نصائح لتوفير فلوسك ! الجزء الثاني

السلام عليكم 

مثل ماودعتكم اني راح اكمل الموضوع ، اللي ماشاف الجزء الاول يقدر يشوفه بالاول بعدها يقرا هذا الجزء لانهم مكملين 

لبعض ... 

بعد ماخلصنا كل شي الحين راح نتعرف على كم نصيحة تساعدك في توفير فلوسك :

+ بطاقات الولاء +

أغلب المحلات تقدم بطاقات خاصة فيهم تقدمينها مع الاشياء اللي بتشترينها من المحل ومنها تحصلين علي نقاط لكل عملية شراء ...  مثل : سيفورا - شكرا - باريس غاليري - رد تاق - كارفور - اير مايلز - لافاييت - ايكيا ..

كل هالمحلات عندهم هالبطاقة وكل ماشريتي شغلة تجمعين نقاط وبالاخير ممكن تاخذين خصم على المشتريات او تطلع لك هدية مجانية ، كل محل له سياسة خاصة بالنقاط ، ممكن تراجعونهم فيها ، بس بطاقات مفيدة وتوفر عليك ، لانك اصلا تشترين منهم ومنها تطلع لك اشياء فري او خصومات ، بالنهاية انتي ربحانة ..

وفكرة صغيرة ، اذا كنتي ناوية تشترين هدية لشخص فكري بهالمحلات اول ممكن فيها شي يناسبة

ومنها تستفيدين من النقاط بعد .

+ بطاقة الطالب +

بعض المحلات عندهم هالخدمة ، انك تراوينهم بطاقتك الجامعية ويسون لك خصم ، محل نيولوك عندهم بطاقة طالب ويخصمون من قيمة مشترياتك ١٠ ٪ بالمية ، وعندك بعد محل اي ستايل iStyle  لمحبين اجهزك الماك والايفون عندهم بعد خصم للطلبة ، وبعد مكتبة جرير عندهم خصم للطلاب.

+ بطاقات المطاعم و الصالونات +

بعض المطاعم والكوفيات توفر بطاقة او ورقة ، بحيث كل ماطلبتي منهم يحطون لك ختم ، واذا جمعتي كل الاختام تقدرين تاخذين شي مجانا .. فكرة جميلة جدا ..

وبعض الصالونات والمشاغل عندهم هالخدمة .. هي حلوه لانك بالاساس تسوين عندهم ومنها تجمعين لك كم ختم وبالنهاية تاخذين خدمة مجانا ، وممكن مايكون عندهم هالبطاقة ، بعضهم يقدمون خدمات مثلا ٥ جلسات حمام زيت والاخيرة مجانا

ف شي حلو تشتركين بهالاشياء ..

+ التنزيلات والعروض +

افضل فرصة للشراء كل احتياجاتك ، الاسعار تكون نازلة ومثلا بدال ماتشترين قميص ب ١٠٠ درهم ممكن يوصل الى ٥٠ درهم ، ف انتي وفرتي مبلغ ممكن تشترين فيه شغله ثانية انتي محتاجة لها ..

غالبا وقت التنزيلات يكون معروف في دبي مثلا في مهرجان دبي للتسوق  يكون في شهر يناير الى فبراير وغالبا كل المحلات تشارك فيه والاسعار تكون جميلة جدا ، ف انتي ممكن توفرين فلوسك وماتشترين مثلا لفترة وفي بداية التنزيلات اخذي احتياجاتك كلها ..

وفي شهر يونيو بعد فيه موسم للتنزيلات ، ممكن تحطين رقمك عند المحلات وهم راح يرسلون لك مسجات بوقت العروض ..

وحطي في بالك المحلات اللي جودة بضاعتها ممتازة وروحي لها بالاول اخذي اللي حابته منها لانه اذا جودة البضاعة ممتازة راح تعمر معاك اكثر ، حتى لو انها اغلى شوي بس افضل لك لانك راح تلبسينها اكثر ..

اشتري قطع كلاسيكية ، عشان تقدرين تلبسينها في اي وقت ولا تروح موضتها ..

+ تاخذين اكلك معاك +

هذا خاص بالطالبات والموظفات

لانه كمية الصرف في الدوامات مو طبيعية ، يعني اقل شي راح تصرفين ٥٠ درهم على الاكل في اليوم الواحد ، اذا كان للفطور والغدا ، وفي الجامعة كنت اصرف اكثر بعد لانه الاكل ماكان رخيص ..

مااقولك اخذي كل اكلك معاك بس مثلا الماي او السناك الخاص فيك ، لانه حتى الماي بعض الاماكن يرفعون سعره

فانتي ممكن تجيبن من البيت او تشترين كرتون ماي و كل يوم اخذي لك علبة معاك ، اشتري لك مجموعة سناكات انتي تحبينها وكل يوم اخذي شي معاك ، بسكوت او تمر او فاكهه .. منها تاكلين شي انتي تحبينه وتقللين من مصروفك شوي شوي

وممكن تجيبين فطورك يوميا من البيت انتي تسوين شي حلو وصحي ، ومنها تحافظين على وزنك بعد ..

...

