March & April Empties 2016 || اشياء خلصتها في مارس وابريل + ٥ شهور على التحدي

March & April Empties 2016 || اشياء خلصتها في مارس وابريل + ٥ شهور على التحدي


السلام عليكم 

تاخرت جدا في طرح هالموضوع بصراحة انشغلت في الفترة الاخيرة وايد و بعدها ماشاء الله دخلنا 
في شهر الخير شهر رمضان والكل منشغل فيه عسى الله يعوده علينا بكل خير ...

خلاص الشهرين اللي راحوا خلصت اشياء وايد بصراحة وكنت بحط الاشياء اللي خلصتها في شهر ٥ بس شفت انه 
الموضوع راح يكون طويل بزيادة ، ف شهر ٥ و٦ راح يكوونون في موضوع ثاني باذن الله .. 

بسم الله نبدا .. اول شي اقدر اقول اني حققت هدفي ولله الحمد
انا عندي هدف اني اخلص ٢٠ منتج كل شهر وخلصت خلال شهرين ٥٢ منتج شي جمييييييل جدا 
جدا وفخوره بنفسي لاني انجزت شي ..

نبدا بالميك اب 

- ماسكرا من ميك اب فور ايفر smoky Extravagant 
شكل الماسكرا غير كانها شجرة الارز ، تعطي جحم وسط للرموش وكثافة خفيفة بعد بس سوادها حلو ، بس ماينفع تكون بروحها لازم معاها ماسكرا ثانية ، وتكتل اذا حطيتي طبقتين .. مااتوقع اني راح اشتريها بس عندي سامبل منها بستخدمه وخلاص ماراح ارجع اشتريها .. 

-

ماسكرا Volume Lash Styler من #ايسادورا 

اول ماجربتها ماحبيتها ابدا .. اولا رطبة وتخرب الميك اب وكانت ماتغييير اي لوك بالأساس تخلي رموشك كانهم كم حبة .. خليتها فتره ورجعت جربتها من جديد ❤️

عكس كل كلامي اللي فوق .. تعطي طول حلو مع شوي حجم للرموش .. توصل لمنابت الرموش بشكل حلو ولا تأذي العين .. ثباتها حلو .. ماانصح بأكثر من طبقتين وبشكل خفيف لانها راح تتكتل بشكل مو حلو .. الفرشة بلاستك ومرنة .. اللي عندي لونها اسود ورقمها ٣٠ 

- كريم اساس من ميك اب فور ايفر ، حلو للبشرة العادية الى الجافة ، مااشوف وايد يتكلمون عنه ، خفيف على البشرة

بس الدرجة شوي كانت غامقة علي ف صوت اخلطه بشوي من هلثي مكس من برجوا .. 

مااتوقع راح اشترية مره ثانية لاني حبيت الهلثي مكس اكثر .

- كريم اساس هلثي مكس من برجوا ، من احلى كريمات الاساس اللي جربتها ينفع يكون يومي ولا ياثر على البشرة

وحلو تخلطينة مع اي كريم اساس ثقيل يطلع حلو ، ساعات احط ضغطتين منه مع ضغطة وحدة من دولتشي اند غابانا ويكون حلو للنهار اذا عندي مناسبة .. اكييييييد برجع اشترية اكثر من مره وشريت لي باك اب منه .. 

- بروفيشنال من بينفت ، حلو للمسام على الانف او الخد احط منه شوي ويخفف لي من شكل المسام ..

عندي بعد منه سامبلز بستخدمهم وبعدين بشتري لي بداله .. 

- كريم يخفف من المسام من بودي شوب كتبت عنه موضوع كامل هنااا 

...

وهذي اشياء خلاص قديمة وابي اتخلص منها ، انا كل فترة اطلع القديم او اللي استخدته وايد ..

...

