مشتريات و تجارب من لش | Lush Haul & Review
السلام عليكم
مساء الدلع ، كل نفس لها حق تتدلع باي طريقة كانت ، واليوم مسانا دلع مع منتجات حلوه من محل لش ..
مشترياتي وتجاربي مع منتجات من لش ، حبيت اشاركم فيها عشان تستفيدون منها ، وانتوا بعد فيدوني باي شي
جربتوه وحبيتوه من هالمحل المميز ..
RUB RUB RUB
جل مقشر للجسم بملح البحر .. يقشر الجسم بطريقة لطيفة اذا استخدمتيه وانتي تحت الشور ، وممكن استخدامه بتاثير اقوى اذا كان جسمك جاف اخذي كمية صغيرة منه وقشري جسمك فيه وبعدها اغسلي جسمك تحت الشور ، راح يعطيك نتيجة جدا حلوه ، وعلى كلامهم ممكن استخدامه للشعر
بس مستحيل استخدمه لشعري .. احسه قوي على فروة الراس ..
ريحته حلوه ومنعشة ، والملح والليمون يساعدك على توحيد لون الجسم ..
سعره ب 100 درهم ، ويتوفر بحجم واحد بس
EAU ROMA WATER
سبرية الوجة بالورد واللافندر " خاص بالبشرة الجافة " اخذته لاني كنت ادور على تونر لبشرتي ونصحتني فيه ..
جربته كم مره خفيف جدا على البشرة وماتحسين انه تونر قوي وممكن يحسس او يهيج بشرتك ، لانه ممتاز للبشرة الجافة والحساسة يخفف من التهيج .. عجبتني لانه عندي منطقة الخدود دائما جافة وحساسة مااقدر استخدم اي شي لانها تهيج وتحرقني في بعض الاوقات ..
المنتج هذا موجود بحجمين : صغير ١٠٠ غرام ب ٤٥ درهم " هو اللي عندي " والكبير ٢٥٠ غرام ب ٩٠ درهم .
شامبو Rehab
صديق الشعر الدهني ، اعشششششقة ولا استغني عنه ابدا ابدا ، لانه شامبو منقي للشعر الدهني ، استخدمه مره في الاسبوع ، ومناسب جدا قبل اي مناسبة لانه يخلي الشعر نظيييف تماما وحلو مع السشوار ..
وكتبت عنه ريفيو هنا ممكن تشوفونه .. انصح فيه وبشدة
وفيه منه ٣ احجام الصغير ١٠٠ غرام ب ٦٣ درهم ، الوسط ٢٥٠ غرام ب ١٢٦ درهم ، الكبير ٥٠٠ غرام ب ١٩٠ درهم .
Angels on bare skin
منظف ومقشر خفيف للبشرة ، شكله غريب صح ! .. هالمنظف ممتاز للبشرة المختلطة الى الجافة ، والحساسة بعد ، فيه زيت اللوز و اللافندر و الورد ..
طريقة استخدامه : تاخذين قطعه صغيره منه وتبللين ايدك بشوية ماي وبعدها لين ماتذوبين القطعة اللي اخذيتها وراح يتكون عندك سائل وتغسلين وجههك فيه بشكل دائري عشان تقشرين الوجه بنفس الوقت ..
خفيف ولطيف جدا على البشرة مايحسسها او يهيجها ، بعد ماتغسلين وجههك بالمقشر راح تحسين بوجه مترطب ..
موجود بحجم واحد ١٠٠ غرام ب ٧٣ درهم .
Full of Grace
بالبداية بتشوفون كآنها صابونه بس لا ، سيروم للبشرة بس على شكل صابونه ، ممتازه للبشرة الجافة والحساسة ، وتناسب البشرة المختلطة ، هالشيء الجميل تسوون فيه مساج للبشرة ويعطيها نعومه حلوه ، ممكن تستخدمون كميه قليله قبل المرطب الخاص فيكم ، او ممكن قبل اي ماسك للوجه ..
طريقة الاستعمال تذوبينها شويه على ايدك وبعدها تسوين مساج لوجهك .. او تاخذينها كلها وتمررينها على وجهك وهي راح تذوب بسرعه .. ماانصحك تكثرين منها لانك راح تلمعين ، كميه بسيطها منها تكفي والبشرة تتشربها بشكل حلو ..
من مكونات السيروم الفطر ، بس ريحته حلوه ..
لازم تحفظ بمكان جاف ، لانها راح تذوب ..
السيروم ب ٩٥ درهم وحجم واحد فقط ..
soft Coeur
زبدة تدليك للجسم ..غنية بزبدة الككاو ، وبكل صراحة انا اكرهه زبدة الككاو عشان ريحتها مااقدر اتحمل الريحة بس فوايدها عجيبة للجسم ، الحلو ب هالشي اللذيذ انه شي سريع ، تاخذين هالزبدة وتدلكينها على جسمك وتبدا تذوب ، حلوه بعد الشاور وترطيبها غني ، صراحه الريحه تخف وماتكون واضحة بزيادة .. هذا اهم شي بالنسبة لي ، عجبني ترطيبها جدا ..
سعر هالشي الجميل ب ٦٠ درهم .
Sandstone
طبعا لش مشهورين ب انواع وايد من الصابون ، اشكال وروايح عجيبه ، كل نوع يناسب شي معين ، انا هالصابونه اخذتها من قبل وجدا جدا حبيتها رجعت اخذتها من جديد ، صابونه تنظف الجسم من قلب مع تقشييير حلووو جدا .. احب تقشير هالصابونه لانه يطلع الشعر اللي تحت الجلد ، هالشي حببي فيها ..
احب ريحتها ليمون مع زنجبيل .. والشي المميز ب هالصابونه موجود في اسمها ، المقشر اللي بالصابونه هذي عباره عن رمل ، ف يقشر الجسم ويعطي نعومه حلوووه .. جربوها .. تستاهل بصراحة ..
الصابون تاخذين بالحجم اللي انتي تبينه ، تقريبها هالقطعه ب شي و ٦٠ درهم .
Catastrophe Cosmetic
ماسك بخلاصة التوت الازرق ، هذا الماسك طبيعي ولازم ينحظف بالثلاجة وصالح للاستخدام لمده ٣ اسابيع
فيه التوت الازرق وزيت اللوز و البابونج ، مناسب انه يهدي البشرة
طريقة الاستخدام :
تمدينة على بشرتك ماعادا العيون طبعا و تتركينه من ٥ الى ١٠ دقائق ،
استخدمته مرتين ، وبكل صراحه ماعجبني ابدا .. اولا ماينمد زين على الوجه يتكتل ويحوس الدنيا .. مع انه شكله تحسين انه راح ينمد بطريقة حلوه بس لا ..
والشي الثاني انه بشرتي تحسست منه و اطلعت لي حبوب اول مره اشوفها .. وفي اماكن مااطلعت لي حبوب فيها من قبل ..
ماحبيته بصراحه .. ولا انصح فيه .. ممكن الانواع الثانية تكون حلوه بس هذا لا ..
وسعر الماسك ب ٦٠ درهم .
وبس ، شاركوني تجاربكم ب منتجات من لش ..
