رحلة ال ٥ كيلو - حياة صحية ٢

رحلة ال ٥ كيلو - حياة صحية  ٢

السلام عليكم

اللي متابعني راح يعرف اني بديت من جديد احاول انزل وزني

وكتبت موضوع قبل تقدرون تشوفونه من هنا 

شنو اللي سويته خلال هالفتره ...

حاولت وقد مااقدر اني التزم بالنظام اللي كاتبته لي ، وكتبته لكم في الموضوع الاول ،

فيه ايام خربطت خصوصي الويك اند ، اما باقي الايام تقريبا ملتزمه ،

الفطور غالبا توست مع جبن وكوب قهوه ، بدون اي خضار او خيار ، مااعرف مااحب على الصبح

واشبع منه ،لانه القهوه تسد نفسي ..

والغدا ملتزمه فيه جدا ، وغالبا اسوي لي دجاج مشوي بالاله الجميله من فيلبس ريحتي جدااااا من اروع الاجهزه اللي حبيها، سريعه ومفيده .. والدجاج بالكثير ثلث ساعه وهو خالص ..

العشا اكل من عشانا عادي بس بالكميه المحدده او اذا اهل ماسوو عشا وراح يطلبون ، صرت اسوي لي

بيض مع خضار مسلوقه او اشوحها شوي على النار .. يعني احاول قد مااقدر امسك نفسي ..

احاول اشرب ماي وااايد بهالشي اعطي نفسي ١٠ من ١٠ ، صرت اشرب ماي وايد

+ وزياده صرت اشرب ماي مع ليمون ، عندي علبة شريتها من لايف ستايل تقريبا فيها لتر ماي احط فيها شرايح

ليمون من الليل واخليه بالثلاجه واشربه اليوم كله .. واحاول كل يوم اكرر هالشي .. فوايده روعه روعه روعه

اولا يريح البطن حيل ، وانا معاي القولون جدا ريحني احاول مااحط ليمون كثير عشان مايهيج المعده بس ممتاز معاي

واذا استمريتي عليه فعلا ينظف الجسم والبشره تصفى ، لانك جالسه تنقين جسمك من كل الشوائب ..

حتى لو انتي ماتبين وزنك ينزل جربي هالشي وخليه يومي ، لانه ممتاز لجسمك وبشرتك ..

...

وايضا هالفتره صرت اشرب شاي اخضر كثير ، احاول من مره الى مرتين يوميا ، ساعات على الساعه ١٢ الظهر

وبعد العشا يعني على الساعه ١٠ .. ممتاز ويفرق بالوزن ، وانا اصلا احب الشاي الاخضر ...

...

اللي حبيته هالفتره هي بذره الكتاااان ، حلوه وفعلا حركه من ثبات وزني اللي عقدني بصراحه ، صرت اخذها

اما مطحونه مع كاسه لبن او مطحونه مع السلطه ، مالها اي طعم ابدا ..

وصرنا اغلبنا نستخدمها بالبيت امي واختي حبوهااا

...

الرياضة للاسف ماسويت شي يذكر ادري انه غلط ، واحاول اطلع اعذار بس قصرت جدا بهالناحيه

بس احاول امشي زياده واتحرك بالبيت اكثر اصعد وانزل ، بس اللي ينقصني الوقت بكل صراحه

لاني حاليا اجهز اشياء وايد ، وافكار ومشاريع جديده ابي ابدا فيها ، احاول اركز هالفتره على التدوين بشكل اكبر

واكتب عدد من المواضيع ، عشان اقدر اشوف شغلي الثاني .. بس هذا موعذر طبعا ..

.....

++ موعدي وشنو اللي صار فيه ++ 

الحمدلله اولا واخيرا .. 

حاليا مع الدوره كل شي متلخبط واصلا ماتوقعت بكون نازله شي ولو نزلت ماراح يبين على الميزان 

مع احتباس السوائل بالجسم .. بس الحمدلله 

نزل وزني وصار ٦٩.٤ كيلو .. كان ٦٩.٧ كيلو .. نزلت ٣٠٠ غرام من وزني 

والشي الجميل جدا جدا اني نزلت في الدهون والحمدلله ٨٠٠ غرام  وصرت الحين ٢٣ كيلو دهون 

باقي لي كيلو دهون واحد وادخل في المعدل الطبيعي .. الحمدلله 

ماغيرت لي اكلي ولا شي لاني الحمدلله ارتحت عليه وعاجبني بصراحه مريح ومرن لي ...