نروح لمنتجات الشعر 

- شامبو الفيف للشعر العادي الى الجاف  انا شعري دهني وماناسبني ابدا .. كان واصل لي في علبة قلام بوكس

بس استخدمه لشعري اذا كنت حاطة زيت بشعري عشان يشيله كله .. اللي شعرها جاف راح يعجبها 

- بديل الزيت من لوريال ممتااااااز يخلي الشعر زبدة ، انا احب احطة قبل الشاور لمدة ساعة وشعري ناشف 

واغسلة بعدين .. يرطب شعري بشكل حلو انا شعري دهني عن الفروة بس الاطراف جافة وهذا يرطب لي شعري ...

يمكن ثاني علبة اخلصها منه .. 

- سبريه للشعر من بوتس ، والله جميل كنت مستعجلة ومالقيت الا هو جدامي واخذته وممتاز والله

وحتى ريحته حلوه وسعره رخيص ب ٦ او ٩ دراهم ..

- ماسك الماكاديما للشعر جدا حلو يرطب الشعر بشكل جميل واتوقع الكل جربه لانه اخذ صيت عالي 

- فيتامين الشعر اللي ارجع دايما اشتريه ومناسبني جدا والحمدلله ماشفت اي اثار جانبيه عليه وهذا ريفيو كامل عنه .

...

نروح لمنتجات العناية بالبشرة 

- كريم للوجة من كودالي ، هالمجموعة استخدمتها كلها بس بصراحة ماشفت منها فايدة كبيره للاسف . 

- غسول زيتي لازالة المكياج من Nip+Fab للاسف الشديد ماحبيته ابدا يحرق العين ويغوشها بعد صح يشيل الميك اب بس ثقيييييل ثقيل بزيادة ، ابدا ماراح افكر اشتريه مره ثانية ..

- كريم واقي من الشمس من افين ، هالنوع للاسف ماناسبني ابدا ابدا ، يخلي وجهيي رمادي وابيض اول مااحطه ، ماعجبني ابدا 

- كريم واقي من الشمس من شسيدو هذا حلو وكتبت عنه موضوع كامل هنا شوفوه 

- تونر للبشرة من لاش جدا حلو حبيت انه ماحسس بشرتي وممكن ارجع اشترية مره ثانية ، كتبت موضوع كامل عن منتجات لش وكتبت عنه بعد هناااااا

...

- سكراب ال 7 scrub من كلينك ، جدا جدا حبييييته عادي جدا اني ارجع اشترية حبيته ويقشر البشرة بشكل حلو ويخليها ناعمه بعد التقشير . 

- الجمااااال كله سيروم تفتيح البقع للبشرة من كودالي عادي ارجع اشتريه اكثر من مره جدا جدا ممتاز كتبت عنه في الانستقرام 

- كريم العيون من N 7 ، عادي بصراحة كتبت عنه في الانستقرام 

- سيروم من كودالي من نفس مجموعة الفيتامين سي ، عادي بصراحة ماحسيت معاه بنتيجة حلوه للاسف .

- غسول منظف للوجة من لش ، فكرته غريبة شوي تاخذين شووي منه وتذوبينه بماي وبعدها تغسلين وجهك ، حلو للبشرة الجافة والحساسه .

...

- سيروم للعيون من كيلز ، قريت عنه وايد انه ممتاز ويخفف من الخطوط والتجاعيد ، للاسف ماشفت منه اي نتيجة خلصته كامل بس مافيه اي شي يذكر غير الترطيب . 

- سيروم من Eucerin ، تستخدم كل امبولة لمدة اسبوع كامل وتساعد بتفتيح البقع في البشرة ، والمفروض استخدم كل ال ٦ امبولات مع بعض انا استخدمت وحدة بس ومااقدر احكم عليه .. لين مااخلصهم كلهم مع بعض ..

- عينة واقي من الشمس من بايودريما ، ماحبيييييته ابدا يخلي الوجة ابيض وبعد فترة يصير رمادي ..

