مشترياتي من موقع لوكستيان الالكتروني للمره الثانية

السلام عليكم 

الجمال الباريسي والحب لوكستيان ، احب هالمحل جدا جدا جدا ، راقي بكل شي صراحة 

ومااذكر اني جربت منتج ولا عجبني .. كنت كاتبة من قبل موضوع عن محلهم الالكتروني واللي سهل علينا واااايد 

خصوصي انج تشوفين كل منتج ووصفة وسعره جدامج وتشترين اللي تبينه .. 

وفيه بعض العروض بس موجودة حصريا في موقعهم الالكتروني .. وصراحة اشجعهم تشترون منه ..

هذا موضوع المشتريات .. تقريبا خلصت كل شي شريته اما كريمات اليدين ماكانوا لي ، بس حلوين وعندي حاليا منهم مجموعة جميلة ومتنوعة .. 

اخذت اشياء اغلبها من العروض ..  ابي اجرب منتجات جديدة علي ،  اعرف اذا راح تعجبني او لا .. واذا اعجبتني اكييد راح اشتري الحجم الاكبر  ..

احلى شي فيه العروض انها تكون فيه شنطة صغيرة ، وانا احب هالشنط استفيد منها وايد .. 

...

اول شنطة اخترتها هالجميلة اللي بالصورة ترى تشيل وحجمها حلو .. 

- كريم وشور جل للجسم بالورد ، الريحة جدا حلوه مع اني شحصيا مو من محبين الورد في روايح العطور او منتجات العناية بالبشرة والجسم .. بس ريحة الورد عندهم جميلة جدا وناعمه وابدا مو مزعجة .. 

- كريم اليدين المشهور هذا الشكل ب اصدار محدود حبيته جدا .. وطبعا كريمات اليدين عندهم اشهر من نار على علم وانا ابدا مااستتغني عنهم .. واحد في الشنطة وواحد على المكتب والاخير قريب مني ل قبل النوم .. 

- عينة صغيرة من عطر fleurs-de-cerisier ، عجبني بصراحة وهذا الاصدار الجديد من العطر ناعم وخفيف مناسب للصيف وللصباح .

..

شوفوا الشنطة حبيتها خصوصي السحاب مكانه غير عن كل مره .. 

اخترت هالمجموعة اللي كل مره ادخل المحل واشتري اللي احتاجة وارش من العطر وعلى اساس اني باخذ شي من هالمجموعة ولا اخذ .. مااعرف ليش .. بس حلو انهم مجموعة واجربهم 

مجموعة النيرولي المذهلة

المجموعة ريحتها جدا جدا حلوووووه بدون اي مبالغة اللي يحب هالروايح .. شي اكيد اكيد برجع اخذ الاحجام الكبيرة ، الريحة ناعمه وراقية ، الريحة هذي تستاهل " شور دلع وبعدها بجاما جديدة " شعور لا يوصف صراحة ..  اللي جوها مثلي تروح تاخذ هالمجموعة .. 

- كريم الايدين قوامة اخف من كريم الشيا لانها نسبة الشيا اخف ، ف اللي تحب كريمات اليدين الخفيفة هذا جدا حلو .

- كريم للجسم ، وعينة صغيرة من العطر .. 

حبيت انهم في الفترة الاخيرة انهم صاروا يكتوب بالعربي ، لانه وايد كانوا يقولون ليش مافيه بالعربي .. 

..

هالعلبة العجيبة الغريبة ، كرة وفيها ٤ منتجات من مجموعة وحدة 

مجموعة Verbena Bauble

ريحتها ليمون ، اللي يحب هالريحة راح يحب المجموعة ، الريحة فرش ومنعشة جدا وانا تعجبني هالمجموعة 

لانها حلوه وتنعش خصوصي هالفترة مع بداية الصيف ..

- شور جل - كريم للجسم - كريم لليد  " كلهم جريتهم من قبل وحلوين " 

- صابونة للجسم ، صراحة اول مره بجربها واكيد بقول لكم رائي فيها .. بس بشكل عام احب صوابينهم ..

...

Shea Nail & Cuticle Nourishing Oil

زيت الاظافر ، جدا جدا جدا معروف ومشهور ، بس دايما يكون مخلص من المحل .. بجربة واكيد بكتب رايي في كل المنتجات الجديدة علي  .. بس وايد يمدحون هالزيت .. 

...

مرطب للشفايف بالورد ، فيه زبدة الشيا ١٠ بالمية ، كمية كبيرة .. 

...

كريم لليدين بالشيا ، نفس اللي كان في الشنطة الاولى ، ترى احب كريماتهم .. فعادي يكون عندي وايد منهم .. وحبيت الرسمه اللي عليه .. 