والموعد الجاي ان شاء الله بتاريخ ١ - ٤ .. تقريبا بعد شهر .. 

+ بزيد من الرياضه وابي ارجع للسباحه .. 

+ اشرب ماي بنفس الطريقة اللي قبل + ماي مع ليمون + شاي اخضر ...

+ اجدد من اكلي بالافكار + واحاول امسك نفسي اكثر بالاكل .. 

+ ودي انزل بالدهون لو ٥٠٠ غرام او اكثر .. 

+ اودع ال ٦٩ كيلو للابــــــد .. خلاص مليت من هالرقم .. ان شاء الله بحقق هالشيء

ويارب يارب يارب اقدر على تحقيق كل اللي ابيه .. 

رحلة ال ٥ كيلو - حياة صحية

السلام عليكم

من زمان ماتكلمت عن موضوع تقريبا بديت المدونة عشانه

الحياة الصحية ، الكل يبي ينحف ويغير حياته للافضل ، بالاول كنت بس ابي انحف وبس

وماهمني اي شي ثاني ، كتبت قبل من موضوع في قسم الحياة الصحية وشلون نزل وزني بطريقة غلط

الحين تغير تفكيري تمااااام ، حاليا ابي اصير صحية من الداخل قبل الخارج ، ودي انه معدل الدهون

اللي بجسمي يصير في المعدل الطبيعي ، كل شي ناكله ونشربه بينفعنا من الداخل و بعدها على الخارج

...

من ٣ شهور رجعت لاخصائية التغذية ، ونقيس بالميزان والوزن نفسه يرتفع كم غرام وينزل كم قرام

جسمي تعود تمااااما على كميه الاكل والحركة اللي اسويها ، حاليا ماعندي اي اصرار اني ارجع للنادي

لاني مليت من الروتين ، بس بديت اسوي اشياء خفيفه تمارين بسيطه ، انا هدفي اشد جسمي

وابدا ابدا ماابي وزني يكون بال ٥٠ ، مااحسه حلو علي ،

ف من اووووول ماقررت انزل وزني وانا بخاطري وحلمي انه يكون وزني ٦٥ كيلو ..

وهذا هدفي وبحققه باذن الله ، وانتوا شاهدين علي .. حاليا وزني ٧٠،٥ كيلو .. و باجر عندي

موعدي مع التغذية ، ويارب اكون نازلة وزن ودهوووون ..

الدهون حاليا ٢٤ كيلو ، والطبيعي على وزني وطولي يكون ٢٢ كيلو ، ف مابقى شي اصلا

واوصل للطبيعي وهذا اللي ودي فيه ، اكون طبيعيه وصحية من الداخل

....

بعد موعدي مع اخضائية التغذية :

الحمدلله الحمدلله الحمدلله .... نـــــزل وزني الى ٦٩.٧ كيلو الحمدلله 

وفي الدهون نزلت ٢٠٠ قرام الحمدلله ... مو وايد بس احسن من الثباات 

حاليا نسبة الدهون ٢٣.٨ والطبيعي ٢٢ او اقل ... وان شاء الله للاقل طبعا .. لانه هدفي اكون صحية اكثر 

...

هالمره غيرت لي نظام اكلي 

وبكتبه لكم .. 

الفطور :

- شريحة توست اسمر او نص خبر عربي صغير او نص صمونه 

- بيض او جبن قليل الدسم او لبنة قليلة الدسم 

- خيار + خس + اي خضار ورقية 

- كوب شاي او قهوه او شاي بحليب قليل الدسم 

سناك :

حبة فاكهة - الانواع المسموحه 

" ٣ شرايح اناناس او نص بابايا او برتقاله او كيوي او رمان او نص جريب فروت " 

الغدا : 

- لحم او دجاج او سمك 

- ملعقه غرف واحده فقط من رز او معكرونة او نص خبز لبناني صغير 

- سلطة + خضار مطبوخة " شوي او سلق او على البخار " 