- لوشن خفيف جدا للترطيب من جيفنشي ، حبييييييته وممتاز قبل الميك اب جدا جدا حلو ، عينة وصلت لي من قلام بوكس .

- عينة تونر من ماركة كورية ايضا كان من قلام بوكس عاددي ماشفت شي واااو منه .

...

- ماسك من ماركة دكتور جارت لتصغير المسام ، جدا حبيته وكتبت عنه في الانستقرام  وعادي ارجع اشترية .

- سامبل من دريمالوجيكا اعشق هالماركة جدا ومنتجاتها تناسبني ولله الحمد ، هي عطتني هالعينة احطها على اماكن الحبوب والحمدلله خفت ، وناوية ارجع اخذ الحجم الاكبر .

- بعد عينة واقي للشمس من بايودرما بعد ماحبيته .

- الحب والعشق كله ، قطن دايسو راااااائع جدا جدا وناعم على البشرة وورخيييييص يستاهل والله .

..

نوصل ل منتجات الجسم 

- كريم للجسم بزبدة الشيا من ايف روشية راااااائع جدا جدا وناوية ارجع اشتري منه من جديد بس اخلص من كم منتج من عندي 

حبيته وكتبت رائيي فيه جدا ممتاز لترطيب البشرة .. هذا رائي فيه 

- كريم مرطب للجسم بريحة المسك هو تابع لمجموعة ، انا احب ريحة مسك النخبة اعشقها هالكريم حلو كريحة بس اما الترطيب عادي مثلة مثل اي مرطب للجسم .

- شاور جل بزيت الزيتون اخييييرا اخييييرا خلصته ريحته للاسف ماحبيتها ريحة زيت زيتون قوية ابدا موحلوه والعلبة كبيرة 

صراحة صرت استخدمه لاي شي بس عشان اخلصه .. ماحبيته ابدا ..

...

- كريم Complex A، اخذت بعد كلام الصيدلي عنه لاني كنت ادور على منتج يخفف من شكل الجلد المحبب او اللي يكون فيه شعر تحت الجلد .. هالكريم ممتاااااااز خفف لي هالمشكة بشكل واضح .. سعره شوي غالي على حجمه الصغير ٢١٠ يمكن 

بس تستخدمينه كل يوم .. انا مو يوميا افضل استخدمه بعد الشاور وخصوصي اذا سويت سكراب للجسم عشان تكون المسامات مفتتوحة بس ممتاز جدا .. وانصح فيه .

- كريم للجسم بالشيا من كلارنس ، من كثر حبي له مااستخدمه وايد ممتااااااز ، ترطيب جميل جدا واللبشرة تتشربة بشكل حلو والترطيب بدوم لفترة طويلة .. 

- زبدة للجسم من ماركة وش مااعرف وين ممكن الاقيها للاسف الشديد بس حبيته وكتبت عنه اكثر هنااا 

- كريم للجسم هالماركة مااعرفها بس وصلت لي فيه علبة ، ترتطيب حلو ووسط بس الريحة اجمللل شوي سويت بس المكس هذا كله جدا حلو .. مااعرف وين ممكن الاقي هالماركة .

...

- مقشر للوجة من سيام بالعسل ، انا مااحب اي شي فيه عسل بس هالمقشر ممتاز استخدمته لجسم مو لوجهي لاني مااحب ريحه العسل ، تاخذين منه شوي وتخلطينه مع الماي وبعدها قشري كل جسمك فيه ، ممتاااااز لانه بشيل الجلد الميت . حبيته ..

- مقشر لليدين خلصته وعجبني بصراحة  وكتبت عنه بشكل اوسع هناااا

...

- زيت للاظافر من ايسينس ، جدا حلو هذي ٢ او ٣ علبة اخلصها ، يرطب الجلد ووسعره رخييييص 

كتبت عنه ريفيو من زماااااان 

- معقم لليدين حلو مو قوي على البشرة ..

