رحلة ال ٥ كيلو - حياة صحية ٢

رحلة ال ٥ كيلو - حياة صحية  ٢

السلام عليكم

اللي متابعني راح يعرف اني بديت من جديد احاول انزل وزني

وكتبت موضوع قبل تقدرون تشوفونه من هنا 

شنو اللي سويته خلال هالفتره ...

حاولت وقد مااقدر اني التزم بالنظام اللي كاتبته لي ، وكتبته لكم في الموضوع الاول ،

فيه ايام خربطت خصوصي الويك اند ، اما باقي الايام تقريبا ملتزمه ،

الفطور غالبا توست مع جبن وكوب قهوه ، بدون اي خضار او خيار ، مااعرف مااحب على الصبح

واشبع منه ،لانه القهوه تسد نفسي ..

والغدا ملتزمه فيه جدا ، وغالبا اسوي لي دجاج مشوي بالاله الجميله من فيلبس ريحتي جدااااا من اروع الاجهزه اللي حبيها، سريعه ومفيده .. والدجاج بالكثير ثلث ساعه وهو خالص ..

العشا اكل من عشانا عادي بس بالكميه المحدده او اذا اهل ماسوو عشا وراح يطلبون ، صرت اسوي لي

بيض مع خضار مسلوقه او اشوحها شوي على النار .. يعني احاول قد مااقدر امسك نفسي ..

احاول اشرب ماي وااايد بهالشي اعطي نفسي ١٠ من ١٠ ، صرت اشرب ماي وايد

+ وزياده صرت اشرب ماي مع ليمون ، عندي علبة شريتها من لايف ستايل تقريبا فيها لتر ماي احط فيها شرايح

ليمون من الليل واخليه بالثلاجه واشربه اليوم كله .. واحاول كل يوم اكرر هالشي .. فوايده روعه روعه روعه

اولا يريح البطن حيل ، وانا معاي القولون جدا ريحني احاول مااحط ليمون كثير عشان مايهيج المعده بس ممتاز معاي

واذا استمريتي عليه فعلا ينظف الجسم والبشره تصفى ، لانك جالسه تنقين جسمك من كل الشوائب ..

حتى لو انتي ماتبين وزنك ينزل جربي هالشي وخليه يومي ، لانه ممتاز لجسمك وبشرتك ..

...

وايضا هالفتره صرت اشرب شاي اخضر كثير ، احاول من مره الى مرتين يوميا ، ساعات على الساعه ١٢ الظهر

وبعد العشا يعني على الساعه ١٠ .. ممتاز ويفرق بالوزن ، وانا اصلا احب الشاي الاخضر ...

...

اللي حبيته هالفتره هي بذره الكتاااان ، حلوه وفعلا حركه من ثبات وزني اللي عقدني بصراحه ، صرت اخذها

اما مطحونه مع كاسه لبن او مطحونه مع السلطه ، مالها اي طعم ابدا ..

وصرنا اغلبنا نستخدمها بالبيت امي واختي حبوهااا

...

الرياضة للاسف ماسويت شي يذكر ادري انه غلط ، واحاول اطلع اعذار بس قصرت جدا بهالناحيه

بس احاول امشي زياده واتحرك بالبيت اكثر اصعد وانزل ، بس اللي ينقصني الوقت بكل صراحه

لاني حاليا اجهز اشياء وايد ، وافكار ومشاريع جديده ابي ابدا فيها ، احاول اركز هالفتره على التدوين بشكل اكبر

واكتب عدد من المواضيع ، عشان اقدر اشوف شغلي الثاني .. بس هذا موعذر طبعا ..

.....

++ موعدي وشنو اللي صار فيه ++ 

الحمدلله اولا واخيرا .. 

حاليا مع الدوره كل شي متلخبط واصلا ماتوقعت بكون نازله شي ولو نزلت ماراح يبين على الميزان 

مع احتباس السوائل بالجسم .. بس الحمدلله 

نزل وزني وصار ٦٩.٤ كيلو .. كان ٦٩.٧ كيلو .. نزلت ٣٠٠ غرام من وزني 

والشي الجميل جدا جدا اني نزلت في الدهون والحمدلله ٨٠٠ غرام  وصرت الحين ٢٣ كيلو دهون 

باقي لي كيلو دهون واحد وادخل في المعدل الطبيعي .. الحمدلله 

ماغيرت لي اكلي ولا شي لاني الحمدلله ارتحت عليه وعاجبني بصراحه مريح ومرن لي ...