- زبادي او لبن قليل الدسم 

- زبادي او لبن قليل الدسم 

سناك :

حبة فاكهة - الانواع المسموحه 

" ٣ شرايح اناناس او نص بابايا او برتقاله او كيوي او رمان او نص جريب فروت " 

العشا : 

- دجاج او تونه او بيض او جبن او نص كوب بقوليات 

- شريحه توست او نص خبز لبناني او نص كوب ذره 

- سلطه 

- زبادي او لبن قليل الدسم + ملعقة صغيرة من بذر الكتان مطحونة 

سناك :

حبة فاكهة - الانواع المسموحه 

" ٣ شرايح اناناس او نص بابايا او برتقاله او كيوي او رمان او نص جريب فروت " 

طبعا مع النظام لازم رياضة و شرب ماي بكميات كبيره 

موعدي الجاي معاها بتاريخ ٢ / ٣ 

كتبت الموضوع بتاريخ ١٤ / ٢ 

وباقي لي بالضبط اسبوعين .. باذن الله بحاول التزم قد مااقدر عشان صج خلاص ابي انزل 

وابي اكون صحية قد مااقدر ، والوعد بعد ماارجع مع التغذية بكتب وش صار ووش سويت 

بهالاسبوعين .. وان شاء الله خير يااارب ... 

يارب حقق لنا كل احلامنا 

شاركوني باحلامكم او اهدافكم او شاركوني ب هال رحلة اننا ننزل ٥ كيلو 

بس مو مهم المدة المهم اننا نحقق هدف .. 

Nutridiet نظام غذائي قليل السعرات الحرارية

السلام عليكم

Nutridiet  نظام غذائي قليل السعرات الحرارية

تقريبا من حوالي الشهر والنص بديت في حميه او رجيم جديد، Nutridiet .

Nutridiet هو استبدال الطعام بهذا المنتج وهو وجبة عالية بروتين الصويا، ويحتوي على جميع العناصر الغذائية التي يحتاجها جسمك ولكنه منخفض جدا في محتواها من السعرات الحرارية لها - فقط حوالي 110 سعرة حرارية لكل وجبة. عن طريق استبدال كل أو بعض وجبات الطعام الخاصة بك مع Nutridiet، يمكنك خفض وزنك بأمان وسهولة. تكوين Nutridiet يقلل من الرغبة الشديدة الخاص الجوع ويضمن أن يتم الاحتفاظ كتلة العضلات أثناء فقدان الوزن الخاص بك. وطعمها كبيرة جدا!

عندهم ٣ برامج سهله لتخفيض الوزن 

١- تخفيض سريع الوزن ، استبدال كافة الوجبات الغذائية .

٢- تخفيض معتدل للوزن ، استبدال وجبتين من الوجبات الغذائية .

٣- محافظة على الوزن ، استبدال وجبة غذائية واحده . 

تجربتي معاه ...

بالبدايه تحمست بصراحه خصوصي انه شي زين وماشفت احد كاتب عنه انه ضره وسبب له مشاكل ، تواصلت معاهم وماشاء الله ماقصرو معاي ، استلمت العلب فيه علبه كبيره

وبداخلها ٣ علب بنكهات " الشوكولاته - فواكه الغابات - الفراوله " ، مرفق معاهم الكوب الخاص و ورقه فيها تعليمات عن النظام كامل .

كل علبه فيها ١٥ مغلف ، كل مغلف عن وجبه او سناك مثل ماتحبين طبعا

طريقه الاستخدام نفرغ مغلف واحد داخل الكوب و نعبيه ماي باااارد جدا جدا و نرج العلبه لين مانشوف انه البودره ذابت في الماي ، ونشربه على طول . " ماينفع نخليه لوقت طويل " .

انا فكرتي من البدايه ابي انزل وزني لكن بشكل بطيء مااحب فكره النزول السريع بالوزن ، بطيء عشان احافظ عليه واستمر ، فبديت ادخل هالشراب على نظام اكلي لكن ك سناك ، اول اسبوع مره في اليوم وغالبا اخليها بالليل لاني اتعشى على ٩ تقريبا وعلى ال ١١ ونص اجوع فاخذت لي هالسناك .

