Ultra Doux Oil Blends Remedies || مزيج الزيوت المعالجة بزيت الزيتون والأملا من غارنيية

Ultra Doux Oil Blends Remedies || مزيج الزيوت المعالجة بزيت الزيتون والأملا من غارنيية 

السلام عليكم 

كل وحدة تحب تعتني بشعرها قد ماتقدر وساعات هالشي يكون مكلف للبعض ، بس العناية مهمه طبعا 

ف اخترت لكم منتج جميل جدا وفادني في عنايتي لشعري و سعره جدا مناسب .. 

الزيت هذا فيه منه ٣ انواع : - زيت الافوكادو والشيا ، مناسب للشعر الجاف جدا او الاجعد 

                                  - زيت الزيتون والاملا ، مناسب للشعر الجاف بعمق والمتضرر

                                 - زيت الارغان و الكاميليا ، مناسب للشعر الجاف والباهت 

مزيج الزيوت المعالجة بزيت والزيتون الأملا من غارنييه ، هالزيت واايد حبيته وناسب شعري ولله الحمد 

الزيت طبعا هو مزيج ل نوعين من الزيوت الاول زيت الزيتون والثاني زيت الأملا للشعر ومعروفة نبتة الأملا بفوايدها 

الزيت الحلو فيه انه غير دبق او لزج وهالشي وايد احبه في اي زيت استخدمه عشان يكون سهل وانتي تحطينه وسهل بعد لغسيل الشعر بعد الاستخدام .. 

والحلو بعد انه العلبة سهله في الاستخدام خصوصي لانه الراس العلبة يسهل انج تحطين الزيت على كامل فروة الراس .. 

طريقة استخدامه : 

ترجين العلبة بشكل جيد عشان الزيوت تختلط مع بعض ، لانها تنفصل ،  تحطينه الزيت على كامل شعرك مع شويه تدليك عشان يتغلغل لكل الشعر ، وخليه للمده اللي انتي حابتها 

بالنسبة لي ساعة تكفي .. وبعدها اغسل شعري .. 

وافضل طريقة لغسل اي زيت من الشعر ، تاخذين شامبو شوي في البداية مع نتفة من الماي وتفركين شعرك فيه وبعدين بللية بالكامل بالماي 

اسهل واسرع لانه لو غسلتي شعرك بالطريقة المعتادة اصعب خصوصي انه الزيت مايطلع بسرعه مع الماي ، لازم شامبو شوي اول ..

رائي فيه : 

عجبني جدا يرطب الشعر ، ويخفف من النفشة شوي ، انا شعري ويفي ف ناسبني جدا لانه رتب لي الخصل وخلى شكلها أجمل ، والميزة الثانية انه مايثقل الشعر خصوصي للي شعرهم دهني نفس حالتي .. 

ف انصح فيه .. 

سعر الزيت = ١٨ درهم فقط ، وموجود في كل السوبرماركت الجمعية التعاونية ، كارفور وغيره 

Review Macadamia Oil Healing Oil Treatment || مراجعه زيت الشعر من ماكاديميا

 Review Macadamia Oil Healing Oil Treatment مراجعه زيت الشعر من ماكاديميا 

السلام عليكم 

كلنا نحب نعتني بشعرنا وندور اجمل الوسائل اللي تعطينا شعر جميل وصحي ، بديت بسلسه العنايه بالشعر 

وحابه اكملها ان شاء الله وكل ماشفت منتج جميل ويستاهل اكيد بكتب عنه طبعا بعد تجربتي له .. 

اليوم عن هالزيت من ماكاديميا  مجموعه عنايه نزلت للسوق وسوت ضجه كبيره ، انا عن نفسي اقتنيت شغلتين ، 

هذا الزيت و الماسك ... وتجربتي حلوه معاهم .. اليوم بتكلم عن الزيت واذا حابين بتكلم عن الماسك في الفتره الجايه .. 

من مميزاته : 

- يستعمل على الشعر النظيف الرطب او الجاف .

- يستخدم علي الشعر بعد السشوار عشان يشيل اي نفشه ، ويعطي لمعه حلوه .

- يعتني باطراف الشعر خصوصي للي تعاني من جفاف شديد .

- ممتاز للي صابغه شعرها وخصوصي لو كان لون فاتح ، هذا راح يعطيها حيويه ولمعه .

- يعطي الشعر الحمايه والترطيب اللي ناقصه .

- ممكن تحطين كم قطره منه مع الماسك حقك ، او ماسك الماكاديميا نفسه يعطي ترطيب اكثر . 