والموعد الجاي ان شاء الله بتاريخ ١ - ٤ .. تقريبا بعد شهر .. 

+ بزيد من الرياضه وابي ارجع للسباحه .. 

+ اشرب ماي بنفس الطريقة اللي قبل + ماي مع ليمون + شاي اخضر ...

+ اجدد من اكلي بالافكار + واحاول امسك نفسي اكثر بالاكل .. 

+ ودي انزل بالدهون لو ٥٠٠ غرام او اكثر .. 

+ اودع ال ٦٩ كيلو للابــــــد .. خلاص مليت من هالرقم .. ان شاء الله بحقق هالشيء

ويارب يارب يارب اقدر على تحقيق كل اللي ابيه .. 

الحياة الصحية - ٤

السلام عليكم 

بالبدايه الموضوع ابد مو مرتب كل شي جا في بالي اليوم كتبته 

كتبته على مرتين جزء الصبح ( وبتلاحظون انه غير متفاءل - وجزء كتبته بعد زيارتي لعياده التغذيه ) 

ببدا على طول وبدون مقدما او ترقيع للموضوع 

صار لي تقريبا ٥ شهور ووزني تقريبا ثابت بين ٦٩،٩ و ٦٩،٢ كيلو 

صح كرقم حلو لكن انا خلاص مليت وتكاسلت نوعا ما ، خفت الرياضه عندي والاكل نوعا ماتغير 

صح اني اكل عادي يعني اللي موجود بس باعتدال ومع ذالك ماينزل الوزن بس كان فيه اختلافات شوي بقياسات الجسم

وهالشي حلووو طبعا بس ودي انزل عن هال ٦٩ كيلو 

مممكن اللي شوي اخرني في النزول هو اني جالسه احقق احلامي تقريبا كلها حاليا 

احد احلامي اني اتعلم السياقه والحمدلله مابقى لي الا كلاس واحد وبعدها الاختبار النهائي واللي يحدد 

اني اخذ الليسن او رخصه القياده او لا 

بس ان شاء الله اخذه يااااارب 

احد العيوب اللي فينيي واللي احاول اني اعدلها هو اني مااعرف اجمع بين كذا شي بوقت واحد

يعني مثلا المدونه والنادي والتدريب والتصميم والتصوير كلها تقريبا اشياء يوميه لازم اسويها

بس صرت اقصر بشي لحساب شي اخر 

حاليا مقصره بالنادي عشان السواقه بس لا لا لا ، الحياه اكبر بكثييير من هالعالم 

والواحد المفروض انه يعرف يرتب نفسه واولوياته ، وهذا ان شاء الله بشتغل عليه 

غير هذا حاليا احس حياتي غير مرتبه ودي ارتبها اكثر او اهذبها ان صح التعبير 

----

كتبت اللي فوق الصباح قبل مااروح لموعدي في عياده التغذيه 

بس الحمدلله رجعت مبسوطه وجداااااااا جدا ليه ؟

وزني ولله الحمد ٦٩،٤ كيلو الحمدلله 

بس نزلت كيلو كييييلووو في الدهون والحمدلله على هالشي لانه هو كان تركيزي من البدايه 

وصلت لاخر منطقه الامان زي مايقولون المفروض الدهون بالجسم تكون من ١٢ الى ٢٢ 

وانا وصلت ٢٢ 

كنت ٣٣،٧ واليوم ٢٢،٨ 

يعني نقصت ١٠،٩ كيلو من الدهون الحمدلله يااارب 

جدا شي جميل ، وباذن الله انزل نسبه الدهون اكثر واكثر وينزل وزني اكثر 

موعدي الجاي ان شاء الله بعد شهر وشوي بتاريخ ٣ - ٣ 

وودي انزل كيلو على الاقل اتخلص من هال ٦٩ يااااارب 

----

وبتكمل عن شغله صغيره وهي ابدا مو صغيره 

الوزن والدهون تعطينا عمر اكبر بكثيررررررررر 

في العياده بجهاز الوزن يطلع كل شي بالجسم ( الوزن - نسبه الدهون - العضلات - السوائل - العظام - والعمر الجسم )