ثاني وثالث اسبوع نفس الشي مره باليوم وساعات احاول مرتين ، رابع وخامس اسبوع بصراحه اهملته شوي ، سافرت ورديت يعني شوي صارت حوسه ، بس كنت احاول اشربه ٣ مرات بالاسبوع .

يعني في البدايه التزمت شوي وبعدها بدا التخبيص ، بس ماعليه انا راضيه لاني اني نزول بطيء لوزني .

المنتج نفسه كلها فيتامينات ومعادن واللي يحتاجها الجسم يومياا وهالشي ممتاز

المغلف الواحد فيه ١١٢ كالوري ، وممتاز كسناك او كوجبه ، لانه مشبع .

+ الطعم .... انا وحده اصلا مااحب المشروبات البارده ، يعني ملك شيك و انواع القهوه البارده مااقدر استسيغ طعمها ،

وهالشراب ، تقريبا اقدر اقول عنه ملك شيك ، واعاني جدا اذا شربته ، احاول ماافكر وانا اشربه ، حبيت طعم الككاو اكثر وهون شي بالنسبه لي ، ولاني كنت اضيف له شوي قهوه سريعه التحضير فيعني ترقع الموضوع بالنسبه لي ، بس شي صعب لي لاني مااحب شي وصرت اشربه . (( بس فعلا اكرره هالمشروبات البارده باي شكل وباي نوع ومن اي كوفي او محل )))  ...

+ ينصح بشرب كميات كبيره من الماي يوميا وهذا الشي كاتبينه ومأكدين عليه .

وزني وكمت نزلت عليه .. هو مثله مثل اي رجيم لازم معاه رياضه وتخفيف بالاكل

وزني اول مابديت كان     ٧٠،٣ كيلو

وبعدها وصل الى            ٦٨،٤ كيلو

اول شي الحمدلله رب العالمين ، لاني افتكيت من عقده ال ٧٠ كيلو هذي و اني نزلت هالوزن وانا بصحه وعافيه

وثانيا نزلت ١.٩ كيلو ، قريب ال ٢ كيلو بس شي ممتااااز في هالفتره وهالتخبيص اللي كان صاير وغير اني ماكنت احب الطعم اللي اشربه .

هل انصح فيه ؟ ايه

بس اللي يحب المشروبات البارده وماعنده عقد بتذوق الطعم مثلي .

هل فادني المنتج ؟ ايه

نزلت عليه ١.٩ كيلو

هل ممكن اعيد هالتجربه ؟

بصراحه لا ، صح انه النتيجه حلوه بس مااقدر على الطعم لانه مشروب باااارد .

الموقع فيه كل شي ، ومنه تقدرون تطلبون المنتج ، وفيه توصيل للامارات كلها والتوصيل مجاني للامارات والدفع عند الاستلام، وفيه توصيل لدول الخليج .

والمنتج متوفر في اغلب الصيدليات المشهوره في الامارات وهذي الامكان كلها موضحه هنااااااا

www.nutridiet.ae

اللي حاب يعرف اي شي او عنده سؤال انا تحت امركم ... 

الحياة الصحية - ٤

السلام عليكم 

بالبدايه الموضوع ابد مو مرتب كل شي جا في بالي اليوم كتبته 

كتبته على مرتين جزء الصبح ( وبتلاحظون انه غير متفاءل - وجزء كتبته بعد زيارتي لعياده التغذيه ) 

ببدا على طول وبدون مقدما او ترقيع للموضوع 

صار لي تقريبا ٥ شهور ووزني تقريبا ثابت بين ٦٩،٩ و ٦٩،٢ كيلو 

صح كرقم حلو لكن انا خلاص مليت وتكاسلت نوعا ما ، خفت الرياضه عندي والاكل نوعا ماتغير 

صح اني اكل عادي يعني اللي موجود بس باعتدال ومع ذالك ماينزل الوزن بس كان فيه اختلافات شوي بقياسات الجسم