طريقه الاستخدام : 

- احط كميه صغييره جدا منه ، الزيت ثقيل شوي وماتحتاجين كميه كبيره منه ، شوي وعلى شعرك الرطب من الاطراف بس 

واذا شعرك جاف ممكن شوي على شعرك كله بس من تحت الاذن ونازل ، لانه قوامه ثقيل وزيتي شوي ماينفع لفروه الراس .

- واذا كان شعرك ناشف او مسشور ، حطي كم قطره منه وعلى الاطراف عشان يعطي لمعه حلوه .. 

* عن نفسي حبيته جدا ومن مفضلاتي بصراحه وايه برجع اشتريه اذا خلص ..

- سعر هذي العلبه ب ٢٤ درهم ، واشوف انه شي ممتاز العلبه صغيره وحلو اذا بتجربينها .. اذا موعارفه اذا راح تحبينه او لا ، وفيه حجم اكبر بس للاسف ماعندي فكره عن سعره ..

ومكان توفره بكل محلات نزيه .. 

وبس هذا كل شي لليوم .. 

ولاتنسون تتابعوني 

..

" استغفر الله وأتوب إليه " 

سلسلة العناية بالشعر ٢ - زيت جدايل للشعر

السلام عليكم 

رجعنا نكمل سلسله الشعر اللي بديتها ، وان شاء الله كل فتره احط شي تابع لموضوع الشعر

والعناية فيه ... 

اليوم عن تجربتي مع زيت جدايل للشعر من عبد الصمد القرشي 

...

بالبدايه بذكر ليش من الاساس استخدمت هالزيت ؟ 

اللي متابعني من الاول يعرف اني نزلت وزني وااايد وكتبت عن هالشي بالمدونه ب سلسله الحياه الصحيه ، وآثار نزول وزني ، شعري تاثر جدا ، يتساقط بشكل خيالي شي مو طبيعي ، فيه اماكن صار فيها فراغات وخف واااايد عن اول

وشعري بطبيعته زين الشعره ناعمه بس ويفي ، عاجبني من الاول ولحد الحين ، ماحبيت اشوف انه يتساقط 

حاولت اعدل اكلي اكل سلطه اكثر واكثر من الجرجير لانه معروف بفوايده للشعر ، ماشفت تحسن واضح 

ف بحثت بالنت ولقيت تجربه وحده عن هالزيت ، وفعلا رحت ل القرشي واخذت لي علبه من الزيت الخاص بالتساقط ..

وكان ب ٥٠ درهم و الحين كانه ب ٧٠  .. من زمان ماشريته بصراحه " وغيروا شكل العلبه " 

...

طريقه استعمالي له :    " نفس الطريقه اللي مكتوبه على العلبه " 

اخذ شوي واحطه بعلبه او صحن صغير واسخنه شوي يا بالمايكروويف او على النار ، بس شوي يكون دافي مو حار 

وبعدها اخذه بقطنه اغمسها بالزيت وابدا احطه على فروه الراس بس على الجذور ، امشي على كل راسي بالزيت 

وبعد مااخلص احاول اسوي مساج للراس لمده دقيقه الى دقيقتين ،اذا خلصت لفيت شعري ورفعته لمده ساعه 

وبعدها اخذ شور 

الزيت مايطلع بسرعه من الشعر وهذا عيبه بس افضل طريقه ، تطلعين اي زيت من شعرك 

حطي شامبو اول قبل ماتبللين شعرك ، ادري بتقولون غلط ، بس جربوبها ،، حاولي تدخلينه بكل شعرك 

وبعدها بلليه بشويه ماي ، وبعدها حاولي تغسلينه زين كذا راح يبدا يرغي اكثر وماتحتاجين تغسلين شعرك ٣ او ٤ مرات بالشامبو ... 

هذي طريقه 

والطريقه الثانيه وسبق كتبت عنها 

اني كنت اروح لصالون او مشغل ، اخليهم يحطون لي الزيت بنفس الطريقه ويكون دافي 

ويسوون لي مساج من قلب لراسي ، واذا خلصت يحطون لي بخار لمده نص ساعه او اكثر ،

،اذا خلصت اخليهم مره ثانيه يسسون لي مساج وبعدها يغسلون شعري وخلاص 

بس كنت اروح لهم كل اسبوع مره وتقريبا لمده شهرين ، وبعدها كل مارحت للصالون اخذ الزيت معاي واخليهم يحطونه لي

... 

خلال هالشهرييين شفت العجب ، التساقط قل ، انا اشوف هالشي بعيني اذا امشطه اشوفه اقل بالفرشه وحتى بالحمام مايطيح وايد ، وهي لاحظت بعد انه مايطيح بايدها مثل كل مره ... 