...

ومع كل طلب من الموقع تختارين ٣ انواع من العينات وهم ساعات يحطون لك زيادة .. 

الشامبو اللي فيه العينة جدا جميييل .. 

و الحلو في الموقع انه مع كل طلب فوق ال ٢٩٩ درهم يعطونك هدية .. اداة التدليك .. ممتازة صراحة انا عندي من الطلب الاول وشي حلو بعد انها وصلتني مره ثانية .. حلوه جدا مع زيت اللوز الخاص بالجسم من لوكستيان طبعا .. 

وهذي كل مشترياتي من الحب لوكستيان .. طريقة الطلب جدا سهله وماتحتاج اي شرح .. تسجلون وبعدها توصلهم رسالة تفعيل .. وتدخلون الموقع وتطلبون كل اللي بخاطركم .. وراح يوصلكم ايميل بتفاصيل الطلب مع رقم تتبع الشحنة من ارامكس 

موقع لوكستيان الالكتروني

مشترياتي من موقع لوكستيان الالكتروني

مشترياتي من موقع لوكستيان الالكتروني

السلام عليكم 

اجمل شي في وقتنا الحالي هو التسوق عن طريق الانترنت ، اسهلها طبعا المواقع اللي توفر خدمة الدفع عند الاستلام،

انا كتبت موضوع كامل وحطيت فيه اغلب المواقع المشهورة اللي تقدم هالخدمة ممكن تشوفونه ،

احد هالمواقع هو لماركتي الجميلة لوكستيان ، الموقع مرتب ومفصل تفصيل جميييل كانك تتسوقين منهم بنفسك ،

حبيت هالشي جدا ، اشتركت فيه وقررت اطلب كم شغله ، واجرب خدمتهم ..

طريقة الاشتراك سهله جدا جدا ، والموقع بالعربي وبالانجليزي فسهل جدا ولا يحتاج اي شرح .. 

الحلو بالموقع انه كل شي موجود مستحيل تلاقين شي غير متوفر ، وغير هالشي انه فيه عروض حصرية بس للموقع

وانصحك بالاول ادخلي مكان العرض وشوفي اللي يناسبك واخذية ، لانه ساعات تلاقين افكار حلوه وتصلح لهدايا ،

او ممكن تكون باحجام صغيرة وتقدرين تجربين اكثر من ريحه هالشي حلو خصوصي لو انك تملين بسرعه من الروايح ..

طلبت من الموقع واخترت اللي ابيه ، وعندهم عرض انك اذا شريتي ب ٢٤٩ درهم يكون التوصيل مجانا ، لانهم ياخذون على التوصيل ٢٥ درهم لشركة التوصيل اللي هي ارامكس .. 

والعرض الثاني انه اذا شريتي ب ٢٩٩ تحصلين على هدية ثانية نشوفها تحت باذن الله .. 

...

انا اخترت انه الاغراض توصل لي بعلبة ، وهذا احد الخيارات اللي تحتارينا وقت الطلب .. حبيت هالفكرة جدا 

العلبة والوانها تفتح النفس ، نشوف محتوياتها 

مع كل طلب ، يرسلون لك كود خصم ب ١٠ بالمية ل الطلب القادم .. 

مرتبة جدا جدا و تنفع لهدية ، وعندهم خدمة انك ترسليها هدية وتكتبين اي عباره انتي تبيها ، و فيه خيار انك تشيلين السعر عشان مايبين .. احب الناس اللي تفكر بكل شي .. 

..

طلبت علبة فيها صابون ب ٣ روايح مختلفة ، لي واختي ، وبعد اخذت صابونة اللوز ، اذكر من زماااان جربتها وحلوه ..

ومرطب للشفايف .. 

...

واخذت من هالعرض الحلو ٣ علب ، عجبني جدا العرض وسعره روعه ب ٥٤ درهم ، فيه ٤ كريمات لليد ..

حجم الكريم ١٠ مل 

وهذي مقارنة بالاحجام ، الاول ١٠ مل هو اللي بالعلبة ، الثاني ٣٠ مل و الاخير ٧٥ مل . 

الاول والثاني ممتازين للشنطة .. 

...

وفيه الاخير الهدايا اللي حاطينها ب هالشي الجميل 

حتى الكرت كاتبين عليه بخط اليد .. 

..

هدية ال ٢٩٩ درهم هي فرشة المساج للجسم ، والباقي سامبلز للتجربة ، مع كل طلب يحق لك ٣ سامبلز انتي تختارينهم ..

شي حلو منهم ، عشان الواحد يجرب وبعدها يشرتي اللي يعجبه .. 