وهالشي حلووو طبعا بس ودي انزل عن هال ٦٩ كيلو 

مممكن اللي شوي اخرني في النزول هو اني جالسه احقق احلامي تقريبا كلها حاليا 

احد احلامي اني اتعلم السياقه والحمدلله مابقى لي الا كلاس واحد وبعدها الاختبار النهائي واللي يحدد 

اني اخذ الليسن او رخصه القياده او لا 

بس ان شاء الله اخذه يااااارب 

احد العيوب اللي فينيي واللي احاول اني اعدلها هو اني مااعرف اجمع بين كذا شي بوقت واحد

يعني مثلا المدونه والنادي والتدريب والتصميم والتصوير كلها تقريبا اشياء يوميه لازم اسويها

بس صرت اقصر بشي لحساب شي اخر 

حاليا مقصره بالنادي عشان السواقه بس لا لا لا ، الحياه اكبر بكثييير من هالعالم 

والواحد المفروض انه يعرف يرتب نفسه واولوياته ، وهذا ان شاء الله بشتغل عليه 

غير هذا حاليا احس حياتي غير مرتبه ودي ارتبها اكثر او اهذبها ان صح التعبير 

----

كتبت اللي فوق الصباح قبل مااروح لموعدي في عياده التغذيه 

بس الحمدلله رجعت مبسوطه وجداااااااا جدا ليه ؟

وزني ولله الحمد ٦٩،٤ كيلو الحمدلله 

بس نزلت كيلو كييييلووو في الدهون والحمدلله على هالشي لانه هو كان تركيزي من البدايه 

وصلت لاخر منطقه الامان زي مايقولون المفروض الدهون بالجسم تكون من ١٢ الى ٢٢ 

وانا وصلت ٢٢ 

كنت ٣٣،٧ واليوم ٢٢،٨ 

يعني نقصت ١٠،٩ كيلو من الدهون الحمدلله يااارب 

جدا شي جميل ، وباذن الله انزل نسبه الدهون اكثر واكثر وينزل وزني اكثر 

موعدي الجاي ان شاء الله بعد شهر وشوي بتاريخ ٣ - ٣ 

وودي انزل كيلو على الاقل اتخلص من هال ٦٩ يااااارب 

----

وبتكمل عن شغله صغيره وهي ابدا مو صغيره 

الوزن والدهون تعطينا عمر اكبر بكثيررررررررر 

في العياده بجهاز الوزن يطلع كل شي بالجسم ( الوزن - نسبه الدهون - العضلات - السوائل - العظام - والعمر الجسم )

واقصد بعمر الجسم انه يطلع لي عمر جسمي من ناحيه الوزن والدهون والعضلات 

وكل ماكان الواحد صحي اكثر ورياضي يكون عمر جسمه مثل عمره الحقيقي والرياضيين عمرهم الجسمي اقل من الحقيقي

انا عمري ٢٩ سنه وجسمي ووزني والاشياء اللي كنت مهببتها فيه عطتني عمر غير

حاليا عمري الصحي والجسمي ٣٨ سنه 

يعني يفرق عن عمري الحقيقي ٩ سنين 

٩ سنين مو شوي ابد وهال ٩ بعد نزول وزني وصرت انسانه رياضيه وصحيه قدر الامكان 

اول مابديت وقررت اني اتخلص من عالم السمنه كان عمري ٢٧ سنه ووقتها عمر جسمي ٤٦ سنه 

كثيرر وشي مؤلم بصراحه 

يخلي الواحد يفكر هو ليه وصل لهذي المرحله ويطرد كل هالاشياء السلبيه من حياته 

لاتخلين الوزن والسمنه تاخذ من عمرك لاني فعلا ندمانه على هالشي ، وماعشت حياتي 

انا من النوع اللي يستحي وغير جريئه ، بس تقريبا الكل ملاحظ انه شخصيتي تغيرت للافضل 

انفتحت علي الناس بديت اطلح بشخصيتي وبذوقي 

انا عندي جنون وبديت اطلعه ولا بستحي من اي شي لانه كل ماقدمت شي انا احبه اشوف ردود الفعل والاصداء جميله

وكل مره يقولون لي انتي فيك اشياء جميله وطاقات حلوه بس انتي دافنتها ولا شفناها 

انا والحمدلله كل عايلتي مساندتني بهالشي وتقريبا كلنا في البيت غيرنا شوي من عاداتنا القديمه 

ونتجه اتجاه صحي . 