واقصد بعمر الجسم انه يطلع لي عمر جسمي من ناحيه الوزن والدهون والعضلات 

وكل ماكان الواحد صحي اكثر ورياضي يكون عمر جسمه مثل عمره الحقيقي والرياضيين عمرهم الجسمي اقل من الحقيقي

انا عمري ٢٩ سنه وجسمي ووزني والاشياء اللي كنت مهببتها فيه عطتني عمر غير

حاليا عمري الصحي والجسمي ٣٨ سنه 

يعني يفرق عن عمري الحقيقي ٩ سنين 

٩ سنين مو شوي ابد وهال ٩ بعد نزول وزني وصرت انسانه رياضيه وصحيه قدر الامكان 

اول مابديت وقررت اني اتخلص من عالم السمنه كان عمري ٢٧ سنه ووقتها عمر جسمي ٤٦ سنه 

كثيرر وشي مؤلم بصراحه 

يخلي الواحد يفكر هو ليه وصل لهذي المرحله ويطرد كل هالاشياء السلبيه من حياته 

لاتخلين الوزن والسمنه تاخذ من عمرك لاني فعلا ندمانه على هالشي ، وماعشت حياتي 

انا من النوع اللي يستحي وغير جريئه ، بس تقريبا الكل ملاحظ انه شخصيتي تغيرت للافضل 

انفتحت علي الناس بديت اطلح بشخصيتي وبذوقي 

انا عندي جنون وبديت اطلعه ولا بستحي من اي شي لانه كل ماقدمت شي انا احبه اشوف ردود الفعل والاصداء جميله

وكل مره يقولون لي انتي فيك اشياء جميله وطاقات حلوه بس انتي دافنتها ولا شفناها 

انا والحمدلله كل عايلتي مساندتني بهالشي وتقريبا كلنا في البيت غيرنا شوي من عاداتنا القديمه 

ونتجه اتجاه صحي . 

الحدلله رب العالمين ، يارب طلبتك الصحه والراحه للجميع . 

---------------

احد اسباب النجاح والحياه الصحيه انها تكون نظيفه وخاليه من الشواءب 

ببدا برتيب وقتي - غرفتي - تنظيم الادراج 

ابي اخلي حياتي سهله وسريعه ، حاليا اكتب بعشوائيه بس اللي عنده اي افكار انا حابه اطبقها 

عندي كذا فكره في بالي :

الاسبوع فيه ٧ ايام 

- ٣ ايام اروح للنادي ( الاحد - الثلاثاء - الخميس ) 

- اكتب تدوينتين كل اسبوع . 

- تصميم بالفوتوشوب كل اسبوع ( مو شرط لاحد - لنفسي )

- الاهتمام بالنفس من ناحيتين ( عقليه و روحيه ) احب القراءه بس بعيده عنها جدا هالفتره بس راجعه لها 

اليوم تاريخ ٢٩ / ١ / ٢٠١٤ 

بعطي نفسي شهرين للترتيب ودخول هالروتين المفيد والمشرق 

وبحط هنا كل شي اسويه ( حتى لو كان ترتيب الميك اب - او قراءه كتاب ) 

واتمنى تساعدوني بخبرتكم ، كلنا نتعلم وكلنا نطمح بالافضل .

شاركوني باي شي تحبونه احب اسمع منكم واستفيد وبعمري مابقصر بشي اعرفه لاني اعيش هالتجربه معاكم وفيكم 

وسؤال ثاني ... حابين موضوع صحي مثلا كل اسبوع او كل اسبوعين ؟ وعن ايش تحبون اتكلم عنه ؟ 

الحيـاه الصحيـه ٣

السلام عليكم 

نرجع لهالسلسله الجميله اللي بديتها وهي الحياه الصحيه 

واحب اعترف في البدايه اني هالايام مااعرف وش فيني متلخبطه او كسوله بمعنى ثاني 

احتاج لدافع جديد وخطه جديده لكسر كل النظام والروتين اللي انا عايشه فيه 

عشان ماامل من شي 

رحت لمراجعتي للتغذيه مثل كل شهر .. وهالشهر الوزن ثابت ٦٩.٢ كيلو 

نفس الشهر اللي فات .. طبعا الحمدلله على كل شي بس ممكن هالشي حبطني زياده اني مانزلت شي 

مع اني عارفه اني بوصل لهذي المرحله ويبتدي عندي ثبات الوزن .. 

