مطعم كرك هاوس | Karak House

مطعم كرك هاوس | Karak House

السلام عليكم 

اتمنى انكم بخير وعافيه ، ويارب كل شي جميل تحلمون فيه تحققونه بإذن الله تعالى

ب هالاجواء الجميله نحتاج نطلع ونغير جو ، اختيارنا هالمره كان لمطعم كرك هاوس ، المتواجد في الداون تاون

في بوليفارد محمد بن راشد ، هالمطعم اشتهر بالكرك واللي يقدمه بالطريقة التقليدية 

مطعم يقدم اكل عربي وهندي بس بطريقة شوي جديدة ومختلفة مع وجود بعض الاكلات التقليدية 

وله جلسات خارجية وداخلية .. اللي حبيته بالجلسات الداخلية كانها خارجية مع الديكور اللي كانج في حديقة صغيرة 

المطعم يناسب للكل العائلة والأطفال والأفراد ..

زيارتي له كانت لفطور مع صديقاتي الجميلات قلبا وقالبا ..

طلبنا كذا شي ، واول شي قدموا لنا ضيافة من عندهم ، خبز محمص مع صوص للتغميس 

حبيت اللبنة اكثر ، الصوص الثاني مااعجبني .. 

..

وصل اول طبق  " شكشوكة " لذييييذة لذيذة لذيذة جدا ، كلنا حبيناها ، مكوناتها بيض / لحم / باذنجان مدخن وطماطم 

لذيذة جدا وتستاهل التجربة ، يقدمون هالطبق مع سلة متنوعة من الخبز .. 

و الطبق الجميل واللذيذ جدا ، صراحة مااعرف اسمه بس هو ذكر لنا هالطبق وعجبنا ، وافل وعليه كذا خلطة 

فول ، وطماطم مشوية ، فطر مع خلطة لذيذة ، اخر شي حمسه بطاط وشوي حاره .. وفي الوسط بيضة مع نقانق 

هالطبق لذيذ جدا ومتنوع .. مشبع وينفع مشاركة لشخصين او اكثر .. 

اللي عرفته انه هالطبق لفترة معينة .. 

و وصل الحبيييييب ، الكرك لذيذ جدا جدا وشي طبيعي انج تطلبين ٢ مو واحد ، مضبوط جدا جدا مايحتاج اي اضافة لا سكر ولا غيره بالضبط نفس اللي احبه .. والاحلى رشه الزعفران تعطي الكرك طعم خيااال 

ووصل الجباتي ، طلبناه مع جبن ، لذيذ جداجدا وابدا مش دسم ، حبيت انه الكلينكس اللي تحت مافيه ولا قطرة زيت 

 الطلب الواحد فيه ٣ من الجباتي 

احلى شي بسكوت جلكوز مع الكرك ، هذي الطريقة تقليدية عندنا اهل الامارات 

حطيت كم صوره للمكان والاجواء بشكل عام ، ماقدرت اصور اكثر لانه ماشاء الله زحمه 

المكان حلو ويفتح النفس ، حلو للتصوير بعد .. 

من الاماكن اللي ممكن ارجع اجربها ، وودي اجرب الغدا والعشا عندهم بعد ، مكانهم في البوليفارد 

يفتحون من ٩ الصبح الى الساعة ١٢ الليل 

الانستقرام 

https://www.instagram.com/KarakHouse

Logma || لقمة

 Logma   لقمة 

كافية ومطعم اماراتي 

مكان مميز وجديد في دبي ، مطعم وكافية لقمة ، صار له كم شهر من فتح وماشاء الله عليه اقبال حلو ، الله يوفقهم يارب

انا زرته مرتين  " فتره العصر - المره الثانية تعشيت فيه " في المره الاولى كان فيه فتره الافتتاح التجريبي وثاني مره 

عدلوا اشياء وايد و شي يحسب لهم .. 

الصور تحت للمينو في فتره الافتتاح التجريبي ..  المنيو الجديد رائع وفيه صور .. 

مثل ماتشوفون المينو منوع ممتاز للفطور - الغدا - سناك - عشا مناسب اي وقت تروحون فيه .. 

اول مره طلبنا كرك و لقيمات و خبز جباب ... 

الكرك كان لذيذ بس وصل لنا دافي ، ماعجبني هالشيء 

  + جباب + يقدم مع جبن كرافت و دبس  ، حلو وعجبني 

+ لقيمات + ... رائعه رائعه لذيذه وتوصلك حاره اعجبتنا كلنا ... 

