٧ X ٧ | اسبوع الشامبو

٧ X ٧  | اسبوع الشامبو 

سلسلة جديدة بديت فيها على الانستقرام  ، ٧ ايام اتكلم عن نوع معين من المنتجات اقول رائي فيهم بشكل موسع 

٧ منتجات في ٧ ايام ، اخترت في البداية اتكلم عن الشامبو جربت بالفترة الاخيرة كذا نوع وحبيت انقل تجربتي فيهم 

السلسلة راح تكون في الانستقرام وبعد مايخلص الاسبوع انقل كل شي للمدونة عشان يكون موثق ومرجع للكل في موضوع واحد 

.....

٧ X ٧  | اسبوع الشامبو 

شامبو بيرت بلس بخلاصة الحنة 🍃

Pert plus with Henna Extracts 🍃 .

.

ماركة بيرت بلس من زمان كنت اشتري منتجاتها ووقفتها من زمان حباً في تجربة شي جديد بس في الفترة الاخيرة رجعت لها .. اخترت اللي بالحنة اولا الشامبو ابدا ابدا مافيه ريحة حنة بالعكس ريحته جمييييلة جدا .. الشامبو ممتاز ينظف الشعر بدون مايثقلة او حتى يخليه دهني .. .

.

انا شعري دهني ف ناسبني جدا .. وبرجع أشتريه مره ثانية 🛍👍🏻 

...

شامبو من بول متشل 🍃 Shampoo One Paul Mitchell 🍃

.

.

عندهم اكثر من نوع ، لكن جربت النوع العادي وعجبني جدا - ريحته عادية وخفيفة جدا - ينظف الشعر بشكل جمييييل جدا ، وتحتاجين منه كمية بسيطة جدا - يعطي الشعر لمعه جمييييلة جدا جدا - مناسب للشعر المعالج او المصبوغ - كمية راهيه ٣٠٠ مل ، راح يطول في الاستخدام 

سعره بين ال ٧٠ و ال ١١٠ حسب المكان اللي بتشترينه منه 

موجود على النت في بعض الموقع او في محلات نزية 

...

شامبو ٢ في ١ من بانتين " صحي ونظيف " ✨

2 in 1 Pantene Daily Care ✨

.

.

شامبو مناسب للاستخدام اليومي ، ينظف ويرطب الشعر بنفس الوقت .. حلو للي شعرها عادي الى جاف .. الدهني ماانصح فيه لانه ممكن يدهن الشعر بسرعه معاه 

...

شامبو Bain Divlent من كيراستاس 🌿

احلى شامبو استخدمته لحد الحين ❤️ من مفضلاتي دايما وأبدا ❤️❤️❤️ الشامبو مخصص للشعر الدهني واللي أطراف الشعر شوي جافة .. هذا بالضبط شعري .. صعب صعب ألاقي شامبو ينظف الشعر الدهني بدون مايجفف الاطراف ويتبعها .. بس هذا مافيه مثله😍😍😍 .

.

.

.. ترى الشامبو من افضل المنتجات مبيعا .. وغير هذا ماخذ جوائز 🥇 .

.

- ممتاز للشعر الدهني ، والاطراف الجافة - ينظف فروة الرأس بشكل ممتاز ، ويرطب أطراف الشعر - الشعر يكون فيه حيوية، خفيف ، ناعم وفيه لمعه .. الشعر الدهني متعب لانه بعض انواع الشامبو تجففه جدا لدرجة انه يفرز دهون اكثر .. او انه ينظف او يرطب الشعر ويكون ثقيل ومافيه حياه ف يرجع يلصق بالفروة - ممكن استخدامه بشكل يومي 

هل برجع اشترية ؟ طبعا 👏🏻😍❤️ .

. سعره = ١٣٠ درهم ، اللي بالصوره هو بالشكل القديم .. .

.

واكثر سؤال يوصل لي من وين نشتري منتجات ماركة كيراستاس ؟ .

.

في اي صالون معتمد في الامارات راح تلاقين ستاند خاص فيهم وفيه كل المنتجات .. عندهم صالونهم الخاص اللي بصراحة ناوية أزوره مكانهم في السيتي ووك ❤️ .

.

وعندهم موقع إلكتروني للطلب ، تطلبين اللي حابته ويوصل لج الطلب للبيت 🍃

....

