السلام عليكم
رجعت بتدوينه عن المنتجات اللي خلصتها ، ومثل ماذكرت قبل اني حاليا هالفتره
جالسه احاول اخلص كل شي مفتوح عندي وباقي في القليل ، والحمدلله هالشهر انجزت كميه لابأس فيها
وخلصت اشياء كبيره نوعا ما ، وان شاء الله الشهور الجايه اخلص كذا شي بعد عشان استمتع بالاشياء الجديده
اللي عندي .
جربو طبقو هالشي .
نبدا
من اليمين :
-صابون سائل لليدين من لوكس بريحه " روعه الغموض " اختي كانت عاجبتها الريحه من الدوام وجبت مثله واعجبتني .
-صابون سائل لليدين من فازلين المرطب الكامل حبيت ترطيبه ومايجفف الايد .
- سائل الاستحمام للجسم فيه فيتامين b12 وعلى اساس انه يوحد لون الجسم بس ماشفت اي نتيجه بس ترطيبه جميل على البشره ويعتبر ترطيب خفيف وفيه حبيبات صغيره لونها ودي .
..
- شور جل من باث اند بودي بريحه باريس الريحه جميله بس ماتثبت كثير على الجسم .
- بودي مست او بخاخ معطر للجسم بريحه القطن من باث اند بودي ، ريحته حلوه وبارده على نظافه .
- غسول للرؤوس السوداء ماحبيته كثير ولا شفت اي نتيجه منه ، وكذا مره جربت منتجات من بوندس بس مااشوف اي تغيير على بشرتي .
غسول للوجه من لوريال حلو ويناسب البشره العاديه الى المختلطه بس مااحس يناسب البشره المختلطه الى الجافه لانه بشرتي تغيرت وصارت مختلطه بالتي زون وجافه في باقي المناطق .
..
- عدساتي الجميله من جونسن انا استخدم هالنوع ومرتاحه عليه جدا ، بس كل مره اشوف سعرها يرتفع اكثر اول كانت ب ١٣٠ درهم وامس شريت علبه جديده وصار سعرها ب ١٧٠ درهم ، صراحه مااعرف ليه يزيد السعر وهي مافيها شي جديد .
- محلول عدسات من توتي يمشي الحال مو احسن واحد بالسوق بس كان باقي فيه نص وابي اخلصه وافتك منه .
- مزيل للعرق من ريكسونا ، هذا الشي للاسف الشديد فاشل انا اتكلم عن الرش فاشل بمعنى الكلمه مايسوى شي
صرت استخدمه بالبيت ومو مرتاحه منه ، اما اللي احبه واعشقه اللي على شكل ستيك او صابونه من اروع مااستخدمت وكتبت عنه كثير في تدوينات سابقه ، بس اللي بالصوره ويكون رش للاسف فاشل .
..
- شامبو جاف شي لازم يكون عندي بحكم انه شعري دهني شي ابد ابد مااستغني عنه من بتيست و حبيت هالريحه .
- بلسم للشعر من بايولجي وهذا للشعر الضعيف ، عندي اللاين كامل شامبو وبلسم وماسك ، الشامبو للاسف خلصته ورميته بس بتكلم عن البلسم شي شي شي شي شي ، كميه صغيره تكفي وتوفي الشعر بعدها زبده من كثر ماهو ناعم ويرطب وكل شي ، اكيد برجع اشتريه هو والشامبو ، انا شعري دهني واختي شعرها جاف وناسبنا احنا الاثنين .
- بخاخ من ترسمي للحمايه من الشعر حلو وكميته كبيره ويطول ، وانا صايره هالفتره اهتم بشعري بزياده واحاول مااستخدم اي حراره عليه ابيه يرجع لصحته وحيويته بس اذا بستخدم شي لازم ابخ منه ، ياليت اللي جرب بخاخ حمايه يقولي لاني ابي شي جديد .
- شامبو من سيوس يعطي حجم للشعر ومافيه مواد ضاره للشعر عن نفسي حبيته .
...
من اليمين :
- صمغ للرموش من دايسو باللون الاسود والشفاف عاديين ، كتب حابه اجربهم مع الرموش من عندهم .
- قطره للعين تكلمت كثير عندها ولا استغني عنها ابدا .
-اللي بعلبه المناكير زيت للجلد اللي حول الاظافر من اروع مااستخدمت ، شريته من صالون سسترز اللي بمردف مول وناويه اروح اخذ منه اذا متوفر عندهم .
سامبل من الصيدليه من ماركه Eucerin ماركه طبيه ومعروفه عطنتي اجربه وهو كريم للوجه يملي الوجه ويخفف من الخطوط ومع حمايه من الشمس انا بالنسبه لي عادي وشوي زيتي لانه بعد ساعه منطقه التي زون تبين كانها مزيته ومااحب هالشي ابد بس خلصته .
- كريم بعد للجلد اللي حول الاظافر من ماركه Flexitol كريم ثقييييييل بس اللي تعاني من جفاف شديد وجروح ممكن تستخدمه لانه بعد ٣ ايام كل شي يصير طبيعي وفعلا ترى انا هالمنطقه عندي حساسه جدا وساعات الزيت العادي مايفيد فجربت هالكريم وماصرت اعاني من اي تشقق او جلد حساس بزياده و صرت استخدمه بعد لرجولي ادهن فيها الرجل كامله والكعب خصوصي ، والرجل تكون طريييه بمعنى الكلمه بس ترى ثقيل .
- كريم فيوسدين خلصته دايم استخدمه على اي حبه ، او بعد مااسوي واكس لوجهي ، لانه وجهي حساس بزياده
ومافاد معاي الا هو ، و ان شاء الله ربي يكتب لي اسوي اول جلسه ليزر بعد كم يوم " اذا حابين اكتب تجربتي بعد كل زياده ماعندي مانع " .
- سامبل فاوندشين من بوبي براون حبيته بصراحه لونه طبيعي ومناسبني جدا ، وممكن اشتريه في المستقبل .
-كحل من ميبلين باللون الاسود ، طبعا ماخلصته بس تقريبا استخدمته نصه وعندي من زمااااااان ، وصرت كل مااستخدمه عيني تحسس منه فقرر اني ارميه لانه صار له فتره طويله .
- واخر شي معطر للسياره او للغرفه من باث اند بودي خلصته بس مايبين بالغرفه كثير ممكن بالسياره هو في مكان صغير ممكن تبين الريحه اكثر .
وبس هذا كل اللي خلصته في شهر فبراير و نرجع لكم بمثل هالتدوينه بشهر مارس اذا خلصت اشياء .
تسلم ايدك وننتظر جديدك
ردحذفتسلمين ياعسل انتي ، وان شاء الله كل جديد يعجبك اكثر
ردحذف