- ديودرنت من فا ، ماحبيته ولا حبيت ريحته قويه جدا ريحة عطر .

- ديودرنت من ريكسونا ولا ارررروع مااستغني عنه ابدا دايما اشترية ولا اغير عنه . 

...

- صابونة للجسم من لوكستيان بريحة الياسمين ، حبيتها الريحة تملي الحماام جدا اعجبتني .. 

- سامبل عينة لكريم للجسم من سسلي ، الريحة قوية قوية قوية لانه العطر ماشاء الله معروف بثباته حتى الكريم مع انه عينة ثبات الريحة لليوم الثاني اشمها بجسمي .. 

- عدسات جونسن احلى عدسات مريحة جدا وتدخل اكسجين للعين جدا حلوه وممتازة ..

..

العطور 

- عطر للشنطة بريحة المسك من مسك النخبة اعشششقة .. ودايما اشتري منه .

- عطر للجسم من تيد بيكر جدا حلو خلصت الحجم الصغير ،عندي الحجم الاكبر جدا حلو للبيت .

- شمعة Red من باث اند بودي، اعجبتني ، وممكن ارجع اشتريها مره ثانية ..

- عطر بخاخ للجسم من باث اند بودي  هالريحة حلوه للي يحب ال

عنبر شوي سويت بس حلوه للبيت ..

...

وخلصت كذا شغلة صغيرة مخلط ، مسك وعطور منوعة سامبلز ..

وبس هذا كله اللي خلصته في هالشهرين والحمدلله حققت الرقم اللي ابيه وان شاء الله استمر 

وموضوع شهر ٥ و٦ ان شاء الله قريب قبل العيد لانه عندي اشياء خلصتها وابي اكتب عنها قبل شهر ٧ لانه وايد 

..

December Empties 2015 | اشياء خلصتها في ديسمبر + مر شهر على التحدي

December Empties 2015 | اشياء خلصتها في ديسمبر + مر شهر على التحدي

السلام عليكم 

مرت سنة كاملة اتمنى انها كانت سنة حلوة عليكم ، الحمدلله على كل شي ربي اعطانا اياه والحمدلله على كل النعم 

سنة جديدة وباذن الله تكون سنة جميلة بكل مافيها ، اتمنى اني ربي يحقق لي كل احلامي واحلامكم يارب 

الحمدلله على الصحة و الامن والامان 

كل بداية سنة نخطط لسنة جديدة اهداف واحلام نحاول نحققها ، انا في نهاية شهر ١١ قرر اني مااشتري اشياء لمدة ٤ شهور ، ممكن صعب للبعض بس الحمدلله قدرت على هالشيء ، ومافيه شي مستحيل اذا ارادتك قوية وان شاء الله استمر ل ٣ شهور على هالقرار الجميل .. 

اشتريت شي واحد بس وكنت كاتبه اني راح اشترية اللي هو برايمر العين اخذت لي واحد من اربن ديكاي 

وبس هذا اللي اشتريتة في هالشهر ..

نشوف الاشياء اللي خلصتها هالشهر ، شوي بس الحمدلله راضية عن انجازي 

...

الميك اب : 

- كحل ممتاز ضد الماي من ماركة باري ام موجودة في صيدلية بوتس ، صراحة القلم ممتاااز وانصح فيه احبه لداخل وخارج العين . 

- ايلاينر قلتر من H&M ، عادي واحس انه نشف بسرعه . 

- ماسكرا من توفيسد ، كلش ماحبيتها ابدا ابدا ، ناشفة شوي وتتكل ، وبعد فترة تشوفين اشياء تحت العين .

...

كريمات واشياء للعناية : 

- سامبل من carita من علبة قلام بوكس ، عادي ماشفت اي شي منه استخدمته مرتين .

- سامبل من بايودريما المجموعة الجديدة اللي باللون الازرق ، هالمجموعة ممتازة للبشرة الجافة 

هالكريم خاص للنهار لانه فيه حماية من الشمس ، رائع بصراحة حبيته جدا ، وتكلمت عنه كذا مره بالسناب .