شامبو Bain Satin 1 من كيراستاس 🍃

شامبو مخصص للترطيب ، مناسب للشعر العادي الى الجاف .. ترطيبة جدا جميل .. ريحته حلوه .. يرطب الشعر من الجذور الى الاطراف .. يعطي لمعه حلوه للشعر وملمسه يكون ناعم 

انصح فيه للي شعرها عادي الى شوي جاف 

اما اللي شعرها جاف الى جااااااف جدا ، فيه نوع ثاني بنفس الاسم بس الرقم يختلف بدال ال ١ ، ٢ 

رقم ٢ ممتاااااز جدا جدا للي شعرها جاف جدا ، رقم ٢ اخذ جوائز بعد ... للي شعرها دهني مثلي تبتعد عنه .. لانه راح شوي يدهن الشعر .. بس انصح فيه للي شعرها عادي الى جاف تأخذ رقم ١ ، او أذا جاف جدا رقم ٢ .

.

سعره = ١٣٠ درهم 

...

شامبو بزيت الزيتون من بالمرز 🍃

Palmer’s Olive Oil Formula 🍃

.

.

شامبو بزيت الزيتون و فيتامين E ،من بالمرز 

الشامبو ريحته حلوه ولطيفة ، يرطب وينعم الشعر 

يعطي لمعه حلوه للشعر .. ينظف الشعر من بقايا المنتجات مثل الجل السبرية وغيرهم 

اذا كان شعرك كيرلي او ويفي ، راح يهذب شكلهم 

الشامبو خالي من السولفات .. الباربين .. مناسب للكل .. بس اذا شعرك دهني بزياده ماانصحج فيه تستخدمينه بشكل يومي 

..

 Bain Densite من كيراستاس 🍃

شامبو منقي للشعر ، يستخدم ك علاج للشعر يعطي الشعر امتلاء مع الوقت .. اذا راح تستخدمين المجموعة كامله مع الامبولات الخاصة فيه .. من زمان كتبت موضوع طويل على المدونة عن امبولات للشعر تنشط الشعر وتكثفة 😍❤️ الامبولات من مفضلاتي وكل فتره ارجع اشتري علبة واستخدمها وفعلا احس بالفرق بعد مااخلص استخدامها .. لانه يطّلع لي شعر من جديد انصح فيهم وبشددددددة من اروع مااستخدمت ، اشتريتهم ٤ مرات وبرجع اشتريهم بعد ❤️ اذا حابه تقرين عن تجربتي مع الامبولات على المدونة او ادخلي هالهاشتاق وشوفي تجربتي بالكامل 

#cwh_haircare .

.

الشامبو راح يساعدج انج تشوفين نتيجة حلوه مع استخدامج للامبولات .. انا جربت المجموعة بالكامل الشامبو - البلسم - الماسك - الامبولات .

.

اذا برجع اشتري شي من هالمجموعة باخذ بس الامبولات .. صح الشامبو يساعد انه الفروة تكون نظيفة بس بصراحة مااحتاجه الامبولات ممتازه .

.

سعر الشامبو =١٣٠ درهم 

....

ان شاء الله السلسلة تعجبكم ، كل فترة راح يكون الموضوع عن منتجات غير باذن الله 

June Empties منتجات خلصتها في شهر يونيو

السلام عليكم 

من زمااااان ماكتبت موضوع عن الاشياء اللي خلصتها اخر شي كان بشهر ٢ واحنا الحين بشهر ٦ 

ماشاء الله الايام تمشي ، 

بحاول المرات الجايه كل ماخلصت شي علي الاقل ٧ اشياء واكتب عنهم لانه ماشاء الله اشياء كثيره تجمعت 

..

...

من اليمين : 

- كريم للجسم من باث اند بودي ب ريحه القطن ، بصراحه ماخلصته اول كريم يسبب لي حساسيه بجسمي مع اني استخدمته من قبل بس هالعلبه يمكن لانها عندي من زمان فما كملتها من شفت الحساسيه . 

- بايو اويل ، احبه واايد ناس تقول انه مانفعها ، انا بالعكس نفعني خفف لي من الخطوط البيضا ، وفيه خطوط شوي بارزه واحس فيها اذا لمست جسمي هذا الزيت خفف من انتفاخها وصار جسمي ملمسه واحد ، احطه بعد اي شاور واقشر بشرتي بالشاور ... و استخدمته بعد مع اي كريم للجسم عندي كم قطره منه مع شوي من الكريم اخلطهم بايدي وادهن جسمي ، واحب الترطيب اللي الاقيه بعدها . 