الحلو انه بعد هالشهرين كنت اروح واسوي شعري مرتين بالشهر تكاسلت نوعا ما ، بس مره سشورت شعري بنفسي 

وانصدمت من كميه الشعر الصغير ، ماشاء الله ، حبيت هالشي وعشقت شعري من جديد 

... 

بعدها اخذت زيت التساقط مع زيت تطويل الشعر ، خلطتهم مع بعض بكميات متساويه 

ورجعت للصالون من جديد ومع الاستمرار ، 

والنتيجه شعري تساقطه اقلللل بكثير اقرب الى الطبيعي جدا ، وشعري اطول 

مااقول انه طول ١٥ سانتي لا بس اطول من المعتاد واسسسسرع ، وهالشي حلو لاني اشوفه بعيني 

وانا اعرف شعري 

...

اللي بتقول تروحين الصالون كل اسبوع وتدفعين ايه ماعندي مشكله دام هالشي راح يحل مشكله شعري 

وعادي مو شرط اكشخ صالون بدبي ، اي صالون نظيف ومرتب وامين ، واغلب الصالونات او المشاغل يكوون

عندهم عروض بنص الاسبوع ممكن تستغلون هالايام وتسوون هالشغله بنص السعر وهذا اللي كنت انا اسويه 

او كنت اخذ بكج كامل اسوي ٤ مرات حمام زيت واخذ شي فري ... 

+ اللي عندها جهاز البخار بالبيت هالشي ممتااااز لانها بترتاح من الروحه والرجعه 

+ الزيت اشتريه من المحل نفسه لا تشترينه من مكان ثاني عطار او غيره 

احنا في دبي ينباع بالمحل وبنباع في جمعيه الاتحاد التعاونيه لانهم موزع معتمد 

...

مواضيع ممكن تفيدك ولها علاقه بالعنايه بالشعر 

الجزء الاول 

سلسله العنايه بالشعر - فيتامين الشعر، البشرة والاظافر

كيراستاس دنسيفيك منشط كثافة الشعر

سلسلة العناية بالشعر - فيتامين الشعر،البشرة والاظافر

السلام عليكم 

صار لي فتره طويله استخدم هالفيتامين ، ومن حبي له قررت اكتب عنه ، 

فيتامين للشعر والبشره والاظافر + انه فيتامينات عامه 

وهذا الشي انا ادور عليه لانه اكلي نص نص واحاول اخليه ممتاز بس اكيد احتاج فيتامينات

لاني مااكل كل شي ، وحابه اعوض الاشياء اللي ناقصتني ... 

استشرت الصيدلي ونصحني بهذا الفيتامين ، من شركة نيتشر باونتي الامريكية 

بكتب كل اللي شفته ، حسيته .. 

+ الاظافر تطول اسرع من المعتاد .

+ هالفيتامين ماتحتاجين معاه فيتامينات كامله هذي تكفي ، ٣ حبات باليوم بعد كل وجبه .

+ حجمها عادي مثل البندول ، ومالها طعم قوي .

+ تاثيرها على البشره ، انا حسيت انه بشتري اصفى والحبوب تطلع بس بشكل خفيف ، بس يوم وقفتها

حسيت بالفرق ، بديت اشوف حبوب اكثر من قبل مثل قبل مااخذ الفيتامين .

+ تطول الشعر بسرعه ، هذا شفته علي ، وتقلل من التساقط بس بشكل خفيف ، يعني مو مره وحده في شهر مابتلاقين شي يتساقط ، لا تاخذ فتره لين تحسين انه شعرك بدا يقل تساقطه . 

+ فيها ٣٠٠٠ من البايوتين وهذا ممتااااز وعلى كلام الصيدلي هذا المقدار المناسب لليوم . 

+ العلبه  فيها ٦٠ حبه ف فما بتكفي لشهر اذا بتاخذينها كل يوم ٣ مرات ، اما اذا بتاخذين حبتين باليوم تكفي ، وانا اشوف السعر ممتاز لشهر . 

+ الحبوب هذي خفيفه على المعده و ماتسبب اي شي ، انا اصلا معدتي حساسه وتتعبني باي شي ، وعلى طول اعرف اذا الشي اللي اكلته زين ولا لا ، وهذي الحمدلله ماحسيت باي شي معاها .

+ ماتسبب لك صداع او غثيان او اي شي من هالقبيل . 

+موجوده باي صيدليه ، ودايما اخذها من بوتس باي فرع .

+ سعر الفيتامين مو غالي حوالي ٨٠ درهم ل ٦٠ حبه .

+++ خلصت تقريبا ٣ علب من هالفيتامين ، وبرجع اشتريه لاني ارتتحت عليه ، وشفت منه نتايج ترضيني .