December Empties 2014 || أشياء خلصتها في ديسمبر ٢٠١٤

السلام عليكم 

هالشهر حاولت اخلصت اي شي باقي فيه شوي قبل ماافتح شي جديد ، 

وفعلا انا احاول اخلص اكبر عدد من الاشياء اللي عندي ، لانه بصراحه عندي اشياء وايد حابه اجربها

واكتب رايي عنها بس ماودي افتح اشياء وانساها وتخرب .. 

هالشهر يمكن اقل شهر خلصت فيه اشياء بس ماعليه ، المهم فيه تقدم حلو .. 

...

من اليمين : 

- كريم للجسم من ايليزابث اردن طقم مع العطر ، حطيته مره على ايدي وماقدرت استحمله ايدي كانت تحكني وتاكلني 

وعلى طول غسلتها زين ... 

- شور جل من فازلين بالرمان ، جميل جدا على الجسم ويآدي الواجب ، بس الحلو فيه ريحته ، خيال فواحه في الحمام 

حلوه ومميزه .. وحاليا استخدم صابون الايد بنفس الريحه ياسلام روعه .. 

- شامبو من Elemis ، رائع وقد كتبت عنه بمفضلاتي هنا 

...

- لصقات للانف لإزالة الرؤوس السوداء من ذا فيس شوب ، حبيتها وممكن ارجع اشتريها ... 

- ماسكرتي وعشقي الابدي من كلينك ، هذي تغنيني عن اي ماسكرا استخدمتها بحياتي هذي رقم واحد وبعدها على طول

ديور بلاك اوت ... شي شي شي اللي ماجربها لازم يجربها طول وكثااااافه ... كتبت عنها من زماااااان هناا 

- زيت الماكاديميا للشعر ، رائع وكتبت عنه هنااا ، اكيد بشتريه 

...

- كريم للوجه من  The art of soap ، صراحه مااستخدمته لوجهي لانه عطري بزياده وخفت وجهي يتحسس منه ،

استخدمته على جسمي بس ريحته قويه ونفاذه ، مو الكل يتقبلها ، وكاني استخدم زيت عطري قوي ..  مستحيل اشتريه ..

- كريم ليلي للجسم من crabtree & evelyn باللافندر ، جميل جدا ثقيل شوي بس ترطيبه عالي جدا ممتاااز 

ممكن ارجع اشتري منه .. 

- زبده الشفايف من بودي شوب بالشيا ، بالبدايه حبيتها وكتبت عنها بالانستقرام ومدحتها ، بس بعد فتره من الاستخدام

صارت هالزبده تجفف شفايفي و تجرحها من الاطراف .. مابرجع اشتريها ابدا .. 

...

وبس هذا كل اللي خلصته ...

" استغفر الله واتوب اليه "

Review Macadamia Oil Healing Oil Treatment || مراجعه زيت الشعر من ماكاديميا

 Review Macadamia Oil Healing Oil Treatment مراجعه زيت الشعر من ماكاديميا 

السلام عليكم 

كلنا نحب نعتني بشعرنا وندور اجمل الوسائل اللي تعطينا شعر جميل وصحي ، بديت بسلسه العنايه بالشعر 

وحابه اكملها ان شاء الله وكل ماشفت منتج جميل ويستاهل اكيد بكتب عنه طبعا بعد تجربتي له .. 

اليوم عن هالزيت من ماكاديميا  مجموعه عنايه نزلت للسوق وسوت ضجه كبيره ، انا عن نفسي اقتنيت شغلتين ، 

هذا الزيت و الماسك ... وتجربتي حلوه معاهم .. اليوم بتكلم عن الزيت واذا حابين بتكلم عن الماسك في الفتره الجايه .. 

من مميزاته : 

- يستعمل على الشعر النظيف الرطب او الجاف .

- يستخدم علي الشعر بعد السشوار عشان يشيل اي نفشه ، ويعطي لمعه حلوه .

- يعتني باطراف الشعر خصوصي للي تعاني من جفاف شديد .

- ممتاز للي صابغه شعرها وخصوصي لو كان لون فاتح ، هذا راح يعطيها حيويه ولمعه .

- يعطي الشعر الحمايه والترطيب اللي ناقصه .

- ممكن تحطين كم قطره منه مع الماسك حقك ، او ماسك الماكاديميا نفسه يعطي ترطيب اكثر . 

طريقه الاستخدام : 

- احط كميه صغييره جدا منه ، الزيت ثقيل شوي وماتحتاجين كميه كبيره منه ، شوي وعلى شعرك الرطب من الاطراف بس 

واذا شعرك جاف ممكن شوي على شعرك كله بس من تحت الاذن ونازل ، لانه قوامه ثقيل وزيتي شوي ماينفع لفروه الراس .

- واذا كان شعرك ناشف او مسشور ، حطي كم قطره منه وعلى الاطراف عشان يعطي لمعه حلوه .. 

* عن نفسي حبيته جدا ومن مفضلاتي بصراحه وايه برجع اشتريه اذا خلص ..

- سعر هذي العلبه ب ٢٤ درهم ، واشوف انه شي ممتاز العلبه صغيره وحلو اذا بتجربينها .. اذا موعارفه اذا راح تحبينه او لا ، وفيه حجم اكبر بس للاسف ماعندي فكره عن سعره ..

ومكان توفره بكل محلات نزيه .. 

وبس هذا كل شي لليوم .. 

ولاتنسون تتابعوني 

..

" استغفر الله وأتوب إليه "