بروحها من لذتها فيه اعشاب وحامضة شوي يمممي لذيذة ، حتى التوست كان لذيذ  .. 

و ك طبق جانبي اخترت بطاط مشوي ، بدون مبالغة لذيييييذ جدا جدا يذوب بالفم ومقرمش شوي من بره وعليه شوي بهارات واعشاب .. اعطيك ١٠٠ من ١٠ .. اعجبني جدا ..

وطلب سمية كان بيض بندكت ، مع تركي و فطر ، جدا جدا اعجبها ، وتمدحه حيل .. 

وكاي بلوقرز يطلعون لانه فيه شوي ميك اب وعطور نسولف عنهم ونصورهم .. 

بشكل عام تجربتي مع سوشال هاوس اعطيها ١٠ على ١٠ كل شي كان جميل ومرتب والاكل لذيذ وخدمتهم حلوه بصراحه ..

هل بعيد تجربتي مره ثانية ؟ طبعا واصلا رجعت لهم مره ثانية للفطور بعد 

الانستقرام : https://www.instagram.com/socialhousedubai

الفيس بوك : https://www.facebook.com/socialhousedubai

Typo | محل تايبو

Typo | محل تايبو

السلام عليكم 

زيارتي لمحل تايبو ، محل جدا جدا جدا جميييل ، وبتعرفون ليش اصلا هو جميل .. 

هالمحل من دخلته وحسيت اني طفلة في محل العاب ، اعشق هالنوعية من المحلات ، اللي فيها كل شي 

ديكورات و دفاتر واقلام واشياء للبيت .. 

خل نشوف جولتنا فيه 

شوفوا الجمال ، مخدات واكواااب و حتى مفارش للطاولات والسرير .. شي رائع ماشاء الله

هالاحرف الجميلة ، حلوه ك ديكور للغرفة ، او حلو الحرف الواحد تضيفينة مع اي هدية بتهدينها لاحد .. 

...

اكواب وصحون حلوه حيييل وغريبة شوي بس اشياد جميلة وبالطبيعة بعد احلى من الصور

اكواب للقهوه ، وساعات ، كروت و علب

شوفوا اخر رف بالصورة ، كلها اشياء للاكسسوارات ، تساعدك انك تنظمين الاكسسواررت اليومية على التسريحة ..

..

جزء من مفارش السرير ، وشموع 

..

عندهم دفاتر بتصاميم جدا جدا انيييقة وناعمة ، وبتناسب كل الاذواق .. انا اخذت منهم البلانر او منظم الوقت اللي دايما تسالوني عنه بالانستقرام .. عندهم اشكال واحجااام منه فيه نفس الحجم اللي عندي وفيه اصغر وفيه اكبببببر ، الكبير جدا جدا حلو .. 

وعندهم بعد كل شي تفكرون فيه ، الات حاسبة - مقالم - شنط - دفاتر - اقلام اي شي يخص القرطاسية والمكتبات بتلاقونة متوفر وباشكال جدا حلوة .. 

...

ونوصل للديكورات

عندهم لمبات للزينة ، للعيد ميلاد او لاي حفلة ، قطاعات - طوابع - اختام - حروف خشب باحجام صغيرة 

المحل ماشاء الله فيه وايد اشياء حتى مو كلها طالعة بالصور ، وبالحقيقة اجمل من الصور بوايد لانه من كثر اللي فيه 
ماعرفت شنو اصور.. يبي له زيااااارة 

عندهم محلين في دبي ، الاول البوكس بارك في شارع الوصل 
والثاني شوي اصغر في دبي مول في الطابق الثاني في مدخل المترو

Eric Kayser | إرك قيصر

Eric Kayser | إرك قيصر 

مطعم ومخبز فرنسي 

تجربة جديدة لمطعم دايما اشوفه في دبي مول بس مافكرت ادخل له ، مع انه يغريني دايما

ب الاشكال الجميلة اللي اشوفها في المدخل ، وريحة الخبز الطازج 

يعني مطعم ومخبز فرنسي شنو تتوقعون ، اكيييد شي لذيذ وجدا بعد .. 

انا جربته في الحلويات والخبز اخذت معاي للبيت بس للاسف الشديد نسيت اصور 

اللي اخذته معاي بس ممكن تشوفون الصور من خلال موقعهم .. 

الاكل عندهم منوع والمينو كبير بصراحة و اللي شدني اكثر شي فيه منيو الفطور والحلى 

لازم تجربونه ، باذن الله بروح له فطور و اكيد بصور لكم .. 

بس في الغدا والعشا فيه اكلات هنديه ومكسيكية وامريكية ، ليش لا اعلم 

..

هم مشهورين جدا بصناعة الخبز والتجدد فيه ، وكل شهر لهم نوع جديد ويحطون اعلان له ، وحبيت هالفكره كنوع من التغيير والتجدد ، خصوصي لمحبين الخبز ..

كان خبز التمر مع الكاري ، اول ماشفته بصراحة ترددت اجربة لاني اصلا مااحب التمر ابدا ، 

ف سمعت لكلامهم وجربته ، لذيييييييذ بشكل ، ماتوقعت انه راح يعجبني ، الخبز طري من داخل 

انا احب هالنوع اللي تكون القشرة الخارجية جافة او يابسة ومن داخل طرية ، لذه 

..

