أرواج اربن ديكاي | Vice Lipstick

أرواج اربن ديكاي | Vice Lipstick

السلام عليكم 

ارواج اربن ديكاي الجديدة ، اللي سوت ضجة اول مانزلت لها نزلت ب ١٠٠ لون !!

تتخيلون ماركة تنزل ١٠٠ لون مره وحدة ، هذا بحد ذاته انجاز كبير .. الكل كانت عينه على هالارواج وشنو الشي المميز فيها .. 

ف كان لي نصيب فيها ولله الحمد عشان اجرب كذا نوع .. ليش كذا نوع لانهم اصلا نازلين ب ٦ تركيبات متنوعة لتناسب جميع الأذواق والاحتياجات 

...

التركيبات ال ٦ : 

MEGA MATTE: لون كثيف غير لمّاع.

COMFORT MATTE: أكثر ألواننا غير اللماعة كريمية القوام.

CREAM: الأصلي: الكريمي الفاخر والجريء.

METALLIZED: كريم بنسبة عالية من مسحوق اللؤلؤ.

SHEER: لون غني بمظهر نهائي لماع عالي الشفافية.

SHEER SHIMMER: مظهر نهائي شبه شفاف بمسحة من مسحوق اللؤلؤ وملمس ناعم.

انا عندي اول ٤ منهم .. 

...

النوع الكريمي .. وهو المفضل عندي ، من تسمعين كريمي تقولين لا راح تكون رطبة وكريمية بزيادة وغير ثابته ، طبعا العكس تمااااما ، لون غني من مسحة وحدة يبين

وثبات جدا حلو لعدد ساعات " طبعا مع الاكل والشرب تبا تخف " بس يظل فيه لون .. الروج يعطي شكل انه الشفايف صحية ورطبة ..  

...

المات ، فيه نوعين منه ، المات القوي والاخف شوي .. 

عن نفسي فضلت الاخف شوي لانه اسهل بالمد على الشفايف ، بس الاثنين ثباتهم جدا جدا حلو .. وودي ارجع اخذ كذا لون بعد .. 

...

النوع الاخير اللي عنديMETALLIZED ، اللي يحب هالنوع راح يعشق هالارواج ، اذا تحبين الشي الغريب والمميز خصوصي انه اللون يبين مو بس لمعه او شيمر خفيف ، لا لون بمعني لون واضح .. والثبات عادي مع الاكل والشرب يروح اللون .. 

.. 

كل الدرجات مع السواتشز لهم .. 

نصيحة اذا بتروحين تشترين اولا حددي النوع اللي تحبينه وبعدها غوصي بالدرجات لانه ١٠٠ لون يخليج تحتارين ولا تعرفين شنو تاخذين .. 

واربن ديكاي فتحوا لهم محلهم الخاص في السيتي ووك ، المحل جدا جميل ومريح .. 

سعر الروج = ٩٢ درهم 

Arcancil Mat Hysteria | ارواج اركانسل المات

Arcancil Mat Hysteria |  ارواج اركانسل المات 

الارواج السائلة اللي تتحول الى المات ، وايد ماركات صارت تسويها وتتميز فيها

وأحد هالماركات ماركة اركانسل Arcancil الفرنسية  

ارسلوا لي من فترة مجموعة من الارواج السائلة وبكل صراحة ما حسيت انها راح تكون حلوه او مميزة 

بس بكل صراحة فاجآتي واصدمتي لانها ممتاااازة وبذكر لكم المميزات اللي شفتها .. 

هم يقولون انه ثباتها لمدة ١٢ ساعة ، بس انا اقصى مدة جربتها هي ٥ ساعات متواصلة بدون ماارجع واعيد عليها 

تتوفر ب ١٥ درجة وهذا شي ممتاز لانك راح تلقين الدرجة اللي بخاطرك 

+ لها ريحة خفيفة جدا جدا ياكاد انج تشمينها بالعلبة فقط وهالشي جدا ممتاز .

+ التعليب جدا ممتاز ، حجمه جدا حلو بحجم الروج العادي مو نفس باقي الارواج اللي تكون كانها قلوس . 

+ العلبة شفافة ف تقدرين تشوفين لون الروج .

+ الالوان تدوم لمدة طويلة هم كاتبين انها لمدة ١٢ ساعة ، انا ماجربتها كل هالمدة ، اقصى حد لي كان ٥ ساعات 

متواصلة ، ثباتها جدا جدا عاااالي وممكن تطول اكثر بدون اكل .. 

اذا اكلتي اكل دسم ممكن تخف شوي .. 

+ الالوان صبغتها قوية ومن اول ماتحطينها يبين اللون ماتحتاجين تعيدين وتزيدين عشان يطلع اللون .

+ الحلو فيها انها ابدا ماتجفف الشفايف ، حتى لو حطيتها لفترة طويلة ، وكنت مجربتها بعد في فترة كانت شفايفي اصلا جافة ولا جففتها بزيادة . 

+ خفيفة على الشفايف وماتحسين انه فيه طبقة ثقيلة على الشفايف . 

