My Favorite - مفضلاتي لهذي الفتره

السلام عليكم 

من قرن يمكن ماكتبت عن مفضلاتي ، يمكن لاني كنت استخدم اشياء يعني مو كثير حابتها عشان اخلصها 

هالمره اشياء احبها وتعجبني ... 

+ زيت جدايل للشعر من عبد الصمد القرشي .. ب ٥٥ او ٦٥ درهم .. 

المفروض يكون لونه اخضر لانه العلبه حق تساقط الشعر بس انا اخلط ٢ مع بعض والكل من عبدالصمد القرشي

اخلط زيت جدايل لتساقط الشعر + زيت جدايل مطول الشعر  والنتيجه هاللون ... 

من اروع الزيوت اللي استخدمتها لشعري ولاحظت الفرق ، شعري ينبت وتحسين فيه اذا لمستي فروه الراس والطول يفرق معاي ، انا اروح لصالون واخليهم يحطونه لي ويسون لي مساج لفروه الراس وبعدها حمام بخار لانه ماعندي ...

اذا التزمتي بهالشي لمده شهرين يعني كل اسبوع مره للصالون بتشوفين الفرق ، اهم شي مساج لفروه الراس وحمام بخار ، احلى نتيجه ..   وهالشي جربته من قبل والحين رجعت له ....

اللي صابغه شعرها لاتقرب من اي زيت عشان لون الصبغه مايتغير .

.....

+ ماسك مرطب للوجه من ديرمالوجيكا Skin Hydrating Masque ، ماسك مرطب مرطب مرطب ممتاز لي انا بشرتي مختطله الى جافه وحساسه بعد

وهالماسك يعطيها الرطوبه المطلوبه ومايخلي وجهي دهني ، ثقيل شوي بس ممتاز .  " متوفر في محلهم في دبي مول في الطابق الاول و بعد في صيدليات بوتس في دبي " .

+ شامبو منقي من Elemis ، ممتااااز ينظف شعري بحكم انه دهني ومايجفف اطراف شعري ، عجبني ، وريحته كاني في سبا وانواع الريلاكس وقت الاستخدام . 

+ ماسك للشعر من كيراستاس ، ممتااااااز كتبت عنه هناااااا  شوفو الموضوع كامل . 

+ مقشر بالملح للجسم ، ماتوقعت اني بعشقه هالكثر فضيييييييييع فضييييييع ، احس يشيل الجلد الميت كله 

احسه يشبه ملح الحليب يوكو اسمه الظاهر ، بس عجيييب ، اخذته من جمعيه الاتحاد ب ٢٥ درهم ، وفيه بانواع وايد

فواكه و ورد وغيره بس انا اخترت البابايا وصناعته تايلنديه . 

....

+ زيت الماكاديما ، شاريته من زمااان واستخدمته فتره وبعدها نسيته في احد الادراج ، ورجعت له مره ثانيه وحبيته من جديد ، ثقيل شوي وكميه قليله جدا تكفي ، انا احطه بس على اخر اطراف شعري ، يرطبها . 

+ العشق الابدي سيروم لورياااال ، صراحه مااذكر كم علبه خلصت من هالشي ، عجيب وخيالي شوي عليه ، 

احطه من تحت اذني الى الاطراف وهو مبلول بالماي ، يحافظ ويرتب شكل تموجات شعري ، مااستغني عنه ابد ... 

+ زبده الجسم من بودي شوب بالشيا ، رقم واحد بالنسبه لي ، خصوصي الشيا ، روعه روعه روعه ، ترطيب جميل وريحه انيقه .

......

+ مسك عبدالصمد القرشي ، مااتوقع فيه احد مايحبه ، هذا العشق ، نظافه واناقه وكل شي  ... 

+ هالعطر وش اقول عنه بسس ودي اشتري المصنع كله ، نسخه طبق الاصل من ريحه مسك عبدالصمد بس بخاااااخ ورخيص ب ١٢٠ ، ومحل عبد الصمد عندهم المسك بخاخ ب ٥٠٠ الظاهر، هذا ارخص ونفس الرييييحه ، شي شي . 

+ بخاخ الجسم مون باث من باث اند بودي شوب ، احب ريحته ويمكن ٣ مره اشتريه ، احبه وريحتها فيها مسك بعد . 

