فطور Social House

فطور Social House  

السلام عليكم 

وجبة الفطور من أحب الوجبات على قلبي ، وفي كل مره أحب اروح اماكن جديدة واجرب اطباق جديدة 

وهالمره كان الاختيار ل مطعم سوشال هاوس الموجود في دبي مول  ..

منيو الفطور ماشاء الله متنوع وكبير ويناسب كل الاذواق ، زرته ٣ مرات للفطور واعجبني في كل مره 

يستاهل لانه فعلا لذيذ جدا .. 

نشوف المنيو وحاولت اصور كل شي بس ماقدرت 

هذا المنيو وطلبنا انا وصديقتي الجميلة جدا سمية حارب  ، وصورت كذا صوره للمكان الجميل ، صراحه يفتح النفس على الصبح 

...

واول شي لازم لازم لازم القهوه ، وانا من عشاق القهوه السادة ، افضلها جدا جدا وماشاء الله قهوتهم لذيذة وتجيب الراس 

نصحت فيها كذا شخص وومثلي عشقها .. 

..

 ووصل الفطور اللذيذ ، طلبي كان اومليت مع فطر، شي جدا جدا لذيذ ويذوب في الفم ، وفوق جبنة فيلادلفيا لذذذذيذة تنوكل بروحها من لذتها فيه اعشاب وحامضة شوي يمممي لذيذة ، حتى التوست كان لذيذ  .. 

و ك طبق جانبي اخترت بطاط مشوي ، بدون مبالغة لذيييييذ جدا جدا يذوب بالفم ومقرمش شوي من بره وعليه شوي بهارات واعشاب .. اعطيك ١٠٠ من ١٠ .. اعجبني جدا ..

وطلب سمية كان بيض بندكت ، مع تركي و فطر ، جدا جدا اعجبها ، وتمدحه حيل .. 

وكاي بلوقرز يطلعون لانه فيه شوي ميك اب وعطور نسولف عنهم ونصورهم .. 

بشكل عام تجربتي مع سوشال هاوس اعطيها ١٠ على ١٠ كل شي كان جميل ومرتب والاكل لذيذ وخدمتهم حلوه بصراحه ..

هل بعيد تجربتي مره ثانية ؟ طبعا واصلا رجعت لهم مره ثانية للفطور بعد 

الانستقرام : https://www.instagram.com/socialhousedubai

الفيس بوك : https://www.facebook.com/socialhousedubai

أماكن للفطور في دبي

السلام عليكم 

دبي مدينتي الجميلة .. دائما توصل لي اسئلة وين افضل مكان ووين هذا المكان 

ف قررت اني ابدأ سلسلة عن دبي وكل مره راح اتكلم عن شي معين 

اليوم اخترت اماكن للفطور في دبي 

بكتب لكم الاشياء اللي جربتها شخصيا واللي عندي لها صور عشان تشوفون كل شي .. 

١- ذا براس The Brass 

اولا الكوفي صاحبة اماراتي وفخوره بهالشيء ، المكان هذا قهوه ويقدم فطور وغدا وعشا وحلى ايضا 

الحلو في هالمكان انه مكان مختص بالقهوه بكل انواعها من الذ انواع القهوه اللي شربتها 

اولا لانه القهوه تطحن عندهم وحسب الطلب وثانيا لانه تحميص القهوة يكون اسبوعيا 

عشاااق القهوه راح يفهمون كلامي .. عندهم نكهات بالقهوه ممكن ما تلاقونها في اماكن ثانية مثل كابيشينو الافندر

او بجوز الهند ..

 

انا زرت الكوفي ٨ مرات ٢ منها للفطور و الباقي للكوفي طبعا 

اخترت هالطبق الذيذ  
كرواسون محشي بالبيض  ويقدم مع سلطة ، حبيت هالطبق جدا .. 
اختي جربت الاومليت بس نوعا ما كان ثقيل لانه فيه جبن واختي مو اي نوع جبن تحبه .. 
بالنسبة لها ماكان خيار موفق .. بس بالمرات القادمة قالت بجرب بدون الجبن .. 

عادي جدا ارجع اطلب هالطلب اكثر من مره .. لانه عجبني جدا 

الاكل لذيذ بصراحة اللي انا جربته يعني وايضا الحلى او المخبوزات ، لانه كل شي يسوونه داخل الكوفي . 

مكانهم في السيتي ووك التوسعة الجديدة 

و في ذا بيتش 

http://www.thebrass.ae

الانستقرام 

...