الحدلله رب العالمين ، يارب طلبتك الصحه والراحه للجميع . 

---------------

احد اسباب النجاح والحياه الصحيه انها تكون نظيفه وخاليه من الشواءب 

ببدا برتيب وقتي - غرفتي - تنظيم الادراج 

ابي اخلي حياتي سهله وسريعه ، حاليا اكتب بعشوائيه بس اللي عنده اي افكار انا حابه اطبقها 

عندي كذا فكره في بالي :

الاسبوع فيه ٧ ايام 

- ٣ ايام اروح للنادي ( الاحد - الثلاثاء - الخميس ) 

- اكتب تدوينتين كل اسبوع . 

- تصميم بالفوتوشوب كل اسبوع ( مو شرط لاحد - لنفسي )

- الاهتمام بالنفس من ناحيتين ( عقليه و روحيه ) احب القراءه بس بعيده عنها جدا هالفتره بس راجعه لها 

اليوم تاريخ ٢٩ / ١ / ٢٠١٤ 

بعطي نفسي شهرين للترتيب ودخول هالروتين المفيد والمشرق 

وبحط هنا كل شي اسويه ( حتى لو كان ترتيب الميك اب - او قراءه كتاب ) 

واتمنى تساعدوني بخبرتكم ، كلنا نتعلم وكلنا نطمح بالافضل .

شاركوني باي شي تحبونه احب اسمع منكم واستفيد وبعمري مابقصر بشي اعرفه لاني اعيش هالتجربه معاكم وفيكم 

وسؤال ثاني ... حابين موضوع صحي مثلا كل اسبوع او كل اسبوعين ؟ وعن ايش تحبون اتكلم عنه ؟ 

الحيـاه الصحيـه ٣

السلام عليكم 

نرجع لهالسلسله الجميله اللي بديتها وهي الحياه الصحيه 

واحب اعترف في البدايه اني هالايام مااعرف وش فيني متلخبطه او كسوله بمعنى ثاني 

احتاج لدافع جديد وخطه جديده لكسر كل النظام والروتين اللي انا عايشه فيه 

عشان ماامل من شي 

رحت لمراجعتي للتغذيه مثل كل شهر .. وهالشهر الوزن ثابت ٦٩.٢ كيلو 

نفس الشهر اللي فات .. طبعا الحمدلله على كل شي بس ممكن هالشي حبطني زياده اني مانزلت شي 

مع اني عارفه اني بوصل لهذي المرحله ويبتدي عندي ثبات الوزن .. 

بس فرحت بشي من خلال الميزان الرقمي اللي عندهم انه نزلت في الدهون كيلو وهذا شي ممتاااااااز جدا 

و زدت حجم العضلات الى كيلو ايضا ، وهذا ممتااااز جدا ، لانه بين اني العب رياضه واثقال 

ومهم جدا انه حجم العضلات يزيد بالجسم عشان الدهون تقل ويزيد معدل الحرق .. 

وسالتها اذا ممكن اغير اكلي او اقلل كميته ، ابد مانصحتني بهالشي لاني احتاجه مع زياده العضلات 

وان شاء الله خير ، اهم شي اني في الطريق السليم .. 

وحددت لي هدف وان شاء الله اوصله .. بنهايه شهر مارس ٢٠١٤ يكون وزني ٦٥ كيلو 

هالرقم هدفي وان شاء الله اقدر وبحاول اقرب منه ولو شوي انا راضيه ، المهم والاهم انه بطريقه صحيه 

وبحياه صحيه اولا واخيرا ، لاني ابي صحتي .

هالايـام احاول ازيد كميه الماء اللي اشربه ، كوب كبير على الريق ، وهالشي شقد اقول انه مفيد 

ينظف القولون والكبد و لاحظت انه بشرتي احلى هالفتره وهالشي انا حابته وبشده 

..