+ تونك للوجه بالخيار وماي الورد من هيرب لاين إسنتشيالز ، روعه

وبارد على البشره ، ان شاء الله ريفيو كامل عن المنتجات اللي 

عندي قريييب ... 

.....

+ زبده الشيا الاصليه والخام ، من شيا ميراج ، رووووووعه

 استخدمها لشفايفي وشوي على الاظافر خيااااال خياااال . 

+ قلم الحواجب من ريفلون ، هو قلم وجل في واحد ، الجل خلص

 وماصار يطلع منه شي ، والقلم جميل وخفيف ابد مو قوي

وتقدرين ترسمين فيه بخفه ويطلع طبيعي جدا ، بس خلي ايدك

 خفيفه بالرسم ... 

+ كونسيلر او كوريكتر من بينفيت ، اخذته اخر رمضان و ووقعت

 فيه حبه ، هم ٣ درجات انا اخذت اغمق درجه ومناسبني

لانه هالاتي غامقه حلو ومرطب بنفس الوقت ، وكميه صغيره تكفي 

اذا زدتها يبدا يخطط حلو للاستخدام اليومي .. 

+ سيروم للرموش من نيو لاش ، ممتاااااز ، انا ماشريتهم هم

 ارسلوه لي بس ماتوقعت انه ممتاز وجبار قد كذا ،

طول لي رموشي وافرق عليها اذا حطيت الماسكرا ،، روعه ..

.. بكتب ريفيو كامل عن هالسيروم قريب ... 

.....

+ اسواره انا سويتها ، " ترى احب اسوي الاكسسوارات " ، احب

 البسها مع ساعتي ولونها حلو وجذاب . 

+ ربطه للشعر ، مااستغني عن هالنوع ممتاااز ولا يقطع الشعر

 ولانه مافيها الحديد ، حتى مافيها اي مكان يجمع الطرفين 

ممتاااااااازه .. 

....

وبس هذي كل مفضلاتي لهالفتره ... 

منتجات خلصتها في يوليو واغسطس - July & August Empties

السلام عليكم ...

اول شي لاتنسوا الاشتراك بالمودنه عشان يوصلكم كل جديدي

اضغطو على المستطيل الازرق

..

من المواضيع اللي احبها واحب اتابعها ، منتجات خلصتها في شهر يوليو و اغسطس ،

وحاولت هالمره اني اخلص كل شي باقي فيه شوي او اذا فيه سامبلز استخدمهم واخفف لانها بدت تتكود وتصير حوسه

في رمضان تقريبا يوميا احاول استخدم شي غير ماسك او منتج جديد جاني سامبل او من العلب اللي توصلني كل شي

والنتيجه هالمره كبيييره

ونبدا سوا

..

من اليمين :

- العلبه الزرقاء مزيل مكياج العيون من كلارنس ، حلو بس فيه ريحه عطر قويه وماحسس لي عيوني بس اخاف مع الاستخدام الطويل يأثر على عيوني بما انها حساسه .

- الحبيب بايودريما ، مايحتاج اي تعليق غير انه رقم واحد بالنسبه لي .

- ماسك مرطب للوجه من كلارنس حبيته ويرطب بشرتي بشكل حلو ، باقي لي كم سامبل منه بعد .

- مناديل للمكياج من ماركه كول اند كول ، ماحبيتها تشيل المكياج بس مو بنفس نتيجه نيتروجينا .

- كريم اساس من لوريال خلصت نصه بصراحه بس عندي من زماااااان وخلاص .

- سامبل لكريم اساس من سيفورا ، حبيته ودرجته حلوه علي ، وباقي عندي بعد سامبل منه .

- قلم كحل اسود من ديور حلو بس خلاص بعد قديم ، ترى كنت اسوي تصفيه بعد اي شي قديم خلاص باي باي .

- محدد للشفايف من لوريااال هذا عشق عشق عشق صح لونه غامق بس احب هالالوان علي المحدد حلو وحتى كان معاه روج جميل بس خلاص خلصته من زماااان .

- قلم كحل تركواز من ايتود هاوس اللون واضح وثابت ، بس خلاص قديم .

- قلوس من نكس لونه جميل احمر على عنابي شوي كان حلو بس خلاص خلص .

...

- بخاخ لمعالجت تساقط الشعر من لوريال ، عادي ماحسيت انه سوا شي غير انه ريحته حلوه للشعر .