بس فرحت بشي من خلال الميزان الرقمي اللي عندهم انه نزلت في الدهون كيلو وهذا شي ممتاااااااز جدا 

و زدت حجم العضلات الى كيلو ايضا ، وهذا ممتااااز جدا ، لانه بين اني العب رياضه واثقال 

ومهم جدا انه حجم العضلات يزيد بالجسم عشان الدهون تقل ويزيد معدل الحرق .. 

وسالتها اذا ممكن اغير اكلي او اقلل كميته ، ابد مانصحتني بهالشي لاني احتاجه مع زياده العضلات 

وان شاء الله خير ، اهم شي اني في الطريق السليم .. 

وحددت لي هدف وان شاء الله اوصله .. بنهايه شهر مارس ٢٠١٤ يكون وزني ٦٥ كيلو 

هالرقم هدفي وان شاء الله اقدر وبحاول اقرب منه ولو شوي انا راضيه ، المهم والاهم انه بطريقه صحيه 

وبحياه صحيه اولا واخيرا ، لاني ابي صحتي .

هالايـام احاول ازيد كميه الماء اللي اشربه ، كوب كبير على الريق ، وهالشي شقد اقول انه مفيد 

ينظف القولون والكبد و لاحظت انه بشرتي احلى هالفتره وهالشي انا حابته وبشده 

..

هالشهر انا خلصت كل الفيتامينات اللي عندي وصراحه ودي اوقف هالفتره 

واعتمد على اكلي ، وودي اصفي جسمي من اي نوع حبوب ، اكل فاكهه وخضار بشكل يومي 

واسوي لي عصير اخضر ، ومعروف بفوايده  

والعصير اللي اعتمده انا شبه يومي ( تفاحه - ٣ خيار - ليمونه - زنجبيل فرش -٣ اعواد كرفس او سلاري - وساعات احط بقدونس ) 

..

صور لبعض الاشياء اللي اكلها 

بسكوت طعمه حلو قريب من طعم بسكوت الشاي واخف بكثير من الدايجستف اللايت .. البسكوته الوحده فيها ٣٦ كالوري فقط .. بالنسبه لي افضل اكله من اكل الدايجستف والسعرات اقل .. وسعره ١٥ درهم موجود بس في ( سبينس - وويتروس ) . 

رايس كيك .. ماادري شلون اشرح هالشي بس هو عباره عن دائره من الرز البني خفيفه جدا 

وطعمه قريب الى البوب كرون .. انا اخذت النوع اللي مافيه ملح ، وفيه انواع كثيره من هالماركه شي لوفات وشي عادي 

الحبه الوحده فيها ٣٠ كالوري .. انا احب اكلها ساده او احط عليها شوي لبنه لايت و زعتر او ممكن جبن ابيض مع زيتون 

او مسحه خفيفه من البيستو مع شريحه حلوم مشويه .. مع كوب شاي ياسلام احلى سناك خفيف ويشبع . 

شابوره من امريكانا ، احب الشابوره عموما واكلها الصباح اذا مالي نفس اسوي فطور من قلب تشبع 

هالنوع حلو وقليل بالسعرات وافضل شي لقيته بالسوق لحد الان .. هالنوع بالذات .. اللي مكتوب عليه Rich Rusk ، لانه امريكانا عندها كثير انواع ، بس ابحثو عن هالنوع ، وفيه منه زي مااخذت انا بالحبوب المتكامله او قليل الدسم ويكون لون العلبه ارزق وفيه نوع ثالث اتوقع اسمر ، مااذكر بصراحه بس دايم اخذ هذا او الازرق ،  وهذا فيه ٤٣ كالوري  للكيس الواحد ، والكيس فيه ٣ حبات شي جيد 

موجود ب كارفو وسبينس والسعر مااذكر بس مو غالي . 