+ اشتري الميك اب في فترة العروض +

مافيه احد مايحب يشتري ميك اب ، اشتري اللي تبينه في فترات العروض وغالبا تكون طول السنة ، في صيدلية بوتس او لايف ستايل دايما يكون فيه تخفيض او اشتري ٣ بسعر ٢ ..

استغلي هالفرص ، صح بتروفرين مبلغ بسيط بس بالاخير انتي قاعده توفرين مبلغ حلو بالنهاية ..

و فيه شي مهم جدا ، المكياج واشياء العناية لها فترة صلاحية ف انتبهي لا تشترين بكميات كبيرة عشان انه السعر رخيص

لا ، خليك ذكية واشتري قد حاجتك ، واذا عندك مكياج وايد حاولي تخلصين الاشياء اللي باقي فيها شوي وخلي هالشي هدف لك ، كل ماخلصتي مثلا ٥ اشياء من المكياج ، يحق لج تشترين شي غالي او رخيص .. وقتها راح تقدرين المكياج اكثر وتعرفين انه مايخلص بسرعه ..

ونفس الاشياء للكريمات ، خلصي الاشياء اللي باقي فيها شوي وطلعيها من مجموعتك ..

+ استخدمي اكواد الخصم +

بعض المواقع الالكترونية وقد كتبت موضوع عن المواقع اللي توفر خدمة الدفع عند الاستلام ممكن تشوفونه ، عندهم عروض دايما اسعار اقل من السوق ، او عندهم اكواد وكوبونات خصم تقدرين تدخلينها وقت عملية الشراء وتخصم لك مبلغ حلو من السعر الاساسي لطلبك ومنها طبعا راح توفرين .

+ اجمعي كل الدراهم +

الدرهم و النص والربع ، احنا تستخدمهم في الامارات وبكثره ، وساعات يكون عندي زيادة وتثقل البوك ، ف اجمعهم في مكان عندي بالغرفة بكوب او علبة ، واحط فيها الزايد عن حاجتي ، ساعات اتفاجأ بالمبلغ الموجود يوصل ل ١٠٠ او ١٥٠ درهم ، اخلي شوي عندي و الباقي احطه بالحساب ومنه اجمع ..

+ لا تخلين مبلغ كاش كبير +

اذا بتروحين للسوق لا تخلين مبلغ كاش معاك كبير ، عشان ماتصرفين بدون حساب ، واذا اعجبك شي قيمته اكثر من المبلغ

روحي للصراف واسحبي بس هالمبلغ ، منها تاخذين قد حاجتك بالضبط ومنها تعرفين كم صرفتي ، وساعات توصلين للصراف وتقولين لا خلاص مااحتاج هالشي ، او اقدر استغني عنه ..

حاولي قد ماتقدرين ماتستخدمين بطاقتك بالمحلات عشان ماتشترين بدون حسااااب ، ب هالطريقة بتفكرين زين في كل قطعة اخذتيها هل فعلا احتاجها ، او بس باخذها لانها اعجبتني ..

+ اشتري اشياء ذات جودة عالية +

في كل شي راح تشترينه ، ابحثي واسالي زين بالاول ، بالاول ابحثي عن الماركة وسمعتها ، بعدها مثلا هل اشيائها تعمر مع الاستخدام ، لها ضمان ؟ وكم سنة ؟

ناخذ مثال : بتشترين فير للشعر او سيراميك ، حلو ابحثي عن افضل الماركات ، والاسعار وقارينها زين بعدها شوفي ضمانها ، وكم مدة هالضمان .. يعني مثلا اشتري سيراميك للشعر من جوسي ايبر ب ٣٥٠ درهم

وله ضمان لطول العمر ، جوده عالية جدا ، ومااحد اشتكى من خرابة ولو فيه مشكلة لا سمح الله الضمان موجود ورجعيه لاي فرع لهم وراح يصلحونه لك ..

صح غالي شوي ، بس افضل تاخذين شي راح يعيش معاك سنييين بدال ماتشترين شي رخيص وكل فتره يخرب وتصليحة له سعر وبعدها راح تشترين غيره .. هذا مثال يمشي مع باقي الاجهزة .. سواء شي صغير او اجهزة كبيرة للبيت ..

+ لا تتستلفين من أحد +

اهم نقطة ، لا تستلفين من أحد فلوس امك اختك اخوك ، حاولي انتي تكونين ملك نفسك ، كل شي عندك وماتحتاجين لاحد ،

واذا عندك دين سددية اول باول ، لا تخلين شي عليك .. حلو انك انتي اللي تعطين مو تاخذين ..

هذا كل اللي عندي حاليا ، وحاولت اجمع افكار اكثر  واكثر

والموضوع هذي لي اولا ولكم ثانيا ، لانه من صج ساعات تطير فلوسي ووقت الحاجة ماالاقي شي

ويكون بخاطري شيء ، حلو الواحد يكون معتمد على نفسه ، بكل شيء ولو فيه احد يساعده بعد شي جميل ، بس فكري بنفسك وحلو الواحد يخطط لبعيد مو حلو يعيش حق اليوم وباجر وبس 

اتمنى انه الموضوع عجبكم وفادكم ولو شوي 

واللي عندها اي فكرة او شي هي تسويه وهو مفيد تكتب لنا تحت

واكيييييييد انه كلنا راح نستفيد وانا اولهم ..