الفاتورة توصلك بهذا الشكل كل الطلبات بالعدد و فاتورة المحل الاصلية ، واذا تبين تبدلين اي شي تاخذين الفاتورة للمحل مع الاغراض واستبدلي الاغراض .. 

انا طلبت يوم ١٧ - ١٠ ، الساعة ١ وربع ، ووصل لي الطلب بتاريخ ١٨ -١٠ ، وقبل الساعه ١٢ الظهر .. 

يعني اقل من ٢٤ ساعة شي ممتااااااااز جدا ، طبعا وصل لي الطلب مع شركة ارامكس .. 

انصح بالطلب من الموقع ، من احلى المواقع اللي طلبت منها ترتيب ونظام وسرعة في الطلبات ، ممتازييين جدا جدا .. 

موقع لوكستيان الالكتروني

مشترياتي من باث اند بودي

السلام عليكم

في فترة التنزيلات اللي راحت اخذت من باث اند بودي شموع ، وماشريت لوشن وغيرهم لانه عندي كثير 

وانا خلصت كل الشموع اللي عندي ، ف هدفي كان على الشموع وهالمره فيه اشياء جميلة والاسعار اجمل بصراحة 

وانا احب اخذ الشموع بالتنزيلات لانه تكون ب نص او ربع السعر الاصلي ، كل الشموع الكبيرة ب ٩٠ درهم 

من اليمين :

Honeysuckle Bouquet ، بوكية زهر العسل ،  اول شمعة استخدمتها ووجدا حبيتها ريححتها احلى بوايد يوم تشعلينها ، قد جربت هالريحة من عندهم بس لوشن وزبدة للجسم ، صراحة مااستحملت الريحة على جسمي ابدا ، قوية بزيادة ، بس الشمعة حلوه قوية وتعطر الغرفة .

اخذتها ب ٤٥ درهم 

Leaves ، الاوراق ،  من احلى الشموع اللي احبها في باث اند بودي مااعرف شلون اوصف ريحتها بس ، قوية وفيها ريحة القرفة ، بس بشكل حلو ، والريحة راقية ، انا عن نفسي اعشقهاااا .

اخذتها ب ٤٥ درهم 

Fresh ، ريحتها على اسمها ، فرررررش من الشموع اللي تغير لك مزاجك ، حلوه ، اخذتها ب ٣٠ درهم 

Brazilian Blue Waters ،مياة زرقاء برازيلية ، حبييييت ريحتها ريحة شي منعش ونظيف 

اخذتها ب ٢٠ درهم .

Dream Big ، رائعة رائعة رائعة ، ريحة اللافندر الهادية ، صراحة ريحة مريحة جدا ، حبييييتتها جدا وانصحكم فيها 

اخذتها ب ٣٠ درهم .

Red Forever ، شمعة بريحة عطرهم الاحمر ، العطر جميييل جدا ويعجبني ، اخذت شمعة منه ، وريحتها نفس العطر بالضبط ، اغراني السعر بصراحة ، كانت ب ١٠٥ وصارت ب ٢٠ درهم بس . 

Rainforest Gardenia ، اللي يحب ريحة الغاردينيا بيحب هالشمعة ، ريحة الغاردينيا مع ريحة مطر ، ريحة حلوووه بصراحة .  اخذتها ب ١٥ درهم .

وبس هذي كانت كل مشترياتي . 

مشتريات || ميك اب ملابس واكسسوارات

السلام عليكم

لاتنسي الاشتراك بالمدونة

..

من زمان عن مواضيع المشتريات ، هو المفروض مااشتري وايد بس فيه اشياء خلصت وابيها

وفيه اشياء يعني امممم شريتها ، مااحد يقدر يمسك نفسه

اول محل هو محل انوتا ، جميل جدا هالمحل فيه قطع حلووه حيل عن نفسي احبه واشتري منه دايما ، عنده فساتين حلوه

وبلايز وقمصان حلوه بسيطه وانيقه ، وعندهم لبس يناسب المحجبات وينفعون في السفر ...

اخذت هالبلوزه طويله وساده مافيها اي شي اخذتها باللون الاصفر وهذا شكلها على العارضه اللي بالوسط

تجي قصيره من قدام وطويله من ورا اخذته بالتخفيض ب ١٣٥ درهم ..

...

بعدها دخلت فيرا مودا ، لقيت عندهم قميصين حلوين ، انا احب هالنوعيه اي شي فيه دانتيل اضييييع عنده

الاول كحلي مع دانتيل اسود ، ومن ورا كله القماش مكسر صراحه مااعرف اشرح بس ان شاء الله واضح

والثاني بيبي بنك ، من فوق كله دانتيل او جوبير ويوصل للكتف والايد ، عجبني وجميل باللبس

واسعارهم ب ٧٩ درهم للواحد 

..