نجي لهذا الشي اللي وقعت في غرامه ، دايم اشوف باليوتيوب وعموما الاجانب ياكلون شبس من الخضار 

بس ماالاقي هالشي عندنا ، وفجأه شفته وجربته ، فعلا لذيذ وجدددداااا وعن نفسي اجيبه كمكافأه لي ، الكيس صغير والكميه معقوله بس شوي عاليه بالسعرات يعني الكيس كله فيه ٤٣٠ كالوري 

هذا الموجود الان وبظل ابحث الى الاقي عن شي يشبه وبسعرات اقل 

بس حلو انه من فتره لفتره ادلل نفسي فيه .. سعره ب ٩ دراهم موجود ب سبينس وجيان 

نجي للكوفي انا انسانه عاشقه للكوفي بشكل مجنون يعني قبل كنت اشرب ٤ اكواب يوميا 

بس حاليا كوب واحد باليوم وساعات مااشرب ، فحلو التقدم اللي وصلت له ، وجربت كثير انواع غير نسكافيه 

لانها تزعجني جدا معدتي ماترتاح لها ابد .. فجبت هذي ومعدتي تقبلتها ، النوعين حلوين 

هالعلبتين ممكن تجلس معاي شهرين الى ٣ شهور بحكم اني مااشرب كل يوم ، وساعات اشرب قهوه ساده 

فيعني حبيت احط هالشي للي يعاني مثلي من نسكافيه 

والسعرات معقوله بس الدهون عاليه بصراحه بس من فتره لفتره نقول جيده وافضل من نسكافيه بمراحل .. 

...

هذا كل اللي في جعبتي حاليا وان شاء الله تستفيدون من تجربتي 

وفي كل متابعه للسلسله بصور اشياء جديده واحطها وتكون مرجع للكل 

Healthy LifeStyle -- الحـياة الصحيـة ٢

السلام عليكم 

رجعت بالجزء الثاني من الحياة الصحية 

وهالجزء خاص بالأكل 

ووش النظام اللي اتبعته 

ان شاء الله بجاوب على كل الاسئله اللي جتني 

واللي ماتابعت الجزء الاول تشوفه وترجع لهنا 

---

اخصائية التغذية قدمت لي نظام السعرات الحراريه 

١٣٠٠ سعره حراريه 

بكتب لكم النظام كامل 

هذا النظام مناسبني انا ممكن مايناسب غيري لاني اعاني من نقص فيتامين دال و الكالسيوم و اعاني من القولون 

ف هي زادت لي الاشياء الغنيه بالكالسيوم وقللت لي الاكلات اللي تثير القولون 

وعلامه # تشير الى نوع او خيار لوجبه واحده من الاختيارات اللي حطيتها 

الفطور :

#  ٢ توست اسمر او ١ خبر عربي صغير او صمون 

     + ملعقتين لبنه قليله الدسم 

# بيضه مسلوقه او مشوحه على النار + خس - طماطم - خيار 

( البيض ل ٣ مرات بالاسبوع )

# كورن فلكس صحي + كوب حليب قليل الدسم 

# كعك او شابوره للرجيم + كوب حليب وشاي 

سنـــاك مابين الفطور والغداء :

# حبه فاكهه  أو حبه بسكويت دايجستف اللايت + كوب شاي اخضر 

الغداء :

لحم - سمك - دجاج ( قد كف اليد ) + ملعقه غرف رز او شريحه توست او ملعقه معكرونه او نص خبر عربي صغير 

+ سلطه او خضار مشويه او مسلوقه او على البخار 

العصر او سنـاااك :

# ٣ حبات بسكويت مالح + شريحه جبن قليل الدسم 

# ١ شريحه توست + شريحه جبن قليل الدسم 

# حبه فاكهه او سلطه فاكهه 

شاي اخضر مع كل سناك 

العشاء :

# مثل الغداء بس بدون الزر او المعكرونه يعني بدون نشويات 

# مثل الفطور بس ١ توست او نص خبز عربي صغير 

# شوربه خضار + سلطه + ١ توست مع جبنه قليله الدسم 

قبل النوم :

حبه فاكهه + حليب او لبن قليل الدسم او روب قليل الدسم 

-----

تقريبا اتبع هذا النظام لمده ١٠ شهور والحمدلله ماشي معاي 

بكتب اشياء تفيد وتساعد 

- اختارو دايما قليل الدسم و الاسمر بكل شي بحياااتكم 

وقارو السعرات الحراريه مثال ( اذا بشتري لبنه قليله الدسم اوقف عند الرف واشوف كل انواع اللبنه قليله الدسم واختار اقل وحده فيها سعرات حراريه ) ونفس الشي للخبز والتوست .

