السلام عليكم
انا وحده اعشق الاكل واحب اجرب شي جديد ، ومطاعم جديده ...
مطعم ليل نهار لبناني بس مو اللبناني اللي متعودين عليه ، يقدم اشياء جديده وافكار حلوه ،
وهذا اللي احبه ويجذبني له ... زرته ٤ مرات ، مرتين في فرع مردف سيتي سنتر ومرتين في فرع الفستيفال سيتي
...
المطعم له فروع في لبنان ، وفي دبي اتوقع بس فرعين اللي ذكرتهم فوق ..
الصور شوي مو واضحه ، لاننا كنا جالسين بره والاضاءه خفيفه جدا ف مو كل شي باين وواضح مثل مااحبه ...
سلطه فتوش ..
انا اعشق الفتوش باي مكان وباي شكل واحبه غرقان ليمون ودبس رمان ، هذا كان ليمون اكثر من دبس الرمان
بس كانت لذيذه بصراحه ..
سلطه فطر مع جرجير ..
فيه جرجير - فطر - جوز - جبن برميزان
بشكل عام حلوه بس تمنيت لو الفطر فيه حركه يعني ، هم حاطينه فرش وماكان له طعم ، والصوص على جنب
الصوص بروحه خياااالي ، بلسمك بس شي ثقيل و رايق وجميل ، ينفع يكون لاي سلطه بعد ...
سلطه لبنه
لبنه - جرجير - فطر - خيار - بقدونس - طماط - والتتبليه كانت ليمون مع زيت زيتون ... حلووه على كلام اللي ذاقوها
وجربنا بعد سلطه المعكرونه ، كانت حلوه بصراحه مع صوص المايونيز بالليمون ..
مااعرف اسم الطبق بالتحديد بس انه بطاط بالفرن وكان محشي جبن او سور كريم ، مو متذكره اللي اللي اكلوه حبووه جدا ..
الطبق اللي ودي ارجع عشانه الحين ،
ساندوتش حلوم مع بيستو .. عشقققق
عجينه متعدده الحبوب - حلوم مشوي - جرجير - طماط مجفف " انا شلته طبعا " انا انسانه مااحب الطماط ابدا ابدا - والصوص كان بيستو مع مايونيز ،،، صراحه الصوص روعه ، وينفع لكذا شي دجاج وغيره .. بالنسبه لي هالطبق ١٠ من ١٠ .. روعه ..
جربنا في الزيارات الثانيه البيتزا جميله والمناقيش ايضا حلوه انا حبيت من المناقيش " البلغاري " جبن مالح مع خلطه نسيت صراحه شنو فيها بس حلوه وطلبتها مرتين .. وعصير الليمون بالنعناع كان حلو بعد ..
هو المطعم بشكل عام حلو ومن المطاعم اللي من ذوقي .. وانصح فيه وتغيير عن المطاعم اللبنانيه التقليديه
المطعم فيه اصناف كثيره واكيد راح يرضي الكل ،
واسعاره حلوه وسط ، يعني السلطات تقريبا ب ٢٠ للوحده
بس عيب واحد انه مو قريب من بيتنا افتحوا فرع في جميرا او الوصل ، عشان يوصل لنا ..
....
هذا موقعهم اللي حاب يطلع عليه ..
ليست هناك تعليقات:
إرسال تعليق