- كريم الايد من باث اند بودي بالشيا ب ريحه التوايلات وود افضل ريحه عندي في كل باث اند بودي ، احب هالكريم واستخدمه لكل ايدي . 

- كريم للايد من باث اند بودي بريحه المسك ، ريحه خفيفه وجميله . 

- كريم للجسم " عينه " من احد العلب اللي استلمها كل شهر ، خلصته وكريم عادي مافيه زود بكل صراحه . 

..

- قطن دوائر حبيت اجرب هالنوع لانه فيه فيه شكل ووخطوط غير عن القطن العادي وممتاز مع التونر كاني اسوي تقشير خفيف للبشره . 

- مناديل مرطب و معطره ، آحب هالنووووع ريحته حلوه واستخدمه لكل شي ، وترى جدا حلو للميك اب الخفيف . 

....

- ماسك للوجه من كول اند كول حبيت اجربه ، عادي ماحسيت بشي بعد استخدامه . 

- واقي للشمس من بايودرما واخذت هالنوع وهذا مات عشان مايعطيني منظر زيتي على وجهي وهذا حلو بس بالاخير بدا يخلي وجهي رمادي ، باقي في العلبه اقل من الربع .

- سيروم للعيون من استي لودر ، على كثر ماقريت انه هالسيروم خيالي للاسف الشديد ماشفت اي نتيجه منه ، شفت اشياء سيئه بصراحه ، انا وحده اعاني من هالاتي بشكل كبير وهذا مو حلو ، كل ماحطيته بالليل من بكرا الصبح اشوف المنطقه تتقشر بشكل رهيب لدرجه اني اقدر اشيل القشور وحجمها كبير ، قريب وبحثت مالقيت احد نفس حالتي واستمريت عليه بشوف اي نتيجه معاه بس مافيه فايده ، حتى اخليه لاسابيع وارجع استخدمه ونفس المشكله ، وسعره غاااااالي .

- موس صغير للوجه استخدمه لوجهي وحواجبي بما اني اسوي ليزر لوجهي ومااقدر استخدم غير الموس ، ممتاز بصراحه ودايما اشتريه ، موجود ب دايسو ودلتني عليه الممرضه اللي تسوي لي الليزر . 

..

- مزيل للمناكير من دايسو ، قديم بصراحه وماصدقت انه يخلص . 

- قلم من سالي هانسن ، للعنايه بالاظافر والجلد اللي حوالي الظفر ، مكتوب عليه انه يطول الاظافر ، وانا اصلا اخذته 

للجلد اللي حوالي الظفر وماشي حاله . 

- مقشر للايدين من باث اند بودي جميل جدا وقوي ومناسب للايد ، احب استخدمه وبعدها ارطب ايدي باي كريم ثقيل للايد . 

...

شرايكم بميكي بس 

- مرطبات للشفايف من لابيلو ، حلوين ، حاليا استخدم اللي بالتوت بس مو حابته كثير لانه يطلع طبقه بيضا على الشفايف بس بحاول اخلصه . 

- كريم جليسوليد ، مين مايعرفه ثقيل بس حلو استخدمه لرجولي وفي ايام البرد كنت اخلطه مع اي كريم عادي للجسم 

لانه جاني جفاف رهيب . 

....

- عطر جميل جميل جمييييل من العطور اللي حبيتها ريحته انيقه و شي انوثي بصراحه ، كل ماحطيته واحد من اخواني يسالني شنو حطيت ، اسمه مونتانا Mantana ، يقولون انه بس في لندن بس ماادري اذا موجود في دبي ياليت اللي يعرف يقول لي ، لاني عشقته . 

- عطر جميل بالعنبر من باث اند بودي شوب ، من العطور المميزه عندهم ، شريت هذا وخلصته في فتره قياسيه بصراحه 

اللي ماشمه يشمه لانه حلو بصراحه .

....

- امبولات للشعر من اروع مااستخدمت في انبات الشعر انا من زمان قلت اني بكتب موضوع عنها وان شاء الله هالمره بكتب ، بس شي رائع . 

- ماسكرا من مافالا للرموش وكتبت عنها ريفيو كامل   هناااااا   رائعه جداااا . 

