عطوري من باث اند بودي وركس

السلام عليكم 

مسائكم عطر يحبه قلبكم ، مثل ماقلت لكم انه كل يوم اثنين راح اكتب عن عطر معين 

وهالمره قلت بكتب عن عطور باث اند بودي ووركس 

عندي ٣ عطور منهم حاليا ، وجربت منهم اكثر 

حابه اتكلم عن الشكل ، شكل العلبه انيق جدا وكلهم بنفس الحجم ، فيه انواع جديده الحين اشكالها غير بس الشكل المتعارف فيه نفس اللي بالصوره ، اول واحد على اليمين هذا الشكل القديم ، اما الجديد يكون فيه رسمه وشكل وجدا احلى من القديم لانه بس كتابه .

كل عطورهم فيه منها كريم للجسم - لوشن للجسم - زبده للجسم - شاور جل - عطر بخاخ للجسم - مقشر للجسم بالاضافه الى عطورهم .

اسعار عطورهم ١٢٠ درهم والسعر موحد الا اذا شي حصري لفتره او عطر باصدار خاص .

...

Blushing Cherry Blossom

اللي يحب عطر تشيري بلوسم ، راح يحب هذا العطر لانه نفسه بس اخف شوي و حمضي شوي .. 

عطر خفيف وحلو ناااااعم جدا ، ممتاز للصباح والدوامات اللي ماتحب شي ثقيل .. 

النوتات العلوية : شمام - سفرجل - يوسف افندي 

الوسطى :  ياسمين - روز دمشقي - روز 

القاعدة : مسك - عنبر - صندل - ورد البنفسج 

....

I Love You 

عطر خفيف وتغلب عليه رائحة الورد ، حبيت اخذ شي مختلف عن ذوقي ، خصوصي اني مااحب العطور اللي تكون ورد بس

النوتات العلوية : حمضيات - ليتشي - زهرة الفاونيا 

الوسطى : ياسمين - الروز - الاوركيد - ليلي " كلها ورد "

القاعدة : مسك - عنبر - صندل- باتشولي 

النوتات اللي موجودين في قاعدة العطر ذوقي تمااااما ، بس ابدا مااشمهم في العطر يمكن المسك شوي 

اما الغالب عليه ريحة الورد .. 

ف بالنسبة لي عادي جدا وماافكر ارجع اشترية ، حاولت احبه بس للاسف ، بس محبين الورد راح يعجبهم .

ثبات العطر ، خفيف الى متوسط 

...

Paris Amour

عالعطر حلو ، شوي سويت بس ناعم ، تقدرين تحطينه باي وقت عجبني جدا ، وباقي لي فيه النص تقريبا 

النوتات العلوية : فراولة - شامبين - يوسف افندي - 

الوسطى : ياسمين - خوخ - التوليب الاحمر 

القاعدة : مسك - صندل - عنبر -فانيلا- جوز هند 

العطر خليط بين الفاكهه و الورد ، مو عارفة اوصفه زين بس عطر الاغلبية حبته او انها ممكن تستعملة ..

هذا ممكن ارجع اشترية .. 

وثباته حلو ، تقريبا من ٣ الى ٤ ساعات . 

مشترياتي من باث اند بودي

السلام عليكم

في فترة التنزيلات اللي راحت اخذت من باث اند بودي شموع ، وماشريت لوشن وغيرهم لانه عندي كثير 

وانا خلصت كل الشموع اللي عندي ، ف هدفي كان على الشموع وهالمره فيه اشياء جميلة والاسعار اجمل بصراحة 

وانا احب اخذ الشموع بالتنزيلات لانه تكون ب نص او ربع السعر الاصلي ، كل الشموع الكبيرة ب ٩٠ درهم 

من اليمين :

Honeysuckle Bouquet ، بوكية زهر العسل ،  اول شمعة استخدمتها ووجدا حبيتها ريححتها احلى بوايد يوم تشعلينها ، قد جربت هالريحة من عندهم بس لوشن وزبدة للجسم ، صراحة مااستحملت الريحة على جسمي ابدا ، قوية بزيادة ، بس الشمعة حلوه قوية وتعطر الغرفة .

اخذتها ب ٤٥ درهم 

Leaves ، الاوراق ،  من احلى الشموع اللي احبها في باث اند بودي مااعرف شلون اوصف ريحتها بس ، قوية وفيها ريحة القرفة ، بس بشكل حلو ، والريحة راقية ، انا عن نفسي اعشقهاااا .

اخذتها ب ٤٥ درهم 

Fresh ، ريحتها على اسمها ، فرررررش من الشموع اللي تغير لك مزاجك ، حلوه ، اخذتها ب ٣٠ درهم 

Brazilian Blue Waters ،مياة زرقاء برازيلية ، حبييييت ريحتها ريحة شي منعش ونظيف 

اخذتها ب ٢٠ درهم .

Dream Big ، رائعة رائعة رائعة ، ريحة اللافندر الهادية ، صراحة ريحة مريحة جدا ، حبييييتتها جدا وانصحكم فيها 

اخذتها ب ٣٠ درهم .

Red Forever ، شمعة بريحة عطرهم الاحمر ، العطر جميييل جدا ويعجبني ، اخذت شمعة منه ، وريحتها نفس العطر بالضبط ، اغراني السعر بصراحة ، كانت ب ١٠٥ وصارت ب ٢٠ درهم بس . 

Rainforest Gardenia ، اللي يحب ريحة الغاردينيا بيحب هالشمعة ، ريحة الغاردينيا مع ريحة مطر ، ريحة حلوووه بصراحة .  اخذتها ب ١٥ درهم .

وبس هذي كانت كل مشترياتي . 