- السيروم العشق كتبت عنه هناااااا وتوني اخلصه اقتصادي بشكل عندي من زماااان ، بس حلووو جدا وانصح فيه .

- سن ان هالشي احبه يفتح لون الشعر كانك صابغته وانا عجبني انا اصلا شعري بني بس يمسك الصبغات والحنه بسرعه وحبيت هالبخاخ انه يفتح لون شعري حيييل حيل حيل حبيته ، فتح لون شعري كذا درجه وصار لون شعري بني فاتح على اشقر حيل حلو انا عن نفسي عاجبني ، واذا رحت لاي صالون يسالوني عن لون شعري او وين صابغته ، بس يجفف الشعر مثله مثل اي صبغه ، شريته من الكويت من صيدليه بوتس بس ماشفته عندنا في دبي يمكن فيه اماكن انا ماشفتها.

- شامبو وبلسم للشعر جاني من العلب اللي تجيني كل شهر ، الشامبو هذا معالج لتساقط الشعر تحطين الشامبو وتسوين مساج لفروه الراس لمده دقيقه وبعدها تغسلينه ، ريحته نعناااع قوي بس منعشششششش ، والبلسم بعد حلو .

- فيتامين للشعر والبشره والاظافر جدا حبيتهم اتوقع ٣ علبه اخلصها ، واللي لاحظت انها تطول شعري بشكل حلو .

...

كلهم مضمضه للفم

- الاخضر ماحبيته بطعم التفاح الاخضر .

- طعم شي لا يطااااق ابد ابد  الحمدلله انه كان صغير .

- كولجيت ، هالنوع ممتااااز بصراحه كان عندي حجم صغير خلصته وجبت هذا وخلصته وتوني جبت واحد اكببر ، ممتاز نصحني فيه طبيبي للاسنان .

- من اورال بي بعد حلو ويشبه كولجيت .

...

- سامبل لعطر من كارتيير حلو بس مو ذوقي ابدا ، بس خلصته .

- تشيري بلوسم من باث اند بودي ، حلو بس ماافكر اشتريه مره ثانيه فيه عطور احلى من باث .

- العشششششق ، سبريه للجسم من كول اند كول خيال خياااال ، احب الروايح اللي تكون بودره ونظافه .

- معطر للغرفه والفرش ، عادي وماكان ثابت ابدا ، اخذته مع مجموعه عطور من القريه العالميه .

...

- مقشر بالملح من شركه بترا ، خياااااااااالي خيااااالي خيالي احب جسمي بعده نظيف ويشيل الجلد الميت من قلب

لهم كشك ب المارينا مول بدبي .

- فازلين ، طبعا استخداماته لا تعد ولا تحصى .

- كريم الجمال من دوف ، ماعمري فكرت اني اشتريه اصلا ، بس جاني من العلب اللي توصلني كل شهر ، بس حبييييييييته حبيته ريحته تكفي تكفي ، شي نظيف وانيق وباااااارد ، كنت استخدمه لجسمي وترطيبه حلو خفيف مايدبق ابد .

- كريم ليلي من ماركه كول وي ، عادي ماحسيت بشي ، واصلا سامبل وصغير .

- لوشن للجسم من سيفورا كان هديه لاني مشتركه بالبطاقه ، بس ماحبيته ريحته قويه وسائل بزياده كانه ماي .

- كريم بالبارفين لليدين من باث اند بودي هاللاين حلو بصراحه ، واستخدم هذا الكريم على ايدي و اقدامي ، ترطيبه قوي وعميق وشوي يدبق بس حلو تحسين بالفرق  بالاستخدام ، يناسب البشره الجافه ، والترطيب اللي فيه من شمع البارفين فعشان كذا قوي .

....

- مرطب من لابيلو بالتوت ، الترطيب حلو بس ماافضله لانه يخلي طبقه بيضا على الشفايف ، يعني ماانصح احد يشوفك فيه .

- عدساتي المفضله من جونسن اند جونسن ، دايما اشتريها وماافكر اغيرها الا اذا نزلو شي جديد ومن جونسن بعد .

- لصقات للانف من بيوريه ، عشق عشق عشق ، احبها لاني من احطها احس بحراره وبعدها خلاص من تجف تشيل كل شي تقريبا ، ممتااازه صح انه غاليه وتعتبر اغلى شي بالسوق من اللصقات بس ممتازه ، سعرها ٣٣ درهم .