- العشق مرطب للشفايف من Sebamed ، رائع رائع رائع ممتاز للشفايف خصوصي اذا كانت ناشفة شوي .

- زيت ارغان بالورد ، كان بعلبة قلام بوكس ، هو للوجة بس ماحبيت استخدمة لوجهي ، استخدمته للرقبة والشعر شوي 

حبيته للرقبة ، ترطيب حلو ولا يدبق ابدا .. وريحته حلوه .

- سكراب للجسم من skin therapy ، عادي جدا جدا جدا اصلا ماتحسين بالتقشير ابدا ابدا ، خلصته واكييييد ماراح اشتري منه .

...

- سامبل من بايودريما ، كريم واقي من الشمس ، ماحبيته بصراحة يخلي الوجة ابيض وبعد فترة يقلب رمادي ، ماحبيته .

- كريم للوجة ثقيل شوي من المجموعة الجديدة من بايودريما هالمجموعة ممتازة جدا ، وهالكريم حبيته جدا اللي بشرتها جافة هالمجموعة حلوه .

- زيت للوجة من كودالي من مجموعة المضادة للتجاعيد ، ماناسبني لانه طلع لي حبوب ببشرتي ، مع انه فيه وايد ناسبهم وحبوه بس انا للاسف ماناسبني ، بس صرت استخدمة لجسمي مع اي كريم للجسم .

...

- كريمين لليدين من ذا فيس شوب ، ترطيبهم عادي وخفيف واصلا ماحبيتهم لليدين واستخدمتهم لجسمي ، ماراح اشتري منهم مره ثانية .

- الكريم اللي احبه من دوف ، ريحته بس شي خياااااالي نظافة ياليت لو يسسون عطر منه ، عادي اتسبح فيه من جماله ، كترطيب خفيف والبشرة تتشربة بسرعة . 

- ثاني سيروم من كودالي مضاد للتجاعيد هذا كانت لاختي ولا حبته ، كان للنص تقريبا وانا كملته بس عادي ماشفت شي مع انه ثاني علبة اخلصها منه .

- وخلصت شمعة ريحتها ناعمة وهادية جدا ..

...

- مقشر للقدم من Pedi Peel ، اول مره اجرب مقشر للقدم بس حبيييييت النتيجة جدا جدا ، انا حطيته يوم الجمعة و بددت تتقشر بعد ٥ ايام تقريبا ، بس نتيجة ولا اروع .. حبيييت ..

- ماسك للشفايف من Dermal ، شكله حلو كانها شفايف بس كبيررررة كانها قطعة سيلكون ، تحطينه على الشفايف لمدة ٢٠ دقيقة .. نتيجة حلوه والله رطب لي الشفايف ولانها قطعة شوي كبيرة رطب لي المنطقة اللي حوالي الشفايف بعد .

- ماسك من اولاي ، والله حلو نعومة وترطيب وفتح لي بشرتي شوي ، كنت مستخدمته من قبل كان عادي بس هالمره اعجبتني النتيجة .. 

- غسول للبشرة من ذا فيس شوب ، عادي بصراحة .

...

سامبلززز : 

- كريم مرطب للبششرة الجافة من كلارنس ، حبيت هالمرطب جدا ، يرطب بشكل حلو ولا يدهن البشرة او انه يكون ثقيل بشكل مزعج ، عجبني وعندي من حجم وسط وبعد سامبلز .. 

- دبل سيروم من كلارنس ، صح سامبل ولا شفت اي نتيجة ، لكن ملمسة ناعم جدا على البشرة حبيت الشعور اللي يعطيني اياه بعد الاستخدام .

- غسول فوم مع كلينك هذا عطتني منه مجموعة يوم شريت جهاز تنظيف البشرة من عندهم ، وممتاز مع الجهاز ، حبيت الاثنين مع بعض كمية صغيرة منه ترغي وتنظف الوجة .. عجبني جدا .. 