٢- تشيز كيك فاكتوري

طبعا هالمطعم مشهور معروف بالاكل واطباقة الذيذة و الكبيرة بالحجم 
بدون مبالغة مااذكر كم مره رحت له ، احب اروح له اذا بسوي شوبغ في دبي مول لانه اكل واشبع ولله الحمد وبعدها اتسوق ومااتغدا بعدها .. لانه اطباقهم حجمها كبير .. 

عندهم كذا طبق للفطور ويوم الجمعة والسبت فيه اطباق غير عن باقي ايام الاسبوع 



طبقي المفضل عندي وعند اختي هو بيض باي طريقة انتي تحبيها ومعاه بطاط بالفرن وتوست لذيذ جدا ومشبع 

وجربنا مره منهم الوافل حلو طعمه بس حجمه كبيييير جدا ماقدرنا نخلصه انا واختي .. 

مكانهم في دبي مول - ذا بيتش - فستيفال سيتي - مول الإمارات 

...

٣- Mo's كافية 



احب فطورهم جدا ورحت له ٤ او ٥ مرات وعلي فترات متباعة وماشاء الله ولا تغير طعمه 
القهوه عندهم لذيذة انا احب القهوه الامريكية .. وبعد التوست الاسمر عندهم لذيييييذ جدا .. 


طبقي المعتاد بيض مع بطاط ومعاه بصل وفلفل احمر بارد هذا بروحه لذيذ 
يقدمون مع الطبق سلة التوست مع الزبدة والمربى 



لذيذ جدا ومكان هادي وبعيد عن الزحمه وخدمتهم بعد حلوه .. 

مكانهم الوحيد في السيتي ووك مقابل النافورة 

...

٤- المخبز الفرنسي 

معروفين طبعا بالخبز والحلويات 
بس بعد الفطور عندهم حلو منتوع .. طبقي المعتاد بيض و بطاط بالفرن 
الكمية ممتااااازة جدا .. وتكفي وتخلصينها كلها .. 



ويقدمون لج مع كل طلب سلة خبز انتي تختارينة و مربى وزبدة .. 
والقهوة عندهم جيدة .. 

فيه عندهم فطور عربي وامريكي وعندهم عروض فطور رخيصة .. بس ماجربت شي غير هالطلب .. 

مكانهم اللي اروح له دايما في الوصل فيتا في شارع الوصل 

...

٥- كافية دوم 

من الاماكن القديمة والمعروفة في دبي .. اكلهم حلو من الاماكن اللي تروحين لها وانتي تبين تغيرين جو 
ليش ؟ لانه مكان هادي جدا وخدمتهم جدا حلو وابدا مايزعجونج .. احب اروح لفرعهم اللي في دبي مول
والصبح طبعا .. لانه يطل على التزلج وتشوفين الناس  وهي فعلا مرتاحة ويلعبون 

طبقي دايما البيض ، صراحة احبه سواء بره او بالبيت بس افضل بره يعني لانه الصبح مالي خلق اسوي شي
يحتاج حوسه لاني مااقدر استوعب صح الا بعد كوب قهوه .. ولاني مااقدر اشرب قهوه على معدة فاضية 
ف اكل اسهل شي .. جبن وتوست وهالاشياء .. 



عندهم انواع من البيض .. وبعد وافل وبان كيك بس ماجربتهم بصراحة .. 

بس الكرك عندهم لذيذ جدا جدا احببببه وساعات اروح عشانه .. 

لهم افرع وايد في دبي 


وبس هذا الجزء الاول واكيد كل فترة بكتب حزء ثاني  

مطعم سيركل كافيه Circle Café

مطعم سيركل كافيه Circle Café

السلام عليكم 

مطاعم وكافيات دبي ماشاء الله لا تعد ولا تحصى ، فيه مطعم وكافية تميز وماشاء الله بدا يتوسع اكثر واكثر

اللي هو مطعم سيركل كافيه ، واللي مؤخرا افتتحوا لهم فرعين في دبي مول مقابل الشلال و في العين 

انا زيارتي كانت ل فرعهم الموجود في جميرا بيتش بلازا على شارع جميرا ويطلع على بحر جميرا 

اخترت اني اروح لهم في فترت الصباح للفطور انا وامي ، اول مره نروح له ، مكان رائع جدا 

هااااااادي قد مااقول هااادي ماتتخيلون ، اللي يدور على مكان هادي ورايق جدا هذا راح يعجبه 

المكان شرح ويفتح النفس ، كل شي الطاولات والكراسي كلها باللون الابيض ، والشباك كبيييير ونشوف البحر قدامنا 

ولا احلى من هالجو ..

