مشترياتي من السوق الحره

السلام عليكم 

مشترياتي البسيطه من السوق الحره في دبي 

اخذت ٣ علب ونشوفهم سوا 

...

...

هالمره مااخذت ولا شي من المكياج او العطور لانه عندي اكتفاء لحد الشبع 

وناويه اخلص الاشياء اللي عندي قبل مااشتري شي جديد

وصارت مشترياتي كلهم عنايه بالوجه والجسم 

..

كريم اليدين من لوكستيان مين فينا مايحبه ويعشقه ، شفت هالعلبه وعجبني انها متنوعه 

فيها ٦ كريمات من كل نوع ٢ 

وبقسمه علي وعلى امي واختي بحيث كل وحده تاخذ ٢ 

النوع الاول اللي بالشيا وهذا احلاهم مرطب من قلب اعشقه 

النوع الثاني ب اللافندر واول مره اخذه بس جدا عجبني اخف من الشيا بس مرطب 

والنوع الثالث جل مو كريم ثقيل زي الشيا ، خفيف وبسرعه تتشربه البشره وهذا مناسب اللي مايحبون شي ثقيل 

للايد بس روعه ومرطب 

وهذي العلب من بره لكل كريم للي حاب يشتري اي نوع من بره 

...

وبعد من لوكستيان هالعلبه الجميله 

فيها كرريم للايد المشهور اللي بزبده الشيا مع كريم للقدم 

كريم اليدين احبه وعندي منه وحبيت اخذ زياده لاني اللي عندي باقي فيه شوي ويخلص 

اما كريم القدم اخذته بعد مدح اختي عليه انه روعه ومرطب وهي بشرتها جافه جدا 

وممتاز معاها فقررت اجربه وفرصه دام انهم بعلبه وحده 

السعر على حسب مااذكر انه اقل من ١٥٠ درهم وكان  يومها فيه خصم ٢٠ ٪ على كل منتجات التجميل 

فطلع باقل  بس مااذكر بصراحه كم 

..

واخذت هالعلبه الجميله من لوريال 

كثير شفت مدح على هالسيروم من رويال انه يحسن البشره ويصفيها 

فقررت اجربه لاني ماشفته عندنا بالاسواق وشفته بالسوق الحره ، وفيه علبه له بروحهاو وفيه عرض

يكون مع كريم للوجه ، واخذت هالعرض 

اذا استخدمته اكيد بكتب عنه ريفيو 

وسعره ب ١٣٠ درهم 

وبس هذي كل مشترياتي 

..

مفضلاتي العشوائيه لشهر فبراير

السلام عليكم 

من يومين لاحظت اني ولا مره كتبت عن اي شي مفضل عندي في الشهر اللي راح 

وقررت هالمره ابدا بمفضلات عشوائيه بعيده عن الميك اب هالمره 

وبحاول اسوي كل شهر اذا حبيت شي جديد وبغيت اشاركم فيه 

..

انا اقدس الوقت الخاص بالقهوه ، واعشق الشوكلاته الغامقه 

وهالمره اختياري لنوع من القهوه من شركه نسكافيه هالنوع غير ومميز وحبيته بكل صراحه 

ونوع التحميص وسط وتعتبر قويه ، واشرب كوب واحد في اليوم 

لانها تسهرني 

واحب اكل معاها هالتشوكلت بار الرائع شوكلاته غامقه وفيها قطع كامله من البندق 

واعشق البندق بكل حالاته وباي شي يدخل فيه 

اممممممم لذه وطعم رائع 

...

نجي للمنتجات العنايه 

مزيل وتونر للميك اب من لوريال وتكلمت عنه فيه تدوينه سابقه تقدرون تشوفونها 

احبه اشيل فيه الميك اب او استخدمه كتونر ممتاز جدا ، وتقريبا باقي ربع العلبه ويخلص ، وللاسف مالقيته في دبي 

الا في المطار فممكن بالسفر الجايه اجيب منه . 

- كريم لليد بالشيا من باث اند بودي اعشق هالكريم وهالريحه " توايلات وود "" هالريحه هي المفضله عندي من باث اند بودي ، والكريم ناعم واحسه مخملي على اليد ، واحطه قريب مني كل ماذكرت حطيته على يدي .

- بايو اويل ، هو زيت مفيد في تخفيف الخطوط البيضا بالجسم ، مااقول انه يمحيها لا بس يخفف منها ومن بروزها ،

عن نفسي احبه واستخدمه بعد اي شور اكون مستخدمه فيه مقشر ، لاني اقشر المكان اللي فيه الخطوط البيضا واول مااطلع من الشور ادهن المكان بالزيت هذا ، وفعلا خفف لي من بروز الخطوط ، وراضيه عن النتيجه . 

- خيط الاسنان جربت كذا نوع وماحبيتهم حبيت هالنوع ناعم وسلس ومايعور او يجرح لانه لثتي وللاسف شوي ضعيفه

وهذا اللي نصحني فيه طبيب الاسنان . 

- قطرات العيون ، هالشي اللي مستحيل يفارقني لاني البس عدسات طبيه شبه يومي ، ومااحب اطلع بالنظاره ف اغلب الوقت اذا انا بره اكون لابسه عدسات ، والعين طبعا تتعب ، بس هالقطرات مريحه وتريح العين ، انصح كل بنت تلبس عدسات فيها . 

- عطر من باث اند بودي اسمه عنبر بلش ، ريحته رائعه حبيتها وتكلمت عنه في تدوينه مشترياتي من باث اند بودي 

رائع جدا و،حبيت حجمه صغير ورش ويبقى لوقت لابأس فيه .

- زيت للاظافر والجلد اللي حولها ، شاريته من فتره قصيره بس حبيته ريحته خوخ بس حلوه ، وبسرعه الجلد يتشربه 

وتقريبا يوميا احطه على اظافر ايدي ورجولي عشان احمي الجلد ، لانه الجلد اللي حوالين الاظافر متعبني وحساس جدا 

وهذا الحمدلله ناسبني . 

- مسك من عبدالصمد القرشي ، شقول وشخلي ، هذا العشق الابدي واللي مستحيل يتغيرر ، ريحته اناقه و نعومه و نظافه و كل شي جميل ، احب احطه بعد الشور خيال وريحته ثابته لوقت طوييييل ، اللي ماحربته تجربته واكيد اكيدد بتحبه لانه روعه ، وجربت كذا نوع ومن كذا محل هذا احلاهم . 

...

وهذي هي كل مفضلاتي لهالشهر ، وان شاء الله بحاول كل شهر احط لكم كل شي حبيته واستمتعت فيه .