- شاور كريم من سيفورا ، حبيته وهذا اخر واحد منهم للاسف ، بس ماعليه استمتعت فيهم وانا استخدمهم .

- كريم من KLAPP , ترطيب حلو وناعم انا استخدمته للرقبة ..

- شاور ومقشر ناعم للبشرة من المنس ، ناعم وخفيف على الجسم ، وريحته تهبل .

- غسول منظف للبشرة من ديرما اي للبشرة الجافة ، حلو وناعم على البشرة ولا يهيجها ابدا ، عجبني .

- جل واقي للشمس من ذا فيس شوب حبيت انه جل مو كريم عشان مايعطيني لون ابيض على الوجة .

...

العطور : كلها سامبلز 

- عطر ياردلي روز ، حلو مع انه روز بس حلو كسامبل بس ماافكر اشتريه 

- عطر من كودالي ، عادي بصراحة .

- الجمال اللي بالوسط حبيتهم بصراحة ، بس ماادري من وين ممكن اشتريهم ، ببحث عنهم .

- عطرين من الرصاصي ، نوعين جدد منهم كلهم بالمسك طبعا ، بس حبيت واحد اكثر من الثاني ، بس نسيت اي واحد 

دخل مزاجي . 

...

وبس هذا كل اللي خلصته هالشهر ، وان شاء الله شهر يناير يكون شي اجمل نحقق فيه لو جزء بسيط من احلامنا

وآمالنا .. 

مافيه شي صعب ب هالحياة احنا نستصعب الامور ، لكن التخطيط السليم يساعدك على الانجاز .

مشتريات || ميك اب ملابس واكسسوارات

السلام عليكم

لاتنسي الاشتراك بالمدونة

..

من زمان عن مواضيع المشتريات ، هو المفروض مااشتري وايد بس فيه اشياء خلصت وابيها

وفيه اشياء يعني امممم شريتها ، مااحد يقدر يمسك نفسه

اول محل هو محل انوتا ، جميل جدا هالمحل فيه قطع حلووه حيل عن نفسي احبه واشتري منه دايما ، عنده فساتين حلوه

وبلايز وقمصان حلوه بسيطه وانيقه ، وعندهم لبس يناسب المحجبات وينفعون في السفر ...

اخذت هالبلوزه طويله وساده مافيها اي شي اخذتها باللون الاصفر وهذا شكلها على العارضه اللي بالوسط

تجي قصيره من قدام وطويله من ورا اخذته بالتخفيض ب ١٣٥ درهم ..

...

بعدها دخلت فيرا مودا ، لقيت عندهم قميصين حلوين ، انا احب هالنوعيه اي شي فيه دانتيل اضييييع عنده

الاول كحلي مع دانتيل اسود ، ومن ورا كله القماش مكسر صراحه مااعرف اشرح بس ان شاء الله واضح

والثاني بيبي بنك ، من فوق كله دانتيل او جوبير ويوصل للكتف والايد ، عجبني وجميل باللبس

واسعارهم ب ٧٩ درهم للواحد 

..

من فور ايفر ٢١ احب هالمحل جدا اخذ منه بلايز وقمصان واكسسوارات ..

قميص بيج ، ماعندي قمصان وايد ف اخذت لي ٢ منهم

مالقيت له صوره بالموقع ، سعره بعد التخفيض ب ٧٠ درهم 

سعره بعد التخفيض ب ٧٠ درهم 

وهذي بلوزه شكل ومن الخلف غير ، قطن ابيض .. حبيتها باررده ،سعرها بعد التخفيض ب ٦٠ درهم 

...