- صوص السلطات اختارو دايما الخفيفه اللايت والافضل تبتعدون عن الصلصات الكريميه زي السيزر والفرنسيه 

او احلى صوص اللي احنا نسويه ( ملعقه عصير ليمون + ملعقه خل تفاح + ملعقه زيت زيتون + ملعقه خل البلسمك ) ادوخ عند هالصوص .. لذيذ 

-اذا تحبون طعم القرفه ضيفوها على الاكل فهي تزيد عمليه الحرق .

- صحن الغدا او العشاء المفروض يكون بهالشكل نصه سلطه و ربع بروتين وربع نشويات .

بحط لكم صوره والاغلبيه يمكن شايفها وهي كميه السكر في الاكل او الحلويات والمشروبات 

الاكل الصحي والطبيعي حلو بس احنا تكبرنا عليه وصرنا ناكل الصناعي 

اللي بيتبع هالنظام ياليت يحاول على الاقل يكون صحي قد مايقدر

حسابات مميزه ومفيده بانستقرام انا استفدت منها

http://instagram.com/bayan2sj  الجميله بيان 

http://instagram.com/Diwani_Diet  محمد وقصه نجاح مصوره 

اتمنى تتابعونهم 

وصلنا لنهاية الجزء وطبعا واكيد فيه اجزاء والى الابد 

وش حابين اتكلم عنه في الجزء اللي بعده
اكمل عن الاكل او شي غير ؟

Healthy LifeStyle -- الحـياة الصحيـة ١

سلسله الحياه الصحيه ١ 

بسم الله الرحمن الرحيم 

مثل ماوعدتكم اني ان شاء الله بسوي هالسلسه 

امس كان موعدي مع اخصائية التغذية والحمدلله فيه نتائج حلوه 

وزني كان : ٦٩.٨ كيلو 

وحاليا: ٦٩.٢ كيلو 

صح مانزل كثير بس الحمدلله راضيه بالقليل 

هالشهر انا مريت باشياء كثيره ممكن هي اللي قللت من خساره الوزن

كانت عندي مواعيد كثيره اسنان وفيشل وغيره 

وكان العيد واهلي موجودين فالطلعات كثيره والروتين شوي يهتز 

بس الحمدلله فوق كل هذا فيه خساره بالوزن 

الوزن اللي خسرته هو ٦٠٠ غرام 

بس بين على جسمي اكثر وخصوصي الخصر والبطن 

وباخر اسبوعين من هالشهر بديت اتدرب مع مدربه بالنادي 

لمده ساعه الى ساعه ونص 

----

شكل جسمي ؟

كمثرى وهو بكل صراحه معاناه وخاصه باللبس نحيف من فوق وسمين من تحت في منطقه الارداف 

وخصر صغير 

تقريبا اغلب لبسي تنانير او بناطلين لازم اضبط الخصر لانه دايم كبير 

يعني حاليا البس قياس ١٢- ١٤ من فوق

وتحت ١٤-١٦ وغالبا ١٦ بس هدفي في الفتره الجايه البس ١٤ … 

---

التمارين ؟

ماحبيت اتكلم عن التمرين بدون صور ف جبت صور من النت توضح التمرين كامل عشان يكون بشكل واضح ومفهوم 

تقريبا هذي التمارين اللي سويتها مع الاجهزه 

هالتمرين جميل جدا للذراع كامله 

اسوي هالتمارين ٢٠ مره كل تمرين ٢٠ مره 

--

هالتمرين ممتاز جدا يشتغل على العضله الزند نفسها وبتحسين بألم وقتها وزياده يشغل عضله الفخذ بنفس الوقت 

---

وهالتمارين جدا ممتازه وساعات نسويها بالكلاسات بالنادي 

بس اذا عندك اثقال بالبيت حلو سويها وبالعدد المكتوب او جيبي علبتين ماي وعبيهم رمل وتصير لك اثقال 

والتمرين هذا ممتاز لعضله الزند و للاكتاف 

--

---

الاكل ؟

بتكلم عنه ببوست لحاله لانه طويل .. وبعض السناكات او الاشياء اللي اكلها حاليا

مخلصه ف يبي لي اروح للسوبر ماركت واصور واجي اعرض واتكلم ببوست شامل ان شاء الله 

---

معلومه ؟

٥ مشروبات تساعدك في خساره الوزن ؟

[ شاي غير محلى اسود او اخضر - الماء - القهوه السوداء - حليب خالي الدسم - عصير الخضار ]