ايفنت باث اند بودي لاطلاق عطر Dark Kiss

السلام عليكم 

من فتره شوي طويله ، دعيت الى ايفنت خاص ب محل باث اند بودي شوب 

لاطلاق عطر ومجموعه ال Dark Kiss حصريا في الشرق الاوسط 

لبيت الدعوه ورحت وصورت ،،،

الايفنت كان في دبي مول في محلهم هناك ... 

استقبالهم كان جميل جدا ، كل وحده من البلوقز تدخل يلبسونها اسوراه معطره بالعطر الجديد ، 

سوالف و تعرفت على كذا بلوقر وشي حلو بصراحه ... 

هذا ستاند العرض اول ماتدخلون المحل ، 

ووقفنا هنا وماقصروا تكلموا عن المجموعه وليش انها حصريه او العطر حصري ، كانو باث اند بودي راح يشيلون

المجموعه بشكل كامل ، بس المدراء اللي في الشرق الاوسط اعترضوا على هالشي لانه هالريحه هي رقم واحد في المبيعات

عندنا ، وتمسكوا بقرارهم ونجحوا فيه ، وخصصوا هالمجموعه والعطر بس للشرق الاوسط ،،،،

العطر ثباته صار اقوى من اول بمراااااحل ، وهالشي حبيته انهم حسنوا الثبات ، لانه الكل يبي ريحه عطر ثابته وقويه ..

....

وفي النهايه اعطونا كيس جميل .. وهذا اللي فيه 

العطر الجميل ، انا مااعرف اوصف العطور بشكل زين بس توت ومسك بس حلو 

انا بالعاده مااحب الروايح اللي فيها فاكهه بس هنا عجبني جداا .. 

شكرا لكم باث اند بودي ووركس 

مفضلاتي العشوائيه لشهر فبراير

السلام عليكم 

من يومين لاحظت اني ولا مره كتبت عن اي شي مفضل عندي في الشهر اللي راح 

وقررت هالمره ابدا بمفضلات عشوائيه بعيده عن الميك اب هالمره 

وبحاول اسوي كل شهر اذا حبيت شي جديد وبغيت اشاركم فيه 

..

انا اقدس الوقت الخاص بالقهوه ، واعشق الشوكلاته الغامقه 

وهالمره اختياري لنوع من القهوه من شركه نسكافيه هالنوع غير ومميز وحبيته بكل صراحه 

ونوع التحميص وسط وتعتبر قويه ، واشرب كوب واحد في اليوم 

لانها تسهرني 

واحب اكل معاها هالتشوكلت بار الرائع شوكلاته غامقه وفيها قطع كامله من البندق 

واعشق البندق بكل حالاته وباي شي يدخل فيه 

اممممممم لذه وطعم رائع 

...

نجي للمنتجات العنايه 

مزيل وتونر للميك اب من لوريال وتكلمت عنه فيه تدوينه سابقه تقدرون تشوفونها 

احبه اشيل فيه الميك اب او استخدمه كتونر ممتاز جدا ، وتقريبا باقي ربع العلبه ويخلص ، وللاسف مالقيته في دبي 

الا في المطار فممكن بالسفر الجايه اجيب منه . 

- كريم لليد بالشيا من باث اند بودي اعشق هالكريم وهالريحه " توايلات وود "" هالريحه هي المفضله عندي من باث اند بودي ، والكريم ناعم واحسه مخملي على اليد ، واحطه قريب مني كل ماذكرت حطيته على يدي .

- بايو اويل ، هو زيت مفيد في تخفيف الخطوط البيضا بالجسم ، مااقول انه يمحيها لا بس يخفف منها ومن بروزها ،

عن نفسي احبه واستخدمه بعد اي شور اكون مستخدمه فيه مقشر ، لاني اقشر المكان اللي فيه الخطوط البيضا واول مااطلع من الشور ادهن المكان بالزيت هذا ، وفعلا خفف لي من بروز الخطوط ، وراضيه عن النتيجه . 

- خيط الاسنان جربت كذا نوع وماحبيتهم حبيت هالنوع ناعم وسلس ومايعور او يجرح لانه لثتي وللاسف شوي ضعيفه

وهذا اللي نصحني فيه طبيب الاسنان . 

- قطرات العيون ، هالشي اللي مستحيل يفارقني لاني البس عدسات طبيه شبه يومي ، ومااحب اطلع بالنظاره ف اغلب الوقت اذا انا بره اكون لابسه عدسات ، والعين طبعا تتعب ، بس هالقطرات مريحه وتريح العين ، انصح كل بنت تلبس عدسات فيها . 

- عطر من باث اند بودي اسمه عنبر بلش ، ريحته رائعه حبيتها وتكلمت عنه في تدوينه مشترياتي من باث اند بودي 

رائع جدا و،حبيت حجمه صغير ورش ويبقى لوقت لابأس فيه .

- زيت للاظافر والجلد اللي حولها ، شاريته من فتره قصيره بس حبيته ريحته خوخ بس حلوه ، وبسرعه الجلد يتشربه 

وتقريبا يوميا احطه على اظافر ايدي ورجولي عشان احمي الجلد ، لانه الجلد اللي حوالين الاظافر متعبني وحساس جدا 

وهذا الحمدلله ناسبني . 

- مسك من عبدالصمد القرشي ، شقول وشخلي ، هذا العشق الابدي واللي مستحيل يتغيرر ، ريحته اناقه و نعومه و نظافه و كل شي جميل ، احب احطه بعد الشور خيال وريحته ثابته لوقت طوييييل ، اللي ماحربته تجربته واكيد اكيدد بتحبه لانه روعه ، وجربت كذا نوع ومن كذا محل هذا احلاهم . 

...

وهذي هي كل مفضلاتي لهالشهر ، وان شاء الله بحاول كل شهر احط لكم كل شي حبيته واستمتعت فيه .