انواع الخبز ، وكانت الساعه ١٢ الظهر وقت ماكنت اصور ، وفيه اشياء كانوا الناس تطلبها وخلصت ..

وايد اجانب كانوا ياخذون خبزهم اليومي منه  .. 

...

الحلى وللاسف ماصورت وايد 

هذي الاشياء اللي جاهزة وسريعة فيه طلبات ثانية بالمينو .. 

وايضا انواع من الساندوش الجاهز وفيه اشياء غير بالمنيو طبعا .. 

..

جربت القهوه عندهم وكانت حلوه .. 

بشكل عام المكان جميل وهادي داخل ، بس شوي اسعاره مرتفعة 

مكانهم بالطابق السفلي من دبي مول ، مقابل محل باتشي 

وفي المدخل اللي يوديكم الى النافورة .. 

هذا موقعهم :http://www.maison-kayser.com/fr/

الفيس بوك : https://www.facebook.com/EricKayserUAE/timeline

Miller Harris || ميلر هاريس

السلام عليكم 

العطور من الاشياء المحببه لقلبي ، اعشقها لحد الثمالة ... العطر ياخذني لعالم ثاني ، ولما توصل لي دعوه 

لاطلاق عطور جديده في دبي ، لبيتها وكلي فرح .. 

دار  Miller Harris ميلر هاريس البريطانية ، تحتفل ب ١٥ سنة وعشان هال ١٥ سنة قرروا يطلقون ٣ عطور جديدة  تحت اسم ‘Le Jardin D’enfance’   ...

اجتمعنا في هالمكان الجميل جدا  فورتنم & مايسون  Fortnum & Mason واللي انصحكم بزيارته .. 

...

العطور الثلاثة الجديدة 

اكثر شخصين ممكن ياخذونكم لعالم ثاني في وصف العطور ، خصوصي الشخص اللي على اليمين ..

هو ماكان يوصف العطر ويعرف فيه لا لا هو كان يقول قصة تاخذك لعالم العطر نفسه بكل احاسيس المكونات .. 

شي لا يوصف بصراحه .. 

الوصف اللي تحت اخذته منهم بصراحه لانه وصفم احلى واشمل 

يروي عطر Coeur de jardin قصة روضة خضراء في أوج تفتحها من خلال التمازج بين عبير البرغموت الإيطالي والليمون والكمثرى والأجاص والخوخ. في حين تضفي براعم الورود التركية وخلاصة الياسمين والمسك تبايناً آسراً على تفاصيل العطر. ويأتي خليط من شذى الأزهار والفاكهة وخلاصة السوسن والمسك وعشب البتشول ليستكمل جمالية التوليفة ويمنحها نفحة إضافية من الغموض.

يفوح عبق كروم العنب وحدائق الفاكهة من عطر Cassis en Feuille الذي يزخر أيضاً بشذى الحمضيات الإيطالية المنعشة وبعبير الكمثرى والفواكه الحمراء والزبيب الأسود. ويغلّفه طيفٌ من التناقضات بين الروائح العذبة والقوية التي تحمل الكثير من سمات الطبيعة الخصبة والكروم الخضراء وأوراق الطماطم الممزوجة ببراعم المسك المصري. يتضافر كل ذلك ليجعل من العطر يصطحبنا في رحلة لاستكشاف كنوز دفينة تعكس رفاهية العصور القديمة التي تفوح منها رائحة خشب الأرز والمسك.

يستوحي عطر Poirier d’un soir عبقه من النكهات المتناقضة ومن تداخل عبير ثمار الكمثرى الطازجة بكل ما تحمله من عذوبة مع شذى تفتح البراعم التي تحيط ببستانٍ من الفاكهة الشهية وقت الغسق. ويتناغم البرغموت الإيطالي المنعش مع عذوبة فاكهة الكمثرى وخلاصة أشجار التوت ليفرض طيفاً من الدفء ولمسةً من عذوبة السكر والكراميل. وتترك تركيبةٌ من التوابل الغنية والورود التركية وخلاصة خشب العود وزيت أخشاب البتولا بصمةً مميزة تمنح العطر مسحةً دخانية تتناغم مع رائحة بذور المسك وخشب الأرز الأبيض وأخشاب الكشمير.

...

كل العطور مميزه ، عن نفسي حبيت اول واحد Coeur de jardin ، الباقي حلوين بس مو ستايلي ..

بس كل البنات اللي كانو موجودات صراحه اختلفت ارائهم على العطور ال ٣ كل وحده حبت شيء .. 

...

هذي مجموعة ثانيه من العطور اللي يقدمونها ، وهي برائحه وحده ، مثل ياسمين او التبغ ، انا مااحب الياسمين 

بس حبيت التبغ بشكل مو طبيعي شي ريحته حلوه سبايسي وقوي ، حبيته صراحه 

...

والمجموعه الاخيره هي مخصصه للخليج ، بصراحه كلهم حلوين بس بعالمنا الخليجي عندنا مثل هالروائح 

بس حلوه وفخمه ، عطور مخلوطه بالبخور والمسك والعنبر .. 

انا عجبني العطر اللي على اليسار اسمه le fumee arabie .. ثقيل وحلو .. 

...

وبالنهاية وقع اختياري علي هالعطر اللي حبيته .. بارد و انيق 

حبيته ومناسب للصيف ... 

لهم محل في دبي مول ملاصق ل بومينغديلز ...