هذي الجلسات الداخليه ، وواسعه ، وفيه جلسات خارجية بس للاسف ماصورتها .. 

سلطة موزريلا بالرمان ، اعجبتني جدا ..

سلطة كينوا بالتمر ، حلوه بس انا مااحب التمر .. 

واشهر طبق عندهم ، بطاطس مقلية بالاعشاب ، لذيذ بصراحه عليها بهارات عجبني جدا .. 

سمبوسة لحم ، توقعت انها عادية الا انها اعجبتني اللحم نفسه روعه مبهر بطريقة حلوه ، وعلى السمبوسة دبس رمان 

زادها لذه الدبس ، عجبني طعم الاثنين مع بعض .. 

وفيه بالصور بعد سمبوسة جبن ، لذييييذه بصراحه ، جبن كرافت مع شبس عمان ، هالخلطة مشهورين فيها اهل الامارات

وحبيت انها موجوده في المطعم ، ماصورتها بروحها بس موجوده في طرف صوره البطاطس  .. 

...

الحلو بالساندوتش انهم يستخدمون خبز الخمير اللذيذ .. وهذا شي جميل وعجبني بصراحه .. لاني اصلا اعشق خبز الخمير .. 

+ ديك رومي مدخن + حلوووه 

+ دجاج بالموزريلا + حلوووه بصراحه ... 

+ برجر لحم + انا ماجربته بصراحه بس كل اللي معاي عجبهم وعلى كلامهم لذيذ والبرجر فرش .. 

بشكل عام المطعم حلو جلساته حلوه وخدمتهم حلوه بس في وقت الزحمه ممكن شوي يتآخرون شوي بالطلب ..

س يستاهل الزياره ولآكثر من مره ، انا عجبني واكييد بكرر زيارتي له .. بس شوي اسعاره مرتفعه ..

الموقع : http://www.logma.ae

الانستقرام : logmauae

الفيس بوك : logmauae

تويتر : logmauae

متواجدين في شارع الوصل - في بوكس بارك .. 

يفتحون من ٩ صباحا الى ١٢ بالليل يوميا 

رقم التيلفون : ٨٠٠٥٦٤٦٢

باباروتي - سيتي ووك

السلام عليكم 

نطلع من جو الميك اب شوي ، بتكلم عن مكان احبه ، وشي اعشقه 

انا وحده اعشق شي اسمه كرك يعني شاي مع حليب مطبوخ بطريقه معينه ، الطعم خيااالي صراحه 

وانا اسويه بالبيت واجيده ، ومعروفه بالعايله كلها اني اسويه ومضبوووط ... يجيب الراس بصراحه .... 

بس اعشق هالمكان لانه يسويه بطريقه حلوه وتجيب راسي ... باباروتي ... 

وآحب هذا الفرع بالذات فرع السيتي ووك ، هادي في اغلب الايام الا الويك اند دايما يكون مزدحم ماشاء الله 

واصلا انا احب السيتي  ووك لاكثر من سبب  ... اول شي قريب من بيتنا و فيه مطاعم ومحلات وفيه باباروتي و صالون بوبا اللي دايما اروح له و سيفورا وبوتس محل نظارات نسيت وش اسمه ... اخلص كل شغلي اللي ابيه فيه 

بدال ماافرررر في المول من جهه الى جهه ... اللي مازار السيتي ووك يروح له المكان جميل ويفتح النفس ... 

..... 

هذي الصوره بعد الافتتاح بكم يوم ، ترى من زماااات فاتح بس توني افرج عن هالصور ... 

الموظفين عسل من بره وهم يهلون ويرحبون فيك ، حتى بالحر بالرطوبه يضحك ، وهالشي اعشقه فيهم ، 

انا كنت رايحه له وقت ماصورت في عز الصيف وحر ورطوبه يومها ولاحظوا في اول صوره فيه موظف واقف بره مو داخل المحل ... 

احب هالجو الصباحي ... رايق ويفتح النفس ..... 

انا وامي الغاليه ، اللي تشاركني نفس العشق ، اصلا اغلب صفاتي وطبعي اخذتها منها ، الله يحفظها ويخليها لنا يااارب 

الكرك روعه ، والبن الخبزه المشهورين فيها خيااااااال ، والحين عندهم ب خلطات شي بالعسل والمكسرات والفراوله وككاو 

ماجربت منهم شي افضل الساده مع كوب كرك ، وجبه كامله ومشبعه .... 

...

وبسس