- فيتامينات للشعر رائعه و لهم موضوع ان شاء الله قريب مع الامبولات ، خلصت علبتين وحاليا انا في الثالثه . 

...

- مزيل للمكياج شبيه جدا ب بايوديرما وكتبت عنه هناااااا ، ممتاز بصراحه ، واللي اعرفه انه حاليا موجود بالسوبر ماركت.

- ماسك لتجديد البشره ، حلو وهو من الماسك اللي تقدرين تشيلينه وانا احب هالشي يعطيني شعور جميل . 

- العشششششق العشششق ، اجمل واخف ريحه ريحه اطفال على بودره على كل شي جميل اتوقع في كل منتجات خلصتها بتلاقون هالمنتج ، هو عطر خفيف للجسم هو اصلا للاطفال بس جمييييل  . 

- مزيل للعرق من ريكسونا ، افضل شي جربته احطه واضمن نفسي حتى بعد النادي مافيه اي ريحه ممتااااز بكل اختصار . 

....

- كريم لليدين من لوكستيان من احب الكريمات على قلبي ، بالشيا طبعا وشريت غيره من حبي له بطل بطل ، بش شوي ثقيل ودبق انا كميه صغيره منه تكفيني . 

- آه على هالعطر ادوخ عنده ، هذا ومع اللي فوق للجسم ومع مسك عبد الصمدالقرشي شي شي شي ، ريحه نظافه خياليه ، بس ماالقاه في دبي ابد ، خبري فيه محل بالراشد بالخبر يبيعه واخر مره رحت المحل كانو يسوون ديكوراته ، احبه وباقي لي علبه وبديت فيها ، ماودي يخلص ابد . 

- غسول للوجه من قارنييه حلو ينظف بشكل حلو خفيف على البشره ويناسب لغسول يومي ، اللي عندي للبشره العاديه الى المختلطه . 

- سبريه للجسم بالورد ، انا احب الورد بس اي شي فيه ورد وللجسم للاسف الشديد مااتحمله وبشرتي تتحسس منه ، حتى اختي فصرنا نستخدمه بالحماام كمعطر جو فقط لا غير ، وريحته حلوه للي يحب روايح الورد ، بس مااتوقع بشتريه بس هذا كان هديه لاختي . 

- شامبو من لوريال معالج ، جاني من العلبه اللي استلمها كل شهر وبصراحه حبيته ، وافكر اشتريه مره ثانيه اذا خلصت كل اللي عندي . 

...

- لصقات للانف اخذتهم على مدح هدى بيوتي ، وصراحه روعه تشيل من قلب ، فيها ٣ لصقات بريحه البرتقال ودي ارجع اشتري نفسها اذا خلصت اللي عندي . 

- ماسكرا من ميبلين ون باي وان ، حبييييتها من الماسكرات اللي اعطتني كل شي ابيه حجم وطول وكثافه ورموشي تبقي على ماهي لفتره طويله ماتنزل . 

- روج من نكس ماادري شنو الحاله اللي كنت فيها يوم اشتريه من اسواء شي شريته روج وفيه لمعه اللولو ولون مشمشي بس بايخ ، انا عن نفسي مااحب هالنوعيه من الارواج فعلا ماادري شنو شريته ، حاولت استخدمه بس ماقدرت ، رقمه ٥٩٧ .

- روج من برستيج ، عندهم ارواج حلوه ، خصوصي المات الوان خطيره وثابته ، النوع اللي خلصته كريمي بس جمييييل جدا خلص بمعنى خلص رقمه cll-07 ، ماادري اذا موجود حاليا بس حلو ، لونه مشمشي على لحمي جميل . 

.....

وبس خلصت كل شي ، بصراحه تعبت وانا اكتب بس عشان اتوب ومااجمع كميه كبيره . 

فيه شي حابه اقوله كلنا عندنا منتجات نحبها شي غالي منها وشي رخيص بس ساعات نستخسر اننا نستخدمها

بحكم انها غاليه ، بس دامك شريتيها استخدميها حرام الفلوس اللي تحطينها بمنتج ولا تستخدمينه وبالاخير ترمينه بحكم 

انه خلص تاريخه لانتي اللي تهنيتي فيه ولا انتي اللي استخدمتيه . 

بحاول استخدم كل شي عندي واذا الله قدرني اني احلل كل شي دفعت ف الحمدلله اني نفعت نفسي منه . 

وبس ...