من احلى الاماكن اللي رحت لها وكان استقبالهم ممتااااز ، مبتسمين طول الوقت وهاديين جدا وكل وقت يتاكدون اذا نبي شي .. احب هالنوع من الستاف ...

المنيو مثل ماتشوفون كانه جريدة ، عجبني جدا .. متنوع خصوصي وجبة الفطور متنوعة 

انواع البيض و البان كيك 

ساندوتش ، سلطات واطباق غدا وعشاء كبير ومتنوع 

وطبعا قسم خاص للحلا 

طلباتنا كانت " قهوه سادة - لاتيه - ترويقة - وبيض مع جبنة الماعز "

و وصلت لي معشوقتي القهوه ، لذيذة جدا واعجبتني ، اقدر القهوه السادة اذا عليها رغوة ، طعمها الذ .. وتجيب الراس 

طلبي كان ترويقة لبنانية .. حبيت اغير عن البيض والساندوتش ف اخذت هالطلب 

فول - لبنة - زعتر - حلاوة طحينية - جبن حلوم - وخضار وزيتون ، ويقدم معاه اختيارك مع الخبز 

عربي - فرنسي - او البيقل .... اعشششششق البيقل بشكل مو طبيعي وهذا احلى مكان اكلته فيه ، صراحة تندمت

بعد ماذقته اني مااخذت ساندوتش بالبيقل ، بس للمرات الجاية باذن الله .. بس عندهم انواع من البيقل 

الساده - الاسمر - بالبصل - سمسم وغيره 

جبن الحلوم ، شي لذيذ طرية جدا جدا جدا ، مافيه وايد مطاعم تقدمها بهالشي خصوصي انها مشوية دايما توصل يابسة او ناشفة مع الشوي ، بس هم قدموها بطريقة جميلة .. اعجبتني انا وامي .. 

وطبق الغاليه 

كان بيض مع بصل مكرمل و جبنة الماعز ، حلو طعمه بس امي فضلت لو انهم مقللين كمية الجبن لانها كبيرة شوي 

بس لذيذة ، وتقدم مع سلطة و خبز من اختيارك .. 

بشكل عام المكان يستاهل ، مكان رايق و ناس بشوشة ، والاسعار معقولة جدا 

لهم جلسات داخلية و لهم بعد جلسات داخل المول نفسه ، فيه شي عجبني ان المطبخ مفتوح وتشوفين كل شي قدامك يتحضر

وهذا شي جدا حلو ، وماشاء الله عدد العاملين فيه وايد و شي حلو منظمين ومرتبين .. 

اكيد لي زيارة ثانية لهم 

الموقع : http://circle-cafe.com

الفيس بوك : https://www.facebook.com/Circleuae

الانستقرام : https://instagram.com/circlecafe

جميرا بيتش بلازا، شارع شاطئ جميرا، دبي

عندهم خدمة الطلب من موقعهم 

CoCoa Room

السلام عليكم 

الاسبوع اللي راح صارت ضجة في دبي مكان جديد راح يتفح ومحد يدخله هالفترة الا بدعوه منهم للتجربة .. 

 افتتاح كوكو روم المشهور والمعروف في الكويت ..  واللي كنت انتظره بكل صراحة لاني عرفت انهم راح يفتحون فرع في دبي،

 و دعوني اني اجرب الفطور قبل الافتتاح الرسمي ، واللي راح يكون يوم السبت هذا بتاريخ ٢٩ / ٨ /٢٠١٥ 

رحت يوم الجمعة انا واختي ، والمكان ماشاء الله فل بالكامل ، ناس معروفة مصممات و اشخاص معروفين بالانستقرام

وبلوقرز وغيرهم ... 

كوكو روم هو جزء من مطعم سلايدر ستيشن ، اللي يكون فاتح من الساعة ١ الى الليل ، اما كوكو روم يقدم الفطور مع الحلى من الساعة ٨ الصبح الى ١٢ الظهر فقط ..

المنيو متنوع وكل شي فيه تقريبا 

* حبيت الصحون في المطعم انييييقة ، حتى الشوكة والسكينة * انااااااقة 

...

بالبداية اخذوا طلبتنا وش نشرب على مانفكر شنو نطلب وعلى مايوصل لنا الطلب .. واحب هالشي ، لاني ابي افتح مخي واصحصح قبل الاكل " يس انا من النوع اللي يقفل اذا ماشرب شي " 

طلبت قهوه سادة ، واختي طلبها كان شاي اسود مع حليب ، عتبها الوحيد انه ماكان اسوود بزيادة وقلنا لهم هالشي ..