من فور ايفر ٢١ احب هالمحل جدا اخذ منه بلايز وقمصان واكسسوارات ..

قميص بيج ، ماعندي قمصان وايد ف اخذت لي ٢ منهم

مالقيت له صوره بالموقع ، سعره بعد التخفيض ب ٧٠ درهم 

سعره بعد التخفيض ب ٧٠ درهم 

وهذي بلوزه شكل ومن الخلف غير ، قطن ابيض .. حبيتها باررده ،سعرها بعد التخفيض ب ٦٠ درهم 

...

الحين عند الحب ، احب محل جوسي كتور ، اعشق اكسسوارتهم

اخذت لي تعليقه او تشارم لاسواره عندي منهم ، وبركبها عليها ، احب الفيونكه ، ب ٨٣ درهم بعد التخفيض 

تابع حبي للفيونكه ، اسواره روز قولد والخيط ابيض ، احب هالنوع من الاساور انيقه، ب ٥٩ درهم بعد التخفيض 

...

الحين الميك اب والعناية 

كاني اجرمت شوي ، بس حطيت كل شي شريته على فترات متباعدة

اول شي مجموعة جميلة من كلارنس اخذتها من مطار دبي ، دايما اشوفها وبخاطري اخذها عشان اجرب كذا منتج من عندهم ، ودايما اسمع انه ماركه ممتازه في لاين العناية ، اذا جربت شي منهم اكيد بكتب عنه .. 

ب ٢١٨ درهم 

..

مناديل نايتروجينا من افضل المناديل لازاله الميك اب ، ماادري كم مره شريتهم ، و مزيل الميك اب من نيفيا 

انا على بالي شريته بس تذكرت انه جاني بعلبه قلام بوكس 

الكيس الاحمر من نيل ستيشن اخذته من عندهم كنت اسوي اظافري عندهم وحبيت هالكيس فيه مبرد القدم + فرشة لتنظيف

الاظافر اخذها معاي كل مارحت لهم ب ٢٥ درهم 

عدساتي من جونسن اند جونسن كل مره يرفعون السعر ، صار لي سنين استخدمها ومرتاحه عليها ولا غيروا فيها شي 

ليش ارتفاع الاسعار هذا ... عندي احساس بعد فتره بتوصل ل ٢٠٠ درهم للعلبة هذي 

واكس للتقويم ، اي وحده مركبه تقويم لازم يكون عندها هالاختراع العجيب 

ملقط عجبني انه بعلبة صغيره من دايسو ب ٧ دراهم 

وماسكات من بيزلين الواحد ب ٩ ريال 

اخر مره يوم كنت بالسعوديه دخلت  محل الشايع للعطور في ابن خلدون بالدمام  واخذت شغلتين منهم 

اخذت خلطة سكون لتعطير الملابس والغرف ، ريحه شي فرش ونظافه صراحه احترت من كثر المخلطات اللي عندهم 

هالعلبه ب ٢٦ ريال و٥٠٠ ميلي ، كبيره ورخيصه ..

واخذت عطر دانتيل ، جميل جميل جميل هو عطر ف ثباته قوي ، ممكن استخدامه كعطر عادي او معطر للملابس والغرف

هذا اغلى لانه عطر ب ٨٦ ريال 

المحل فيه اشياء حلوه ومتنوعه طلوا عليه 

اخذت الشامبو الجاف من دوف الاخضر محارب للدهون والوردي لكثافه اكثر 

سبريه للشعر من بوتس ب ٦ دراهم 

كريم للشعر من غارنييه ب شي ٢٠ درهم  سويت عنه ريفيو هنااا

علبة رش عجبتني من دايسو ب ٧ دراهم 

لوشن مرطب من سيتافيل هالماركه رائعه ب ٥٦ درهم 

زبدة الجسم بالشيا من بودي شوب هالحجم الاكبر ماينزل الا مره بالسنه حسب كلامهم ب ١٥٠ درهم 

زيت مضاد للسيلوليت من VLCC اول مره اخذ شي من عندهم بس حبيت اجربه 

واخر شي فيوسدين من يستغنى عنه 

...

اخر جزء هو الميك اب ... 

بودره البنانا من بن ناي ب ١٠٤ درهم 

كحل ذابالم نسيت سعره 

باليت بلشر من ايلف 

ورموش من هاوس اوف لاشز 

...

كريم اساس من برجوا هلثي مكس ب ٧١ درهم 

كريم اساس من دولشي اند غبانا ب ٢٩٥ درهم 

كونسيلر من دولتشي اند غبانا ب ١٨٥ درهم 

...

وهذي كل مشترياتي الفتره اللي راحت