- ديودرنت من ريكسونا ، هذا بعد العشق ، وهذا بريحه البودره عشق ماايحتاج اتكلم صرتو تعرفون حبي للبودره .

.....

- امبولات الشعر الجميله ، صار لي قرن وانا بكتب عنها بس جميله اخذوها بدون تردد .

- افشل شامبو جاف استخدمته هالنوع بالذاااات اللي مخصص للشعر البني ، مو حلو ابد ابد

اذا لمست شعري ايدي تصير بنيه واذا سبحت اشوف اللون ينزل مع الماي ، ماحبيته ابدا.

....

- مسك من عبدالصمد القرشي ، خلصته وبعد ماخلصته كان فيه بقايا ف سويت DIY هناااااااا طلو على الموضوع وخلصته بعدها .

- سامبل  من كارتير خلصت قبل واحد وهذا الثاني .

- زيت للفواحه من باث اند بودي بريحه القرفه ، احب ريحتها بس هذا الشي كل ماحطيته صدعت وحسست واعاطس فخلاص مااقدر عليه .

- عطر للفواحه جميييييييل بريحه المشمش حبيته بس ريحته نظافه تهبل ، اخذته من سبينس مالقيت هالماركه بمكان ثاني .

- عطر توهقت فيه بصراحه اخذته بالغلط وطلع ريحته ياسمين ، ماحب هالريحه اببببد  حاولت يمين يسار بس كلش مااقدر استحملها ف خلاص يعني .

- رش للغرفه بنفس ريحه الاخ اللي فوق ، هذا شوي اخف من الزيت بس مااقدر عليه يتعبني .

...

- كريم للاقدام من بوتس جميييل جدا ، ممكن اشتريه مره ثانيه بس عندي الحين كذا شي ابي اخلصهم بس حلو .

- مضمضه صغيره من كولجيت ، بخلي هالعلبه اعبي فيها من الكبير اخليها للسفر او لاي مكان لانه حجمها حلو .

- محلول عدسات ، اكثر محلول حبيته ممتاااااز ، اشتريه من محل النظارات اللي بالهنا سنتر في دبي ، مااعرف اذا فيه محلات ثانيه تبيعه .

- عدسات توتي خلاص خلصت مدتها " بحط لها صوره تحت "

- مقشر للجسم من بودي شوب حلو بصراحه وكتبت عنه هناااا 

...

هذي عدسات توتي المحدده ، جمييييله بصراحه واحبها علي ، هذا اللون البني من المجموعه المحدده بس على العين يكون عسلي ، بس حلوه وتحلي العين ، عن نفسي احب الالوان العسليه علي وتطلع حلوه وكانها طبيعيه .

....

- ماسك من اولاي ، عادي ماشفت شي واااو باقي ٢ باستخدمهم .

- كوريكتر من بوبي برواااان ، عشق عشق عشق يخفي هالاتي وممتاااز بصراحه وبرجع اشتريه باذن الله .

- كونسيلر من ماك استخدمت كميه كبيره بس خلاص بدا يخطط ويحوس الدنيا ووقفته من فتره وخلاص هو اصلاا من زمان عندي ومابرجع اشتريه ، افضل برو لونغ وير .

- كريم اساس من ماك ، خلص من قرن بس توني اشوف العلبه وبخليها اذا خلصت اشياء من ماك عشان باك تو ماك

مابرجع اشتريه لانه يطلع لي حبوب و عندي الافضل منه .

.....

- قطن دوائر اشيل فيك الميك اب او استخدمه للتونر .

- ماسك للشعر من بايولجي من ماتركس هذا للشعر الضعيف يهببببل هو والشامبو والبلسم خلصت الباقي من زمان ،

ريحه المجموعه هذي تهبببببل جميله جدا ، شعري بعد الشامبو والبلسم احسه زبده من كثر النعومه . ممتاز .

- زيت للشعر من دابر امبلا ، كنت استخدمه اذا حطيت لشعري زيت الجدايل على الجذور كنت احط من هذا على الاطراف.

وبسسسسس خلصصصصصصت ، شعور جميل يوم تخلصين كل شي ومنها عشان اعرف اللي احبه واللي مااحبه .

شاركوني تجاربكم مع اي منتج من اللي جربتهم او شي تنصحوني فيه .