هالشهر انا خلصت كل الفيتامينات اللي عندي وصراحه ودي اوقف هالفتره 

واعتمد على اكلي ، وودي اصفي جسمي من اي نوع حبوب ، اكل فاكهه وخضار بشكل يومي 

واسوي لي عصير اخضر ، ومعروف بفوايده  

والعصير اللي اعتمده انا شبه يومي ( تفاحه - ٣ خيار - ليمونه - زنجبيل فرش -٣ اعواد كرفس او سلاري - وساعات احط بقدونس ) 

..

صور لبعض الاشياء اللي اكلها 

بسكوت طعمه حلو قريب من طعم بسكوت الشاي واخف بكثير من الدايجستف اللايت .. البسكوته الوحده فيها ٣٦ كالوري فقط .. بالنسبه لي افضل اكله من اكل الدايجستف والسعرات اقل .. وسعره ١٥ درهم موجود بس في ( سبينس - وويتروس ) . 

رايس كيك .. ماادري شلون اشرح هالشي بس هو عباره عن دائره من الرز البني خفيفه جدا 

وطعمه قريب الى البوب كرون .. انا اخذت النوع اللي مافيه ملح ، وفيه انواع كثيره من هالماركه شي لوفات وشي عادي 

الحبه الوحده فيها ٣٠ كالوري .. انا احب اكلها ساده او احط عليها شوي لبنه لايت و زعتر او ممكن جبن ابيض مع زيتون 

او مسحه خفيفه من البيستو مع شريحه حلوم مشويه .. مع كوب شاي ياسلام احلى سناك خفيف ويشبع . 

شابوره من امريكانا ، احب الشابوره عموما واكلها الصباح اذا مالي نفس اسوي فطور من قلب تشبع 

هالنوع حلو وقليل بالسعرات وافضل شي لقيته بالسوق لحد الان .. هالنوع بالذات .. اللي مكتوب عليه Rich Rusk ، لانه امريكانا عندها كثير انواع ، بس ابحثو عن هالنوع ، وفيه منه زي مااخذت انا بالحبوب المتكامله او قليل الدسم ويكون لون العلبه ارزق وفيه نوع ثالث اتوقع اسمر ، مااذكر بصراحه بس دايم اخذ هذا او الازرق ،  وهذا فيه ٤٣ كالوري  للكيس الواحد ، والكيس فيه ٣ حبات شي جيد 

موجود ب كارفو وسبينس والسعر مااذكر بس مو غالي . 

نجي لهذا الشي اللي وقعت في غرامه ، دايم اشوف باليوتيوب وعموما الاجانب ياكلون شبس من الخضار 

بس ماالاقي هالشي عندنا ، وفجأه شفته وجربته ، فعلا لذيذ وجدددداااا وعن نفسي اجيبه كمكافأه لي ، الكيس صغير والكميه معقوله بس شوي عاليه بالسعرات يعني الكيس كله فيه ٤٣٠ كالوري 

هذا الموجود الان وبظل ابحث الى الاقي عن شي يشبه وبسعرات اقل 

بس حلو انه من فتره لفتره ادلل نفسي فيه .. سعره ب ٩ دراهم موجود ب سبينس وجيان 

نجي للكوفي انا انسانه عاشقه للكوفي بشكل مجنون يعني قبل كنت اشرب ٤ اكواب يوميا 

بس حاليا كوب واحد باليوم وساعات مااشرب ، فحلو التقدم اللي وصلت له ، وجربت كثير انواع غير نسكافيه 

لانها تزعجني جدا معدتي ماترتاح لها ابد .. فجبت هذي ومعدتي تقبلتها ، النوعين حلوين 

هالعلبتين ممكن تجلس معاي شهرين الى ٣ شهور بحكم اني مااشرب كل يوم ، وساعات اشرب قهوه ساده 

فيعني حبيت احط هالشي للي يعاني مثلي من نسكافيه 

والسعرات معقوله بس الدهون عاليه بصراحه بس من فتره لفتره نقول جيده وافضل من نسكافيه بمراحل .. 

...