بتكلم عن حبي للقهوه بجميع اشكالها 

احب دائما اذا كنا في كوفي شوب اطلب موكا بس حاولت اغير شوي

صرت اطلبها بحليب خالي الدسم منها اقلل مقدار الفات او الدسم ومنها استمتع بقهوتي بدون مااخذ سعرات مالها لزمه

والطعم عن جد مايفرق وعندي احلى بحليب خالي الدسم تكون خفيفه ولذيذه 

وللي يحبون الكوفيات الدسمه ترى التغيير حلو انتي في النهايه تبين طعم القهوه مو باقي النكهات 

يعني كريما و كاراميل وغيره 

التغيير حلو ومطلوب وتغيير عادات صغيره = تغير الارقام على الميزان

مافيه شي مستحيل نصيحتي حبي نفسك واعطيها حب لانها جوهره ثمينه تستاهل اغلى ماعندك 

---

فيـتاميـناتـي

السلام عليكم 

حابه اتكلم عن الفيتامينات اللي اخذها 

خصوصي بعد مانزلت من وزني تقريبا ٢٤ كيلو 

طبعا اولا الحمدلله على الصحه والعافيه بس خلال هالفتره جسمي

وشعري وبشرتي تاثرو جدا خلال هالنزول و زياده على هالشي 

اكتشفت بعد فحص الدم انه عندي فيتامين دال و الكالسيوم نازلين جدا

والحمدلله خلصت كورس علاج الفيتامين دال و الكالسيوم ورجع لمستواه الطبيعي.

وفي نفس الوقت كنت اخذ هالفيتامينات اللي بتشوفونهم بالصوره تحت 

من اليمين دائما وابدا 

فيتامينات كامله او ملتي فيتامين يعوض اي نقص واخذ منه حبه وحده باليوم 

وبعد وجبه يفضل وجبه الفطور 

وسعره ٧٨ درهم 

والثاني فيتامين E ومعروف بفوايده للبشره 

وبعد حبه وحده لليوم وبعد وجبه 

وسعره ٩٩ درهم 

والثالث والاخير هذا الحب 

بايوتين ممتاز جدا للشعر والبشره فرقت على شعري بعد مااخذته يطول بسرعه 

بس فيه شي احب انوه عنه وهو يزيد سرعه نمو الشعر بالجسم كله 

يعني مثلا اذا تشيلين شعر جسمك كل شهر بيصير تشيلينه كل ٣ اسابيع 

بس انا ماعندي مشكله لاني فعلا حابه نتايجه على شعري 

و تقدرين تاخذين من حبه واحده الى ٤ في اليوم 

بس طبعا بعد وجبه 

وانا اخذ ٣ في اليوم بعد الفطور والغدا والعشا 

والحبه نفسها جدا صغيره 

وسعر العلبه ٤٥ درهم 

بس اهم نصيحه اذا كنتي حامل او مرضعه ماانصحك تجربين اي فيتامين بدون استشاره الطبيب 

وشكرا لكم 

Weight Loss

بسم الله الرحمن الرحيم 

معاناتي مع السمنه هي 

احد الاسباب اللي خلتني افكر بعالم التدوين والكاتبه طبعا هذا غير حبي للمكياج وعالمه 

فقررت اكتب عن الواقع اللي اعيشه واللي غيرت الكثير منه 

من صغري وانا اشوف نفسي اسمن شوي من اللي حولي خصوصي في المدرسه 

حتى فيه الصف السادس اذكر مره اخذونا الي غرفه الممرضه ناخذ الوزن والطول لجميع طالبات الفصل 

اذكر وزني وقتها كان ٥٠ بالضبط و مااذكر اني شفت وزني بعدها بالخمسين اطلاقا 

وتمشي الايام والموضوع بالنسبه لي عادي لاني كنت اشوف فيه بنات مثلي وفيه بنات اسمن مني بمراحل بس 

تفكيري كان عادي دام اني القى مقاسي بالسوق ويطلع حلو ومرتب خلاص يعني انا طبيعيه 

وتمر الايام عادي من الابتدائي الى الثانوي والجامعه 

جت فتره قررت اخذ الهاردسك اللي عندي وفيه صوري وصور العايله قلت بسوي لي فايل واحط صوري فيهم