الحين عند الحب ، احب محل جوسي كتور ، اعشق اكسسوارتهم

اخذت لي تعليقه او تشارم لاسواره عندي منهم ، وبركبها عليها ، احب الفيونكه ، ب ٨٣ درهم بعد التخفيض 

تابع حبي للفيونكه ، اسواره روز قولد والخيط ابيض ، احب هالنوع من الاساور انيقه، ب ٥٩ درهم بعد التخفيض 

...

الحين الميك اب والعناية 

كاني اجرمت شوي ، بس حطيت كل شي شريته على فترات متباعدة

اول شي مجموعة جميلة من كلارنس اخذتها من مطار دبي ، دايما اشوفها وبخاطري اخذها عشان اجرب كذا منتج من عندهم ، ودايما اسمع انه ماركه ممتازه في لاين العناية ، اذا جربت شي منهم اكيد بكتب عنه .. 

ب ٢١٨ درهم 

..

مناديل نايتروجينا من افضل المناديل لازاله الميك اب ، ماادري كم مره شريتهم ، و مزيل الميك اب من نيفيا 

انا على بالي شريته بس تذكرت انه جاني بعلبه قلام بوكس 

الكيس الاحمر من نيل ستيشن اخذته من عندهم كنت اسوي اظافري عندهم وحبيت هالكيس فيه مبرد القدم + فرشة لتنظيف

الاظافر اخذها معاي كل مارحت لهم ب ٢٥ درهم 

عدساتي من جونسن اند جونسن كل مره يرفعون السعر ، صار لي سنين استخدمها ومرتاحه عليها ولا غيروا فيها شي 

ليش ارتفاع الاسعار هذا ... عندي احساس بعد فتره بتوصل ل ٢٠٠ درهم للعلبة هذي 

واكس للتقويم ، اي وحده مركبه تقويم لازم يكون عندها هالاختراع العجيب 

ملقط عجبني انه بعلبة صغيره من دايسو ب ٧ دراهم 

وماسكات من بيزلين الواحد ب ٩ ريال 

اخر مره يوم كنت بالسعوديه دخلت  محل الشايع للعطور في ابن خلدون بالدمام  واخذت شغلتين منهم 

اخذت خلطة سكون لتعطير الملابس والغرف ، ريحه شي فرش ونظافه صراحه احترت من كثر المخلطات اللي عندهم 

هالعلبه ب ٢٦ ريال و٥٠٠ ميلي ، كبيره ورخيصه ..

واخذت عطر دانتيل ، جميل جميل جميل هو عطر ف ثباته قوي ، ممكن استخدامه كعطر عادي او معطر للملابس والغرف

هذا اغلى لانه عطر ب ٨٦ ريال 

المحل فيه اشياء حلوه ومتنوعه طلوا عليه 

اخذت الشامبو الجاف من دوف الاخضر محارب للدهون والوردي لكثافه اكثر 

سبريه للشعر من بوتس ب ٦ دراهم 

كريم للشعر من غارنييه ب شي ٢٠ درهم  سويت عنه ريفيو هنااا

علبة رش عجبتني من دايسو ب ٧ دراهم 

لوشن مرطب من سيتافيل هالماركه رائعه ب ٥٦ درهم 

زبدة الجسم بالشيا من بودي شوب هالحجم الاكبر ماينزل الا مره بالسنه حسب كلامهم ب ١٥٠ درهم 

زيت مضاد للسيلوليت من VLCC اول مره اخذ شي من عندهم بس حبيت اجربه 

واخر شي فيوسدين من يستغنى عنه 

...

اخر جزء هو الميك اب ... 

بودره البنانا من بن ناي ب ١٠٤ درهم 

كحل ذابالم نسيت سعره 

باليت بلشر من ايلف 

ورموش من هاوس اوف لاشز 

...

كريم اساس من برجوا هلثي مكس ب ٧١ درهم 

كريم اساس من دولشي اند غبانا ب ٢٩٥ درهم 

كونسيلر من دولتشي اند غبانا ب ١٨٥ درهم 

...

وهذي كل مشترياتي الفتره اللي راحت