ـ الشي اللي شوي مو حلو انه اللون مايبين زين مثل لون اللي داخل العلبة .. 

بكل صراحة الارواج فاجاتني وحبييييتهم جدا ..  يستاهلون التجربة 

ارواج ميسلين | Misslyn Lipstick

ارواج ميسلين | Misslyn Lipstick

السلام عليكم 

ماركة ميسلين جديدة على سوقنا الخليجي ، موجودة بس في محلات لايف ستايل في الخليج كله 

هي ماركة المانية ، وعارفين جودة الماركات الالمانية شلون ممتازة ..

ارسلوا لي مجموعة من منتجاتهم  وحابه اجربهم .. 

ارواج كريمية الى مات و ثباتها لمدة عالية .. cream to matte long-lasting lipstick

عندي لونين من مجموعة المات .. اليمين رقمة ١٢ .. اليسار ١٧١

اولا هي ماااااات ابدا ابدا مو كريمية ، وصعبة شوي بالمد على الشفايف ، شوي جافة ..

اللون البرتقالي ماحبيته وايد لانه مو مرتب ويتقطع على الشفايف .. واصلا هالدرجة بالذات ماتناسبني 

اللون الثاني لوني المفضل .. احب هالالوان ، هذا عكس الاول ، يطلع اللون صح من اول مره وقوي بصراحة ، والثبات جدا عالي ، حتى مع الاكل والشرب يطبع لكن تشوفين فيه روج على شفايفك ماراح اللون .. 

تحتاجين قبلها مرطب ممتاز للشفايف ، وبعد ماتشيلينها بعد تحتاجين لمرطب شفايف 

...

وعندهم بعد محددات للشفايف 

هالمحددات ، واااااو واااو واااو باختصار ، شي رائع جدا وسهل جدا بالرسم 

واللون قووووووي قوي قوي وثااااابت ، ينفع يكون روج اصلا مو بس محدد .. 

عن نفسي ودي اروح اخذ الوان ثانية جدا جدا حلوه 

عندي لونين بس منهم اليمين ٥١ ، اليسار ٨٢ 

وهذي الوان الارواج و المحددات 

ماعندي فكرة عن الاسعار للاسف الشديد 

ستاند الماركة موجود في لايف ستايل .

Review Rouge Edition Velvet أرواج برجوا المخملية

السلام عليكم 

مراجعه لارواج برجوا ...

من اسبوع تقريبا ارسلو لي برجوا هالروج وجدا اشكرهم على هالشي 

الروج نازل منه ٨ الوان ، وانا عندي لون واحد ، والالوان كلها جميله ، بس حبيت اللون اللي معاي

واقدر احطه باي وقت .. 

انا دايما ادور على الارواج اللي تكون " ثابته - مات " وهالروج حقق لي كل اللي انا ادوره في عالم الارواج 

لاني بصراحه مااحب سالفه اني كل شوي ارجع اعيد على الروج او انه يطبع وينمسح اذا اكلت او شربت 

جربت هالروج تقريبا لمده ٥ ساعات حطيت طبقتين منه وخليته ينشف وعجبني جدا ، التغطيه عاليه جدا 

ومات بس المات الحلو والانيق اقدر اقول عنه ، مش المات اللي من كثر ماهو مات يجفف الشفايف ويكون منظرها مو حلو 

لا بالعكس شي انيق وراقي .. 

اكلت وشربت خلال ال٥ ساعات الروج يطبع على الكوب بس طبعه خفيفه وانا توقعت اني اذا شفت المرايه

ماراح القى روج على شفايفي ، انصدمت انه فيه روج وثابت و لا راح مع الاكل والشرب ، ومايحتاج اني اعيد عليه اصلا

بس جربت اني اعيد عليه واشوف وش يصير هل انه راح يتكتل او شي ؟ 

طبعا ... لا حطيت طبقه وجدا جميله كاني توني احط الروج لاول مره .. حبيت هالشي 

ممكن انك تحطين طبقه وحده وكافيه بعد او تزيدين طبقه او ٣ ، في حال ال ٣ طبقات اللون راح يطلع بالضبط 

نفس لون العلبه . 

+ ودي بالفتره الجايه انه برجوا ينزلون درجات ثانيه منه يعني كل موسم ينزل لون جديد لاني وبكل صراحه 

اعتبر هالروج من مفضلاتي ، واتمنى اشوف الوان اكثر . 

++ فيه نقطه حابه اقولها " اذا شفايفك جافه او متقشره حاولي تقشرينها وترطبينها قبل لانه الروج مات وممكن يجففها اكثر ومايطلع عليك الروج بالشكل الحلو " و ايضا " بعد استخدامك للروج رطبي شفايفك دائما ، لانه معروف اي روج 

يكون مات و ثابت لعدد من الساعات يجفف الشفايف " 

درجه اللون اللي معاي 07 Nude-ist 

وتقيمي له ٥ من ٥ 

سعر الروج = ٧٠ درهم