لاول مره اشوف نفسي بهالشكل واقارن نفسي بنفسي مااستوعبت ولا قدرت اربط بين اللي اشوفه وبين اللي بعقلي اني طبيعيه 

سكرت الملف والهادر كله وتركته ودخلت مرحله الضياع شلون ومتى 

سالت نفسي ليه مااحد قالي انتي سمينه 

او ليه انا ماانتبهت لنفسي 

ماكنت اشوف نفسي 

مرحله صعبه بس حلوه لانه فيها صراحه مع النفس ومراجعه اسباب كثيره 

مرت هالفتره وبعدها اشتركت بنادي صحي 

واخترت نادي فيتنس فيرست نادي عالمي ومشهور وله فروع كثيره واهم شي انه فيه فرع قريب للبيت 

بعد الاشتراك والدفع جا اول يوم اروح فيه رسمي وابدا 

الصدمه الكبيره لي كانت هي وزني ايه نعم وزني الجميل 

وزنت نفسي هناك وكان بالضبط ٩٣ كيلو وكان هذا بتاريخ ٢١/٥/٢٠١٠ 

قريب جدا من ١٠٠ كيلو 

واخذت وعد على نفسي اني ماارجع لهالوزن لو ايش يصير 

مستحيل 

بديت بالتمارين على الاجهزه وادخل كم كلاس بالنادي واخفف من اكلي 

وبتاريخ ٢٦/٦/٢٠١٠ نزل وزني الى ٨٩،٢٠ كيلو الحمدلله 

وبالتخفيف بالاكل و التمارين وصلت الى ٨٠،٥ كيلو 

وبدا وزني يثبث وبنفس الفتره كنت اقرا عن رجيم الاتكوتين في اقلاع 

وقررت اجربه  وفعلا نزلت عليه وتغيرت مقاساتي تمااااما 

طبعا استمريت عليه لمده ٧ شهور تقريبا 

من ١٦/١/٢٠١١ الى ١/٨/٢٠١١

ماكنت امشي عليه مضبوط وبالحرف الواحد لكن نزلت عليه ووصلت الى  ٧٦ كيلو

بس بعدها وقفت شوي شوي خصوصي انه تعب جسمي وبشرتي وشعري

شعري يتساقط بشكل خيالي وبشرتي تعبت وجهي شاحب واسود 

كنت ذبلانه باختصار 

وبديت اعالج شعري واحاول اكل شي صحي 

بس ماكنت اعرف وش اكل شي صحي زين ومفيد ولا يتعبني 

وبدا وزني يرجع شوي شوي الى ان وصل الى ٨٣،٥ كيلو  

طبعا هالزياده صارت في سنه وشوي ضايعه واحاول اخفف بس حبي للاكل كان اقوى

بس بعدها قررت ابدا صح لانه احدد قراراتي انه مافيه رجيم ابدا 

واحاول اثقف نفسي وقررت اتخذ نمط الحياه الصحيه 

بعد القراءه تكونت عندي معلومات جيده بس تحتاج الى توجيه صحيح وبصراحه خفت اكون بروحي بهالقرار 

وانتجهت الى عياده التغذيه وهي تابعه الى هيئه الصحه بدبي وتابعه الى حكومه دبي 

وهي مجانيه للاماراتيين فقررت ابدا وقلت ماراح اخسر شي 

وفعلا ماخسرت شي الا ربحت نفسي وصحتي خصوصي انه فيه احد يتابعني باستمرار

بديت مع الاخصائيه بتاريخ ١٢/١٢/٢٠١٢

يوم مميز بحياتي 

رحله لمده ١٠ شهور جميله بكل مافيها وصلت فيها الى ٦٩،٨ كيلو

الحمدلله الحمدلله الحمدلله 

وناويه اكمل باذن الله اكل صحي ومدروس وحياه صحيه وطبعا ماتخلو من التمارين 

واذا حابين ممكن اسوي سلسله متابعه كل شهر 

لاني كل شهر اروح للاخصائيه واوزن وممكن احط صور لاكلاتي والتمارين 

يعني سلسله متكامله 

بعد كم يوم موعدي مع الاخصائيه وبرجع اكتب لكم وش صار وكم نزلت وايش سويت هالشهر 

وبس هذا كل ماعندي اليوم 

واتمنى لكم حياه صحيه وراحه نفسيه