اما القهوه ف كانت لذيذه ، طعم القهوه والتحميص ممتاز ، لدرجة طلبت كوب ثاني .. 

بس يوصل لكم ب هالطريقة ، واعجبتني .. 

...

وطلبنا كان بيض على طريقتنا ، بان كيك بالبتر ملك .. 

البان كيك ، شقول بس ، لذيذ جدا جدا جدا ، طعمه مثل اللي احبه بالضبط ، فيه نكهة حلوه ، 

الطبقة اللي فوقة شقرا ومن الداخل شي خفيف وابدا مو عجين ، لا شي خفيف ويذوب .. لذيذ جدا مع السيرب ..

اعجبنا انا واختي .. وعادي نرجع عشانه ، وودي اجرب المرة الثانية رد فلفت بان كيك .. شكله كان خطير 

وعندهم بعد اوريو بان كيك .. 

...

نوصل للحب .. 

اخترنا البيض اللي احنا نختار الاضافات و الاشياء الجانبية اللي معاه .. " طريقة التقديم حلوووه " 

اخترنا بيض سكرامبل مع جبن فيتا ، هي مالحة شوي انا احبها بهالشكل ،بس اختي تقول شوي مالحة .. بالامكان تضيفون ٣ اشياء مع البيض .. بس فضلنا اختيار واحد فقط .. 

مع هاش براون و توست محمص .. 

هالطلب بكبرة شي دخل مزاااااااجي وعلى ذوقي ميه بالميه ، ليش 

لانه البيض وطريقتة خياااااال ، البيضة جوسي وابدا مو ناشفة ، اول مكان يسوي البيض مثل امي بالضبط  ، امي صار لها منافس .. لذيذة و تذوب ...

الهاش بروان ١٠ على ١٠ ، لذيذ والملح ممتاز و الاحلى انه مافيه زيت بزيادة " بعض الاماكن تحسين انه تاكلين زيت مو هاش بروان " يستاهل الطلب .. 

والشي اللذيذ جدا جدا جدا ، التوسسسسسسسست المحمصصصص ، اختي اول ماذاقته تقولي حناااااان هذا لك 

وراح يعجبك ، اقولها شكله حلوو تقولي لا الطعم لك انتي ، ذقتة ووقعت فيه حبه ، انا انسانه اعشق المخبوزات 

التوست لذيذ اولا طعمه حلووووو ، والقطعه سميكة و محمصصصصة  ياسلام اكتملت علامات الجمال .. 

اخر شي اكلته سادة بدون اي شي .. 

انا طلبت لي قهوه سادة ثانية وطبعا شي ، واختي اخذت شاي مغربي بالنعناع نصحتنا فيه وحدة من اللي كانوا يشتغلون 

وصلت لنا ريحته قبل مايوصلنا على الطاولة ، ريحته تهببببببل و صج شاي مغربي على اصولة ، عجب اختي جدا ويشبه الشاي المغربي الاصلي .. 

..

الافضل تروحون وانتوا مو ماكلين ولا شي ابدا ابدا ، بالنسبه لي انا واختي هذا كله كان وايد علينا ، ف حلاته تروحون جوعانين .. او تطلبون اشياء مشاركة لانه بكل صراحة تحتارون وودكم تطلبون المينو كله عشان تذوقون كذا شكل .. 

..

...

المكان والديكور جميل جدا وهادي ورايق جدا ، الاسعار ماعندي فكره عنها لانه المنيو التجريبي مافيه اسعار 

ف ممكن المينو الجديد يكون فيه السعر .. 

الخدمة ممتازة ، وكل اللي يشتغلون فيه ولا اروع والضحكة ماتفارقهم ، وجدا عجبنا هالشيء .. 

المكان يستاهل الزيارة اكثر من مره عشان ابي اجرب كذا شي ماجربته .. ف ان شاء الله في الفترة القادمة ارجع لهم باذن الله .. 

مكان مميز لفطور مميز في دبي ، يلبي اذواق الكل ، رجال ونساء واطفال وبكل الاذواق .. 

مااتوقع فيه احد راح يدخل ومايلاقي شي ياكله .. اقدر المطاعم اللي توفر اصناف متنوعة .. 

وين مكانهم .. في شارع الوصل في الغاليريا مول دبي

Galleria Mall, Al Wasl Road - Dubai

الموقع : http://www.cocoaroom.co

الانستقرام : https://instagram.com/cocoaroomae