هذا كل اللي في جعبتي حاليا وان شاء الله تستفيدون من تجربتي 

وفي كل متابعه للسلسله بصور اشياء جديده واحطها وتكون مرجع للكل 

Healthy LifeStyle -- الحـياة الصحيـة ٢

السلام عليكم 

رجعت بالجزء الثاني من الحياة الصحية 

وهالجزء خاص بالأكل 

ووش النظام اللي اتبعته 

ان شاء الله بجاوب على كل الاسئله اللي جتني 

واللي ماتابعت الجزء الاول تشوفه وترجع لهنا 

---

اخصائية التغذية قدمت لي نظام السعرات الحراريه 

١٣٠٠ سعره حراريه 

بكتب لكم النظام كامل 

هذا النظام مناسبني انا ممكن مايناسب غيري لاني اعاني من نقص فيتامين دال و الكالسيوم و اعاني من القولون 

ف هي زادت لي الاشياء الغنيه بالكالسيوم وقللت لي الاكلات اللي تثير القولون 

وعلامه # تشير الى نوع او خيار لوجبه واحده من الاختيارات اللي حطيتها 

الفطور :

#  ٢ توست اسمر او ١ خبر عربي صغير او صمون 

     + ملعقتين لبنه قليله الدسم 

# بيضه مسلوقه او مشوحه على النار + خس - طماطم - خيار 

( البيض ل ٣ مرات بالاسبوع )

# كورن فلكس صحي + كوب حليب قليل الدسم 

# كعك او شابوره للرجيم + كوب حليب وشاي 

سنـــاك مابين الفطور والغداء :

# حبه فاكهه  أو حبه بسكويت دايجستف اللايت + كوب شاي اخضر 

الغداء :

لحم - سمك - دجاج ( قد كف اليد ) + ملعقه غرف رز او شريحه توست او ملعقه معكرونه او نص خبر عربي صغير 

+ سلطه او خضار مشويه او مسلوقه او على البخار 

العصر او سنـاااك :

# ٣ حبات بسكويت مالح + شريحه جبن قليل الدسم 

# ١ شريحه توست + شريحه جبن قليل الدسم 

# حبه فاكهه او سلطه فاكهه 

شاي اخضر مع كل سناك 

العشاء :

# مثل الغداء بس بدون الزر او المعكرونه يعني بدون نشويات 

# مثل الفطور بس ١ توست او نص خبز عربي صغير 

# شوربه خضار + سلطه + ١ توست مع جبنه قليله الدسم 

قبل النوم :

حبه فاكهه + حليب او لبن قليل الدسم او روب قليل الدسم 

-----

تقريبا اتبع هذا النظام لمده ١٠ شهور والحمدلله ماشي معاي 

بكتب اشياء تفيد وتساعد 

- اختارو دايما قليل الدسم و الاسمر بكل شي بحياااتكم 

وقارو السعرات الحراريه مثال ( اذا بشتري لبنه قليله الدسم اوقف عند الرف واشوف كل انواع اللبنه قليله الدسم واختار اقل وحده فيها سعرات حراريه ) ونفس الشي للخبز والتوست .

- صوص السلطات اختارو دايما الخفيفه اللايت والافضل تبتعدون عن الصلصات الكريميه زي السيزر والفرنسيه 

او احلى صوص اللي احنا نسويه ( ملعقه عصير ليمون + ملعقه خل تفاح + ملعقه زيت زيتون + ملعقه خل البلسمك ) ادوخ عند هالصوص .. لذيذ 

-اذا تحبون طعم القرفه ضيفوها على الاكل فهي تزيد عمليه الحرق .

- صحن الغدا او العشاء المفروض يكون بهالشكل نصه سلطه و ربع بروتين وربع نشويات .

بحط لكم صوره والاغلبيه يمكن شايفها وهي كميه السكر في الاكل او الحلويات والمشروبات 

الاكل الصحي والطبيعي حلو بس احنا تكبرنا عليه وصرنا ناكل الصناعي 

اللي بيتبع هالنظام ياليت يحاول على الاقل يكون صحي قد مايقدر

حسابات مميزه ومفيده بانستقرام انا استفدت منها

http://instagram.com/bayan2sj  الجميله بيان 

http://instagram.com/Diwani_Diet  محمد وقصه نجاح مصوره 

اتمنى تتابعونهم 

وصلنا لنهاية الجزء وطبعا واكيد فيه اجزاء والى الابد 

وش حابين اتكلم عنه في الجزء اللي بعده
اكمل عن الاكل او شي غير ؟